Wepélisiananu 43
43
Jozɛfu bwenu go ’sa lɔ lɛ é ziin
1Yé lɔrɔ dɔle kɛlɛ tɛrɛ la plɛplɛ. 2’Sa lé wo si a nya Éjipiti tɛrɛ la, wo nyaa aan wo ’bɛ blele nya, Jakɔb lé é benu lɛ léé: ’Ka go fɛblele sɛné lɔ ko lɛ é ziin. 3Juda lé a lɛ léé: Mi ’ko we fe ko lɛ é yara tɔntɔn nya léé, dé ko zuané ’ka ko va lo, ko ’ka dan ’é yara néné ye lɛ lo. 4Dé é sɔ i lɛ léé, i ko zuané nwunvɔ ko va, ko dan go lɛ, yé ko dan fɛblele lɔ lɛ i lɛ. 5Mi ’ko lé ko lɛ léé, dé ko zuané ’ka ko va lo, ko ’ka dan ’é yara néné ye lɛ lo, bɛwemalé dé é ’ka sɔ lɛ i lɛ léé, bé pa ko va lo, ko ’ka goo monomono lo. 6Yé Izraɛl léé: Mɛmalé ka wenaané kɛlɛ an lɛ yé ka fe mi ’ko lɛ léé, ’wo zuané do ana é ziin? 7Wo léé: Mi ’ko é ko valé ko gɔnɔlamunu lé we laa ko lee. Yé é lé ko lɛ léé: Ka ti a é yuɛma é ziin? Ka zuané do aa? Yé wenu lé é a laa ko lee, ko wo gi fe a lɛ. Dé é dan a fe lɛ léé, ’ko da ko zuané nya, ’naan, ko ’bɛ gi dɔɔ kaa?
8Juda lé é ti Izraɛl lɛ léé: ’I zi nɔ né lɛ, ’é go an va yé ko nwa yé ko go ma, yé ko koo, bii koo, kolé nénu koo, yé kaa vo é yuɛma ma, yé kaa ’ka gaan lo. 9Maa anbo dɔ i lɛ, bé ma laa é ziin an lee. Dé an ’ka da lɛ a nya i lɛ é ziin lo, dé maa ’ka a dɔ lɛ i ’lɛ lo, bé we dɔ an nwiin lɛɛfaama ma. 10Dé ko ’ka kɔɔn mɔn lɛ lo, ’té ko nɔla ko pa gi é ziin gɔnɔ fié. 11Wo ti Izraɛl lé wo lɛ léé: An ’ka bɔa we ’ko lɛ lo. ’Ka kɛlɛ ’ko zo: ka tɛrɛ ’ko la fɛ zinnu si; ’ka a zén kalé pulunu gi yé ’ka go wo nya gɔné ’ko lɛ a blan nya: baumélia kiéné koo, zɔrɔnyɔnɔ kiéné koo, zianbla ginzannu koo, mirélia koo, bɛɛ koo, amandé koo, woo lé. 12Gɔɔli lé ka si é kyɛn, ’ka ’bɛ gɔɔli zoɛ’léé fié si yé ka go a nya ka lee, yé gɔɔli lé wa pa ’sa ta loru kalé pulu gi, ’ka go ’bɛ nya é ziin. Dé wo saan é woo? 13’Ka ka zuané si yé ’ka nwa; ’ka go gɔné ’ko va. 14Plɛplɛfaazan Bale ’é ka kɛlɛ mi zinnu nya mi ’ko yuɛ gi ma; ’é daan ka bwe koɛzan valé Bɛnjamɛn ma, yé ’wo da é ziin ka va ma. Yé maa, dé anlé nénu vuru an ma, ’té an vuru é wo wo gi.
15Wo blanfɛ si; gɔɔli’léé kyɛn lé ke wo lee, wo ’bɛ gɔɔli zoɛ’léé fié si, ’é valé Bɛnjamɛn nya. Wo nwa, yé wo go Éjipiti tɛrɛ la, yé wo dɔ Jozɛfu ’lɛ.
16Jozɛfu Bɛnjamɛn ye wo va tɔɔn, é lé ’é leezan lɛ léé: ’I munu ’ko wɔra kɔn gi; ’i wi gyɛ yé bé dɔne; munu ’konu é dan fɛ ble lɛ an va é yiéyi. 17We lé Jozɛfu a fe, mi ’ko a kɛlɛ. É go munu ’konu nya Jozɛfu lé kɔn gi. 18Dé wo go wo nya Jozɛfu lé kɔn gi, kana zén wo gi, yé wo léé: Gɔɔli lé wa pa kolé pulunu gi é kyɛn, alé we ma lé wo da ko nya kɔn gi, weblele ko va yé wo kle pa ko ta we ma lé; ko kɛlɛle luunu nya yé wo kolé sokofalenu si ko lee we ma lé. 19Wo bié Jozɛfu lé kɔn ’léé munu nwiinzan sɔnɔ, yé wo we fe a lɛ kɔn ’léé, 20yé wo léé: Anzan, ilé zanté. Ko da é vinin fɛblele lɔ lɛ gɔnɔ do. 21Ko bɔ zia, yé ko yii fɛana, ko kolé pulunu lɛ so, ’té ko faa lé gɔɔlinu a ’sa ta kolé pulu gi do do, wa pɛzéwo fɛan zo, a’léé yɛrama. Ko da a nya ko lee é ziin. 22Ko da gɔɔli bɛnu nya ko lee é ziin, fɛblele lɔle we gi. Mianzan kolé gɔɔlinu pa kolé pulunu gi, ko ’ka azan dɔɔa lo. 23Jozɛfu leezan lé wo lɛ léé: ’Ka vo drɔɔ ma. Té ka kana we do lee lo. Kazambale lé ke ka ti lé Bale nya, yee ɛ fɛwezan nɔ ka lɛ kalé pulunu gi. An kalé gɔɔli ye. Yé é da Siméɔn nya wo lɛ. 24Gɔné ’ko é wo wɔra Jozɛfu lé kɔn gi. É ’yi nɔ wo lɛ yé wo ’wo gane ma zuru a nya. Yé é fɛblele nɔ wolé sokofalenu lɛ é ziin. 25Wa fe wo lɛ kɔɔn léé, wo dan fɛ ble lɛ Jozɛfu va, bɛwemalé wo blannu ma’lɛrɛ yé wo Jozɛfu dale é yiéyi lɛbɛn.
26Jozɛfu bɔ an wo kɔn’léé, blannu lé wo da a nya, wa nɔ a lɛ. Yé wo dia ’wo bli la tɛrɛ va a ’lɛ. 27Yé é lé wo lɛ léé: Ka a drɔɔ? Ka ti kwakwa lé, ka alé we fe an lɛ é kyɛn, é ana é ziin drɔɔ? É a tan é yuɛmaa? 28Yé wo léé: I wuozan, ko ti, a drɔɔ; é a tan é yuɛma. Yé wo ’wuo tua a lɛ, yé wo dia ’wo bli la a ’lɛ. 29Jozɛfu é yara nwa yé é ’é zuané, ’é bu lé né Bɛnjamɛn nagini. Yé é léé: Ka zuané lé, ka alé we fe maa lɛ, yee lé ke bɛɛ? Yé é a taa fe é ziin léé: An be, Bale i drɔɔ vo ma. 30A zuané lɔrɔ a a gyɛna a bli gi kaii, yé é a a va léé, ’é wuvɔ. Yé é go kɔnné do gi fiéfié, yé é wuvɔ ’bɛna. 31A zuo é ’é yara foli, yé é bɔra, yé é ébo kun plɛplɛ yé é vo é tadɔle yé é léé: ’Ka da fɛ nya.
32Wo Jozɛfu zé fɛ nɔ é yɛrama; wo a bwenu zé nɔ é yɛrama, yé Éjipiti munu lé woo fɛ blé a va, wo ’bɛnu zé nɔ é ziin é yɛrama. Éjipiti munu ’ka fɛ blé Ébrunu va lo. ’Bɛ a we lɛrɛlɛrɛ nya wo yuɛ gi. 33Jozɛfu bwenu nyana é ’lɛ, ’é vinin ma vinin ma, a se a a vininzan lɛ fɛan zo, a zo; yee lé wa yaa é voéla, é nyana wo nyaana nya. Yé wo vo wo ke naginina gi vurule nya. 34Fɛblele lé ke Jozɛfu ’lɛ, é a pa zia wozé nya. Yé Bɛnjamɛn zé mini wozé ta gɔnɔ soru. Yé wo dɔrɔ mini, yé wo gi nana a va.
Obecnie wybrane:
Wepélisiananu 43: GOURU
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Alliance Biblique de Cote d'Ivoire 1979
