PAIMBA 9
9
Posusa Pasa anu karadua
9:1-14
1 #
Pa. 12:1-13
Ri wuya anu kaʼisa ri taʼu karadua palai nto Isaraeli ungka ri tana Masiri, i Pue mompau ri Musa ri pada bone Sinai. Ndatoʼo i mPue, 2-3“Ri sampuyu pai aopo eo mbuya ri wuya seʼi, tepuʼu soyomo reme, waʼa nto Isaraeli sangaya-ngaya da mawianaka Posusa Pasa malulu padika anu roo ndapakanoto.” 4Inceʼe painaka napokau i Musa to Isaraeli mawianaka Posusa Pasa. 5Naposusaka ntau seʼe ri pada bone Sinai ngkinowia ri sampuyu pai aopo eo mbuya wuya anu kaʼisa. Pura-pura nawianaka ntau seʼe silulu pai anu ndapesongkaka i mPue ri Musa.
6Paikanya reʼe bara tesangkuja tau anu karika ua roomo maisu watangkoro ntau mate, painaka bareʼe maya malulu posusa Pasa ri eo setu. Tau seʼe njoʼu madadu i Musa pai Haruni, 7natoʼo “Kami seʼi karika maka roomo maisu watangkoro ntau mate. Paikanya nunjaa puʼunya painaka ndapetangani kami seʼi da mampanyombaka panyomba ri Pue, sangkani-ngkani pai waʼa ngkasangkompo mami?”
8Mesono i Musa, “Ndipopea riunya, rantani kutarima totoraka ungka ri Pue.”
9-10I Pue mampokau i Musa mantoʼoka to Isaraeli, “Ane reʼe ri oyomi bara ri oyo waʼa mulimi anu karika ua mangaisumo watangkoro ntau mate bara ntongo mpelinja lawa, siʼa seʼe sangaya-ngaya da mamposusaka Pasa gala i mPue. 11Paikanya posusa setu da nawianaka ri wuya anu da rata, inceʼemo ri wengi sampuyu pai aopo eo mbuya muya karadua. Posusakamo eo setu, mangkoni bimba Pasa pai roti anu bareʼe ndaragi pai inau anu mapaʼi. 12#Pa. 12:46, Yoh. 19:36 Neʼe boi reʼe ndidika yabi mpangkoni setu rata ri mowuro raneonya, pai neʼe boi reʼe mau sambaʼa wuku mpinatuwu anu ndipanyombaka ri Yaku anu da ndapuʼasi. Posusakamo Pasa setu silulu pai waʼa mpadikanya.
13Paikanya tau anu bareʼe karika pai bareʼe woʼu ri raya mpelinja anu lawa pai naoamo bareʼe mamposusaka Pasa, tau setu ndareke bareʼemo tesua ri imba waʼa ntau-Ku, ua siʼa bareʼe mampanyombaka panyomba ri yaku ri tempo anu ndapakanoto. Tau setu sangaya-ngaya da mangkoyo huku ncalaanya.
14Ane rapanya ri oyomi reʼe sambaʼa tau mencua anu da rayanya mosusa Pasa, siʼa sangaya-ngaya da mamposusaka silulu pai pura-pura padika anu ndapakanoto. Padika setu kono pura-pura tau, madago to Isaraeli madago woʼu tau mencua.”
Limu anu merara
9:15-23
(Pa. 40:34-38)
15-16Ri eo pangawangu Kema i mPue, tudumo limu anu kangkulamuti Kema setu. Ane mawengi nakarataka mowuro limu setu ndakita ewa apu. 17Ane meangkataka limu setu, to Isaraeli da marongkasi kema ntau seʼe, nepa malai woʼu. Pai rimbeʼi woʼu petudu limu setu njairia woʼu da pokema ntau seʼe. 18Ua pasongka i mPue banca Isaraeli marongkasi kemanya pai ua songka i mPue nawangu woʼu. Sangkasae limu setu ndate ri wawo Kema i mPue, tau seʼe da maroo-roo njairia. 19Ane masae karodo limu setu ri wawo Kema i mPue setu, tau seʼe medonge ri pampakanoto i mPue bareʼe da malai ungka njairia. 20Paikanya podo tesangkuja ndeme limu setu rodo ri wawo Kema setu. Mau ewambeʼi, songka i mPue anu mampakanoto palai pai karoo-roo ntau seʼe. 21Tesasaoyo sambengija peʼonto limu setu, mowuro meangkataka muni, peangkataka limu ri mowuro tau seʼe woʼu da malai. Impia ntano peangkataka limu setu, madago mareme bara mawengi, malai tau seʼe. 22Sangkasae limu setu rodo ri wawo Kema i mPue, bara radua eo, sambuya, santaʼu bara meruu, sangkasae setu woʼu da karoo-roo ntau seʼe njairia. Sangadi meangkataka limu setu nepa da malai tau seʼe. 23Maroo-roo bara melimba ri kareʼe anu ntaninya da silulu pai songka i mPue mampoliu i Musa.
