Korint II 1
1
Heb nongen hanu.
1Io Paulus, hom lao ad Jesu Kristo, Jehova gin loh i le mburer aden, ma ndere Timoteus, iouoro beani nongen hian le ndro su ad Jehova ber Korint, ma le ndro su lao helian masigane ber gor asu Grek. 2Golnisden, ma benu ad Jehova i da ge ndro mu, ad Damdu, ma ad Ndorlaben Jesu Kristo.
Paulus mugueni Jehova, i da gin rumburdi i.
3Iou bamugueni Jehova, Damen ad Ndorlaben adu Jesu Kristo, i da ibdi gahaloseli me ndro du, i da rederhi du. 4Ndangen i gin rederhi du le rang adu momen, i da gin meher ndro du. I ha lengi, iou rederhi su masi lie le rang asu momen, iou gob hian le ndro su, dege Jehova gin hinen i me ndro du hanu. 5Ngendian ad Kristo gin meher ndro du dsoln, i rederhi du le rang adu momen gle hian lie. 6Be ngendian adu dsoln na gmehere ndro du, aga gle sobani mu, mu horuan gleri. Be Ndorlaben i rederhi du le rang adu momen, dandu rederhi mu dagara lie le rang ademu momen i da ndro mu. Ndorlaben i hengen ndoui me ndro du, iou ndoa ge le rang momen adu be ngendian dsoln i da ge ndro du. 7Dandu mu ndoa dege iou lie, dandu, ngendian ad Ndorlaben i da ge ndro mu, i rederhi mu gle nongen aden hian dagara lie.
8Mu ndere hian, iou beg bosoui le ndro mu le ngendian masi le rang momen, i da gin meher ndro du, be iou da le gor Asia mandehe. Ndangen ngendiadu dsoln gin meher ndro du, baghege iou ginmad leri. 9Ndangen iou gin hanguruen le bergoldu, iou gmed. Ndorlaben i ha lengi, iou belengeni aden ge, de hanguruen heb ndoui adu bui, ir belengeni Jehova ge, i da ndoa le hingeni su le ngad asu su da ginmad. 10I gin rumburdi du le longu ogo masi momen, i da gin meher ndro du. I rumburdi du le longu masi i da beg meher muren lie. Iou belengeni aden ge, i ge, i grumburdi du le longu masi momen. 11Dandu i, mu lie, mu ha soling ndro Jehova i osbani du. Ndangen su mabosanged su gin ndemani Ndorlaben, i osbani du, malabo i gin sobani du, gabmugueni Ndorlaben le golnisden aden, i da gin meher ndro du.
Heb nongen le ndro su, su da gin bo iil le ndro Paulus.
12Iou mugueni longu hendre ge: Dandu, iou gin irgai hian, monen ge le bormarn ad Jehova, dandu heb longu momen bugane. Iou gin irgai hian dagara le ndoui ad hom ndramed ber boan bui, le ndoui ad Jehova ge. Iou gin irgai monen le molengasu ndramed masi ber boan, ma le bormarmu dagara lie. 13Be iou hondre nongen dege ogoro le ndro mu, nongen adu i monen ge, iou hanguruen le bergoldu le longu hendre e hendre, dege iou gin hondre le ndro mu. Iou ha lengi danmu hanguruen monen gleri, dege iou gin hondre. 14Longu hendre e hendre danmu leri, dege heb longu ogo: Ndorlaben ber lang i mugueni du, be i ilndri mu, i mugueni mu lie be i ilndri du, iou ha mugmug, mu ha mugmug lie, mabenan le rang, be Ndorlaben adu Jesu Kristo na gmeher lie.
15Aga hanguruen adu. Iou ha leng dogi le ndro mu, iou ha leng mugmug bersilie gle ademu. 16Boen iou ha leng dogi le gor Korint, le ndro su ber Masedonia, boen io leng dogi mul le ndro mu, su holel ademu su gdulieni io le gor asu Judea. 17Be io ha leng dogi dege ogoro, io gin hanguruen momen derbe? Io hanguruen dege su ndramed ber boan ogo, su hanguruen i ie? Be io bai ehe, io hanguruen bugane derbe? 18Jehova i danen i, nongen adu le ndro mu i monen ge, ehe adu i bugane bui, bugane adu i ehe bui. 19Ndur Jehova, Jesu Kristo, iou gin bohernou le ndro mu, io ma Silvanus, dagara Timoteus, Jesu Kristo ogo, nongen aden i ehe, ma i bugane bersi bui, ehe aden i ehe ndangen. 20Jehova i gin bosoui longu mabosanged, i da beg hengen le ndro su lao aden, i gin hengeni le ndro su, dege i gin bai goru. Jesu Kristo i gin meher, i ogo, i ehe ad Jehova. Aga Amen le nongen ad Jehova, i beg daui engerang aden me ndro du. 21Jehova, i ge, i gin hengen me ndro du ndoui ad Kristo i gin daui ndrelgei helian le borbaldu, 22i gin daui gelman aden le bergoldu, aga Meluan Helian i da le bergoldu.
23Io eloh Jehova, i ge, i danen i, desa io de gin meher ndro mu roud bui: Io ha leng belengeni mu heb ge mandehe. 24Iou ndorlaben ademu bui, bugane, iou ha leng sobani mu, mu gu mugmug ge, mu masi mu da gin boro ndoui ad Ndorlaben hian ge.
Obecnie wybrane:
Korint II 1: LLENT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Published by the British and Foreign Bible Society 1956