प्रेरितों के काम 10
10
कुरनेलियुसै पतरस शदवा
1कैसरिया नगरा मझ कुरनेलियुस नाँईयेरा अक मैहणु थ्या, जै इतालियानी नाँईयेरै एकि सैना-दलैरा सूबेदार थ्या। 2सै परमेश्वरेरी अराधना करींथ्या, जां सै पूरै परिवारै समैत परमेश्वरा किना डरींथ्या, जां गरीब यहूदी मैहणुवंनी दांन दियां करींथ्या, जां हर टैंम परमेश्वरा किना प्रार्थना काता रिहींथ्या। 3अक धियाड़ि, धियाड़िरै लगभग त्रियें बजै तेनी दर्शना मझ साफ-साफ तकाउ कि परमेश्वरैरा स्वर्गदूत तैस किनि अईछी करि बोलता कि, हे कुरनेलियुस! 4तेनी स्वर्गदूता पन ध्यान दित्ता जां डरि ग्या जां बोलणा लगा, “हे मालिक ऐक्यु कितु आ?” स्वर्गदूतै कुरनेलियुसा सिंउ बौलु, “तिंडि प्रार्थनाय जां तिंडै दांन परमेश्वरेरै सांमणै पुजि ग्यै, जां तेनी सै स्वीकार करि लियोरै अत्तै। 5जां अबै याफा नगरा मझ मैहणुवां भेईजि करि शमौन जैसनि पतरस बि बोलतै, तैस शदा लै।” 6सै शमौन चमड़ैरा धन्धा कांनारै एकि मैहणुरै घरै मेहमान थ्या, जेसैरू नाँ शमौन थियु जां तेसैरू घर समुन्द्रेरै किनारै आ। 7जेख्णी सै स्वर्गदूत जैस सिंउ तेनी गल-बात केईथी चलि ग्या, ता तेनी दो सेवक जां अक सिपाहि जै तैस किनि हाजिर रिहींथ्या सैक्या सिपाहि शदा जै परमेश्वरेरी अराधना करींथ्या। 8जां तेन्हांनि सभ गलै जै भुई शुणा करि याफा नगरा मझ पतरसा अंणननी भेईजा।
पतरसैरा दर्शन
9दर्शनेरी दुईं धियाड़ि सैक्यै त्रा मैहणु जै कुरनेलियुसै भेईजोरै थ्यै, सै धियाड़ी शहरा नीड़ ऐ थ्यै, तां तैस टैंमा पतरस घरेरी छत्ति पनि प्रार्थना कांननी ग्या। 10तैस भ्रुख लगी जां किछ खांणा चांहथा थ्या, पण जेख्णी सै रोटी बंणाता ऐ थ्या ता सै इकध्याना भौ ग्या, 11जां तेनी तकाउ, कि सुरग खुलि गियु, जेठां किना अक बड़ी-बडी चादरी जेतेई चीज चोउवो कूंणा किना हैट धरती पन उतारियूंति थी। 12जैस मझ पृथ्विरै सैक्यै चोउवो पैयिड़ै बाऐ, जां रैंगने बाऐ जानवर (मतलब पेटेरै भारै चलणार जानवर) जां असमांणेरै पंछी थ्यै। जेन्हैरै बारै मझ मूसेरी व्यवस्था बोलती कि सै अशुद्ध जां अपवित्र अत्तै जां जै ऐन्हां यहूदियनी खांणा किना नमां क्यौरा। 13तां तेनी अक हक शुणि, जेनि बौलु, “हे पतरस! ऐन्हां मार जां खा लै।”
14पण पतरसै बौलु, “ना प्रभु! कदि ना; केईनी कि मीं कदि बि कोई अशुद्ध या अपवित्र चीज ना खाउरी।” 15फिरी तेनी दुबारे सैहै आवाज शुणि, “जै परमेश्वरै शुद्ध करि दित्तु, तु तेसनी अशुद्ध मेईं बोलै।” 16सै दर्शन त्रा बारी दौहराईया; तेठां किना बाद सै चादर इकदम सुरगनी उछुई गैई। 17जेख्णी पतरस ऐस दर्शनेरै बारै मझ उलझौरा थ्या कि ऐठणीरा मतलब कितु भूंणा, तां कुरनेलियुसेरा भेईजौरा मैहणु शमौनेरै घरैरा पता करि-करि फाटकेरै सांमणै खड़ै भुवै। 18जां जौरै बोलि करि पुछणा लगै, “क्या शमौन जेसैरू नाँ पतरस बि आ, क्या सै ऐस घरा मझ रुकौरा?”
19पतरस ऐमिहां बि तैस दर्शनेरै बारै मझ उलझौरा थ्या, तां पवित्र आत्माय तैस सिंउ बौलु, “तका ताउ त्रा मैहणु तोपतै अत्तै। 20उठ जां थल्लै गा, बेशक सै होरी जातिरै मैहणु अत्तै, तु तैन्हांं सेईतै गांहणनी शर्म मेईं करै तैन्हांं सिंउ गा, केईनी कि मीं सै तुहां किनि भेईजोरै अत्तै।” 21तां पतरसै थल्लै उतरि करि तैन्हांं मैहणुवां सिंउ बौलु, “तका, जैस तुवे तोपतै अत्तै, सै आंउ आ; तुवे ऐड़ि क्यारै तेईनी यौउरै अत्तै?” 22तैन्हैं बौलु, “कुरनेलियुस सूबेदार जै धर्मी जां परमेश्वरा धेरै डरींणार जां सभनियांं यहूदी मैहणुवां मझ इज्जतदार मैहणु आ, तेसनी एकि पवित्र स्वर्गदूतै आज्ञा दित्ती कि ताउ अपड़ै घरा मझ शदाईया जां ताउ किना उपदेश शुणियां।” 23तां पतरसै सैक्यै अंदर शदाय जां तेन्हांनि राती रींहणैरै तेईनी बौलु, जां दर्शनेरी दुईं धियाड़ी सै तैन्हांं सेईतै ग्या; जां याफा नगरा किना बि कुछ विश्वासी भाई तैन्हांं सेईतै ग्यै।
कुरनेलियुसेरै घरै पतरस
24दर्शनेरी त्रीं धियाड़ी सै कैसरिया नगरा मझ पुज्जै जां कुरनेलियुस अपड़ै परिवारा, रिश्तैदारा जां दोस्ता किट्ठैरी करि तेन्हैरा इन्तजार काता थ्या। 25जेख्णी पतरस अंदरनि गांहथा थ्या, तां कुरनेलियुस तैन्हांं सिंउ मिला जां कुरनेलियुसै पतरसेरै पैयिड़ छू करि प्रणाम कियु। 26पण पतरसै सै खड़ा केया जां बौलु, “खड़ा भौ, मिंडी अराधना मेईं करै आंउ बि ता मैहणु ऐ आ।
27जां तैस सिंउ गल-बात काता अंदरनि चलि ग्या, जां तेनी अन्तर बड़ै मैहणु किट्ठै तका करि, 28पतरसै तैन्हांं सिंउ बौलु, तुहां पता कि होरी जातिरै मैहणुवां सिंउ बेशणु या तेन्हैरै घरा मझ गांहणु, असु यहूदी मैहणुवां केरै नियमा केरै खिलाफ आ, पण परमेश्वरै मूंनी शुणाउ कि कोस बि मैहणुनी अपवित्र या अशुद्ध मेईं बोलै। 29ऐठणीरै तेईनी जेख्णी आंउ शदा ता बिना किछ बोलणै आंउ चलि या अबै आंउ पुछता कि आंउ तुहैं कोस कंमेरै तेईनी शदाउरा?
30कुरनेलियुसै जुबाव दित्ता, चोउर धियाड़ी पेहिलै ऐसै टैंमा आंउ अपड़ै घरा मझ लगभग धियाड़िरै त्रियें बजै प्रार्थना काता थ्या कि अचानक अक मैहणु चमकदार लिकड़ै ला करि मिंडै सांमणै खड़ा भौ ग्या। 31जां स्वर्गदूतै मिंडै सांमणै बौलु, हे कुरनेलियुस परमेश्वरै तिंडि प्रार्थनाय शुणि लियोरी अत्ति जां गरीबा केरै तेईनी तिंडै क्यौरै दान परमेश्वरेरै सांमणै पुजि ग्यै जां तेनी तिंडा जिक्र क्यौरा। 32ऐठणीरै तेईनी कोसक्यै याफा नगरा मझ भेईजि करि शमौन जेसैरू नाँ पतरस आ, तैस शदावा लै, सै शमौन चमड़ैरा धन्धा कांनारै एकि मैहणुरै घरै मेहमान आ, जेसैरू घर समुंद्रेरै किनारै आ, जेख्णी सै ऐईला, ता तैस ताउनि परमेश्वरेरी तरफ सिंउ अक संदेश शुणांणा।” 33तां मीं झट तांउ किनि मैहणु भेईजै, जां तीं भलु कियु कि तु चलि या। अबै असै सभ जंणै इठि परमेश्वरेरै सांमणै अत्तै, ताकि जै परमेश्वरै तांउ सिंउ बोलोरू आ तैस शुणियां।
पतरसैरा उपदेश
34तां पतरसै बोलणैरी शुरूआत की जां बौलु कि अबै मूं पूरा विश्वास आ कि परमेश्वर कोसेरा बि भेद-भाव ना काता। 35पण हर जातिया मझ जै परमेश्वरैरा डर मनता जां धार्मिक कम काता, परमेश्वरा सै मैहणु अच्छा लगता। 36तुहां तैस खबरिरै बारै मझ पता, जै परमेश्वरै असेड़ै तेईनी मतलब इस्राएल देशेरै मैहणुवां केरै तेईनी दितोरी थी। तेनी शांतिरै बारै मझ खुशखबरी शुणाय जै मैहणुवंनी यीशु मसीह पनि विश्वास कांने ला मेयि सकती। सै सभनियांं मैहणुवां केरा प्रभु आ। 37तुहां तैन्हांं गला केरै बारै मझ पता आ, जै सारै यहूदिया प्रदेशा मझ भोरी अत्ति। ऐ सारी गलै गलील प्रदेशा किना शुरू भौ करि यूहन्नेरै बपतिस्मेरै प्रचारा किना बाद भुई। 38परमेश्वरै सैहै यीशु जै नासरत नगर वासी आ, पवित्र आत्माय जां शक्ति ला अभिषिक्त क्यौरा थ्या; जां सै भलाई काता रिय्हा, जां सभ जै शैतानेरै सताउरै थ्यै सै सारै ठीक क्यै केईनी कि परमेश्वर तैस सेईतै थ्या।
39जां असै खास चैलै, मैहणुवंनी तैन्हांं सारिया चीजा केरै बारै मझ शुणांतै, जै असुवें यीशु यरूशलेम शहरा मझ जां बाकि यहूदी देशा मझ काता लधौरा थ्या जां यहूदी अगुवे सैक्या क्रूसा पन मारी छडा। 40पण परमेश्वरै सै त्रीं धियाड़ी मौरा मझां जींतैरा जां लुहाई बि दित्ता। 41सभनियें मैहणुवें सै ना तका पण तैन्हैं गवाहियै जै परमेश्वरै पेहिलै चुणी थ्यै लियौरै, मतलब असै जैन्हैं तेसेरै जरियै जींतियुणा किना बाद तैस सिंउ खउ-पित्तु। 42जां यीशु असुनि आज्ञा दित्ती कि सारा मैहणुवां मझ प्रचार करा जां गवाहि देया कि ऐ सैहै मैहणु आ जै परमेश्वरै मौरा केरा जां जींता केरा न्याय कांननी रखौरा। 43जां सारै भविष्यवक्तै तेसेरै बारै मझ गवाहि दित्ती कि जै कौ बि तैस पन विश्वास करैला, तेसनी तेसेरै नाँईयां किना पापा केरी माफी मेईंणी।
होरिया जातिया पन पवित्र आत्मा ऐईंणा
44पतरस ऐ गलै बोलता ऐ थ्या कि पवित्र आत्मा वचन शुणनारा सभनियांं पन उतरि या। 45जां जेख्णी जेत्थरै खतना क्यौरै विश्वासी पतरसा किनि यौउरै थ्यै सै सारै हैरांन भुवै कि होरिया जातिया पन बि पवित्र आत्मा वरदाना सैयि उतरा। 46सैक्यै जांणतै थ्यै कि प्रभु पवित्र आत्मा दितौरा, केईनी कि तैन्हैं सैक्यै भांति-भांतिरी भाषाय बोलतै जां परमेश्वरेरी बड़ाई कातै शुणै। 47ऐत पन पतरसै बौलु, “ऐनि गलै ला तुवे सारै पूरी तराहि सिंउ सहमत भूंणै चेहिंथै कि असुवां ऐन्हां मैहणुवंनी पांणी ला बपतिस्मा दींणा चेहिंथा केईनी कि ऐन्हैं बि असुवां सैयि पवित्र आत्मा परमेश्वरा किना पाउरा।” 48जां पतरसै तेन्हांनि आज्ञा दित्ती कि जै मैहणु कुरनेलियुसैरै घरै किट्ठै भोरै थ्यै, तेन्हांनि यीशु मसीहरै नाँ मझ बपतिस्मा दिया। जां तैन्हैं तैस सेईतै विनती की कि कुछ धियाड़ी असु सेईतै हौरा बेश जां ऐठणीरै तेईनी सै तैन्हांं सिंउ कुछ धियाड़ि हौरा रिय्हा।
Obecnie wybrane:
प्रेरितों के काम 10: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
