प्रेरितों के काम 15
15
यरूशलेमेरी सभा
1फिरी किछ मैहणु यहूदिया प्रदेशा किना अईछी करि विश्वासी भाईयानि ऐ शिख्रांणा लगै, “कि अगर मूसा भविष्यवक्तेरै रीति-रिवाजेरै अनुसार तुवाड़ा खतना ना भुआ ता तुवाड़ा उद्धार ना भौ सकता।” 2जेख्णी पौलुस जां बरनबासैरा तैन्हांं सिंउ ऐस बारै मझ बड़ा वाद- विवाद भुआ ता ऐ ठैहराउ, कि पौलुस जां बरनबास जां असु मझां होरै बि किछ विश्वासी ऐस गलैरै बारै मझ चर्चा कांननी यरूशलेम शहरा मझ खास चैला जां विजुर्गा किनि गहिया। 3फिरी विश्वासी मैहणुवां केरी मंडली तेन्हैरी यात्राईरै तेईनी किछ पेईंसा जां रोटिया केरा इन्तजाम करवा जां जिहीं ऐ सै फीनीके प्रदेश जां सामरिया प्रदेशै बतै गांहथै थ्यै ता तैन्हैं मैहणुवंनी मंन फिरांणैरी खुशखबरी शुणाय, कि किहीं होरी जाति यीशु पन विश्वास काति अत्ति जां सारै विश्वासी भाई बड़ै खुश भुवै। 4जेख्णी सै यरूशलेम शहरा मझ पुज्जै, ता विश्वासी जां खास चैलै जां विजुर्ग तैन्हांं सिंउ खुश भौ करि मैऐ, जां पौलुस जां बरनबासै बौलु कि परमेश्वरै तैन्हांं सिंउ रेहि करि केतियै-केतियै कम क्यै।
5पण फरीसिया केरी मंडली मझ जैन्हैं विश्वास केया, तैन्हांं मझां कुछ मैहणुवें खड़ै भौ-करि बौलु, कि “होरनियां जातिया खतना करवांणा जरूरी आ जां मूसेरी व्यवस्था मनणैरी आज्ञा दींणी चेहिंथी।”
6तां खास चैलै जां विश्वासी मंडलिरै विजुर्ग ऐस गलैरै बारै गल-बात कांनेरै तेईनी किट्ठै भुवै। 7तां पतरसै बड़ा वाद-विवाद भूंणा किना बाद खड़ै भौ करि तैन्हांं सिंउ बौलु, “हे विश्वासी भाईयो! तुवे जांणतै अत्तै कि बड़ी धियाड़ि भौ गियोरी अत्ति कि परमेश्वरै तुहां मझां आंउ चुणी लियौरा, कि मिंडै प्रचारै ला होरनियां जातिया केरै मैहणु बि खुशखबरी शुणि करि विश्वास करिया। 8जां परमेश्वर जै सभनियांं केरै विचार जांणता तेन्हांनि बि असुवां सैयि पवित्र आत्मा दी-करि लुहाउ कि परमेश्वरै सैक्यै अपड़ै मैहणु समझि करि अपना लियै। 9जां विश्वासै ला तेन्हैरै मंन शुद्ध करि-करि असु मझ जां तैन्हांं मझ कौ भेद-भाव ना रखा। 10तां फिरी, तुवे परमेश्वरा केईनी परखतै जां होरनियां जातिया केरै विश्वासी मैहणुवंनी ऐन्हां सभनियांं यहूदी रीति-रिवाजा केरा पालन कांनेरै तेईनी जौर जबरदस्ती केईनी कातै अत्तै। जेख्णी परमेश्वरै लुहाओरू आ कि तैन्हांं तेन्हैरै नियम कानूना केरा पालन कांनेरी जरूरत ना। जैन्हैरा पालन ना असेड़ै पूर्वज करि सकतै ना असै यहूदी करि सकतै। 11ऐतियु कांनु ठीक ना, पण असै विश्वास कातै कि ऐ प्रभु यीशु मसीहेरै अनुग्रह ला ऐ आ कि असै बचाईयूंतै, ठीक तिहियें जिहीं सै बचाईयोरै अत्तै, ना कि मूसेरै कांनूना केरा पालन कांने ला उद्धार मेईंणा।”
12तां सारी सभा चुप-चाप भौ-करि बरनबास जां पौलुसेरी गलै शुणना लगी, कि परमेश्वरै तेन्हैरै जरियै होरनियां जातिया मझ केतियै-केतियै बड़ै चिन्ह जां अदभुत कम लुहाऐ।
याकूबेरा फैसला
13जेख्णी तैन्हैं बोलणु बंद कियु ता याकूब बोलणा लगा कि हे भाईयो मिंडी शुणां। 14शमौन पतरसै ऐक्यु समझाउ, कि परमेश्वरै पेहिलै होरनियां जातिया पन केतैई कृपा दृष्टि की, कि तैन्हांं मझां किछ अपड़ै मैहणु भूंणेरै तेईनी छांटी लियै। 15जां गैर यहूदी मैहणुवां केरा ऐक्या बदलाव तेनी गलै ला मनियूंता, जैस गलैरै बारै मझ परमेश्वरेरी गलै बोलणारै पवित्र शास्त्रा मझ बड़ै पेहिलै लिखोरू आ, 16“ऐठां बाद मूं फिरी अईछी करि दाऊदेरा राज्य जै दुशमणै छिढाई छडौरा मूं सैक्या फिरी दुबारे खड़ा कांना। जां तेसेरै खंडहर फिरी बणांणै, जां सैक्यै फिरी खड़ै कांने। 17ऐठणीरै तेईनी कि बाकि सारै होरी जातिरै मैहणु जै मीं अपड़ै मैहणु भूंणेरै तेईनी चुणोरै अत्तै, प्रभु तोपिया। 18ऐ सैहै प्रभु परमेश्वर बोलता जै बड़ै टैंम पेहिलै ऐन्हां गला केरै बारै मझ शुणांता यौउरा।
19ऐठणीरै तेईनी मिंडा विचार ऐ आ, कि होरनियां जातिया मझां जै मैहणु परमेश्वरा किनि ऐईंतै, तैन्हांं परेशानियां मझ ना बारिया कि तैन्हांं असेड़ै दवाबा मझ सारा यहूदी नियम-कानूना केरा जां रिवाजा केरा पालन कांना पुईया। 20पण असै तेन्हांनि ऐ लिखि करि भेईजतै कि सै तैस मीटा ना खईया जै मैहणुवें मूर्तिया पन चढ़ाउरू आ जां व्यभिचारा किना जां गआ घौटि करि मारौरा पशुवा केरू मीट मेईं खांतै जां तेन्हैरा खून मेईं खांतै। 21केईनी कि पुरांणै टैंमा किना नगरा-नगरा मझ मूसेरी व्यवस्थायरै बारै शुणाई गियौरू आ, जां ऐ हर आरामेरी धियाड़ि यहूदी सभा घरा मझ पढ़ियूंती।”
होरनियां जातिया बाऐ विश्वासियनि चिट्ठी
22ऐठणीरै तेईनी फिरी यरूशलेम शहरेरा सारा विश्वासिया समैत जां खास चैला जां विजुर्गा अच्छु लगु, कि ऐपुवै मझां किछ भाई छांटी करि, मतलब यहूदा जेसैरू नाँ बरसब्बा आ, जां सीलासनि जै विश्वासिया केरै बिच अगुवा थ्या; सैक्यै पौलुसा जां बरनबासा सेईतै अन्ताकिया नगरेरी कलीसियै मझ भेईजियो। 23जां तेन्हैरै हत्था ऐ चिट्ठी लिखि करि भेईजि; “अन्ताकिया नगरा मझ, सीरिया जां किलिकिया प्रदेशा मझ रींहणार विश्वासी भाई जै होरिया जातिया मझां अत्तै, खास चैला जां विजुर्ग विश्वासी भाईया केरा नमस्कार।
24असुवां ऐ पता लगा कि असेड़ै बिच मझां किछ मैहणुवें तैठि अपड़िया गलै ला तुवाड़ै मंन भटका दितोरै अत्तै। जां तुवे परेशानि मझ बारी छडोरै अत्तै पण असै तेन्हांनि आज्ञा ना थी दितोरी। 25ऐठणीरै तेईनी असुवें अक मंन भौकरी ठीक समझु, कि कुछ मड़दा छांटी करि अपड़ै प्यारे बरनबासा जां पौलुसा सेईतै तुहां किनि भेईजिया। 26ऐ ता ऐत्यै मैहणु अत्तै, जैन्हैं अपड़ै प्रांण असेड़ै प्रभु यीशु मसीहरै तेईनी परेशानि मझ सुटौरै अत्तै। 27जां असै यहूदा जां सीलास भेईजोरै अत्तै, जैन्हां ऐपु अईछी करि ऐकेई गलै तुहांनि शुणां दींणी जै असै लिखि रिय्होरै अत्तै। 28पवित्र आत्मायनी, जां असुवां बि ठीक लगु कि ऐन्हां जरूरी गला छडि; तुहां पन हौरा बौझ ना सुटिया; 29कि तुवे मूर्तिया पन चाढ़ोरी रोटी, खूना, जां गअ घौटि करि बलि क्यौरा जीवा केरू मीट खांणा किना जां व्यभिचारा किना दूर रेय्ही ऐहै तुवाड़ै तेईनी बधिया आ। ऐहीं कांने ला तुवाड़ा आघै भला भूंणा।”
30फिरी सै यरूश्लेम किना विदा भौ करि अन्ताकिया शहरा मझ पुज्जै, जां तैन्हैं तैठि विश्वासी भाई किठैरी करि सै चिट्ठी तेन्हांनि दी दित्ती। 31जां सैक्यै तैस चिट्ठी पढ़ि करि तैन्हांं उत्साहित गलै ला बड़ै खुश भुवै। 32जां यहूदा जां सीलास जै ऐपु बि भविष्यवक्ता थ्यै, बड़ी सारी गलै ला विश्वासी भाईयनी उपदेश दी करि मजबूत क्यै। 33यहूदा जां सीलास किछ धियाड़ि तैठि रुकणा किना बाद, विश्वासियै भाईयै सैक्यै दुबारे शांति सेईतै तैन्हांं किनि भेईजि दित्तै, जैन्हैं सैक्यै ऐठि भेईजोरै थ्यै। 34पण सीलासै अन्ताकिया शहरा मझ रींहणैरा फैसला केया, ऐठणीरै तेईनी यहूदा अकैलाऐ यरूशलेम शहरानि वापस चलि गिया। 35पण पौलुस जां बरनबास अन्ताकिया शहरा मझ रैही ग्यै, जां बड़ा मैहणुवां सेईतै प्रभु यीशु मसीहरा प्रचार कातै जां खुशखबरी शुणांतै रिय्है।
पौलुसेरी दुईं प्रचार यात्रा, पौलुस जां बरनबासेरू खिडणु
36किछ धियाड़िया किना बाद पौलुसै बरनबासा सेईतै बौलु, कि “जैन्हां-जैन्हां नगरा असै प्रभुरै वचन शुणाय, ऐईछा, फिरी गहि करि तैन्हांं विश्वासिया भाईया तकांतै कि सै केतियै अत्तै।” 37तां बरनबासै यूहन्ने जैसनि मरकुस बि बोलींथ्यै, तैस सेईतै लैई गांहणा चांहथा थ्या। 38केईनी कि पौलुसै सैक्या जै पंफूलिया प्रदेशा मझ तैन्हांं किना अलग भौ गियौरा थ्या, जां कंमा पन तैन्हांं सेईतै ना ग्या, सैक्या ऐपु सेईतै लैई गांहणा ठीक ना समझु। 39ऐक्या विचार कांना किना बाद तैन्हांं मझ ऐतिया झगड़ा भुआ, कि पौलुस जां बरनबास एकि दुवें किना अलग भौ ग्यै जां बरनबास यूहन्ना मरकुसा लै करि जहाजा पन साइप्रस टापुनि चलि ग्या। 40पण पौलुसै सीलास चुणी ल्या, जां जिहीं ऐ सै अन्ताकिया शहरा किना ग्या ता विश्वासी भाईयै सैक्या परमेश्वरेरै अनुग्रहा मझ सोंपी करि अंन्ताकिया शहरा किना चलि ग्या। 41जां फिरी सै पूरै सीरिया जां किलिकिया प्रदेशा मझ ग्यै जां कलीसियेरै विश्वासिया मजबूत कातै आघै चलि ग्यै।
Obecnie wybrane:
प्रेरितों के काम 15: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
