PAIMBA 8
8
Cara da ndapadika silo
8:1-4
1 #
Pa. 25:31-40, 37:17-24 I mPue mompau ri Musa ndatoʼo, 2“Toʼokamo i Haruni ri tempo da napantutuni silo papitu anu lau ri potunda ncilo setu, da natutuni mpodago rantani kono narara witi ncilo tondo ri suara.” 3Nawiana i Haruni wuwunya anu ndapesongkaka i mPue. Siʼa mantutuni waʼa ncilo setu masuara tondo suara witi ncilo. 4Potunda ncilo setu, sangkani pai ramba-rambanya paka ungka ri wuyawa anu ndapalu, malulu pandiri anu ndatuju i mPue ri Musa.
Pampatongko waʼa nto Lewi
8:5-26
5I Pue mompau ri Musa ndatoʼo, 6“Patanimo waʼa nto Lewi ungka ri to Isaraeli anu ntaninya pai wianakamo upacara pampakagali tau seʼe, ewaseʼi: 7webusikamo tau seʼe pai ue upacara pompakagali pai pokaumo tau seʼe juku-juku wuyu ngkoronya pai mabusu rengko ntau seʼe. Ewanceʼemo napampakagali ntau seʼe koronya. 8Nepa nupokau tau seʼe mantina sambaʼa japi laki anu mangurapa sangkani pai panyomba anu motaʼa pangkoni ungka ri tarigu nagalo lana. Pai siko sangaya-ngaya da mantima sambaʼa japi laki anu ntaninya da mewali panyomba ngkabareʼenya ndakitanaka salaa. 9Roo setu pasambakamo waʼa nto Isaraeli pai pokaumo waʼa nto Lewi mekakore ri suara Kemaku. 10Waʼa nto Isaraeli sangaya-ngaya da maʼokotaka palenya ri wawo ntanoana waʼa nto Lewi, 11i Haruni sangaya-ngaya da mampanyombaka waʼa nto Lewi setu ewa panyomba anu ndapatani ungka ri to Isaraeli ri yaku, da naka nakoto ntau seʼe mawianaka panyomba ri yaku. 12Roo setu to Lewi sangaya-ngaya da madika pale ntau seʼe ri wawo mboʼo radua japi laki setu; anu sambaʼa sangaya-ngaya da ndapanyombaka mewali panyomba ngkabareʼenya ndakitanaka salaa, pai anu sambaʼa woʼu da mewali panyomba anu ndaʼombasi. Pai upacara setu to Lewi ndapakagali.
13Patanimo waʼa nto Lewi setu galaku pai pokaumo tau seʼe da mamporiokoi i Haruni pai waʼa ananya. 14Pai upacara setu, komi mampatanimo waʼa nto Lewi ungka ri to Isaraeli ntaninya, da naka mewali anuku. 15Karoonya siko mawianaka upacara pampepombaika waʼa nto Lewi setu, tau seʼe sintinajamo motetala ri raya Kemaku. 16Yaku mampapewalimo tau seʼe mancandari pura-pura ana uyue tuama nto Isaraeli; mewali tau seʼe ndapatani da galaku. 17#Pa. 13:2 Ri sindara Kupaʼopisaka ana uyue ri tana Masiri, ana uyue tuama ri sombori nto Isaraeli pai pura-pura pinatuwu anu uyu pampoana kupatanimo galaku. 18Seʼi-seʼi waʼa nto Lewi mancandari pura-pura ana uyue nto Isaraeli, 19pai waʼa nto Lewi setu kupepombaika ri Haruni pai waʼa ananya, da naka tau seʼe mampancaruka to Isaraeli motetala ri raya kema-Ku. Pai tau seʼe woʼu mamperapi puruka to Isaraeli ri yaku da naka banca bareʼe marata silaka ane rata mosu gaga ri kareʼe anu magali setu.”
20Inceʼe painaka i Musa, i Haruni pai waʼa nto Isaraeli da mampanyombaka to Lewi ri Pue, ewa anu roo ndapesongkaka i mPue ri Musa. 21Waʼa nto Lewi setu mawianaka upacara pompakagali koronya pai mabusu rengko ntau seʼe, nepa napanyombaka i Haruni waʼa ntau seʼe ewa pombai anu tepatani ri Pue. Siʼa mawianaka woʼu upacara pampakagali tila ntau seʼe. 22To Isaraeli mangawianaka pura-pura anu ndapesongkaka i mPue ri Musa anu mangkono to Lewi. Ua kaʼinceʼenya to Lewi sintinajamo motetala ri raya Kema i mPue natadulakoni i Haruni pai waʼa ananya.
23I Pue mompau ri Musa ndatoʼo, 24“Pura-pura to Lewi anu ganamo ruampuyu pai alima ntaʼu waindeku, sangaya-ngaya da mawianaka tetala ri raya Kema-Ku, 25pai ri tinuwu alima mpuyu ntaʼu siʼa da ndapapeʼonto ungka ri tetalanya. 26Roo setu siʼa maya mampela to Lewi anu motetala ri raya Kema-Ku, paikanya siʼa bareʼemo resoʼo ri tetala. Ewanceʼe padedewaka ndapampasilolongani potetala waʼa nto Lewi.”
