1 કુરિંથીઓ પત્રો 2
2
ઇસુ મોતુ પ્રચાર
1ઓ વિશ્વાસી પાવુહુ, જાહાં આંય પરમેહેરુ સુવાર્તા પ્રચાર કેરા માટે તુમા પાહી આલો, તાંહા માયુહુ તુમા આરી મોડા-મોડા શોબ્દા ઉપયોગ નાહ કેયો આને જ્ઞાનુ ગોઠયા નાહ કેયા. 2કાહાકા માયુહુ ઇ નક્કી કેલો કા આંય ઇસુ ખ્રિસ્તુ આને તીયા ક્રુસુપેને મૃત્યલે છોડીને બીજો કેહડાજ વિશે તુમા આરી ગોઠયા કિવ્યુ. 3આંય જાંહા તુમા આરી આથો તા ખુબુજ કમજોર આને બીખુમે આને ખુબુજ કાપતો રેતલો. 4માયુહુ માઅ શિક્ષણ, આને પ્રચારુમે લોકુહુને જ્ઞાનુ લોભુવાલી ભાષા ઉપયોગ નાહ કેયો, પેન પવિત્રઆત્મા સામર્થ્ય આગેવાનીકી તુમનેહે આખ્યોહો. 5કા તુમા વિશ્વાસુ આધાર લોકુ જ્ઞાનુપે નાય, પેન પરમેહેરુ સામર્થ્ય પે રેઅ.
પરમેહેરુ જ્ઞાન
6તેબી જે લોક આત્મિક રીતીકી મજબુત હાય, તીયામે આમુહુ જ્ઞાનુ ગોઠયા કેતાહા, પેન ઈયા જગતુ અધિકારી નાશ વેરુલો ગોઠયા નાહ કેતા. 7પેન આપુહુ પરમેહેરુ તીયા જ્ઞાનુ ભેદુલે આખતાહા, જો જગતુ બોના પેલ્લા તીયાહા નક્કીજ કી લેદલો કા તીયા જ્ઞાન આને મહિમા આમનેહે આપે. 8આને પરમેહેરુ યોજના ઈયા જગતુ કેલ્લા બી અધિકારીહી નાહ જાંયો, કાહાકા કાદાચે તે જાંતે તા મહિમામય પ્રભુ ક્રુસુપે નાય ચોળતો. 9પેન જેહેકી પવિત્રશાસ્ત્રમે લેખલો હાય, “જે ગોઠયા કીદીહીજ નાહ હેયા તીયા વિશે કીદીહીજ નાહ ઉનાયા, આને જે લોકુ દીમાકુમે બી નાહ આલ્યા, એ ગોઠયા પરમેહેરુહુ જો તીયા આરી પ્રેમ કેતેહે તીયાં માટે તીયાર કેયીહી.”
10પેન પરમેહેરુહુ તીયુ ગોઠી વિશે આમનેહે પ્રેરિતુપે પવિત્રશાસ્ત્ર મારફતે જાહેર કેયા, કાહાકા પવિત્રઆત્મા બાદી ગોઠી, એટલે પરમેહેરુ ગુપ્ત ગોઠયા બી જાંહે. 11તુમા મનુ ગોઠયા ખાલી તુમુહુજ જાંય સેક્તાહા, બીજો કેડોજ નાહ જાંય સેકતો, તીયુજ રીતે પરમેહેરુ ગોઠ ખાલી પવિત્રઆત્મા જાંહે. 12આમુહુ ઈયા જગતુ આત્મા નાહ પેન પરમેહેરુ મોક્લુલો આત્મા મીલવ્યોહો, કા પરમેહેરુ આપલા વરદાનુ ગોઠી વિશે આમુહુ જાંય સેક્જી. 13ઈયા ખાતુરે આમુહુ પ્રેરિત ઈયુ ગોઠીહીને લોકુ જ્ઞાનુ મારફતે હિક્વુલા શોબ્દાકી બીજા લોકુહુને નાહ આખતા, પેન આત્મિક રીતીકી મજબુત હાય તીયાહાને પવિત્રઆત્મા મારફતે આપવામે આલ્લી ગોઠીકી આખતાહા, એટલે આત્મિક જ્ઞાન આત્મિક ગોઠયા કેતાહા. 14પેન શારીરિક માંહુ પરમેહેરુ આત્મા ગોઠયા ગ્રહણ નાહ કેતો, કાહાકા તીયા નજરીમે તોઅ મુર્ખતા હાય. આને તોઅ તીયુ ગોઠીહીને નાહ જાંય સેકતો કાહાકા તીયાલે આત્મિક રીતીકી જાંય સેક્તાહા. 15જીયાહા પવિત્રઆત્મા મીલવ્યોહો તે તીયુ ગોઠીહીને જાંય સેક્તેહે જે પવિત્રઆત્મા હિક્વુતેહે, પેન જીયાહા પવિત્રઆત્મા નાહ મીલવી, તે પવિત્રઆત્મા મીલવુલો લોકુ વિચાર નાહ જાંય સેક્તા.
16જેહેકી પવિત્રશાસ્ત્રમે લેખલો હાય, “કેડો બી ઇ નાહ જાંય સેકતો કા પ્રભુ મનુમે કાય હાય આને તીયાલે હિકવી નાહ સેકતો,” પેન આમુહુ વિશ્વાસ કેનારા જાંય સેક્તાહા કા ઇસુ ખ્રિસ્તુ મનુમે કાય હાય.
Obecnie wybrane:
1 કુરિંથીઓ પત્રો 2: DUBNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Dubli (દુબલી) Bible by The Love Fellowship is licensed under Creative Commons Attribution-ShareAlike 4.0 License.