यहुन्ना 14
14
परमेश्वरा तेईनी पुजणैरी बत्त
1“तुवाड़ा मंन दुखी ना भुईया तुवे परमेश्वरा पन विश्वास रखतै, मूं पनि बि विश्वास करा। 2मिंडै पिता परमेश्वरेरै घरा मझ बड़ै कमरै अत्तै। अगर ऐहीं ना भूंतु ता मूं तुहांनि शुणा दींणु थियु; कि आंउ तुवाड़ै तेईनी जगा तियार कांना चला। 3मूं गहि करि तुवाड़ै तेईनी जगायरा इन्तजाम कांना, जां फिरी मूं ऐईंणु जां तुवे अपड़ैनि लै गांहणै, जेठि आंउ भूंणा तैठि तुहां बि बेशणु।
मार्ग, सच्चाई जां जीवन
4आंउ जेदि गांहथा, तेधोरीं बत्त तुवे जांणतै।” 5थोमै यीशु सेईतै बौलु, “हे प्रभु! असु पता ना कि तुवे कोई गांहथै अत्तै, ता असु तेधोरीं बतैरा पता किहीं भूंणा?” 6यीशु तैस सेईतै बौलु, “मार्ग, सच्चाई जां अनन्त जीवन आंउ आ। मीं बगैर मिंडै पिता परमेश्वरा किनि कौ ना गहि सकता।” 7“अगर तुवे मूं जांणतै ता मिंडै पिता परमेश्वरा बि जांणतै, तुहैं सै लधौरा बि आ।” 8फिलिप्पुसै यीशु सेईतै बौलु, “हे प्रभु! असुनि पिता परमेश्वरा लुहाय दै। असेड़ै तेईनी ऐहै बड़ु आ।”
9यीशु तेन्हांनि बौलु, “हे फिलिप्पुस! आंउ यौउता टैंम तुहां सिंउ रिय्हा, तां बि तुहां मिंडै बारै मझ पता ना लगा? जेनि आंउ तका, तेनी पिता परमेश्वर बि लधा, तां बि तुवे कितु बोलतै अत्तै; असुनि पिता परमेश्वरा लुहाय दै? 10क्या तुवे विश्वास ना कातै कि, आंउ पिता परमेश्वरा मझ आ जां पिता परमेश्वर मूं मझ आ? आंउ जै शिक्षा तुहांनि दींता, सै शिक्षा मिंडी अपड़ि ना। आंउ ता अपड़ै पिता परमेश्वरेरै कम पूरै काता आ जै मूं मझ आ। 11तुवे मिंडी ऐस गलै पन विश्वास करा कि, आंउ पिता परमेश्वरा मझ आ, नंता तैन्हांं कंमा तका करि ऐ विश्वास करा जै मीं क्यौरै अत्तै।”
यीशुरै नाँ किना प्रार्थना
12“आंउ तुहां सिंउ सच-सच बोलता कि, जै मूं पन विश्वास रखता, तैन्हांं ऐपु ऐ सारै कम कांने, जैन्हां कंमा आंउ काता, तैन्हांं ऐठां बि बडै-बडै कम कांने, केईनी कि आंउ पिता परमेश्वरा किनि गांहथा आ। 13जै किछ तुहां मिंडु नाँ लैकरी मगणु, सै मूं पूरू कांनु, जेनि ला पुत्रेरै कारण पिता परमेश्वरेरी माहिमा प्रकट भुईया। 14अगर तुवे मूं किना मिंडा नाँ लैकरी किछ मगेलै, ता आंउ तैस पूरू करैला।”
पवित्र आत्मायरी प्रतिज्ञा
15“अगर तुवे मूं सेईतै प्रेम कातै ता मिंडी आज्ञाय बि मंनैलै। 16आंउ पिता परमेश्वरा सेईतै प्रार्थना करैला जां सै तुवाड़ै तेईनी अक हौरा सहायक भेईजैला, जै कि हमेशा तुहां सेईतै रिय्हा। 17मतलब सै सच्चाईरा आत्मा आ, जैस संसार स्वीकार ना करि सकता, केईनी कि संसार ना तैस तकांता ना तैस जांणता। तुवे ता तैस जांणतै, केईनी कि सै तुहां सिंउ रींहथा जां तुहां मझ रींहणा।
18मूं तुवे अनाथ ना छडणै, आंउ तुहां किनि ऐईंता आ। 19थोड़ी देर आ, फिरी संसारा आंउ ना लेहिंणा, पण तुहां आंउ तकांणा; केईनी कि आंउ जींता आ, ऐठणीरै तेईनी तुवे बि जींतै रींहणै। 20जेधियां मूं जींति करि वापस ऐईंणु, तैस धियाड़ि तुहां पता लगी गांहणा कि आंउ अपड़ै पिता परमेश्वरा मझ आ, जां तुवे मूं मझ अत्तै जां आंउ तुहां मझ आ। 21जैस मिंडी आज्ञाय केरा पता आ सै मनतै बि जां जै तेन्हैरा पालन कातै, सैहै मूं सिंउ प्रेम कातै जां जै मूं सिंउ प्रेम करैला तैस सिंउ मूं बि प्रेम कांना जां तैन्हांं मझ मूं प्रकट भूंणु।” 22यहूदा (जै यहूदा इस्करियोती किना अलग आ) तेनी बौलु, “हे प्रभु! कितु भूं कि तु अपड़ै-आपा असु मझ प्रकट काता आ, पण संसारैरा मैहणुवां पन प्रकट ना काता?” 23यीशु तेसनी उत्तर दिता, “आंउ अपड़ै-आपा ऐतिया मैहणुवां किनि लुहाता जै मूं सिंउ प्रेम कातै जां मिंडी शिक्षाय केरा पालन कातै। जां मिंडै पिता परमेश्वरा तैन्हांं सिंउ प्रेम कांना जां असु तैस किनि गांहणु जां तैस सेईतै बेशणु। 24जै मूं सेईतै प्रेम ना रखता सै मिंडै वचन बि ना मनता जां जै वचन तुवे शुणतै अत्तै, सै मिंडै वचन नत्तै पण तैस पिता परमेश्वरेरै अत्तै जेनि आंउ भेईजौरा आ।”
25“तुहां सिंउ बेशि करि मीं ऐ गलै तुहांनि बोलोरी अत्ति। 26पण ‘सहायक’ मतलब पवित्र आत्मा जै पिता परमेश्वरा मिंडु नाँईयां किना भेईजणा, तैस तुहांनि सभ-किछ शिख्रांणु, जां जै किछ मीं तुहां सिंउ बोलोरू आ, तैस तुहांनि तैन्हांं गला केरा चैता दिवांणा।
यीशुरा शांतिरा उपहार
27आंउ तुहांनि सुख-शांति दी करि गांहथा आ। जै मिंडी सुख-शांति आ तैस आंउ तुहांनि दींता, जिहीं संसार दींता, तिहीं आंउ तुहांनि ना दींता। तुवाड़ा मंन दुखी ना भुईया जां डरिया ना।” 28तुहैं आंउ ऐ बोलता शुणा कि, “आंउ गांहथा आ जां फिरी मूं तुहां किनि ऐईंणु।” अगर तुवे मूं सिंउ प्रेम रखतै ता तुहां ऐन्हैं गलै ला खुश भूंणु थियु कि आंउ पिता परमेश्वरा किनि गांहथा आ, केईनी कि पिता परमेश्वर मूं किना महान आ। 29मीं तुहांनि ऐ गलै भूंणा किना पेहिलै शुणा दित्ती, केईनी कि जेख्णी ऐ सभ भूंणु तां तुवे मूं पन विश्वास करै। 30“मूं किनि अबै तुहां सिंउ जादी गलै कांनेरै तेईनी जादा टैंम ना, केईनी कि ऐस संसारैरा सरदार शैतान आ जां सै मिंडु किछ ना करि सकता। 31पण ऐ जरूरी आ कि संसारा ऐ पता लगी गहिया कि आंउ पिता परमेश्वरा सिंउ प्रेम काता जां पिता परमेश्वरै मूंनी आज्ञा दितोरी आ; ऐठणीरै तेईनी आंउ तिहियें काता। उठा! ऐठां किना चलि पूंतै।”
Obecnie wybrane:
यहुन्ना 14: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
