Zakharia Uram 12
12
Yerusalem atei asi lebdeiboka tubto yumkuna dobkwamnyi to ati kunubdeibmou uram deyok
12:1-9
1Er Iya Erebdobnyi biryi sun Israel nang deyok ati uram ato ebdeibmou. Ara, Er Iya Erebdobnyi bira im deibdongobmounyi kurur. Ani, tonda Erda tukwe bukwa dika deibdongobmounyi kurur. Ani, Erci ninyi umbura dam asi kanya kiknibmasounyi kurur. Erci uram ara ato ebdeibmar, 2“Diba kobdob aryi Niryi Yerusalem atei ara, me kwebde yin moyok asi walina talen me kwebde deiriraming to atei kubdeibkwan. Ba, Yerusalem atei dam-dam doramingnyi atei nang ara akatei aryi walina talen me yibmangnyi ba, kanya kum dandoka doki yibarande to kubsinibkwaming. Ba, Yerusalem atei dangmangnyi tum ara Yehuda atei nang ababyi mambul neik tum dobkwaming. 3Ura, im dangna tukwe dangna mutuk nang nirya antanibdobingnyi ura, Yerusalem atei asi mar bobkwaming. Ato kubkwaming bok, a tum aryi Niryi Yerusalem atei ara ikin ilinto keil ato kubdeibkwan ba, yuk mutuk atei nang aryi bobman kum kubkwande. Asi, unanyi biryi, ‘Akatei nang asi bobdenkwayeb,’ tenen ukunmangnyi ura, weik dilaka sakwande. 4Asi a talak ara Niryi sun bukoka mar iyanganmangnyi bisam kuda ara kanya wamlibsinibkwan ba, a bisam deici bukmangnyi nang ara walina talebsinibkwan. Ura, Ni asing elekoka Yehuda mutuk kuraming asi dibnilibkwan bok, sun yuk mutuk atei nang bisam kuda nirya ara asing kubminikwan. 5Asi sirya kunubdeibnyi ura, Yehuda mutuk atei kuraming nang aryi sun kanya dam aryi ato ebkwaming, ‘Sun Yerusalem atei kuraming nang mikib dobdobmang ara Er Iya Erebdobnyi, imtam yin doun nang sienyi bira sun Nai, sun Molonungnyi biryi karebmar,’ ebkwaming. 6A uki tum ara Niryi sun Yehuda mutuk nang asi uk co toubde miningnaming to kubdeibkwan. Ani, tonda gandum du kala lokdoba kankan asi uk ubna deiriraming to kubkwan. Ba, a uk aryi yuk atei nang-yuk atei nang ara dina-dina yaleboka yibde banmaci bok, Yerusalem atei nang ara ur mangkau kubdobkwaming.
7Er Iya Erebdobnyi biryi, ‘Daud ai ninyi ab atei Yerusalem nang ab aryi Yehuda mutuk nang urasin dam asi wingdabingnyei,’ tenen. Ati, yuma kobdob ara Yehuda mutuk nang asi sun mar ordana nang muna kirdongon atei nang kibdeibkwande. 8A talak aryi Ni Iya Erebdobnyi biryi Yerusalem atei nang asi kalikwan. Ba, sun kankan nang asi mitang kubci nang ara mikib karebkwan ba, Daud boramwe mikib ato nang kubkwaming. Ba, Daud ai ninyi ara Ni Imtamnyi bito nang kubkwaming. Ani, sunsi Er Iya Erebdobnyi uram eryuryangananyi si Malaikat Tuhan biryi sun sienyi kiana ato kubkwaming. 9Ba, a talak aryi sun Yerusalem atei nang asi mar boyandenkwaming atei nang nirya ara Ni Imtamnyi biryi oboka kum daneibkwan,” ebdeibmou.
Lukoka kwinibmainyi biti urumna ebmou engeboka uram deyok
12:10-14
10Er Imtamnyi biryi ato eboka uram ebmou, “Aminda ara Niryi Daud ai ninyi ab Yerusalem atei kuraming nang ab asi ninyi boukwe kimna kanya dobkwetebkwan. Ani, Nisi uram sisikoka moloron kanya karebkwan. Ura, sunci er lukoka kwinibmanginyi bisi dibdengnyi ura, sunci engebkwaming. Ara, tentok deibdamingnyi mi asi dibmaci ba, isin dakeiboka-dakeiboka engeraming to kuboka engebkwaming. Ani, er boukwe ati, mita tuluninto kubci ba, yuma ko deiamingnyi mi asi dibmaci ba, engeraming to kuboka engebkwaming.#Yoh. 19:37; Why. 1:7 11A tum ara Yerusalem atei nang aryi malyi limdon engebkwaming. Ara, sun kwemdeina si Hadad-Rimon biti sun mar ordan mutuk bakan si Megido aryi ilinto isin dakeiboka-dakeiboka engeraming to kuboka engebkwaming. 12Ura, a mutuk dam kuramingnyi nang nirya engebkwaming. Akatei kuramingnyi nang nirya ara ai yuk-yuk aryi engebkwaming. Sun Daud deibdoba ninyi yala sun yuk engebkwaming. Sun nerabwe yuk engebkwaming. Ani, Natan deibdoba ninyi yala sun yuk engebkwaming. Ba, sun nerabwe yuk engebkwaming. 13Ba, Lewi deibdoba ninyi yala sun yuk engebkwaming. Ura, sun nerabwe yuk engebkwaming. Ba, Simei deibdoba ninyi yala sun yuk engebkwaming. Ura, sun nerabwe yuk engebkwaming. 14Ura, sun a mutuk dam kuramingnyi nang yala nirya ababyi engebkwaming. Ninyi yala yuk-yuk kuramingnyi to engebkwaming ba, sun nerabwe ababyi yuk-yuk engebkwaming,” eboka Er Imtamnyi biryi ato ebmou.
Obecnie wybrane:
Zakharia Uram 12: MTG
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@LAI 2007 (New Testament), @LAI2022 (Old and New Testament)