प्रेरितों के काम 9
9
यीशुरी शाऊला सिंउ गल-बात कांनी
1ऐसेरै दौरान शाऊला पन हालै तेईनी बि प्रभु यीशुरै चैला जरकांणेरा जां मांनेरा भूत सवार थ्या, सै महायाजका किनि ग्या, 2जां तैस किना दमिश्क नगरेरै यहूदी सभा घरैरा नाँ पन चिट्ठी मग्गी, यदि तेसनी कोई बि मड़द या जनानि यानि कि जै मसीह गुट्टेरै मैहणु अत्तै मेईया ता तैन्हांं बंन्ही करि यरूशलेम शहरानि लै ऐईछिया। 3पण जेख्णी शाऊल जां तेसेरै साउगी चलतै-चलतै दमिश्क नगरा नीड़ पुज्जै, तां इकदम सुरगा किना तेसेरै चोउवो पासै प्रगड़ु चमकु। 4जां सै धरती पन छिढि ग्या, जां यीशुरी ऐ आवाज शुणि कि, “हे शाऊल! हे शाऊल! तु मूं केईनी सतांता?” 5तेनी पुच्छु, “हे प्रभु! तु केणु आ?” तेनी बौलु, “आंउ यीशु आ; जैस तु सतांता। 6पण अबै तु खड़ा भौ करि नगरा मझ गा, जां जै किछ ताउ कांनु आ, सै कोसक्यै ताउनि शुणां दींणु।” 7जै मैहणु शाऊला सेईतै यात्रा कातै थ्यै, सै चुपचाप खड़ै रिय्है जां किछ बि ना बोलियु; केईनी कि तैन्हांं आवाज ता जरूर शुणींति थी पण लाधी ता कौ बि ना थ्या ऐईंता। 8तां शाऊल धरती पना उठा, पण जेख्णी टीरै खौलै ता तैस किछ बि लाधियै ना लगु ऐईंणा जां सै तेसैरा हत्थ पकड़ी करि दमिश्क नगरानि लैई ग्यै। 9जां तैस त्रियां धियाड़िया किना किछ बि लाधिऐ ना लगु ऐईंणा जां ना तेनी किछ खउ ना पित्तु।
शाऊलेरा बपतिस्मा
10दमिश्क नगरा मझ हनन्याह नाँईयेरा अक चैला थ्या, तेसनी प्रभु यीशु दर्शन दी-करि बौलु, “हे हनन्याह!” तेनी बौलु, “हाँ प्रभु आंउ इठि आ!” 11तां प्रभु तैस सिंउ बौलु, “खड़ा उठ! जां जै सिधि नाँईयें बाई गयि आ, तैठि गा, जां यहूदेरै घरा मझ तरसुस शहरेरै रींहणारै शाऊला पुछि लै; केईनी कि सै प्रार्थना काता, 12जां शाऊलै दर्शना मझ तकाउ कि हनन्याह नाँईयेरा अक मैहणु तैस किनि अईछी करि तैस पन हत्थ रखता तका; जेनि ला कि तैस लाधी ऐईंणा लगी पुईया।” 13हनन्याहै उत्तर दित्ता कि, “हे प्रभु! मीं ऐस बारै मझ बड़ा किना शुणौरू आ कि ऐनि यरूशलेम शहरा मझ तिंडै पवित्र मैहणुवां सिंउ बड़ा बुरा व्याव्हार क्यौरा; 14जां ऐड़ि बि ऐसै मैहणुनी प्रधानयाजके हक दित्तौरा कि जै कोई तिंडै नाँ पन विश्वास कातै तैन्हांं सभनियांं बंन्ही करि यरूशलेम शहरानि लैई गा।” 15पण प्रभु तैस सिंउ बौलु कि, “तु चलि गा! केईनी कि ऐ ता होरनियां जातिया जां राजा जां इस्राएलिया केरै सांमणै मिंडै नाँईयेरै बारै मझ प्रचार कांनेरै तेईनी मीं सै अपड़ि सेवा कांनेरै तेईनी चुणौरा।” 16जां मूं तेसनी शुणाणु, कि मैहणुवंनी मिंडै बारै मझ शुणांणै ला, तैस क्यौता जादा दुख सेहन कांना पूंणा। 17तां हनन्याह निकई पेया जां तैस घरा मझ पुज्जा, जेठि शाऊल रुकौरा थ्या जां तैस पन अपड़ा हत्थ रखि करि बौलु, “हे भाई शाऊल! जेनि प्रभु यीशु ताउनि बत्तै मझ इदि ऐईंतै टैंमा दर्शन दित्थियै, तेनी यीशु आंउ भेईजौरा कि तु फिरी दुबारे तकांणा लगिया जां तु पवित्र आत्माय ला भरी गहिया।” 18तां इकदम तेसैरा टीरा मझां पपड़ि तैई छुड़खी जां खड़ै भौ-करि बपतिस्मा ल्या।
19जां रोटी खा करि तेसनी दुबारे ताकत मेईं। जां शाऊल बड़ी धियाड़ि दमिश्क नगरा मझ तैन्हांं चैला सिंउ रिय्हा।
दमिश्क मझ शाऊलेरा प्रचार
20जां सै इकदम दमिश्क शहरा मझ यहूदी जंज घरा मझ यीशुरा प्रचार कांना लगा। कि यीशुऐ परमेश्वरैरा पुत्र आ। 21सारै मड़दै जैन्हैं प्रचार शुणा सैक्यै हैरान भौ ग्यै जां बोलणा लगै, “क्या ऐ ता सैहै मैहणु ना जै यरूशलेम शहरा मझ यीशुरै विश्वासिया सताईंथ्या जां इठि बि ऐठणीरै तेईनी यौउरा थ्या, कि तैन्हांं बंन्ही करि प्रधानयाजका किनि लैई गहिया?” 22पण शाऊलै हौरा बि ज्यादा शक्तिशाली रूप सिंउ प्रचार कांना शुरू करि दित्ता, जां ऐस गलैरा प्रमांण दी करि कि यीशु ऐ मसीहा आ, दमिश्क शहरा मझ रींहणारा यहूदिया मैहणुवां केरू मुँह बंन्द काता रिय्हा।
23जेख्णी शाऊला दमिश्क शहरा मझ रींहथै बड़ा टैंम भौ ग्या, ता यहूदियै तैस मांनेरी चाल बंणा दित्ती। 24पण तैन्हेरी तैस चालिरा शाऊला पता लगी ग्या, कि सै ता तैस मांनेरै तेईनी रात-धियाड़ी फाटका पन तैनात भूंतै। 25पण अक रात चैलै शाऊला घौड़ेरी एकि उथड़ि कंन्थी पनि लेई ग्यै, जै शहरेरै चोउवो पासै बंणोरी थी। तां तेनी कंन्थिरै खुलौरै पासै किना रशिरै सहारै टोकरी मझ सैक्या हैट उतारी दिता। ऐहीं करि-करि सै दमिश्क शहरा किना बचि करि निकई ग्या।
यरूशलेम शहरा मझ शाऊल
26यरूशलेम शहरा मझ पुजि करि शाऊलै चैला केरी संगती मझ जुड़नेरी कोशिश की, पण सारै चैलै तैस किना डरींथ्यै, केईनी कि तैन्हांं विश्वासै ना थ्या भूंता कि सै बदली करि सच-मझ यीशुरा चैला बंणी गियौरा। 27पण बरनबासै सैक्या ऐपु सेईतै तैन्हांं खास चैला किनि न्यां जां तेन्हांनि शुणाउ, कि किहीं चारै दमिश्क शहरानि गांहथै टैंमा बत्तै मझ शाऊलै प्रभु यीशु लधा, जां प्रभु ऐस सिंउ गल-बात केईथी; जां ऐनि दमिश्क शहरा मझ यीशुरै नाँईयां मझ क्यौति हिम्मती सिंउ प्रचार केईथ्या। 28खास चैलै बरनबासा पन विश्वास केया जां ऐठणीरै तेईनी शाऊल यरूशलेम शहरा मझ हर जगाय ऐईंता-गांहथा रिय्हा। जेख्णी सै विश्वासिया सेईतै रिहींथ्या, जां निडर भौ-करि प्रभुरै नाँईयेरा प्रचार काता रिय्हा;। 29जां यूनानी भाषा बौलणारा यहूदी मैहणुवां सिंउ गल-बात जां समझांणनी जां वाद-विवाद लगातार काता रिय्हा; पण सै तैस मांनेरी कोशिश कांना लगै। 30ऐ जेख्णी पता लगा ता विश्वासियै भाईयै सै कैसरिया नगरा मझ लै अंणा, जां कैसरिया नगरा मझ तैन्हैं तेसेरै तेईनी तरसुस शहरानि जेठि तेसैरू नगर थियु, तैठिनी जहाजेरा इन्तजाम केया। 31ऐठणीरै तेईनी सारै यहूदिया प्रदेशा मझ जां गलील प्रदेशा जां सामरिया प्रदेशा मझ कलीसियेनि शांति मेयि जां तेन्हैरी आत्मिक उन्नति भूंती रेय्ही; जां कलीसिया प्रभुरै डरा मझ जी रिय्होरी थी। जां पवित्र आत्माय ला तसल्ली पा करि विश्वासिया केरी गिणती बधणा लगी।
लुद्दा नगरा मझ पतरस
32जां फिरी ऐत्यु भूं कि पतरस तैन्हांं सभनियांं प्रदेशा मझ हर जगाय सफर काता ग्या जां तैन्हांं पवित्र मैहणुवां सिंउ मिला, जै लुद्दा नगरा मझ रिहींथ्यै। 33तैठि तेसनी ऐनियास नाँईयेरा अक अधरंगै ला बिमार मैहणु मैआ, जै तेनी बिमारी ला अट्ठा साला किना बिछांणा मझ पियौरा थ्या। 34पतरसै तैस सिंउ बौलु, “हे ऐनियास! यीशु मसीह ताउ ठीक काता। खड़ा भौ, अपड़ु बिछांण चुक! तां इकदम ऐनियास खड़ा भौ ग्या।” 35नगरदारै जां लुद्दा जां शारोन शहरा मझ रींहणारै सारै मैहणुवें तैस तका करि प्रभु यीशु पन विश्वास केया।
दोरकासनि जीवनदान
36याफा नगरा मझ तबीता नाँईयेरी अक विश्वासी जनानि रिहींथी जेसैरू नाँ यूनानी भाषाय मझ दोरकास थिउ। सै बड़ै सारै भलै-भलै कम करींथी जां गरीबा केरी मजत करींथी। 37तैस दौराना जेख्णी पतरस लुद्दा नगरा मझ थ्या तैन्हांं धियाड़िया सै बिमार भौकरी मरि गैई, जां तैन्हैं सै सन्होई करि बहौड़ी रखि। 38केईनी कि लुद्दा नगर याफा नगरेरै नीड़ ऐ थ्या, चैलै ऐ शुणि करि कि पतरस तैठि आ दो मैहणु भेईजि करि तैस सिंउ विनती की कि, “असु किनि ऐईंणनी देरी मेईं करै।” 39तां पतरस बि खड़ा भौ करि तैन्हांं सिंउ चलि पेया, जां जेख्णी तैठि पुज्जा सै तैस बहौड़ी लै ग्यै। जां सारी विधवाय रूंती-रूंती तैस किनि अईछी खड़ी भुई जां जै कुर्तै जां लिकड़ै दोरकासै अपड़ै जीते जी तैन्हांं सिंउ बेशि करि बंणाउरै थ्यै, तैन्हांं लुहाना लगी। 40तां पतरसै सारै भेईनि भेईजै, जां जेणुं टंकि करि प्रार्थना की; जां लासी धेरै तका करि बौलु, “हे तबीता, उठ!” तां तेनी अपड़ै टीरै खोलि दित्तै, जां पतरसा तका करि उठिकरि बेशि गैई। 41तेनी अपड़ै हत्थैरा सहारा दीकरी सै उठाई जां पवित्र मैहणु जां विधवाय शदा करि सै जींति-जागती लुहाई दित्ती। 42ऐ गलै सारै याफा नगरा मझ फैली गेई; जां बड़ै जंणै प्रभु यीशु पन विश्वास केया। 43जां पतरस याफा नगरा मझ शमौन नाँईयेरै एकि चमड़ैरा धन्धा कांनारेरै ऐड़ि बड़ै दीह रिय्हा।
Obecnie wybrane:
प्रेरितों के काम 9: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
