Wepélisiananu 44
44
Jozɛfu é bwenu gi dan
1Jozɛfu we fe ’é leezan lɛ léé: ’I fɛ pa munu ’konu lé pulunu gi wolé kɔné sibɛ yɛrama. Yé ’i wo faa do do lé gɔɔli pa wolé pulunu gi. 2Yé anlé ’yiminikana lé ke gɔɔlifu kana nya bɛ, bé pa wo zuané lé pulu gi, ’é valé alé ’sa ma gɔɔli nya. We lé Jozɛfu a fe, a leezan a kɛlɛ.
3Bladi, tu kini bléyi va, wo zi nɔ munu ’konu lɛ yé wo go ’wolé sokofalenu nya. 4Wo si fla yé wo ’ka tan bɔ lɛ baa lo. Yé Jozɛfu lé ’é leezan lɛ léé: ’I nwa, ’i go munu ’konu zuo. Dé bé dɔ wo ma bé fe wo lɛ léé: Mɛmalé ka wezin lɛgi pa wenyané nyaa? 5Kana lé anzan éé ’yi minian a gi, ’té ébo ma we yé a gi, é ’ka ka lee loo? We ’ko ma, ka kɛlɛ naané. 6Jozɛfu leezan a dɔ wo ma yé é we ’konu fe wo lɛ. 7Yé wo lé a lɛ léé: Mɛwemale anzan we ’ko zo fe ko maa? Bale ’é dɔ ’é wuomunu zi, té wo ’bɛ zoɛ we kɛlɛ lo ma. 8Gɔɔli lé ko a ye é vinin kolé pulunu gi, ko ’ka si lɛ a nya Kanaan tɛrɛ la yé ko da a nya i lɛ é ziin loo? Dé gɔɔli léoo, dé kyan léoo, ko kɛla kaa yé ko a sia kyeen nya izan lé kɔn gii? 9Dé i kana ’ko ye i wuomian nwiin, ’bɛzan ’é ga ma, yé kobozen ’ko kɛlɛ kozan lé luunu nya ma. 10Yé é léé: ’É kɛlɛ ka dére ta ma. Dé wo kana ye mianzan nwiin, ’bɛzan ’é kɛla anlé luu nya, ’té we ’ka ka mi pɔnénu nwiin lo. 11Tɔɔn, wo ’wolé pulunu zun tɛrɛ va do do, yé wa gi fuo do do. 12Jozɛfu leezan wo nwiinnu gini. É a pélisia wo vininzan ta yé é a ’wuo pla wo voélazan ta. Yé é kana ye Bɛnjamɛn lé pulu gi.
13Wo ’wolé sɔnu fia yé wo kɔné pa ’wolé sokofalenu punu, yé wo nɔla wo pa gi fla zia. 14Juda valé é zuanénu bɔ Jozɛfu lé kɔn ’léé, ’té é ana ’bɛna tan, yé ’wobo dia tɛrɛ va a ’lɛ. 15Jozɛfu lé wo lɛ léé: Mɛ we lé ka a kɛlɛ bɛɛ? Ka ’ka a gi dɔɔa léé, an zo mi éé fɛna yé loo? 16Juda lé a lɛ léé: Mɛ we lé ko fé anzan lɛɛ? Ko we fé kaa? Ko kolé we kɛla tegele kaa? Kazambale i wuomunu lé weplenu ye. Anzan lé luunu lé ke ko nya ’ko; ko koo, mi lé wo kana ye a nwiin koo, ko lé. 17Yé Jozɛfu lé wo lɛ léé: Bale ’é ’bɛ yi ga an lee ma. Mi lé wo kana ye a nwiin, é dan kɛlɛ lɛ anlé luu nya, yé ’kaanu, ’ka go ka ti va drɔɔ ma.
18Yé Juda bié Jozɛfu sɔnɔ yé é léé: Anzan, ilé zanté. ’I tɔné dɔ i wuozan lɛ ma, ’é we do fe ’ézan lɛ ma; té a bli é fli ’é wuozan ma monomono lo ma. Bii a bélé Faraɔn zo. 19É vinin, anzan we laa ’é wuomunu lee léé, ka ti anaa? ka zuané aa? 20Yé ko léé, ko ti ana. É a kwakwa, yé ko zuané kiéné do ana, alé kwa ta né nya. Né ’ko bwe do a, yé é ga. Wo fiénu bu a do. É vo é do, yé a we a é ti lee. 21Bii lé é vinin i wuomunu lɛ léé, ’ka da a nya ’é va, yé ’é a ye ’ébo yuɛ nya. 22Ko lé anzan lɛ léé, né ’ka bɔa sile lɛ é ti va lo. Dé é si a va, a ti ’é gaan. 23Bii lé i wuomunu lɛ léé, dé ka zuané ’ka da lɛ ka va lo, ka ’ka dan ’é yara néné ye lɛ é dɛrɛ lo. 24Ko go aan wo i wuozan, an ti va, yé ko anzan dérenu fe a lɛ. 25Ko ti léé, ’ka go é ziin, ’ka fɛblele kiéné lɔ ko lɛ. 26Yé ko léé, ko ’ka bɔa gole lɛ lo. Naa, dé ko zuané ’ka ko va lo, ko ’ka mi ’ko yara néné yé lo. Dé é a lé ko zuané a ko va, ko dan go lɛ. 27I wuozan ko ti lé ko lɛ léé, ka gi dɔɔ léé, an na négɔné fié yaa an lɛ. 28A do si anlé kɔn léé yé maa ’ka a ye lɛ é ziin lo fɔɔ kyɔ, amalé é dɔ an gi léé, winu a wi kini ékema. 29Dé ka mi ’ko si é ziin an lee yé wenyané bɔ a ma, ka dan an gyɛ lɛ an be lé gibɔrɔ nya, yé an dan go lɛ nyané blele nya an tranu zuo, gamunu nyanana. 30Sin, dé ko go é ziin i wuozan an ti va, ’té né lé a we ke a lee kaii bɛ, dé é ’ka ko va lo, 31dé an ti a ye léé, né ’ka ko va lo, é dan ga lɛ. Yé i wuomunu lé we ma lé i wuozan, ko ti, é dan go lɛ nyané blele nya ’é tranu zuo, gamunu nyanana. 32I wuozan ébo dɔ ’é ti lɛ né pa gi yé maa lé an ti lɛ léé, dé maa ’ka da lɛ a nya i lɛ é ziin lo, ’té a we a an nwiin lɛɛfaama an ti va. 33Amalé, ilé zanté. ’An vo né pa gi anzan lé luu nya ma. Yé nézan valé é bwenu ’é go ma. 34Dé né ’ka an va lo, an kɛla kaa yé an go é ziin an ti vaa? Yiba! Té maa an ti lé nyanéblele ye lo ma.
Obecnie wybrane:
Wepélisiananu 44: GOURU
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Alliance Biblique de Cote d'Ivoire 1979
