Revelation 19
19
1ထို့နောက် ရွှေမြို့တော်၌ လူအုပ်ကြီး၏ အသံကဲ့သို့ ထွက်ပေါ်လာသော ကြွေးကြော်သံကို ကျွန်ုပ်ကြားရ၏။ ထိုအသံမှာ…“ဘုရားရှင်၏ ဂုဏ်ကျေးဇူးတော်ကို ချီးမွှမ်းကြလော့။ ဘုရားရှင်သည် ကယ်တင်တော်မူသောအရှင် ဖြစ်တော်မူ၏။ ဘုန်းအသရေးတော်၊ တန်ခိုးတော်နှင့် ပြည့်စုံတော်မူသော အရှင်ဖြစ်၏။ 2အဘယ်ကြောင့်ဆိုသော် အရှင်၏ စီရင်တော်မူချက်တို့သည် မှန်ကန်၍ တရားမျှတသောကြောင့်ဖြစ်၏။ ကာမဂုဏ်ခံစားခြင်းဖြင့် ကမ္ဘာလောကကို ပျက်စီးစေသော ပြည့်တန်ဆာမကြီးကို စီရင်တော်မူပြီ။ အရှင်၏ အစေခံတို့ကို သတ်သောကြောင့် ဒဏ်ခတ်တော်မူပြီ” ဟူ၍ဖြစ်၏။ 3တစ်ဖန် သူတို့က “ဘုရားသခင်၏ဂုဏ်တော်ကို ချီးမွမ်းကြလော့၊ ထိုမြို့မှ မီးခိုးတို့သည် အစဉ်ထာဝရ လွင့်တက်လျက်ရှိ၏” ကြွေးကြော်ကြ၏။ 4ထိုအခါ အကြီးအကဲနှစ်ဆယ့်လေးပါးနှင့် သတ္တဝါလေးပါးတို့သည် ဝပ်တွားခယလျက် ရာဇပလ္လင်တော်ပေါ်၌ ထိုင်တော်မူသော ဘုရားရှင်ကို ကိုးကွယ်ကြ၏။ ထို့နောက် “အာမင်၊ ဘုရားဂုဏ်တော်ကို ချီးမွှမ်းကြလော့” ဟုဆိုကြ၏။ 5ထိုအခါ ရာဇပလ္လင်တော်မှ ထွက်ပေါ်လာသောအသံမှာ “ကျွန်ုပ်တို့၏ ဘုရားရှင်ကို ကြောက်ရွံ့သည့် လူတန်းစား အနိမ့်အမြင့်အပေါင်းတို့… ကျွန်ုပ်တို့၏ ဘုရားရှင်ကို ချီးမွှမ်းကြလော့” ဟူ၍ဖြစ်၏။ 6ထို့နောက် လူအုပ်ကြီး၏ အသံကဲ့သိုလည်းကောင်း၊ အရှိန်အဟုန်နှင့်စီးဆင်းနေသော ရေသံနှင့် မိုးခြိမ်းသံကဲ့သို့လည်းကောင်း ထွက်ပေါ်လာသောအသံကို ကျွန်ုပ်ကြားခဲ့ရ၏။ ထိုအသံမှာ “ဘုရားရှင်၏ဂုဏ်တော်ကို ချီးမွှမ်းကြလော့။ ကျွန်ုပ်တို့၏အနန္တတန်ခိုးရှင် ဘုရားရှင်သည် အုပ်စိုးတော်မူ၏။ 7ရွှင်လန်းဝမ်းမြောက်လျှက် ကိုယ်တော်၏ ဘုန်းအရေတော်ကို ချီးမွှမ်းကြပါစို့။ သိုးသငယ်၏ မင်္ဂလာပွဲသည် အချိန်ကျပြီဖြစ်၍ သူ၏သတို့သမီးသည် မိမိကိုယ်မိမိ ပြင်ဆင်လေပြီ။ 8ထိုသတို့သမီးသည် “ဖြူစင်သော ပိတ်ချောထည်ကိုဝတ်ဆင်ရ ရရှိထားပြီ” ဟူ၍ဖြစ်၏။ 9ထိုအခါ နတ်ဒေဝါက “သိုးသငယ်တော်၏ မင်္ဂလာပွဲသို့ ဖိတ်ကြားခံရသောသူတို့သည် မင်္ဂလာရှိကြ၏ဟု ရေမှတ်ထားကြလော့” ဟုကျွန်ုပ်အားပြော၏။ ထို့နောက် “ဤအရာများသည် ဘုရားရှင်၏ နုတ်ထွက်စကားတော်များပင်ဖြစ်၏” ဟုလည်းကျွန်ုပ်အား ထပ်မံပြောဆို၏။ 10ထိုအခါ ကျွန်ုပ်သည် ထိုနတ်ဒေဝါကို ရှိခိုးရန် သူ၏ခြေရင်း၌ ဒူထောက်၏။ သို့သော် ထိုနတ်ဒေဝါက “ဤသို့မပြုနှင့်၊ ငါသည် သင့်နှင့် သင့်ညီအကိုများမှစ၍ ကိုယ်တော်ယေရှုဟောပြောမည့် သမ္မာတရားကို စောင့်ထိန်းရသူတို့နှင့် လုပ်ဖေါ်ဆောင်ဘက် အစေခံတစ်ဦးသာလျှင်ဖြစ်၏။ ဘုရားရှင်ကိုသာရှိခိုးလော့” ဟုဆို၏။ အဘယ်ကြောင့်ဆိုသော် ကြိုတင်ဟောပြောချက်များ၏ အနှစ်သာရသည် ကိုယ်တော်ယေရှုအကြောင်းအား သက်သေခံချက်ပင်ဖြစ်၏” ဟုဆို၏။ 11ထိုအခါ ရွှေမြို့တော်သည် ပွင့်လျှက်ရှိသည်ကို ငါမြင်ရ၏။ ထိုနေရာတွင် မြင်ဖြူတစ်ကောင်လည်းရှိ၏။ ထိုမြင်းဖြူကို စီးတော်မူသောသူသည် သစ္စာရှိသူနှင့် ဖြောင့်မှန်သူဟု အမည်ရ၏။ သူသည် ဖြောင့်မတ်မှန်ကန်စွာ တရားစီရင်၍ ဖြောင့်မတ်မှန်ကန်စွာ စစ်တိုက်တော်မူ၏။ 12သူ၏မျက်လုံးများသည် မီးလျံကဲ့သို့တောက်ပပြီး သူ၏ဦးခေါင်းထက်တွင် သရဖူများကိုဆောင်းထား၏။ သူကိုယ်တိုင်မှလွဲ၍ မည်သူမျှမသိနိုင်သော အမည်တစ်ခုကို သူ၏အပေါ်တွင် ရေးမှတ်ထား၏။ 13ထိုအရှင်သည် သွေးတွင်နှစ်ထားသည့်အဝတ်ကို ဝတ်ဆင်ထား၏။ သူ၏အမည်နာမမှာ “ဘုရားရှင်၏ နှုတ်ကပတ်တော်” ဟူ၍ဖြစ်၏။ 14နတ်ဒေဝါတပ်ပေါင်းစုတို့သည် စင်ကြယ်သော ပိတ်ချောဖြူကို ဝတ်ဆင်ထားလျက် မြင်းဖြူများကိုစီးကာ ထိုအရှင်နောက်သို့ လိုက်ကြ၏။ 15ဘုရားရှင်ကိုဆန့်ကျင်သော လူမျိုးတို့ကို နှိမ်နှင်းရန် ထက်သောသန်လျက်သည် ထိုအရှင်၏ ခံတွင်းမှထွက်၏။ သူသည် ထိုသူတို့ကို လှံတံဖြင့် အုပ်စိုးတော်မူလိမ့်မည်။ သူသည် ထိုသူတို့ကို သံလှံတံဖြင့် အုပ်စိုးတော်မူလိမ့်မည်။ သူသည် ဘုရားရှင်၏ကြီးမားသော အမျက်တော်ဟူသော စပျစ်သီးနယ်ရာကျင်းကို နင်းတော်မူလိမ့်မည်။ 16သူ၏ ဝတ်ရုံတော်နှင့် ပေါင်တော်တွင် “ဘုရင်တကာတို့၏ ဘုရင်၊ သခင်တကာတို့၏ သခင်” ဟူသော ဘွဲ့နာမတော်ကို ရေးသားထား၏။ 17ထို့နောက် နေထဲ၌ ရပ်နေသော နတ်ဒေဝါတစ်ပါးကို ကျွန်ုပ်မြင်ရ၏။ သူက ကောင်းကင်အလယ်၌ ပျံဝဲနေသော ငှက်အပေါင်းတို့အား ကျယ်လောင်သောအသံဖြင့် “ဘုရားရှင်၏ ညစာစားပွဲတော်သို့ လာ၍စုဝေးကြလော့။ 18ရှင်ဘုရင်၏အသာ၊ တပ်မှူး၏အသား၊ စစ်သည်တို့၏အသား၊ မြင်းနှင့် မြင်းစစ်သည်တို့၏အသား၊ လွတ်လပ်သူနှင့် အစေခံများ၊ လူတန်းစား အနိမ့် အမြင့်အပေါင်းတို့၏အသားကို လာ၍ စားကြလော့” ဟုကြွေးကြော်လေ၏။ 19ထိုအခါ သားရဲမှစ၍ ကမ္ဘာပေါ်ရှိရှင်ဘုရင်များနှင့် သူတို့၏တပ်များသည် မြင်းစစ်သည်များနှင့် သူ၏တပ်ကို စစ်တိုက်ရန် စုဝေးကြသည်ကို ကျွန်ုပ်မြင်ရ၏။ 20သားရဲသည် မိမိကိုယ်စား နိမိတ်လက္ခဏာပြသော အရိယာသူတော်စင်အတုအယောင်များနှင့်အတူ ဖမ်းဆီးခြင်းခံရ၏။ ထိုအရိယာသူတော်စင်အတုအယောင်မှာ သားရဲ၏အမှတ်တံဆိပ်ကို ခံယူကြလျက် သားရဲ၏ရုပ်တုကို ကိုးကွယ်ကြသော သူတို့အား ထိုနိမိတ်လက္ခဏာများဖြင့် လှည့်ဖြားကာ လမ်းလွဲစေသူဖြစ်၏။ သူတို့နှစ်ဦးသည် ကန့်နှင့် လောင်သောမီးအိုင်ထဲသို့ အရှင်လတ်လတ် ပစ်ချခံကြရ၏။ 21ကျန်ရှိသောသူများသည် မြင်းစီးတော်မူသောသူ၏ ခံတွင်းမှထွက်သော သန်လျက်နှင့် သတ်ဖြတ်ခံရပြီး ငှက်အပေါင်းတို့သည် ထိုသူတို့၏အသားကို ဝလင်စွာစားကြ၏။
Obecnie wybrane:
Revelation 19: TPV-RV
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
