लूका 2

येशूको जन्म

1तिन दिनमि सम्राट अगस्टसले आफ्नो सारा रोमी साम्राज्यमि जनगणना लिय भण्न्या हुकुम जारि अर्यो। 2कुरेनियस सिरिया प्रदेसका हाकिम हुनज्या यो पइल्ली बेरको जनगणना थ्यो। 3सब जाना जनगणनाकिलाइ नाउँ दर्ता अराउनाइलाइ आफना-आफना पुर्खाका सहरमि गया। 4योसेफ राजा दाउदका बंशका भया हुनाले तिन गालील जिल्लाको नासरत गाउँ बठेइ यहुदिया जिल्लाको बेतलेहेम गाउँ गया।, क्याकि राजा दाउद तइ ठाउँमि जन्मया थ्या। 5नाउँ दर्ता अराउनाइकिलाइ तिन आफसित मगनि भयकि मरियमलाइ संङ लइजाइबर गया, जो गर्भवती भएइ थिइ। 6-7जब तिनन बेतलेहेम गाउँमी थ्या, तब तिननकिलाइ तइ ठाउँमि बस्साकिलाइ ठउर थेइन जाँ यात्री बसनथ्या। तबइकिलाइ तिनन गोठमि बस्या। जब मरियमको बालक पाउन्या बेला आइय्यो, तब उइले ताँ आफ्नो जेठो चेलो जन्मायो। उनले बालकलाइ लत्तामि बेडिबर डुँडमि राख्यो, जाँ मान्सनले जानबरलाइ खानाइ दिनाहान।

गोठला रे स्वर्गदुत

8तसइ इलाकामी केइ गोठाला थ्या, जइले चौडमि बसिबर रातमि आफना बगालको हेरबिचार अरन्थया। 9प्रभुका एक स्वर्गदुत तिनरा वाँ धेका पड्या रे प्रभुको चमक तिनरा वलतिर पलतिर चम्क्यो, रे तिनन बड्ताइ डराया। 10तब स्वर्गदुतले तिननलाइ भण्यो, “जनडरा, क्याकि हेर, म तमनलाइ बरताइ आनन्दको सुसमाचार सुणानउ, जो सब मान्सका निउति हुन्या हो। 11आज बेतलेहेम गाउँमी जो राजा दाउदको गाउँ हो। तमनका निउति एक जाना मुक्तिदाताको जन्म होइरइछ, जो ख्रीष्ट प्रभु हुन। 12यो बालकको हो भणि तमन यो चिन्ह बठेइ था पाउन्या हउ: तमनले एक बालकलाइ लत्ताले बेडयाको रे डुँडमि स्याइ राख्या भेटाउन्या हउ।” 13तब एक्‍कासि तिन स्वर्गदुतसित स्वर्गीय सेनाको एक ठुलो दल धेका पड्यो। परमेश्वरको प्रसंसा अद्दाइ तिननले भण्यो,

14“स्वर्गमि परमेश्वरलाइ महिमा रे

पृथ्बीमि जइ मान्ससित उन भौत खुशी हुनाहान,

तिननलाइ सान्ति!”

15जब स्वर्गदुत तिनन बठेइ बिदा होइबर स्वर्गमि गया, तब गोठालाले आपसमी भण्यो, “आस, हाम बेतलेहेम गाउँ सम्म जानाउ, रे ताँ घट्या यो घटना रे प्रभुले हामलाइ भण्या कुरणी गइबर हेद्दाउ।” 16तिनन हतार अरिबर बेतलेहेम गाउँमी गया, रे मरियम रे योसेफ बस्या ठाउँमि बालकलाइ डुँडमि स्याइ राख्या भेट्यो। 17जब गोठालाले यो धेक्यो, तब यइ बालकको बिसयमि जो कुरणी स्वर्गदुतले तिननलाइ भण्याथ्यो त्यो कुरणी मरियम, योसेफ रे और मान्सनलाइ भणिदियो। 18तिनन सब तइ कुरणीमि छक्‍क पड्या जो गोठालाले तिननलाइ भण्याथ्यो। 19तर मरियमले यिन सब कुरणी मन भितरइ राखिबर सोच्चपसि। 20जसो स्वर्गदुतले तिननलाइ भण्याथ्यो तसोइ सब कुरणी सुण्या रे धेक्या हुनाले, परमेश्वरको महिमा रे प्रसंसा अद्दाइ गोठाला फर्क्या।

येशूलाइ मन्दिरमि अर्पण अर्याको

21बालक जन्मयाको आठौ दिनमि खतना हुनज्या उनरो नाउँ येशू राख्यो, जइ नाउँ उन गर्भमि आउना हइ पइल्ली स्वर्गदुतले दिइराइथ्या।

22जब मोशाको कानुन अन्सार मरियमको सुद्द हुन्या समय पुरा भयो, तब मरियम रे योसेफ यरुशलेम सहरको मन्दिरमि गया। 23-24तिनन ताँ एक जोड कुय्याँ अथवा परेवाका दुइ बच्चा बलिदान चडाउनाइ गयाथ्या। त्यो प्रभुले भण्या कुरणी पालन अददाइ थ्यो। तिनन येशूलाइ समर्पण अददाइकिलाइ लगइ यरुशलेम मन्दिरमि गयाथ्या, क्याकि प्रभुको कानुनमी इसो लगइ लेखिया छ, “पइलो जन्मन्या हरेक जेठो प्रभुको निउति पबित्र हुन्या छ।”

25तइ समयमि यरुशलेम सहरमि शिमियोन नाउँ भया एक जाना मान्स थ्या। उन धर्मि रे भक्तजन थ्या उन उत्सुक भइबर ख्रीष्ट फर्कि आउन्या रे इस्राएल देशका मान्सनलाइ सान्त्वना दिन्या बाटो हेरिरइथ्या, रे पबित्र आत्मा उनसित थ्या। 26“प्रभुका ख्रीष्टलाइ नधेकन्ज्या सम्म तु मद्द्या आथिनी” भण्न्या प्रकाश उनलाइ पबित्र आत्माले प्रकट अर्याथ्या। 27त्यो दिन शिमियोन पबित्र आत्माको अगुवाइमी मन्दिर भितर गया। जब इजा-बाले बालक येशूलाइ उनरो निउति मोशाको कानुन अन्सारको बिधि अद्दाइलाइ मन्दिर भितर लेइबर आया, 28तब तिननले बालक येशूलाइ आफना काखिमि राख्यो, रे परमेश्वरलाइ धन्यबाद दिइबर भण्यो,

शिमियोनको स्तुतिगान

29“आब हे परमप्रभु, आस म, तमरो नौकरलाइ तामले बाचा अर्या अन्सार सान्ति सित मद्द दिय।

30क्याकि मइले उद्दारकर्तालाइ धेकिराइछु जइलाइ तमले सब मान्सनलाइ बचाउनाइलाइ पठायाथ्या,

31जो तमले सब मान्सका सामने तयार अरिराइथ्या,

32उन परमेश्वरलाइ प्रकट अद्दाइकिलाइ गैर-यहुदि मान्सनकि निउति ज्योति हुन रे तमरो इस्राएल देशका मान्सनकि निउति उन आदर हुन।”

33येशूका इजा-बा शिमियोनले उइका बारेमि भण्या कुरणीमि अचम्म माण्यो। 34शिमियोनले तिननलाइ आसिर्बाद दियो, रे उनरी इजा मरियमलाइ भण्यो, “हेर यो बालक इस्राएल देशमि नष्ट अददाइ रे भौत मान्सनलाइ मुक्ति दिनाइ नियुक्त भएका हुन रे उन परमेश्वर बठेइ चिन्हका रुपमि पठाया छ, तर भौत मान्सनले उनरो बिरोध अदद्या हुन। 35तिननले आफ्ना बिचार धेकाउन्या हुन, रे तरबारको जसो ठुलो दुःखले तेरो आफ्नोइ हृदय लगइ छेडीन्या हो।”

36आशेरका कुलमी फनुएलकि चेली हन्ना नाउँ भएइ एक बुढी अगमबक्ता थिन, जो ब्या अरिबर सात बर्ष मान्तरइ बैकानसित बसेइ थिन। 37रे बिधवा रइबर उन चौरासी बर्षकि थिन। उनले कभइ मन्दिर छाड्नथीन्न, तर उपवास रे प्रार्थनासित रातदिन आराधना अरन्थीन। 38तसइ बेला उनले आइबर परमेश्वरलाइ धन्यबाद दियो, रे यरुशलेम सहरका मान्सनलाइ छुटकारा दिनाइ ख्रीष्टलाइ पठाउनाइ निउति परमेश्वरको बाटो हेद्दया सबलाइ बालकका बारेमि भण्न्न पसि।

39जब मरियम रे योसेफले प्रभुको कानुन अन्सार सब काम अरिबर सक्यो, तइ पछा तिनन गालील जिल्लामि आफनोइ नासरत गाउँमी फर्क्या। 40बालक बुद्दिले भरिबर बड्डाइ रे बलियो भयो, रे परमेश्वरको अनुग्रह उनमी थ्यो।

मन्दिरमि बालक येशू

41येशूका इजा-बा निस्तार काजबारमि बर्ष बर्षै यरुशलेम सहर जान्या अरन्थया। 42जब येशू बार वर्षका भया, तब उन चाडका रित अन्सार यरुशलेम सहरमि गया। 43चाडका दिन सकिया पछा मरियम रे योसेफ फर्किन्या बेला बालक येशू यरुशलेम सहरमि रया। यइ कुरणी उनरा इजा-बाले पत्ता पाएइन। 44उन तिननसित यात्रा अद्द्या दलसित छन भणि सम्जिबर तिनन एक दिन भरि हिट्या। तिननले उनलाइ आफना नातेदार रे साथिनका बिचमणि खोज्ज पस्या, 45तर नपाइबर तिनन उनलाइ खोज्जाइ आजी यरुशलेम सहरमि फर्किया। 46तीन दिन पछा तिननले उनलाइ मन्दिरका आगनमी शिक्षकका बिचमि बसिबर तिनरा कुरणी सुणनाइ तिननसित प्रश्न अद्दार्या पायो। 47सुण्न्या सब उनरो समज-सक्ति रे उनले दिया उत्तरमी छक्‍क पडन्थ्या। 48उनलाइ धेकिबर उनरा इजा-बा छक्‍क पड्या, रे उनरी इजाले भण्यो, “ए चेला, तुइले हामलाइ यिसो कि अरि? हेर, तेरा बा रे म हइरान होइबर तुलाइ खोज्जाथ्या।”

49उनले तिननलाइ भण्यो, “तमनले मलाइ क्याकि खोज्या? म आफना बाका घरमि हुनु पणन्छ भण्न्या तमनलाइ था थेइन ब?” 50तर उनले तिननलाइ भण्या कुरणीको अर्थ तिननले बुज्जइ सकेइन।

51रे उन तिननसित नासरत गाउँमी गया, रे तिनरा आज्ञाकारी होइबर बस्या। उनरी इजाले यिन सब कुरणी आफना मनमि राख्यो 52रे येशू बुद्दिले भरिबर, कदमि रे परमेश्वरको रे मान्सको अनुग्रहमी बड्डाइ गया।

Obecnie wybrane:

लूका 2: DTYNT

Podkreślenie

Kopiuj

Porównaj

Udostępnij