प्रेरितों के काम 23
23
1महासभाय धेरै ध्यान सिंउ तका करि पौलुसै बोलणु शुरू कियु, “हे प्यारे भाईयो, मीं अजकि धियाड़ि तेईनी परमेश्वरेरै सांमणै बिल्कुल सच्चाई मझ जीवन बिताउरा।” 2जां पौलुसै जै बौलु सै शुणि करि होरै महायाजक हनन्याहै, तेन्हांनि जै तैठि पौलुसा किनि खड़ै थ्यै, तेसेरै मुहां पन थप्पड़ मांनेरी आज्ञा दित्ती। 3पौलुसै तैस सिंउ बौलु, “हे पाखंडी मैहणु, परमेश्वर ताउ पन थप्पड़ मारैला। तु व्यवस्थायरै अनुसार मिंडा फैसला कांननी बेठौरा आ, जां फिरी तु व्यवस्थायरै विरूद्ध मूं पन थप्पड़ मांनेरी आज्ञा दींता।”
4सै जै पौलुसा किनि खड़ै थ्यै, तैन्हैं बौलु, “तु परमेश्वरेरै महायाजकेरी निंदा काता।”
5पौलुसै बौलु, “हे भाईयो, मूं ता पता ऐ ना थ्या कि ऐक्या महायाजक आ; केईनी कि पवित्र शास्त्रा मझ लिखोरू आ, कि अपड़ै मैहणुवां केरै प्रधानानि बुरू मेईं बोलै।”
6पौलुसै ऐ जांणि करि कि किछ सदूकी मैहणु जां किछ फरीसी मैहणु तैठि थ्यै, फिरी पौलुस महांसभाय मझ जौरै-जौरै बोलणा लगा, “हे भाईयो, आंउ फरीसी आ, जां फरीसिया केरी आउलाद आ, मिंडा मुकदमा ऐड़ि ऐठणीरै तेईनी भूंता केईनी कि मूं आशा आ कि परमेश्वरा मौरै मैहणु फिरी जींतै कांने।” 7जेख्णी पौलुसै ऐ गल बोलि, तां फरीसिया जां सदूकिया मझ झगड़ा भूंणा लगा; जां सारी सभाय मझ फूट पै गैई। 8केईनी कि सदूकी मैहणुवां केरा विश्वास आ कि, मौरै मैहणु फिरी ना जींतियुंणै, ना स्वर्गदूत जां ना बुरी आत्मा आ; पण फरीसी ऐन्हां सभनियांं गला पन विश्वास कातै जां मनतै।
9तां तैठि बड़ा हूला भौ ग्या जां मूसेरी व्यवस्थायरी शिक्षा शिख्रांणै बाऐ किछ मैहणु जै फरीसी थ्यै, खड़ै भौ ग्यै जां बहस करि-करि बोलणा लगै, “असुवां ऐस मैहणु मझ किछ बि बुराई ना लाधी ऐईंति; शायद ऐहीं भौ सकतु कि तैस सिंउ कुनिक्यै बुरी आत्मा या स्वर्गदूतै गल क्यौरी भुईया?” 10जेख्णी तैठि बड़ी बहस भूंणा लगी, तां पलटनिरै सरदारै ऐस डरा किना कि ऐक्यै पौलुसेरै टुकड़ै- टुकड़ै ना करि छडिया, तेनी अपड़ि पलटनिनी आज्ञा दित्ती कि हैट गहि करि सभायरै बिच मझां पौलुसा पूरी ताकती सिंउ भेईर कढि करि तैस किलै पन लैई ऐईछा।
11तेसै राती प्रभु यीशु पौलुसा किनि अईछी करि खड़ै भौकरी बौलु, “हे पौलुस, हिम्मत रख; केईनी कि जेतेई तीं यरूशलेम शहरा मझ मिंडी गवाहि दितोरी आ, तेतैई ऐ तांउ रोम शहरा मझ बि गवाहि दींणी पूंणी।”
पौलुसा खत्म कांनेरी साजिश
12जेख्णी भियाग भुई, ता किछ यहूदी मैहणुवें किट्ठी साजिश केयि, जां कसम खई कि ज्यो-तेईनी असै पौलुसा मारी ना छडतै, त्यो-तेईनी असै किछ खालै या पीलै ता असुवां पन धिक्कार आ। 13जैन्हैं ऐ कसम खईथी, सैक्यै चाहिया मैहणुवां किना जादै थ्यै। 14प्रधानयाजका जां वुजुर्गा किनि अईछी करि बौलु, “असै पक्की कसम खा लियौरी आ कि ज्यो-तेईनी असै पौलुसा मारी ना छडैलै, त्यो-तेईनी असुवां रोटी- पांणी किछ बि ना चखणु, अगर खालै ता असु पन धिक्कार आ। 15ऐठणीरै तेईनी अबै तुवे जां महासभा, पलटनिरै सरदारा सेईतै विंनति करा, कि पौलुसा तुहां किनि लैई ऐईछा, मनि ल्या जीं कि तुवे तेसेरै बारै मझ होरी बि जांच पड़ताल कांना चांहथै अत्तै, जां तेसेरै पुजणा किना पेहिलै असै तैस खत्म कांननी तियार बेशैलै।”
16पण तैड़ी पौलुसेरै भांणजै शुणु कि यहूदी मैहणु पौलुसा खत्म कांनेरी सलाह बणांतै अत्तै ता किलै पन गहि करि तेनी पौलुसा सिंउ सभ किछ शुणां दित्तु। 17पौलुसै सूबेदारा मझां अक शदा जां तैस सिंउ बौलु, “ऐस जुवाना पलटनिरै सरदारा किनि लैई गहा, ऐ तैस सेईतै किछ बोलणा चांहथा।” 18ऐठणीरै तेईनी सूबेदारै पौलुसैरा भांणज पलटनिरै सरदारा किनि भेईजि दिता जां बौलु, “बंदी पौलुसै आंउ शदा जां मिंडै छंदै क्यै, कि ऐक्या जुवान पलटनिरै सरदारा सेईतै किछ बोलणा चांहथा; ऐस तैस किनि लैई गहा।” 19पलटनिरै सरदारै तेसैरा हत्थ पकड़ी करि सै अलग नीं करि पुच्छा, “कि तु मूं सेईतै कितु बोलणा चांहथा?”
20तेनी बौलु, “यहूदी सभायरै कुछ अगुवे अक सकीम बंणा करि सहमत भुवै कि तांउ सिंउ विनती करिया कि दोत्तीं पौलुसा महांसभाय मझ अंणिया, कि सै तेसेरै बारै मझ बारीकि सिंउ जांच कांना चाहंथै अत्तै। 21छंदै तेन्हेरी ऐस विनती धेरै ध्यान मेईं दींता, केईनी कि तैन्हांं मझियें चाहिया किना बि जादै मैहणु पौलुसा मांनेरै तेईनी तियार अत्तै, जैन्हैं ऐ कसम खा लियौरी आ कि ज्यो-तेईनी तैन्हैं पौलुस मारी ना छडा, त्यो-तेईनी ना किछ खांणु ना पीणु, जां अबै सै बस तिंडै बोलणेरी भायि मझ अत्तै।” 22तां पलटनिरै सरदारै जुवाननि ऐ बोलि करि दूर भेईजा कि, “कोस बि पता ना लगिया कि तीं मूंनी ऐ शुणाउरू आ।”
पौलुस फेलिक्सा किनि भेईजा
23तां सरदारै दो सूबेदार शदा करि तेन्हांनि बौलु, “दो शाउ सिपाहि, सत्थर घुड़सवार, जां दो शाउ बरछियै बाऐ सैनिका कैसरिया नगरा गांहणनी तियार रखै, तु रातिरै नाउवै बजै निकोहि गहि।” 24सैना दलैरै सरदारै पौलुसेरै तेईनी घौड़ेरी सवारिरा इन्तजाम करा कि सै राज्यपाल फेलिक्सा किनि सही सलांमत पुजा दियो। 25सैना दलेरै सरदारै राज्यपालनि अक चिट्ठी बि लिखि जै ऐनि हिसाबै आ। 26महाप्रतापी फेलिक्स राज्यपालनि क्लौदियुस लूसियासेरू नमस्कार;
27ऐ मैहणु यहूदिया केरै जरियै पकड़ियोरा आ जां सै ऐस मांना ऐ चांहथै अत्तै, पण जेख्णी मूं पता लगा कि ऐ रोमी नागरिक आ, ता आंउ अपड़ा सिपाहिया सिंउ या जां सै छडा करि लै अंणा। 28जां आंउ जांणना चांहथा थ्या, कि सैक्यै तैस पन कुनि कारणै दोष लांणा चांहथै अत्तै, ऐठणीरै तेईनी तैस तेन्हैरी महासभाय मझ लैई ग्या। 29तां मूं पता लगी ग्या, कि सै अपड़ै यहूदी व्यवस्थायरै बारै मझ तैस पन दोष लांतै अत्तै, पण मारनै जां बन्हणैरै लायक ऐस पन कौ दोष ना। 30जां जेख्णी मूंनी शुणांउ कि सै ऐस मैहणु मांनेरै चक्करा मझ आंतै ता मीं झट-पट सै ताउ किनि भेईजि दित्ता; जां तैन्हांं यहूदिया केरै बारै जैन्हैं तैस पन आरोप लाईथ्या, आदेश दितौरा आ कि तिंडै सांमणै तैस पन आरोप लईया।
31तेसै राती जिहीं सिपाहियनि आज्ञा दितोरी थी तींहै तैन्हैं पौलुस रातौ रात अन्तिपत्रिस नगरा मझ लैई अंणा। 32दुवें रौजै सै सवारा पौलुसा सेईतै कैसरिया नगरा गांहणैरै तेईनी छडि करि, पैदल सिपाहि ऐपु यरूशलेम शहरेरै किलैनि वापस यै। 33तैन्हैं कैसरिया नगरा पुज्जी करि राज्यपालनि चिट्ठी दित्ती; जां पौलुस बि तेसेरै सांमणै खड़ा केया। 34राज्यपालै चिट्ठी पढ़िकरि पुच्छु, “कि ऐ कोस प्रदेशेरा आ?” जां जेख्णी समझि ग्या कि ऐ किलिकिया प्रदेशेरा आ; 35तां तैस सेईतै बौलु, “जेख्णी तिंडै आरोपी ऐईलै तां मूं तिंडै मामलै मझ शुणनु।” जां तेनी पौलुसनी राजा हेरोदेसेरै किलै मझ, पेहरै मझ रखणैरी आज्ञा दित्ती।
Obecnie wybrane:
प्रेरितों के काम 23: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
