1 કુરિંથીઓ પત્રો 3
3
મંડળીમે ફુટ પોળુલો યોગ્યો નાહ
1ઓ વિશ્વાસી પાવુહુ, જાંહા આંય તુમા આરી આથો, તાંહા જેહેકી આત્મિક રીતીકી મજબુત લોકુહુને શિક્ષણ આપુહુ, ઇયુજ રીતીકી માયુહુ તુમનેહે શિક્ષણ નાહ આપ્યો, પેન સંસારિક એટલે ખ્રિસ્તુ હાના પોયરા હોચે શિક્ષણ આપ્યોહો. 2તીયા સમયુલે માયુહુ તુમનેહે ખાલી સાદારણ રીતીકી જીયુ રીતીકી હાના પોયરાહાને દુધ પાજતેહે તીયુ રીતીકી શિક્ષણ આપ્યોહો, માયુહુ તુમનેહે પરમેહેરુ વચનુ ઉંડો શિક્ષણ નાહ આપ્યો, જો માંડો ખાવુલો સમાન હાય, કાહાકા તુમુહુ તીયા સમયુમે રોટલી ખાવુલો યોગ્યો નાય આથા, આને આમી બી નાહ ખાય સેક્તા. 3આમી લોગુ તુમુહુ અવિશ્વાસી લોકુ સમાન રેતાહા. આને ઈયા જગતુ લોકુ સમાનુજ વેહવાર કેતાહા.
4કાહાકા આમી તુમામેને એગો માંહુ આખેહે કા, “આંય પાઉલુ ચેલો હાય,” આને બીજો આખેહે, “આંય અપુલ્લોસુ ચેલો હાય,” તા તુમુહુ ઈયા જગતુજ લોકુ સમાન વેહવાર કેતાહા. 5પાઉલ આને અપુલ્લોસ તા ખાલી પરમેહેરુ સેવક હાય, જીયા મારફતે તુમુહુ ઇસુ ખ્રિસ્તુપે વિશ્વાસ કેયોહો, પરમેહેરુહુ બાદાહાને કામ કેરા ખાતુરે તોજ કામ આપ્યોહો. 6બાદા પેલ્લા તા માયુહુ તુમનેહે પરમેહેરુ વચન ઉનાવ્યો, ઇયાં ખાતુરે આંય તીયા માંહા હોચે હાય જીયાહા ખેતુમે બીયારો પોયો. આને જીયુ રીતીકી બીયારો ઉગી જાહે તા બીજે માંહે આવીને તીયાલે પાંયુકી સિંચાય કેહે તીયુજ રીતીકી અપુલ્લોસુહુ બાદમે આવીને તુમનેહે વિશ્વાસુમે મજબુત કેરા ખાતુરે મદદ કેયી. આને જેહેકી અનાજુલે પરમેહેર વાદાવેહે તીયુજ રીતીકી તુમનેહે નવો જીવન આપ્યોહો આને તુમુહુ આત્મિક રીતીકી વાદતાહા. 7ઇયાં ખાતુરે પોનારો કા પાંય વાલનારો ખાશ નાહ, પેન પરમેહેર ખાશ હાય જો અનાજુલે વાદાવેહે. 8માયુહુ તુમનેહે પરમેહેરુ વચનુકી શિક્ષણ આપ્યોહો, આને અપુલ્લોસ તીયાજ શિક્ષણુમે મજબુત કેતો રીયો તીયામે બેનુ એકુજ ઈરાદો આથો, પેન દરેક માંહુ પોત-પોતા મેહનત અનુસાર પરમેહેરુપેને ઇનામ મીલવી. 9કાહાકા આમુહુ પરમેહેરુ સેવક તરીકે આરી કામ કેનારા હાય; તુમુહુ પરમેહેરુ ખેતી, પરમેહેરુ ઇમારત હાય.
10પરમેહેરુહુ માને જો વરદાન આપ્યોહો તીયાકી, જીયુ રીતીકી એક બુદ્ધિમાન રાજમિસ્ત્રી પોંગો બોનાવા ખાતુરે પેલ્લા પાયો ટાકેહે, તીયુજ રીતીકી માયુહુ પેલ્લા તુમામે હારી સુવાર્તા પ્રચાર કેયો, આને તીયા બાદ બીજો રાજમિસ્ત્રી આવીને તીયાજ પાયાપે દિવાલ બોનાવેહે, પેન કામ કેતા સમયુલે બાદા લોક ધ્યાન રાખા જોજે કા તોઅ કેહેકી કામ કેહે. 11કાહાકા જો પાયો પેલ્લાજ ટાકલો હાય, તોઅ ઇસુ ખ્રિસ્ત હાય, આને તીયા સિવાય બીજો કેડો બી પાયો નાહ ટાકી સેકતો. 12પેન તીયા પોંગા કેડો કેહેકી બોનાવેહે. હોના, ચાંદી આભુસણુકી કા ખુબુજ કિંમતી ડોગળાકી કા લાકળાકી કા ચારા-કુટારાકી બોનાવે, 13ન્યાયુ દિહ દરેક કામ દેખાય, કાહાકા દરેક માંહુ કામ આગીકી પારખામે આવી, એજ આગ દરેક કામુહુને સાબિત કેરી. 14કાદાચ તીયા પાયાપે કેલો બાંધકામ આગીકી બી નાય બોલે આને મજબુત વેરી, તા તીયા પાયાપે બાંધકામ કેનારો રાજમિસ્ત્રીલે પરમેહેર ઇનામ આપી. 15કાદાચ એગા કેલો કામ આગીમે બોલી જાય, તા બાંધકામ કેનારા નુકશાન વેરી, પેન બાંધકામ કેનારો એહેકીજ ઉદ્ધાર પામુહુ, જીયુ રીતીકી એગો આગીકી બોલતો-બોલતો વાચાય જાય.
16તુમુહુ હારી રીતીકી જાતાહા કા, તુમુહુ પોતે પરમેહેરુ મંદિરુ હાય, આને તીયા આત્મા તુમામે રેહે. 17જો કેડો પરમેહેરુ લોકુમે ફુટ ટાકેહે, તીયાલે પરમેહેર દંડ આપી. કાહાકા તુમુહુ પરમેહેરુ પવિત્ર મંદિર હાય.
18કાદાચ તુમામેને કેડાલે બી ઇ લાગે કા જગતુ નજરુમે આંય બુદ્ધિમાન હાય, તા તીયાલે જગતુ લોકુ નજરીમે મુર્ખ બોના જોજે, કા તોઅ ખરેખર પરમેહેરુ નજરીમે બુદ્ધિમાન બોની જાય. 19કાહાકા જે ગોઠયા લોકુ નજરીમે બુદ્ધિમાન હાય, તોઅ પરમેહેરુ નજરીમે મુર્ખ હાય. જેહેકી પવિત્રશાસ્ત્રમે લેખલો હાય,
“પરમેહેર બુદ્ધિમાન લોકુહુને તીયા ચતુરાયુ ઉપયોગકીને તીયાહાને ફસવી દેહે.” 20આને પવિત્રશાસ્ત્રમે ઇ બી લેખલો હાય, “પ્રભુ જાંહે કા બુદ્ધિમાન લોકુ વિચાર કાયજ કામુ નાહ.”
21ઈયા ખાતુરે કેડો બી લોકુ આગેવાનુપે ઘમંડ નાય કે, કાહાકા બાદોજ પરમેહેરુહુ તુમા ભલાયુ માટે આપ્યોહો. 22કાદાચ આંય પાઉલ વેરી, કા અપુલ્લોસ, કા પિત્તર, કા ઈયા જગતુ વસ્તુ, કા તુમુહુ જીવતા રીયા, કા ઓ સમય જો આમી ચાલી રીયોહો, કા આવનારો સમય, બાદોજ પરમેહેરુહુ તુમા ભલાયુ માટે આપ્યોહો. 23તુમુહુ ખ્રિસ્તુ આધિનુમે આને ખ્રિસ્ત પરમેહેરુ આધિનુમે હાય.
Obecnie wybrane:
1 કુરિંથીઓ પત્રો 3: DUBNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Dubli (દુબલી) Bible by The Love Fellowship is licensed under Creative Commons Attribution-ShareAlike 4.0 License.