प्रेरितों के काम 22
22
भीड़िरै सांमणै पौलुसैरा भाषण
1“मिंडै प्यारे भाईयो जां वुजुर्गो, अबै मेहरबानि करि-करि मिंडा उत्तर शुणा।” 2सैक्यै ऐ शुणि करि कि ऐ इब्रानी भाषाय मझ बोलता, तां सै होरै बि शांत भौ ग्यै। फिरी पौलुसै ऐक्यु बौलु, 3आंउ अक यहूदी मैहणु आ, मिंडा जन्म किलिकिया प्रदेशेरै तरसुस नगरा मझ भौरा थ्या, पण आंउ ऐड़ि यरूश्लेम मझ मोटियोरा जां मिंडी पढ़ाई व्यवस्थायरी रीतिरै मुताबिक गुरू गमलीएलेरी देख-रेखी मझ भुई; आज परमेश्वरेरै तेईनी जेतिया तुहां सभनियांं केरा जोश आ तेतियाऐ मिंडा बि आ। 4मीं क्या मड़द क्या जनानि दोईयो बंन्ही-बंन्ही करि जैल्ही मझ बंद करि दित्तै, जां यीशु मसीह पन विश्वास कांने बाऐ ऐड़ि तेईनी सताय कि सैक्यै मरवा बि छडाय। 5ऐस गलैरै तेईनी महायाजक जां महासभायरै सारै वुजुर्ग गवाह अत्तै; कि तैन्हांं किना आंउ यहूदी भाईया केरै नाँ पन तैन्हांं पकड़नेरै तेईनी समन लैकरी दमिश्क नगरानि गांहथा थ्या, जेनि ला तेठणीरा मैहणुवंनी बि सजा दिवांणनि बंन्ही करि यरूशलेम शहरानि अंणु।
पौलुसैरा मंन बदलियूंणा
6जेख्णी आंउ यात्रा काता-काता दमिश्क नगरा नीड़ पुज्जा, लगभग धियाड़िरा टैंम थ्या अचानक असमांणा किना अक तैज प्रगड़ु मिंडै चोउवो पासै चंमकु। 7आंउ धरती पन छिढि ग्या जां मीं अक आवाज शुणीं। कौ मूं सिंउ बोलता थ्या, शाऊल, शाऊल, तु मूं केईनी आ सतांता? 8मीं उत्तर दित्ता, प्रभु, तु केणु आ? तेनी मूं सेईतै बौलु, आंउ नासरत ग्राँईयेरा रींहणार यीशु आ, जैस तु सतांता। 9मिंडै साउगियै प्रगड़ु ता लधु, जां जै मूं सिंउ बोलता थ्या, तैन्हैं अक आवाज शुणि। पण तैन्हांं समझ ना यैई कि आवाजि मूं सिंउ कितु बौलु। 10तां मीं बौलु, हे प्रभु! आंउ कितु करूं? प्रभु मूं सेईतै बौलु, उठिकरि दमिश्क नगरा मझ गा, जां जै किछ तांउनि कांननी ठैहराउरू आ सै सभ ताउनि तैड़ि शुणा दींणु। 11जेख्णी तैस तैज प्रगड़ुरी वजहि सिंउ मूं किछ लाधी ना यूँ, ता मिंडै साउगी मिंडा हत्थ पकड़ी करि मूं दमिश्क नगरा मझ लैई यै। 12तैठि हनन्याह नाँईयेरा अक मैहणु थ्या। सै व्यवस्थाय पन चलणार अक परमेश्वरैरा भक्त थ्या, जां तैड़ी रींहणै बाऐ सारै यहूदी मैहणुवां मझ सै अक इजतदार मैहणु थ्या, सै मूं किनि या। 13तेनी मूं किनि खड़ै भौ करि मूं सेईतै बौलु, “हे भाई शाऊल, फिरी तकांणा लग। तेसै टैंमा मिंडै टीरा केरी नजर खुलि गैई जां आंउ तैस तकांणा लगा।” 14तां तेनी मूं सेईतै बौलु, असेड़ै पूर्वजा केरै परमेश्वरै तु ऐठणीरै तेईनी चुणौरा कि, तु तेसैरी ईच्छा जाणियां, जां तैस धर्मी मतलब मसीह तकाईया, जां तेसैरी आवाज शुणियां। 15केईनी कि तु तेसैरी तरफों सारा मैहणुवां केरै सांमणै तैन्हांं गला केरा गवाह भूंणा, जै तीं तकाई जां शुणि। 16अबै केईनी देर काता खड़ा उठ, बपतिस्मा लै, जां तेसैरा नाँ लै करि अपड़ै पाप धौ दै।
होरिया जातिया मझ प्रचार
17यरूशलेम शहरा मझ वापस ऐईंणा किना बाद जेख्णी आंउ मंदरा मझ प्रार्थना काता थ्या, ता आंउ एकि दर्शना मझ मघन भौ ग्या। 18मीं तकाउ कि प्रभु मूं सिंउ ऐ बोलता, छुईं-छुईं यरूशलेम किना निकोहि गा; केईनी कि मिंडै बारै मझ तुहैं दितोरी गवाहि ऐन्हां मैहणुवां जै ऐड़ि अत्तै ना मंनणी। 19मीं बौलु, हे प्रभु तैन्हांं ता ऐपु पता कि आंउ ताउ पनि विश्वास कांनारा मैहणुवां जैल्ही मझ सुटींथिया जां जगाय-जगाय अराधनालय मझ पिटवाईंथ्या। 20जेख्णी तिंडै गवाह स्तिफनुसा मातै थ्यै तैस टैंमा आउ बि तैठि खड़ा थ्या, जां ऐस गलै मझ आंउ सहमत थ्या जां आंउ तैस मांनारा केरै लिकड़ा केरी रखवाली काता थ्या।
21जां प्रभु यीशु मूं सेईतै बौलु, “गहा, आंउ तुहां होरिया जातिया मंझ दूर-दूर जगाईया मझ भेईजता।”
22ऐड़ि तेईनी कि मैहणु पौलुसेरी गलै शुणतै रिय्है पण अबै तैन्हैं चिंडै दींणी शुरू की, “ऐस मारी छडा; ऐसेरा जींतै रींहणैरा कौ अधिकार ना।” 23जेख्णी सैक्यै चिंडै दींणा जां अपड़ि जांनि पनियें भेईरियें लिकड़ै उटकांतै जां गुस्सा लुहानेरै तेईनी सै हवाय मझ धूड़ उडांणा लगै। 24तां पलटनिरै सरदारै पौलुसनी किलै मझ लैई गांहणैरा जां कोड़ै मारी करि तेसैरी जांच कांनेरा आदेश दित्ता, जेनि ला ऐ पता चलिया कि मैहणु पौलुसेरै विरोधा मझ ऐनि तरीकै केईनी अत्तै चिंडै दींतै। 25जेख्णी सै कोड़ै मांननी तैस बंन्हतै थ्यै, तां पौलुसै ऐपु किनि खड़ै सूबेदारा किना पुच्छु, “क्या तुवाड़ै सांमणै एकि रोमी मैहणुरा दोष साबित भूंणै बिना तैस पन कोड़ै मांने ठीक आ?”
26ऐ शुणि करि सूबेदार पलटनिरै सरदारानि ऐठणीरै बारै मझ सूचना दींणनी ग्या जां बौलु, “तु ऐ कितु काता? ऐ ता अक रोमी नागरिक आ।” 27पलटनिरै सरदारै तैस किनि ऐईछी करि पुच्छु, “मूंनी शुणां, क्या तु रोमी मैहणु आ?” पौलुसै उत्तर दित्ता, “जी हाँ।”
28ऐ शुणि करि पलटनिरै सरदारै बौलु, कि “मूंनी ऐ नागरिकता मोटी रकम दींणै ला मेऔरी आ।” पौलुसै उत्तर दित्ता, “आंउ ता जन्मा किना रोमी नागरिक आ।” 29तां जै मैहणु पौलुसेरी पूछ-ताछ कांना यौउरै थ्यै; इकदम तैड़ां किना खिस्की ग्यै। पलटनिरै सरदारा बि ऐ पता लगा कि ऐ अक रोमी नागरिक आ जां मीं ऐ बंन्होरा डरि ग्या।
महासभाईरै सांमणै पौलुस
30दुवें रोजै तेनी ठीक-ठीक जांणनेरी ईच्छाय सेईतै कि यहूदी तैस पन केईनी दोष लांतै अत्तै, ऐठणीरै तेईनी तेसेरै सारै बन्धन खोलि दित्तै; जां प्रधानयाजका जां सारी महासभायनि किठियूंणैरी आज्ञा दित्ती, जां पौलुस हैट अंणि करि तेन्हैरै सांमणै खड़ा करि दित्ता।
Obecnie wybrane:
प्रेरितों के काम 22: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
