PAIMBA 4
4
Totala nto Lewi ungka ri muli i ngKehati
4:1-20
1Ndapokau i mPue i Musa pai Haruni, 2maimba to Lewi muli i ngKehati malulu samborinya santina-santina seʼe, 3pai da maʼuki pura-pura toʼo ntuama montepuʼu ri tinuwu togo mpuyu ntaʼu rata ri tinuwu lima mpuyu ntaʼu, anu mangkoto da motetala ri Kema i mPue. 4Tetala ntau seʼe inceʼemo mampasilolongani waʼa mparewa anu magali mpodago.
5Ndapatada i mPue i Musa ewaseʼi, “Ane jelamo temponya da marongkasi wa ʼa ngkema, i Haruni pai waʼa ananya da mesua ri raya Kema i mPue, mangayali ayapa makumba ri suara mPeti mPojanji, ayapa setu da nakaʼuwika Peti setu. 6Roo setu da nakaʼuwika woʼu ntau seʼe pai pela anu maʼalusu, nepa naboborika ayapa anu mayawuyu ri wawonya, nepa napataka kaju mpoaju mPeti setu.
7Meja kareʼe roti anu ndapatokaka i Pue da nakaʼuwika ayapa mayawuyu ri wawonya, pai ri wawo meja setu da nadika ntau seʼe surayanya, baki padika dupa, baki padika panyomba, pai bokori ngkareʼe anggoro anu da ndapanyombaka. Roti anu da ndapanyombaka kanjau-njaunyamo ri wawo meja setu. 8Pura-pura setu da ndakaʼuwika ayapa mawaa, nepa naboborika pela anu maʼalusu ri wawonya, nepa napatakaka kaju anu ndapoajuka meja setu.
9Witi ncilo sangkani pai waʼa ncilonya, parewa mpadika lana saitu anu da ndawusoʼika waʼa sumbu ncilo setu da nakaʼuwika ntau seʼe ayapa anu mayawuyu. 10Witi ncilo pai pura-pura parewanya da napujuka ntau seʼe pela anu maʼalusu nepa nadika ntau seʼe ri wawo ngkaju mpoaju.
11Roo setu lampaʼani muyawa da ndakaʼuwika ayapa mayawuyu ri wawonya, nepa ndaboborika ple anu maʼalusu, nepa ndapatakaka kaju mpoaju lampaʼani setu. 12Pura-pura parewa ri raya Lincu Magali da napujuka ntau seʼe ayapa mayawuyu. Nepa nakaʼuwika pela anu maʼalusu pai nadika ri wawo ngkaju anu da ndapoajuka. 13Da nayali ntau seʼe awu ri lampaʼani setu, nepa nakaʼuwika ayapa makodara ri wawonya. 14Pai da nadika ntau seʼe ri wawo lampaʼani setu parewa anu da ndapake mawianaka panyomba inceʼemo: tampa mpadika apu, sarompo, isuyu pai loya. Pai pura-pura setu da nakaʼuwika ntau seʼe pela anu maʼalusu, nepa ndapasuaka kaju mpepasaʼa moaju.”
15-20Ndatoʼo i mPue ri Musa pai Haruni, “Ri tempo da ndiparongkasi waʼa ngkema, i Haruni pai waʼa ananya da mesua ri raya ngKemaku da mangkaʼuwi pura-pura waʼa mparewa anu reʼe ri rayanya. Roo setu nepa maya mesua waʼa nto Kehati da mampoaju. Paikanya bareʼe maya nabulere, bara nauati pai napeole ntau seʼe waʼa mparewa setu maka roomo ndapakagali galaku. Pai ane nawianaka ntau seʼe incetu, tau seʼe da mate. Mewali, da naka neʼe posa to Kehati ri lemba nto Lewi, i Haruni pai waʼa ananya da mantilaka tau seʼe tetala da mampakanoto anu da nakeni ntau seʼe. Incetumo tetala nto Kehati ri tempo ndapangalimba Kemaku. I Eliasari ana i Haruni mangajagai Kemaku pai pura-pura banganinya, lana ncilo, dupa, roti anu ndapatoka da ndapanyombaka, lana mpoʼupacara pai anu ntani-ntaninya.”
Tetala nto Lewi ungka ri muli i Geresoni
4:21-28
21-22Ndapokau i mPue i Musa maimba to Lewi inceʼemo muli i Geresoni malulu somborinya santina-santina seʼe. 23Da naʼuki i Musa pura-pura toʼo ntuama montepuʼu ri tinuwu tatogo mpuyu ntaʼu rata ri tinuwu lima mpuyu ntaʼu anu mangkoto da motetala ri Kema i mPue. 24Tetala ntau seʼe inceʼemo da mangkeni waʼa mparewa seʼi: 25Tenda ngKema setu sangkani pai pela anu maʼalusu anu ndalapisika ri wawonya pai ri rayanya, pai ayapa mpoompo wombo ngKema, 26waʼa layari pai wayaanya anu ndapake ri tambale sape-sape Kema setu, lampaʼani, ayapa anu ndaomponika wombo mpesua ri tambale, pai pura-pura parewa anu ndapake da mampataka pura-puranya setu. Tau seʼe da mamporipalei pura-pura tetala anu mokenta pai waʼa mparewa setu. 27I Musa pai i Haruni da mamparesa da naka waʼa ntetala anu napepombaika i Haruni pai waʼa ananya ri muli i Geresoni setu nawianaka, da naka pura-pura parewa anu da ndakeni sangaya-ngaya da ndakeni. 28Incetumo tetala nto Geresoni ri Kema i mPue; pawianaka tetala setu natadulakoni i Tamari, ana i nTadu mPanyomba Haruni.
Tetala nto Lewi ungka ri muli i Merari
4:29-33
29Ndapokau i mPue i Musa maimba to Lewi inceʼemo muli i Merari malulu somborinya santina-santina. 30Da naʼuki i Musa pura-pura toʼo ntuama montepuʼu ungka ri tinuwu togompuyu ntaʼu rata ri lima mpuyu ntaʼu, anu mangkoto da motetala ri Kema i mPue. 31Tau seʼe ndawaika tetala da mangkeni waʼa mparewa ngKema setu inceʼemo: woʼo ncobonya pai potundanya. 32Sangkani pai waʼa nono ntambale sape-sape Kema setu lau pai potundanya, waʼa mpatonya pai wayaanya sangkani pai waʼa mparewa anu da mampakaroso pekakore ngKema setu. Sambaʼa-sambaʼa tau ndatilaka wungka-wungka anu da nakeni. 33Incetumo tetala nto Merari, pura-pura pawianaka ntau seʼe tetala setu, natadulakoni i Tamari ana i nTadu mpanyomba Haruni.
Paimba waʼa nto Lewi
4:34-49
34-48Silulu pai songka i mPue, i Musa pai i Haruni sangkani pai waʼa ntadulako nto Isaraeli maimba tatogo ntina tau ri lemba nto Lewi inceʼemo: to Kehati, to Geresoni pai to Merari. Pawianaka ntau seʼe poimba setu, naimba sancombori-sancombori. Naʼuki ntau seʼe pura-pura toʼo ntuama montepuʼu ungka ri anu togompuyu ntaʼu tinuwunya rata ri tinuwu limampuyu ntaʼu anu mangkotomo mawianaka tetala ri Kema i mPue. Seʼimo poromunya:
| Tina | Imba ntau |
|---|---|
| Kehati | 2.750 |
| Geresoni | 2.630 |
| Merari | 3.200 |
| Poromunya: | 8.580 |
49Silulu pai songka i mPue ri Musa, sambaʼa-sambaʼa tau ndaʼuki toʼonya pai ndawaika tetala anu da nawianaka bara anu da nakeni.
