Zakharia Uram 13
13
Er Imtamnyi biryi, “Kwemdeina molon dinyi ab tola eboka kunurminingna nang ab ara kum daneibkwan,” eboka kunubdeibmou uram deyok
13:1-6
1Er Imtamnyi biryi ato eboka kunubdeibmou, “Aminda uki tentok berekwande tum ara Niryi me u kukdongobkwan. Ara, Niryi Daud ai ninyi ab Yerusalem atei kunung nang ab aryi sun malyi kuramingnyi dinyi ab sunsi beterdongoramingnyi dinyi ab asi ilikabokwan ati, me u kukdongobkwan. 2Ba, a talak aryi Ni Imtamnyi biryi a mutuk dam kurur kwemdeina molon dinyi si ara kum daneibkwan. Ba, ninyi aryi kwemdeina si tubto kum si sibkwaming. Ani, a mutuk dam aryi tola uram eboka kunurminingnung nang ab malyi kurminingni isa kanya amangdur nang ab ara Niryi kisibdonokwan. 3Asi ninyi tentok aryi anaboka uram ermurunanyi nabi kibdandobdiryi, uram eboka kunubminikwande. Uca, anyi er deiandingnyi nang bitinyi, er nai ab er kwin ab aryi ersi ato ebkwanding. ‘Kan enmarim uram ara Er Iya Erebdobnyi si deici aryi tola uram enmarim bikmakinim. Ati, kanda kam kum kubkwandim,’ ebkwanding. Ato ebdingnyi bok, anyi biryi er nai er kwin uram kekena kum kubdiryi taba deiboka uram tuba eboka kunurminingmaci ura, er deiandingnyi nang bitinyi aryi ya lukoka obkwanding. 4Ura, a talak aryi tola uram eboka kunurminingnamingnyi nang sun alyi aryi tubto uram ermurun nang nabi nang kum kibdankwaming. Ani, sunci tola uram eboka kunubminikwamingiryi, uram ermurun nang kikniboka ongoramingnyi aling, bisam otong aling ara tubto ongoboka uram kum ebkwaming. 5Bok, sun yuk-yuk aryi ato ebkwaming. ‘Nira uram ermurunanyi nabi kuma. Eda, nira wa tukwe talenanyi bica. Wa tukwe talena asi ni dinyi aca,’ ebkwaming. 6Ba, yuk nang aryi ersi ato eboka asibdenkwaming. ‘Kan nong deici ara unatoa aryi oankou ba, dilaka cabkou do?’ eboka asibdenkwaming. Uca, erci ato ebkwande, ‘Kum, ara ni kwit yabwe atei aryi oanoua asi dilaka cabnoua,’ ebkwande,” eboka Er imtam yin doun nang sienyi biryi kunubdeibmou.
Bisam domba kalingnanyi obingnyi ba, bisam domba mer ara daluboka bokwalwalabdankwaming uram deyok
13:7-9
7Er Iya Erebdobnyi biryi ato eboka arukmou, “We, ninyi on ya e. Tikokminyi ura, Ni bisam kalingnanyi bisi obdum. Ni ab tonkwa uruna kununumnyi bisi obdum. Bisam domba mer ara daluboka bokwalwalabdankwaming ati, kanci bisam domba kalingnanyi bira obkabokdum. Ba, Niryi taruk lakoka sun ni uram keken nang asi wenebkwan.#Mat. 26:31; Mrk. 14:27 8Ba, a mutuk dam atei nirya asi meici kukoka deici winiryi kibdeibkwan. Ukubdeibnyi ura, tubto ton bitinyi deici ara kum daneibnyi ura, tentok deici ara takdongobkwan ba, kam kubdobkwaming. 9Ura, Niryi a tentok takdongoanyi deici nang asi dobtaleboka keil uk daboka bitaraming to kubdeibkwan. Ba, a nang ara ninyi aryi keil si perak uk daboka bitaraming ato nang kubkwande. Ani, Niryi sunsi dengna weik keil si emas uk daboka dibdenkwamangnyi ati, uk daraming to sunsi uk daboka dibdenkwan. Ba, sunci Ni si asi nabningnyi ura, Niryi sunsi uram dekeibkwan. Ara, Niryi sunsi, ‘Sunda, Niryi wibmasise nang, Ni mabwe nermabwe kundarur,’ ebkwan. Ba, sunbabyi ato ebkwaming, ‘Er Iya Erebdobnyi bira nun Nai nun Molonanyi kurur,’ ebkwaning,” ato eboka Er Iya Erebdobnyi biryi arukmou.
Obecnie wybrane:
Zakharia Uram 13: MTG
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@LAI 2007 (New Testament), @LAI2022 (Old and New Testament)