यहुन्ना 13
13
यीशु चैला केरै पैयिड़ धोतै
1फसहेरै त्यौव्हारेरी धियाड़ि थी। यीशु पता थ्या कि तेसैरा टैंम चलि यौउरा जां मूं ऐ संसार छडि करि पिता परमेश्वरा किनि वापस चलि गांहणु आ। ता यीशु अपड़ा चैला सिंउ जैन्हां सिंउ बड़ा प्रेम करींथ्या जै इस संसारा मझ थ्यै, जेतिया प्रेम सै रखता यौउरा थ्या, तेतियायै प्रेम तेनी लाष्टी तेईनी रखा।
2यीशु अपड़ा चैला सिंउ रोटी खांता थ्या, तां शैतान शमौन इस्करियोतिरै पुत्र यहूदा इस्करियोतिरै मंना मझ यीशु पकड़वाणैरा विचार पेईदा करि छडौरा थ्या। 3यीशु ऐ पता थ्या कि सभनियांं चीजा केरा हक तेसनी दितौरा आ जां ऐ बि पता थ्या कि सै परमेश्वरा किना यौउरा आ जां तेसै किनि वापस चलि गांहथा आ। 4सै रोटी खा करि उठै, तैन्हैं अपड़ै भेईरियें लिकड़ै उतारी दित्तै जां ढका पन परना बंन्ही ल्या।
यीशु चैला केरै पायिड़ धोतै
5तां फिरी यीशु पराति मझ पांणी भरी करि चैला केरै पैयिड़ धोतै जां जै परना तेनी ढका पन बंन्होरा थ्या, तेनी ला अपड़ा चैला केरै पैयिड़ पुछणा लगा। 6जां सै शमौन पतरसा किनि या तां पतरसै यीशु सिंउ बौलु, “हे प्रभु! क्या ताउ मिंडै पैयिड़ धूणै?” 7यीशु उत्तर दिता, “कि आंउ जै काता तुहां ऐम्हियां ना लगणा पता।” 8पतरसै बौलु, “मूं ताउ किना अपड़ै पैयिड़ कदि ना धुवांणै।” यीशु तैस सिंउ बौलु, “अगर आंउ तुवाड़ै पैयिड़ ना धौला ता तुहां सिंउ मिंडा कोई रिश्ता ना भूंणा।” 9ऐत पन शमौन पतरसै तैस सेईतै बौलु, “हे प्रभु! तां मिडै पैयिड़ै ना पण हत्थ जा शिर बि धौ दै।”
10यीशु तेसनी जुबाव दिता, “जै सन्होई बेठौरा आ, तेसेरै पैयिड़ छडि करि होरू किछ धूंणैरी जरूरत ना। तुवे सारै शुद्ध अत्तै पण सिर्फ एकि जंणै छडि करि।” 11यीशु पता थ्या कि कोस तैस सिंउ धोखा कांना, ऐठणीरै तेईनी यीशु ऐहीं बौलु कि, “तुवे सारै शुद्ध अत्तै पण सिर्फ एकि जंणै छडि करि।”
पैयिड़ धूंणेरा मतलब
12जेख्णी यीशु तेन्हैरै पैयिड़ धौ बेठा ता अपड़ै भेईरियें लिकड़ै ला करि फिरी बेशि ग्या जां तैन्हांं सिंउ बौलु, क्या तुहां पता ना लगा कि मीं तुहां सिंउ कितु कियु? 13तुवे मूनी गुरू जां प्रभु बोलतै पण तुवे ठीकै बोलतै केईनी कि आंउ सैहै आ। 14ऐठणीरै तेईनी मीं, तुवाड़ा प्रभु जां गुरू भौ करि बि तुवाड़ै पैयिड़ धोतै ता तुहां बि नम्र भौ करि योकिया केरै पैयिड़ धूंणै चेहिंथै। 15ऐ मीं तुहांनि अक नमूना लुहाआ, कि जिहीं मीं तुहां सिंउ कियु तिहियें तुवे बि करियां करा। 16आंउ तुहां सिंउ सच-सच बोलता; दास अपड़ै मालिका किना बडा ना भौ सकता, ना सैकिया जेनि सै भेईजौरा भूंता, तैस किना बडा भौ सकता। 17अबै तुहां ऐन्हां गला केरा पता आ जां ऐन्हां गला केरै अनुसार चला ता तुवे धन्य अत्तै।
18“आंउ तुहां सभनियांं केरै बारै मझ ऐ ना बोलता। मूं पता आ कि मीं केणु-केणु चुणोरै अत्तै; पण ऐ ऐठणीरै तेईनी भूं कि जै पवित्र शास्त्रा मझ लिखोरू आ सै पूरू भुईया; जेनि मूं सिंउ रोटी खई तेनिऐ मूंनी धोखा दिता। 19अबै आंउ तैस गलै भूंणा किना पेहिलै तुहांनि ऐ शुणा दींता कि जेख्णी ऐ भौ गियु ता तुहां विश्वास कांना कि आंउ सैहै आ। 20आंउ तुहां सिंउ सच-सच बोलता कि; जै मिंडै भेईजौरा केरा स्वागत काता, सै मिंडा स्वागत काता, जै मिन्डा स्वागत काता, सै मूं भेईजणारै परमेश्वरैरा स्वागत काता।”
विश्वासघाता धेरै इशारा
21जेख्णी यीशु ऐ गलै बोलि बेठा ता तेन्हैरा मंन उदास भौ ग्या जां यीशु अपड़ै चैलानि ऐ शुणाउ कि, “आंउ तुहां सिंउ सच-सच बोलता कि, तुहां मझियां एकि आंउ पकड़वांणा।” 22चैलै शक करि योकिया धेरै तकांणा लगै कि सै कोसेरै बारै मझ आ बोलता। 23यीशुरा अक चैला जैस सेईतै सै प्रेम करींथ्या, सै यीशुरै ब्रखै बत्तै ढुकि करि बेठौरा थ्या। 24तां शमौन पतरसै तैस धेरै इशारा करि-करि ऐ बौलु कि, “ऐस पुछि ता लै, कि ऐ कोसेरै बारै मझ बोलता आ।” 25तां तेनी तिहियें ढुकि करि यीशु किना पुच्छु, “हे प्रभु! सै केणु आ?” 26यीशु तेसनी जुबाव दिता कि, “जैसनि मूं तरि मझ रोटी सैलि करि दींणी, तैस आंउ पकड़वांणा।” जां यीशु रोटिरा टुकड़ा डुबा करि शमौनेरै पुत्र यहूदा इस्करियोतिनी दित्ता। 27जां रोटिरा टुकड़ा लींतै शैतान तैस मझ चलि ग्या। तां यीशु तैस सिंउ बौलु, “जै तु काता तैस झट कर।” 28पण रोटी खांणारा मझां ऐ गल कुनि ना समझि कि ऐ गल तेनी केईनी बोलि। 29यहूदै किनि थेईली भुईंथी, ऐठणीरै तेईनी कुनि-कुनि समझु कि यीशु तैस सेईतै बोलता आ कि, “जै किछ असुवां त्यौव्हारानि चेहिंथु तैस खरीदी करि लै आ” या “गरीब मैहणुवंनी किछ दान करि दै।” 30तां सै टुकड़ा लै करि भेईनि चलि ग्या जां रातिरा टैंम थ्या।
नवीं आज्ञा
31जेख्णी सै भेईनि चलि ग्या ता यीशु बौलु, “अबै मिंडा मतलब मैहणुरै पुत्रेरी महिमा भुई जां तेनी ला परमेश्वरेरी माहिमा भुई। 32अगर तेनी ला परमेश्वरेरी महिमा भुई ता परमेश्वरा बि अपड़ै पुत्रेरी जल्दी माहिमा कांनी। 33हे बालको! आंउ तुहां किनि थोड़े टैंमेरै तेईनी आ। तुहां आंउ तौपणा जिहीं कि मीं यहूदी अगुवो सिंउ बि बोलोरू आ, तिहीं तुहां सिंउ बि बोलता; आंउ जेदि गांहथा आ, तेदि तुवे ना अईछी सकतै। 34आंउ तुहांनि अक नवीं आज्ञा दींता कि; तुवे योकिया सिंउ प्रेम करा। जिहीं मीं तुहां सिंउ प्रेम रखा तिहियें तुवे योकिया सिंउ बि रखा। 35अगर तुवे योकिया मझ प्रेम-भाव रखैलै तां मैहणुवां पता लगणा, कि तुवे मिंडै चैलै अत्तै।”
पतरसेरी नमां कांनेरी भविष्यवाणी
36शमौन पतरसै यीशु सेईतै बौलु, “हे प्रभु! तु कोई आ गांहथा?” यीशु उत्तर दिता कि, “जेदि आंउ गांहथा, तेदि तुवे ऐमिहां मूं पीछै ना ऐईछी सकतै पण बाद मझ तुहां मिंडै पीछै ऐईंणु।” 37पतरसै तैस सेईतै बौलु, “हे प्रभु! ऐमिहां आंउ ताउ पीछै किना अईछी सकता? आंउ ता तिंडै तेईनी अपड़ै प्रांण बि दी दियुं।” 38यीशु पतरसा सिंउ बौलु, “आंउ तुहां सिंउ सच-सच बोलता, कि आज ऐ ऐसै राती कुखड़ेरी दो बारी बांग दींणा किना पेहिलै, ताउ त्रा बारी मूं किना मुकरी गांहणु।”
Obecnie wybrane:
यहुन्ना 13: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
