Recording of the Inuktitut NT without background music.

Eastern Arctic Inuktitut Bible © Canadian Bible Society, 2012, 2021. ℗ Hosanna 2023

Inuktitut - CBS (NT) Non Drama

Inuktitut - CBS (NT) Drama

ᐃᖅᑲᖅᑐᐃᕕᖕᒦᑎᑎᔪᓕᒫᑦ ᓂᑯᕕᓐᓇᒥᒃ, ᔩᓱᓯ ᐰᓛᑑᓯᒧᐊᕈᑎᕚᑦ, ᔩᓱᓯᒥᒃ ᐃᖅᑲᖅᑐᒐᒃᓴᖑᖅᑎᑎᓯᒪᔪᑦ ᐅᖃᖅᐳᑦ, “ᐅᓇ ᖃᐅᔨᓚᐅᖅᐸᕗᑦ ᐃᓅᖃᑎᑦᑎᓐᓂᒃ ᑕᒻᒪᖅᓮᔪᖅ, ᐃᓂᖅᑎᓚᐅᖅᐹᑎᒍᑦ ᓰᓴᕆᒧᑦ ᑖᒃᓰᔭᖃᑦᑕᖁᓇᑕ, ᐃᒻᒥᓂᒃ ᒥᓮᐊᓯᐅᓂᕋᕐᓗᓂ ᐊᖓᔪᖅᑳᕐᔪᐊᖑᓂᕋᓗᓂᓗ.”
ᐰᓛᑑᓯᐅᑉ ᐊᐱᕆᕚ, “ᔫᑎᑦ ᐊᖓᔪᖅᑳᕐᔪᐊᕆᕚᑏᑦ?”
ᔩᓱᓯᐅᑉ ᑭᐅᕚ, “ᑕᕝᕙ ᐅᖃᕇᖅᐳᑎᑦ.”
ᐰᓛᑑᓯ ᐅᖃᖅᐳᖅ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᓐᓄᑦ ᐃᓄᒋᐊᒃᑐᓄᓪᓗ, “ᓇᓂᓯᓐᖏᓚᖓ ᑖᑦᓱᒪ ᐸᓯᔭᐅᑦᔪᑎᒃᓴᖓᓂᒃ.”
ᑖᒃᑯᐊ ᐱᒋᐊᓪᓚᒃᑲᓐᓂᖅᐳᑦ ᐊᒃᓱᕈᓕᕐᓗᑎᒃ, ᐅᖃᖅᐳᑦ, “ᐆᒪ ᐃᓄᐃᑦ ᐊᔪᕆᖅᑐᐃᑦᔪᑎᒥᓄᑦ ᐅᐃᒪᔮᖅᑎᑉᐰᑦ, ᔫᑎᐊᓕᒫᒥ, ᒐᓕᓕᐊᒥᓪᓗ ᐱᒋᐊᕐᓗᓂ ᒪᐅᖓᓘᓐᓃᑦ ᐊᒡᓛᑦ ᑎᑭᑉᐳᖅ.”

ᐰᓛᑑᓯ ᑕᒪᑐᒥᖓ ᑐᓴᕋᒥ, ᐊᐱᕆᕚ ᔩᓱᓯ ᒐᓕᓕᐊᒥᐅᖑᖕᒪᖔᑦ. ᑐᑭᓯᑎᑕᐅᒐᒥ ᔩᓱᓯ ᐃᕉᑕᓯᐅᑉ ᐊᖓᔪᖅᑳᕐᔪᐊᖑᕕᖓᓂᑦ ᐱᓯᒪᖕᒪᑦ, ᐃᕉᑕᓯᒧᐊᕈᑦᔭᐅᑎᑉᐹ, ᑖᓐᓇ ᔨᕉᓴᓕᒻᒦᒻᒪᑦ ᐱᓇᓱᐊᖅᑎᓪᓗᒋᑦ ᑕᒪᑐᒥᖓ. ᐃᕉᑕᓯ ᖁᕕᐊᓱᒻᒪᕆᓚᐅᖅᐳᖅ ᔩᓱᓯᒥᒃ ᑕᑯᒐᒥ, ᑐᓴᐅᒪᔭᑐᖃᕆᒐᒥᐅᒃ ᑕᑯᔪᒪᔭᑐᖃᕆᓪᓗᒍ, ᑲᒪᓇᖅᑐᓕᑎᓪᓗᒍ ᑕᑯᑎᑕᐅᓂᐊᕋᓱᒋᓪᓗᓂ. ᐃᕉᑕᓯᐅᑉ ᐊᒥᓱᓂᒃ ᐊᐱᖅᓱᖅᐹ; ᔩᓱᓯᓕ ᑭᐅᓚᐅᓐᖏᓚᖅ. ᑐᓂᕐᕈᓯᖅᑎᑦᓯᔨᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔨᑦ ᓴᓂᐊᓄᐊᖅᐳᑦ ᐊᒃᓱᕈᕐᓗᑎᒃ ᐱᓇᓱᐊᓕᖅᐹᑦ ᔩᓱᓯ. ᐃᕉᑕᓯᐅᑉ ᐅᓇᑕᖅᑐᒃᓴᖁᑎᖏᑕ ᔩᓱᓯ ᒥᑕᐅᑎᒋᕚᑦ ᓇᕐᕈᒋᓪᓗᒍᓗ; ᐊᒻᒪ ᐅᓕᒡᔪᐊᒥᒃ ᐱᐅᔪᐊᓗᖕᒥᒃ ᐊᑎᑎᑉᐹᑦ, ᐅᑎᖅᑎᓪᓗᒍ ᐰᓛᑑᓯᒧᑦ. ᐅᓪᓗᒥᓪᓗ ᑕᕝᕙᓐᖓᑦ ᐱᒋᐊᕐᓗᑎᒃ ᐃᕉᑕᓯᒃᑯᒃ ᐰᓛᑑᓯᒃᑯᒃ ᐃᓚᓐᓈᕇᓕᖅᐴᒃ, ᓯᕗᓂᖓᓂ ᐊᑭᕋᕇᓚᐅᕋᓗᐊᕋᒥᒃ.


ᑕᕝᕙ ᐰᓛᑑᓯᐅᑉ ᑐᓂᕐᕈᓯᖅᑎᑦᓯᔨᑦ ᐊᖓᔪᖅᑳᖏᑦ, ᐊᐅᓚᑦᓯᔨᑦ ᐃᓄᐃᓪᓗ ᑲᑎᖁᕔᑦ, ᐅᖃᐅᑎᓪᓗᒋᑦ, “ᐅᓇ ᐅᕙᓐᓄᐊᕈᑎᔭᓯ ᐅᖃᐅᓯᕆᓪᓗᒍ ᑕᒻᒪᖅᓮᓂᕋᕐᓗᒍ ᐃᓄᖕᓂᒃ; ᖃᐅᔨᓴᕋᒃᑯ ᑕᑯᓐᓇᖅᑎᓪᓗᓯ, ᑕᑯᒋᑦ, ᓇᓂᓯᓐᖏᓚᖓ ᑖᑦᓱᒪ ᑐᖁᑕᐅᑦᔪᑎᒃᓴᖓᓂᒃ ᐸᓯᒃᓯᕈᑎᒋᔭᑦᓯᓐᓂᑦ; ᐃᕉᑕᓯᓗᑦᑕᐅᖅ ᓇᓂᓯᖏᓐᓇᒥ ᐸᓯᔭᐅᑦᔪᑎᒃᓴᒥᒃ ᑖᑦᓱᒧᖓ ᐅᑎᖅᑎᒃᑭᕚ ᐅᕙᑦᑎᓐᓄᑦ. ᑕᑯᒋᑦ, ᐊᖑᑦ ᐅᓇ ᐱᓂᐊᓚᐅᖅᓯᒪᓐᖏᓚᖅ ᑐᖁᑕᐅᑦᔪᑎᒃᓴᒥᒃ; ᑍᒤᒻᒪᑦ ᑏᒐᖅᑐᖅᑕᐅᑎᓐᓂᐊᖅᐸᕋ ᐊᓂᑎᓪᓗᒍᓗ.”
ᖄᖏᖅᑕᐅᕕᒃ ᓇᓪᓕᐅᑎᔭᕌᖓᑦ ᐰᓛᑑᓯ ᐱᐅᓯᖃᖅᐸᒃᐳᖅ ᑎᒍᔭᐅᓯᒪᔪᑦ ᐃᓚᖓᓐᓂᒃ ᐊᓂᑎᑦᓯᔭᕆᐊᖃᖅᐸᒡᓗᓂ.
ᐃᓄᒋᐊᒃᑐᕐᔪᐊᓪᓕ ᐊᑕᐅᓯᒃᑯᑦ ᓂᓪᓕᐊᓕᖅᐳᑦ, “ᐅᓇ ᑐᖁᑕᐅᓕ, ᐸᕋᐹᓯ ᐊᓂᑎᑕᐅᖔᕐᓗᓂ.” ᐸᕋᐹᓯ ᑎᒍᔭᐅᓯᒪᕕᖕᒧᐊᖅᑎᑕᐅᓯᒪᕗᖅ ᐊᑭᕋᖅᑐᓕᖅᑎᑎᓪᓗᓂ ᐅᐃᒪᔮᖅᑎᑦᓯᓚᐅᕐᖕᒪᑦ ᑕᕝᕙᓂ ᐃᒡᓗᒐᓴᒡᔪᐊᓂ, ᐃᓄᐊᖅᓯᒪᓪᓗᓂᓗ.
ᐰᓛᑑᓯᐅᑉ ᐃᓄᒋᐊᒃᑐᑦ ᐅᖃᐅᑎᒃᑲᓐᓂᖅᐰᑦ, ᔩᓱᓯ ᐊᓂᑎᑕᐅᖁᒐᓗᐊᕋᒥᐅᒃ; ᐃᓄᒋᐊᒃᑐᓪᓕ ᕾᒐᓛᓕᖅᐳᑦ, “ᑭᑭᐊᒃᑐᖅᑕᐅᓕ, ᑭᑭᐊᒃᑐᖅᑕᐅᓕ!”
ᐰᓛᑑᓯᐅᑉ ᐱᖓᔪᐊᓐᓂᒃ ᓱᓕ ᐅᖃᐅᑎᒃᑲᓐᓂᕆᕔᑦ, “ᓱᖕᒪᑦ, ᓱᓇᒥᒃ ᐱᕋᔭᐅᑎᖃᖅᓯᒪᖕᒫᑦ? ᓇᓂᓯᖏᓐᓇᒪ ᐊᑐᖅᓯᒪᔭᖓᓂᒃ ᑐᖁᑕᐅᑦᔪᑎᒃᓴᒥᒃ ᑖᑦᓱᒪᓂ; ᑍᒤᒻᒪᑦ ᑏᒐᖅᑐᖅᑕᐅᑎᓪᓗᒍ ᓴᒃᑯᑕᐅᖁᓕᖅᐸᕋ.”
ᐃᓄᐃᓪᓕ ᐊᒃᓱᕈᒻᒪᕆᓕᖅᐳᑦ ᕾᒐᓛᕐᓗᑎᒃ ᓂᐱᓕᒫᒥᖕᓄᑦ ᔩᓱᓯ ᑭᑭᐊᒃᑐᖅᑕᐅᖁᓪᓗᒍ. ᕾᒐᓛᕐᖕᓂᕐᖕᒥᖕᓄᓪᓗ ᓵᓚᖃᓕᖅᐳᑦ. ᐰᓛᑑᓯ ᑕᕝᕙ ᐱᖁᔨᓕᖅᐳᖅ ᔩᓱᓯᐅᑉ ᑐᖁᑕᐅᑦᔪᑎᒃᓴᖓᓂᒃ, ᐃᓄᒐᓴᒡᔪᐊᑦ ᑍᒫᒃ ᐱᖁᔨᖕᒪᑕ. ᐰᓛᑑᓯᐅᑉ ᐊᓂᑎᑕᐅᑯᓕᖅᐹ ᐸᕋᐹᓯ ᑎᒍᔭᐅᓯᒪᕕᖕᒦᑦᑐᖅ ᐃᓄᐃᑦ ᐊᓂᑎᑕᐅᖁᔭᖓᑦ, ᐅᐃᒪᔮᖅᑎᑦᓯᓂᖓᓄᑦ ᐃᓄᐊᖅᓯᒪᓂᖓᓄᓪᓗ ᑎᒍᔭᐅᓯᒪᔪᖅ, ᔩᓱᓯ ᐱᔭᐅᑎᓕᖅᐹ ᐃᓄᐃᑦ ᐱᔪᒪᔭᖏᑦ ᒪᓕᒡᓗᒋᑦ; ᐃᓱᒪᖅᓲᑎᒋᓗᒍ ᐱᓂᐊᕐᕕᒋᓂᐊᕐᖕᒪᑦᔪᒃ.


ᐅᓇᑕᖅᑐᒃᓮᑦ ᔩᓱᓯ ᑕᓯᐅᕐᓗᒍ ᐊᓐᓂᓯᓕᖅᐹᑦ, ᐊᓂᓕᕐᓗᑎᒃ ᑲᑎᓯᕗᑦ ᐊᖑᒻᒥᒃ ᓮᕆᓂᒥᐅᕐᖕᒥᒃ ᓮᒨᓂᒥᒃ ᐊᑎᓕᖕᒥᒃ, ᓄᓇᐅᑉ ᐊᓯᐊᓂᑦ ᐃᒡᓗᒐᓴᖕᓄᑦ ᑎᑭᓯᒪᔪᒥᒃ, ᑖᓐᓇ ᓴᓐᓂᖓᔪᓕᖕᒥᒃ ᐃᖅᓱᒃᑎᓕᖅᐹᑦ ᔩᓱᓯᐅᑉ ᑭᖑᓂᖓᓂ.
ᐃᓄᒋᐊᒃᑐᕐᔪᐊᑦ ᒪᓕᒃᐳᑦ ᑖᑦᓱᒥᖓ, ᐊᕐᖕᓁᓪᓗ ᐃᓚᖏᑦ ᒪᓕᖃᑕᐅᔪᑦ ᖁᕝᕕᐅᖅᐳᑦ ᐅᒡᒍᐊᕈᑎᖃᕐᓗᑎᒃ ᔩᓱᓯᒥᒃ. ᔩᓱᓯᐅᑉ ᑕᑯᓴᕐᓗᒋᑦ ᐅᖃᐅᑎᕔᑦ, “ᐊᕐᖕᓁᑦ ᔨᕉᓴᓕᒻᒥᐅᑦ, ᕿᐊᑦᔪᑎᒋᓇᓯᓐᖓ, ᐃᓕᑦᓯᓐᓂᒃ ᕿᐊᑦᔪᑎᒋᓕᕆᑦᓯ ᕿᑐᕐᖓᑦᓯᓐᓂᒡᓗ. ᑕᑯᒋᑦ, ᐅᓪᓗᐃᑦ ᑎᑭᑦᓱᒫᖅᐳᑦ ᐃᓄᐃᑦ ᐅᖃᕐᕕᒋᔪᒫᖅᑕᖏᑦ, ‘ᓮᒻᒪᖅᑎᐅᓯᒪᔪᒥᒃ ᐃᓅᓯᖃᖅᐳᑦ ᐊᕐᖕᓁᑦ ᕿᑐᕐᖓᖅᑖᕈᓐᓇᖏᑦᑐᑦ, ᓄᑕᕋᒃᑖᓚᐅᖅᓯᒪᖏᑦᑐᓪᓗ, ᐊᒫᒪᒃᑎᑦᑎᓚᐅᖅᓯᒪᓇᑎᒡᓗ!’ ᑕᒪᓐᓇ ᓇᓪᓕᐅᑎᒃᐸᑦ ᐃᓄᐃᑦ ᐅᖃᕈᒫᖅᐳᑦ ᖃᖅᑲᓄᑦ, ‘ᑲᑕᒡᕕᒋᑎᒍᑦ’; ᐱᖑᖕᓄᓪᓗ ᐅᖃᕈᒫᕆᕗᑦ, ‘ᑕᓕᑎᑎᒍᑦ.’ ᑕᒪᒃᑯᐊ ᐊᑐᖅᑕᐅᔪᓐᓇᖅᐸᑕ ᐱᕈᖅᑐᑦ ᑐᖑᔪᖅᑎᓪᓗᒋᑦ, ᐸᓂᖅᓯᒪᓕᖅᑎᓪᓗᒋᓪᓕ ᖃᓄᐃᑦᑐᖃᕈᒫᖅᐹ?”
ᐊᖑᑏᒃᑕᐅᖅ ᒪᕐᕉᒃ ᐊᓯᖏᒃ, ᐱᐅᖏᑦᑐᓕᓯᒪᔫᒃ, ᐊᒻᒪ ᑐᖁᑕᐅᔭᖅᑐᕐᓗᑎᒃ ᑭᑭᐊᒃᑐᖅᑕᐅᕕᒃᓴᒧᐊᖅᑎᑕᐅᒋᕘᒃ ᔩᓱᓯ ᐃᓚᒋᓪᓗᒍ. ᖃᖅᑲᒧᑦ ᑎᑭᓐᓇᒥᒃ ᐊᑎᓕᖕᒧᑦ ᓂᐊᖁᕕᓂᕐᖕᒥᒃ, ᑕᕝᕙᓂ ᔩᓱᓯ ᑭᑭᐊᒃᑐᖅᐹᑦ, ᐱᐅᖏᑦᑐᓕᓯᒪᔫᒡᓗ, ᐂᑉᐹ ᑕᓕᖅᐱᐊᓂ, ᐂᑉᐸᖓᓗ ᓴᐅᒥᐊᓂ. ᔩᓱᓯ ᐅᖃᖅᐳᖅ, “ᐊᑖᑖᒃ, ᐃᓱᒪᒋᔪᓐᓁᕐᕕᒋᒃᑭᑦ; ᖃᓄᐃᓕᐅᕐᖕᓂᕐᖕᒥᖕᓂᒃ ᖃᐅᔨᒪᖏᒻᒪᑕ.”
ᔩᓱᓯᐅᑉ ᐊᓐᓄᕌᖏᑦ ᓇᓚᐅᑖᕈᑎᒋᓪᓗᒋᑦ ᐊᑐᓂᑦ ᐱᑖᕋᓱᐊᖅᐳᑦ. ᐃᓄᐃᑦ ᑕᕝᕙᓂ ᓇᖏᖅᐳᑦ ᑕᑯᓐᓈᕐᓗᑎᒃ; ᔫᑎᓪᓕ ᐊᖓᔪᖅᑳᖏᑦ ᒥᑕᐅᑎᖃᖅᐳᑦ ᔩᓱᓯᒥᒃ, ᐅᖃᕐᓗᑎᒃ, “ᐊᓯᒥᓂᒃ ᐱᐅᓕᓯᓚᐅᖅᐳᖅ; ᐃᒻᒥᓂᒃ ᐱᐅᓕᓕᕐᓕ, ᒥᓮᐊᓯᐅᒍᓂ ᒎᑎᐅᑉ ᓂᕈᐊᖅᓯᒪᔭᖓ!”
ᐅᓇᑕᖅᑐᒃᓮᑦᑕᐅᖅ ᒥᑕᐅᑎᒋᕚᑦ; ᒪᔪᕋᕐᕕᒋᓪᓗᒍ ᐅᐂᓂᒥᒃ ᖃᒃᑭᓐᓇᖅᑐᒥᒃ ᐱᑎᓐᓇᓱᐊᖅᐹᑦ, ᐅᖃᕐᓗᑎᒡᓗ, “ᔫᑎᑦ ᐊᖓᔪᖅᑳᕐᔪᐊᕆᒃᐸᑎᑦ, ᐃᓕᖕᓂᒃ ᐱᐅᓕᓚᐅᕆᑦ!”
ᖁᓛᓂᓗ ᑎᑎᕋᖅᓯᒪᔪᖃᖅᐳᖅ ᐃᒤᓕᔪᓂᒃ: “ᐅᓇ ᔫᑎᑦ ᐊᖓᔪᖅᑳᕐᔪᐊᖓᑦ.”
ᓂᕕᖓᖃᑎᖓᑕᓗ ᐂᑉᐸᖓᑕ ᒥᑕᐅᑎᒋᕚ, ᐅᖃᕐᓗᓂ, “ᒥᓮᐊᓯᐅᓐᖏᓚᑏᑦ? ᐃᓕᖕᓂᒃ ᐱᐅᓕᓚᐅᕆᑦ ᐅᕙᒍᒡᓗ!”
ᐂᑉᐸᖓᑕᓕ ᐃᓂᖅᑎᖅᐹ ᐅᖃᕐᓗᓂ, “ᒎᑎᒥᒃ ᓯᕘᕋᖏᓐᓇᕖᑦ? ᑍᒫᓪᓗᐊᖅᑕᐅᖅ ᑖᑦᓱᑐᓇᖅ ᓱᒋᐊᖅᑕᐅᔪᑎᑦ ᑐᖁᑕᐅᓂᐊᕐᓗᑎᑦ. ᐅᕙᒍᒃᓕ ᑍᒫᒃ ᐱᔭᐅᑦᔪᑎᒃᓴᖃᕋᓐᓄᒃ ᐱᓂᐊᕐᕕᐅᕗᒍᒃ ᐱᓂᐊᕐᖕᓂᕆᓚᐅᖅᑕᕗᒃ ᒪᓕᒡᓗᒋᑦ; ᐅᓇᓕ ᐊᖑᑦ ᓈᒻᒪᖏᑦᑐᒥᒃ ᐱᓚᐅᓐᖏᓚᖅ.” ᔩᓱᓯᒧᑦ ᐅᖃᖅᐳᖅ, “ᔩᓱᓰ ᐃᖅᑲᐅᒪᓛᖅᐸᕐᖕᒪ ᐊᑕᓂᐅᕕᖕᓄᑦ ᑎᑭᒍᕕᑦ!”
ᔩᓱᓯᐅᑉ ᐅᖃᐅᑎᕚ, “ᓱᓕᔪᒥᒃ ᐅᖃᐅᑎᕙᒋᑦ, ᐅᓪᓗᒥ ᐂᑉᐸᕆᓂᐊᖅᐸᕐᖕᒪ ᖁᕕᐊᓇᖅᑐᕕᖕᒥ.”


ᐅᓪᓗᖅ ᕿᑎᕋᓕᖅᑎᓪᓗᒍ, ᓄᓇᓕᒫᖅ ᑖᖅᓯᓚᐅᖅᐳᖅ ᐅᓐᓄᓴᖕᒧᑦ 3ᒧᑦ ᑎᑭᓪᓗᒍ, ᓯᕿᓂᖅ ᖃᐅᒪᔪᓐᓃᖅᓯᒪᑎᓪᓗᒍ; ᑐᒃᓯᐊᕐᕕᒡᔪᐊᑉ ᐃᓗᐊᓃᑦᑐᖅ ᑖᓗᑕᕐᔪᐊᖅ ᐊᓕᒃᐳᖅ ᒪᕐᕉᓕᓪᓗᓂ. ᔩᓱᓯ ᓂᐱᖅᑯᖅᑐᓪᓗᓂ ᕾᒐᓛᖅᐳᖅ, ᐅᖃᕐᓗᓂ, “ᐊᑖᑕᒃ, ᐊᓂᕐᖕᓂᕋ ᐃᓕᖕᓄᑦ ᑐᓂᕙᕋ!” ᑍᒫᒃ ᐅᖃᕇᕋᒥ ᐊᓂᕐᖕᓇᖏᖅᐳᖅ.
ᐅᓇᑕᖅᑐᒃᓮᑦ ᐊᖓᔪᖅᑳᖓᑦ ᑕᑯᒐᒥ ᐱᓂᐊᕐᖕᓂᐅᔪᒥᒃ, ᒎᑎ ᓂᖅᑐᓕᖅᐹ, ᐅᖃᕐᓗᓂ, “ᐃᓛᒃ ᐊᖑᑦ ᑖᓐᓇ ᓱᓕᓪᓗᓂ ᐸᓯᔭᐅᑦᔪᑎᒃᓴᖃᓚᐅᓐᖏᓚᖅ!”
ᐃᓄᓕᒫᑦ ᑕᕝᕙᓃᑦᑐᑦ ᑕᑯᔭᖅᑐᖅᓯᒪᔪᑦ, ᑕᒪᑐᒥᖓ ᖃᐅᔨᒐᒥᒃ ᖃᓄᐃᑦᑐᖃᕐᖕᒪᖔᑦ, ᐊᖏᕐᕋᓕᖅᐳᑦ ᓴᒡᕕᖕᒥᖕᓂᒃ ᐸᑎᒃᓯᖃᑦᑕᕐᓗᑎᒃ ᕿᒃᓵᖕᓂᕐᖕᒧᑦ. ᔩᓱᓯᒥᒃ ᖃᐅᔨᒪᓪᓚᕆᒃᑐᓕᒫᑦ, ᐊᕐᖕᓁᓪᓗ ᒐᓕᓕᐊᒥᑦ ᐱᓯᒪᔪᑦ ᐅᖓᓯᒋᔭᖓᓂ ᓇᖏᖅᐳᑦ ᑕᑯᓐᓈᕐᓗᑎᒃ ᑕᒪᒃᑯᓂᖓ.


ᐊᖑᑎᑕᖃᓚᐅᖅᐳᖅ ᔫᓯᐱᒥᒃ ᐊᑎᓕᖕᒥᒃ ᔫᑎᑦ ᓄᓇᖏᑕ ᐃᓚᖓᓐᓂᑦ ᐊᕆᒪᑎᐊᒥ ᓄᓇᖃᖅᑐᒥᒃ. ᑖᓐᓇ ᔫᑎᑦ ᑲᑎᒪᔨᕐᔪᐊᖏᓐᓄᑦ ᐃᓚᒋᔭᐅᔪᖅ, ᐃᓄᑦᓯᐊᕙᐅᕗᖅ ᓇᓛᒎᖅᑐᒥᒃ ᐃᓅᓯᖃᕐᓗᓂ, ᑖᓐᓇ ᑲᑎᒪᔨᐅᖃᑎᒥᓂᒃ ᐊᖏᖃᑎᖃᓚᐅᓐᖏᓚᖅ ᐱᑦᔪᑎᒋᔭᖏᓐᓂᒃ ᐱᓂᐊᕐᖕᓂᖏᓐᓂᒡᓗ, ᒎᑎᐅᑉ ᐊᑕᓂᐅᕕᖓᑕ ᑎᑭᑦᓱᒫᕐᖕᓂᖓᓂᒃ ᓂᕆᐅᒋᔭᖃᖅᐳᖅ. ᑖᓐᓇ ᐰᓛᑑᓯᒧᑦ ᐅᐸᒍᑎᓚᐅᖅᐳᖅ ᔩᓱᓯᐅᑉ ᑎᒥᖓᓂᒃ ᐱᔪᓐᓇᖅᑎᑕᐅᔪᒪᓪᓗᓂ. ᔩᓱᓯᐅᑉ ᑎᒥᖓ ᓴᓐᓂᖓᔪᓕᖕᒥᑦ ᐊᖅᑲᖅᑎᑉᐹ ᐃᒻᒧᓯᕐᓗᒍ ᖃᓪᓗᓈᖅᑕᒥᒃ ᓵᑦᑐᒥᒃ, ᐃᓕᓪᓗᒍ ᐃᓗᕕᕐᖕᒧᑦ ᐃᓗᓕᐅᖅᓯᒪᔪᒧᑦ ᕾᖅᓱᒥ, ᑐᖁᖓᔪᒥᑦ ᓱᓕ ᐃᓗᕕᕐᕕᐅᓚᐅᖅᓯᒪᖏᑦᑐᒧᑦ. ᑖᓐᓇ ᐅᓪᓗᖅ ᐅᐸᓗᖕᒊᔭᕐᕕᐅᖕᒪᑦ, ᓴᐸᑎᒧᑦ ᓴᐸᑎᓐᖑᖅᐸᓪᓕᐊᓂᐊᓕᕐᓗᓂ.
ᐊᕐᖕᓁᑦ ᔩᓱᓯᒥᒃ ᒪᓕᓚᐅᖅᑐᑦ ᒐᓕᓕᐊᒥᑦ ᔫᓯᐱ ᒪᓕᒃᐹᑦ, ᑕᑯᓪᓗᑎᒃ ᐃᓗᕕᕐᖕᒥᒃ, ᔩᓱᓯᐅᑉ ᑎᒥᖓ ᖃᓄᖅ ᐃᓗᕕᖅᑕᐅᖕᒪᖔᑦ ᑕᑯᓐᓈᕐᓗᑎᒃ; ᐊᖏᕐᕋᕋᒥᒃ ᑎᐱᑦᓯᐊᕆᒃᓴᐅᑎᑦ ᒪᒪᖅᓴᐅᑎᓪᓗ ᑎᒥᖓᓄᑦ ᒥᖑᐊᕈᑎᒋᓂᐊᖅᑕᑎᒃ ᐅᐸᓗᖕᒊᔭᖅᐰᑦ.
ᓴᐸᑎᒥ ᕿᑲᖅᐳᑦ, ᐱᖁᔭᓂᒃ ᒪᓕᒡᓗᑎᒃ.

Słuchaj ᓘᑲᓯᐅᑉ ᐊᒡᓚᖏᑦ 23