PAIMBA 5
5
Padika kono tau karika
5:1-4
1Ndatoʼo i mPue ri Musa, 2“Toʼokamo waʼa nto Isaraeli padika seʼi: Pura-pura tau anu ketangga bara anu toyoi nana, bara anu maisu watangkoro ntau mate, da nupapesuwu ungka ri kareʼe mpokema nto Isaraeli. 3Tau seʼe sangaya-ngaya da ndapokau malai, da naka neʼe napaka karika kareʼe mpokema, maka yaku da maroo-roo sangkani-ngkani pai waʼa ntauku.” 4Nawianaka nto Isaraeli songka mpadika setu napokau ntau seʼe mesuwu ungka ri raya ngkema pura-pura tau anu majuʼa ewanceʼe.
Padika kono pombayari kasalaa
5:5-10
5-6 #
Tad. 6:1-7
I Pue mawaika i Musa waʼa mpadika seʼi anu da nalulu nto Isaraeli. Ane sambaʼa tau anu bareʼe mepoʼinaya ri Pue ua mowia sala ri kasitaunya. 7Tau setu sangaya-ngaya da mangaku salanya pai da mabayari gana-gana, pai ndarangani ruampuyu parasee ri tau anu napakarugimi setu. 8Paikanya, ane matemo tau anu naparugi setu pai tau setu bereʼe ananya bara kasangkomponya anu mosu, pombayari setu da ndawaika i Pue da gala tadu mpanyomba. Pombayari setu bareʼepa tesua bimba laki anu da napanyombaka ntau anu masalaa setu tila ngkatesompo ncalaanya. 9Ungka ri mpengaya-ngaya anu napanyombaka nto Isaraeli ri Pue, da reʼe anu tepatani da tila tadu mpanyomba anu mantarima panyomba setu. 10Nunjaa anu napanyombaka ntau ri Pue inceʼe mewali tila ntau setu ngkalionya. Podo nunjaa anu napepombaika ri sambaʼa tadu mpanyomba, inceʼe ntadu mpanyomba setu.
Padika kono rongo anu natumoposaka langkainya
5:11-31
11-14Ndapokau i mPue i Musa mamparata waʼa mpadika seʼi ri to Isaraeli. Boi reʼe tuama mantumoposaka rongonya. Nasawanga ndaya rongonya roomo mowongo-wongo pai tuama ntaninya, painaka bareʼemo magali koronya. Paikanya bereʼe kanotonya narata langkainya, maka nawianaka mesasambuni pai bereʼe tau mewali sabi, pai bereʼe naparata-rata. Bara pantumoposaka langkainya setu bereʼe kamonconya maka bereʼe powia ndongonya. 15Anu radua ngaya seʼi i langkai sangaya-ngaya da mangkeni rongonya ri tadu mpanyomba. Da nakeni woʼu panyomba anu ndapanyombaka inceʼemo kilo tarigu gandu. Tarigu setu bareʼe maya ndadikaka lana saitu bara ndadikaka dupa, maka incetu panyomba ngkatumopo, anu posokinya mewali petondoni kareʼenya katumopo i langkai ri rongonya.
16Tadu mpanyomba sangaya-ngaya da mampokau weʼa setu mekakore ri suara lampaʼani mpanyomba mancuaraki i Pue. 17Tadu mpanyomba setu sangaya-ngaya da mantima samponga tabo tana, natawaka sakodi ue magali. Roo setu da natima sakodi awu ungka ri ara Kema i mPue da nadika ri ue setu. 18Ungka lairia sangaya-ngaya da nabowosi tinuku mbeʼa setu, nepa tarigu mpanyomba ngkatumopo da nadika ri palenya, nepa tadu mpanyomba mangkekeni ue mapaʼi inceʼemo ue mpontadeasi. 19Roo setu da natoʼo i ntadu mpanyomba pau pontandokoro anu nasintuwunaka mbeʼa setu. Tadu mpanyomba sangaya-ngaya da mantoʼo, “Ane bareʼe mosalara siko, bareʼe da kono ntadea siko anu napareʼe ue mpontadeasi seʼi. 20Paikanya ane roomo mosalara siko, 21mbolimo i Pue da mampakonoka siko tadeasi pontandokoromu ri oyo waʼa bancamu. Mbolimo Sira da mampapemore puʼu mpaʼamu pai da mampakaboro kompomu. 22Ue pontadeasi seʼi da mesua ri raya ngkompomu da mampakaboro pai da mampapemore puʼu mpaʼamu.”
Da mesono weʼa setu natoʼo, “Sintuwu yaku; mbolimo i Pue mampowia ewanceʼe.”
23Tadu mpanyomba sangaya-ngaya da maʼuki tadeasi setu ri karatasa anu ndayuyu nepa napalisika ue mapaʼi setu. 24Tadu mpanyomba mampokau weʼa setu da mainu ue mapaʼi anu mampareʼe tadeasi. Ane nainumo ue setu pai naepe majuʼa. 25Tadu mpanyomba sangaya-ngaya da mantima tarigu mpanyomba setu, da natanderaka ri suara i mPue nepa nakeni ri lampaʼani. 26Ungka lairia da natima sangkaku tarigu mewali petondoni pura-pura tarigu setu roomo ndapanyombaka, nepa naʼombasi ri wawo lampaʼani. Kapusanya, ue setu da napapanginuka weʼa setu. 27Ane rapanya weʼa setu roomo mosalara, ue setu da mampakaʼai napaepe majuʼa; komponya da mewoke pai puʼu mpaʼanya da memore. Toʼonya da mewali pontadeasi ri oyo bancanya. 28Paikanya ane rapanya weʼa setu bareʼe masala, siʼa bareʼe da nakono ntadea pai ntongo da moanapa.
29-30Ewanceʼe padikanya ane reʼe sambaʼa langkai tumopo pai mancawanga ndaya rongonya mowia majaʼa mampaka keʼonu koronya. Tuama setu sangaya-ngaya da mangkeni rongonya ri suara i mPue pai tadu mpanyomba da mawianaka songka mpadika setu ri siʼa. 31Tuama setu bareʼe kono salaa, paikanya rongonya ane tongawa monco powianya sangaya-ngaya da nakoyo hukunya.
