Fwile 1
1
Izraɛl nyané ble Éjipiti tɛrɛ la
(LvS 105:24–25; Kw 7:14–19)
1Izraɛl benu lé wo go Éjipiti tɛrɛ la, wo tɔ lé ke ’ko. Wo go ’bɛna Jakɔb nya, ’té wo faa do do lé nénu valé wo nanu a wo va. 2Wa Rubɛn koo, Siméɔn koo, Lévi koo, Juda koo, 3Isakaa koo, Zabulɔn koo, Bɛnjamɛn koo, 4Dan koo, Néfitali koo, Gad koo, Azɛɛ koo, wo nya. 5Munu lé wo si Jakɔb gi, wo faa ’léé a yɔ yaa wɔlɛ vu. ’Té Jozɛfu a é kyɛn Éjipiti tɛrɛ la. 6Jozɛfu koo, a bwenu koo, ’bɛ bléyi va munu faa koo, wo ga. 7Izraɛl lé nénu a néyaamunu nya, yé wo kɛlɛ kiɛre, yé wo ’léé gi gyɛ yé wolé plɛplɛ taa vo zénna a va. Yé wo fan tɛrɛ ’ko la.
8Minwiinzan dɛrɛ do nwa Éjipiti tɛrɛ la yé ’bɛ ’ka Jozɛfu dɔɔa lo. 9É lé élé munu lɛ léé: Ka yua, Izraɛl lé nénu a kɛlɛna kiɛre wo mini ko ta, ’té wo plɛplɛ mini ko ta. 10Kaa go, kaa gikiniwe kɛlɛ wo vazia; kaa wo ’léé gi gyɛle yi ga, dé guli é da da yé wo péli vɔ ko nyanézannu va gulidanle ko va we ma yé wo ko bin tɛrɛ ’ko la. 11Yé wo nyanagɔɔnzannu dɔ wo zuo, glanyanama tɔntɔn nɔle wo lɛ we ma. ’Bɛ zo lé wo Pitom valé Ramzɛs pa, Faraɔn lé fɛtadɔ?-?flanu nya. 12Naa, dé wo nyanama tɔntɔn nɔ wo lɛ, ’bɛ kɛlɛ wo ’léé gi?-?gyɛwe valé wo fanwe nya; yé Éjipiti léa bo Izraɛl lé nénu ma. 13Yé Éjipiti munu Izraɛl lé nénu zun fɔɔ yé wo kɛlɛ nyanama tɔntɔn pazannu nya. 14Wo wolé tɛrɛla lɔrɔ nyaa wo ma, bɔtɛrɛ valé briki lé nyanama tɔntɔn nya, ’bɛ valé féi nyanama faa nya; yé wo nyanama ’konu faa nɔ wo lɛ ’wo gi pɔnpɔn nya.
15Éjipiti mununwiinzan blɛn we fe é ziin Ébru munu lé dɔtrɔlomu lɛ; wa do laama Sifra, yé wa koɛ laama Pua. 16É lé wo lɛ léé: Dé Ébru lomu vɔ lu zi yé ka ye léé, wa né yaana, dé gɔné lé, ’ka a gyɛ; dé le lé, ’ka a vo é yuɛma. 17Naa, dɔtrɔlomu kana Kazambale lee yé wo ’ka Éjipiti mununwiinzan blɛn lɛdɔ lɛ a ma lo; wo nénu vo é yuɛma. 18Éjipiti mununwiinzan blɛn dɔtrɔlomu laa yé é lé wo lɛ léé: Mɛmalé ka kɛlɛ ’bɛ zo yé ka nénu vo é yuɛmaa? 19Dɔtrɔlomu a zi pa Faraɔn lɛ léé: Ébru lomu ’ka bélé Éjipiti lomu zo lo, ’bɛzama; wa le blila plɛplɛnu nya yé wo né yaan faa yé dɔtrɔle é da. 20Kazambale wezin kɛlɛ dɔtrɔlomu lɛ; yé munu ’léé gi gyɛ yé wo kɛlɛ kiɛre é baba. 21Dɔtrɔlomu kana Kazambale lee, amalé Kazambale wolé kɔn gi munu drɔɔ vo.
22Yé Faraɔn élé munu faa bélidɔ léé: Dé wo né yaa gɔné nya, ’ka a vuli yuu va, yé ’ka nélomu faa vo é yuɛma.
Obecnie wybrane:
Fwile 1: GOURU
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Alliance Biblique de Cote d'Ivoire 1979
