Wepélisiananu 50
50
Jakɔb gyɛbole
(WP 47:28–31)
1Jozɛfu dia é ti yara, yé é wuvɔ a ta, yé é pwɛpwɛ vɔ a ma. 2Dɔtrɔnu lé wo alé nyanama paan bɛ, é lé wo lɛ léé: ’Ka an ti gale plaa, yé dɔtrɔnu Izraɛl gale plaa. 3Wo vo a gale plaana fɔɔ yi yɔ fié. Yé Éjipiti munu a wuvɔ yi yɔ yaa wɔlɛ vu.
4Gyɛboyinu gié aan wo, Jozɛfu Faraɔn muun pa élé kɔngimunu ta, yé é lé wo lɛ léé: Dé maa ka yuɛi bɔ, kalé zanté, ’ka go anlé muun nya Faraɔn va. ’Ka fe a lɛ léé, 5an ti léé, an bale ’nyɔɔn ’é lɛ yé é léé, ’é a dana ga lɛ. Mipana lé ’é a lɔ Kanaan tɛrɛ la, ’maa ’é pa ana mi. Maa a a va léé, ’maa go ana, an ti pale we gi, yé an da é ziin. Yé wo go alé muun nya Faraɔn va. 6Faraɔn lé a lɛ léé: ’I go, yé i ti pa bélé é léé, ’i bale ’nyɔɔn ’é lɛ fɛan zo, a zo.
7Jozɛfu go é ti pa lɛ. Faraɔn wuomunu koo, alé kɔngimi segelenu koo, Éjipiti tɛrɛ la mi segelenu faa koo, 8Jozɛfu lé kɔngimunu faa koo, a bwenu koo, a ti lé kɔngimunu koo, wo go a va. Nénu koo, ’blanu koo, dirinu koo, wo saa ɛ vo wo pa gi Gozɛn tɛrɛ la. 9Goronu valé wisootazannu a Jozɛfu va é ziin, yé munu lé wo go a va, wa di. 10Wo bɔ aan wo Atad lé ’sa sunwona, ’bɛ a Juudɛn yuu zi, wo wuvɔ plɛplɛ yé wo dére bɔ baa, yé Jozɛfu ’é ti gyɛ bo yi sɔrafié ’bɛna, a ti tɔ kɛlɛle blɛn we ma. 11Gyɛ lé wa bo Atad lé ’sa sunwona, Kanaan tɛrɛlamunu ana ye, yé wo léé: Yiba! gyɛ blɛn do bɔ Éjipiti munu va. Amalé ’sa sunwona ’ko lé ke Juudɛn yuu zi, wa tɔ pa Abɛl‐Misraim.
12Wo ti Jakɔb wo bélidɔ dérean nya, wa kɛlɛle lɛ sɔɔ yee ɛ zo. 13Wo go a nya Kanaan tɛrɛ la, yé wa pa gɔmaguru lé é ke Makipéla féi, a gi. Yee lé Abraam a lɔ Et mi Éfrɔn lee ézé mipana nya, Mamré yara zia.
14Jozɛfu nyaa aan wo é ti pale nya, ’bɛ zuo é go Éjipiti tɛrɛ la é ziin, yee valé é bwenu koo, munu faa lé wo go a va a ti pale we gi koo, wo nya.
15Jozɛfu bwenu a ye aan wo léé, ’wo ti ga, wo léé: Dé ko za a Jozɛfu gi, yé wenyanénu faa lé ko kɛlɛ a lɛ, dé é dan wo lɛgi pa lɛ ko maa? 16Yé wo lé Jozɛfu lɛ léé: I ti we fe é gale ’lɛ, yé é léma: 17’Ka fe Jozɛfu lɛ léma: Wenyané valé we lɛrɛlɛrɛnu lé i bwenu a kɛlɛ i lɛ, ilé zanté, ’i wo ma we vo ma. Wo wenyané kɛlɛ i lɛ weboen nya, naa, ilé zanté, ’i ti lé Bale wuomunu ma we vo ma. Jozɛfu dére ’ko ’ma aan wo, é wuvɔ. 18A bwenu bozen da dia lɛ ’wo bli la a ’lɛ, yé wo léé: Ko a i wuomunu nya. 19Jozɛfu lé wo lɛ léé: Kana ’é si ka gi ma. Maa ɛ Bale pagi siéé? 20Ka ’wuo gi bɔrɔ léé, ka wenyané kɛlɛ an lɛ. Kazambale a nɔla wezin nya, we lé a lɛ sɔɔ kyɔ ’ko, a kɛlɛle we gi, yé migɔnɔ kiɛre vo é yuɛma. 21Té ka kana lo ma; maa dan ka pa lɛ, ka valé kalé nénu nya. Yé é wo tɔrɔ paa, we drɔɔ fele nya wo lɛ.
Jozɛfu gale
22Jozɛfu nyana Éjipiti tɛrɛ la, yee valé é ti lé munu nya. É vo é yuɛma lɛɛ yɔ soru wɔlɛ vu. 23Jozɛfu Éfraim benu ye fɔɔ é bɔ a néné gɔnɔ yaazan ma. Yé Manasé be Makii benu tin Jozɛfu gane la.
24Jozɛfu lé é bwenu lɛ léé: An dan ga lɛ. Naa, Bale é dan bɔra lɛ ka va, yé é dan ka si lɛ tɛrɛ ’ko la, yé tɛrɛ lé Bale ’ébo ’nyɔɔn Abraam koo, Izak koo, Jakɔb koo, wo lɛ léé, ’é dan a nɔ lɛ wo lɛ bɛ, é dan go lɛ ka nya ’bɛna. 25Jozɛfu lé Izraɛl benu lɛ léé: Kazambale é dan bɔra lɛ ka va. ’Ka bale ’nyɔɔn an lɛ léé, ka dan an wɔlɛnu sia lɛ fɛkona yé ka go wo nya ka lee. Yé wo bale ’nyɔɔn.
26Jozɛfu lɛɛ kɛlɛ lɛɛ yɔ soru wɔlɛ vu, yé é ga. Wa gale plaa, yé wa gale pa kɛsu gi Éjipiti tɛrɛ la.
Obecnie wybrane:
Wepélisiananu 50: GOURU
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Alliance Biblique de Cote d'Ivoire 1979
