प्रेरितों के काम 14
14
पौलुस जां बरनबासेरा इकुनियुम शहरा मझ विरोध
1इकुनियुम शहरा मझ ऐत्यु भूं कि पौलुस जां बरनबास यहूदिया केरी प्रार्थना सभा घरा मझ सेईतै-सेईतै ग्यै, जां तैन्हैं बड़ै प्रभावशाली तरीकै सिंउ तैठि प्रचार केया, तां यहूदिया जां होरनियां जातियै दोईयो मझियें बड़ै सारै मैहणुवें विश्वास केया। 2पण विश्वास ना कांनारै यहूदियै होरनियां जातिया केरै मैहणु विश्वासी भाईया केरै विरोधा मझ बड़ै भड़काय, जां सैक्यै विश्वासिया भाईया केरै खिलाफ करि दित्तै। 3पण पौलुस जां बरनबास बड़िया धियाड़िया तेईनी तैठि रिय्है, जां प्रभुरै भरौसै पन निडर भौ करि गलै कातै थ्यै, जां परमेश्वरै तेन्हैरै हत्थै ला चिन्ह जां अदभुत कम करवा करि साबित कियु कि ऐस अनुग्रहरै बारै मझ तैंन्हैरा संदेश सच्चा थ्या। 4पण नगरेरै मैहणुवां मझ फूट पैई गेईथी; ऐनि ला केत्थरै ता यहूदिया केरी तरफि, जां केत्थरै ता खास चैला केरी तरफों भौ ग्यै। 5जेख्णी होरी जाति जां यहूदियै तेन्हैरा अपमान कांनेरी कोशिश जां तैन्हांं मांनेरा फैसला केया। 6तां सै ऐस गलेरै बारै मझ बुझि ग्यै, फिरी सै लुकाउनिया प्रदेशेरै लुस्त्रा शहरा जां दिरबे शहरा मझ, जां आस पासेरै प्रदेशनी नशि ग्यै। 7जां तैठि खुशखबरी शुणांणा लगै।
पौलुस जां बरनबास लुस्त्रा मझ
8लुस्त्रा शहरा मझ अक मैहणु बेठौरा थ्या, जै पैयिड़ा केरा कमजौर थ्या। सै जन्मा किना लट्टा थ्या, जां कदि बि ना थ्या चलौरा। 9सै पौलुसा गलै कातै शुणता थ्या जां पौलुसै तैस धेरै ध्यान सिंउ तकाउ कि ऐस मैहणु ठीक भौ गांहणैरा विश्वास आ। 10जां जौरै आवाज दी करि बौलु, “अपड़ै पैयिड़ा केरै भारा पन सिधा खड़ा भौ।” तां सै उटकि करि चलणा- फिरना लगा।
11मैहणुवें पौलुसैरा ऐ कम तका करि लुकाउनिया भाषाय मझ जौरै हक दी करि बौलु, दैवता मैहणुरै अव्तारा मझ असु किनि उतरि यौउरा। 12जां तैन्हैं बरनबासनी यूनानियां केरै दैवतेरू ज्यूस नाँ दित्तु, जां पौलुसनी हिर्मेस दैवतेरू नाँ दित्तु, केईनी कि सै गलै कांना मझ मुख्य थ्या। 13जां ज्यूसेरै तैस मंदरैरा पूजारी जै तेन्हैरै शहरेरै सांमणै थ्या, तैन्हैं बकरा जां फुला केरै हार अणैं केईनी कि सै बलिदान कांना चांहथै थ्यै।
14पण खास चैलै बरनबास जां पौलुसै जेख्णी शुणु, ता सै बड़ै परेशान भुवै जां ऐठणीरै तेईनी तैन्हैं ऐपुवै अपड़ै लिकड़ै फाड़ी दित्तै, जां भीड़ि मझ उल्लरी ग्यै, जां जौरै हक दीकरी बोलणा लगै, 15“हे मैहणुवो, तुवे कितु अत्तै कातै? असै बि ता तुहां सैयि मैहणु अत्तै, जां तुहांनि खुशखबरी शुणांतै, कि तुवे ऐन्हां बेकार परम्पराईया किना अलग भौकरी जींतै-जागतै परमेश्वरा धेरै ऐईछा, जेनि धरती जां सुरग जां समुद्र जां ऐन्हां मझ रीहिंणार सारै जीव-जंतु बंणाय। 16तेनी बीति गियोरै टैंमा मझ सारी जाति अपड़ि-अपड़ि बत्तै चलणा दित्ती। 17फिरी बि सै भलै कम करि-करि अपड़ै बारै मझ गवाहि दींता जां भलाई काता रिय्हा जां सुरगा किना झड़ी जां फलवंत रितु दी करि, तुवाड़ै तेईनी रोटी जां तुवाड़ै मंन आनंद सेईतै भरता रिय्हा।” 18ऐ बोलि करि बि तैन्हैं मैहणु बड़ी मुशकलि सेईतै रौकै कि तेन्हैरै तेईनी बलिदान मेईं करा।
19पण यहूदियै अन्ताकिया जां इकुनियुम शहरा किना अईछी करि मैहणु अपड़ै पक्षा मझ करि लियै, जां पौलुसा मांनेरै तेईनी घौड़तिया बज्जी, जां मौरा संमझी करि तैस नगरा किना भेईर ध्रीड़ी करि लैई ग्यै। 20पण जेख्णी चैलै पौलुसेरै चोउवो पासै किना ऐईछी करि खड़ै भुवै, तां सै उठिकरि नगरा मझ ग्या, जां दुईं धियाड़ी बरनबासा सेईतै दिरबे नगरानि चलि ग्या।
सीरियेरै अन्ताकिये मझ वापस ऐईंणु
21तेठां किना बाद पौलुस जां बरनबासै तैस नगरेरै मैहणुवंनी खुशखबरी शुणाय, जां बड़ै सारै चैलै बंणाय, फिरी तैड़ां बाद सै अपड़ि बत्तै वापस गांहणा लगै। सै फिरी लुस्त्रा शहरानि ग्यै। फिरी सै तैड़ां किना इकुनियुम शहरानि ग्यै जां फिरी सै पिसिदिया प्रदेशेरै अन्ताकिया शहरानि ग्यै। 22जां सै हर नगरा मझ चैला केरा मंन मजबूत जां उत्साहित कातै रिय्है जां ऐकेई शिक्षा दींतै रिय्है कि विश्वासा मझ बंणी रिय्हा; जां ऐ बोलींथ्यै, “असु बड़ै भारी कष्ट उठाय करि परमेश्वरेरै राज्य मझ प्रवेश कांना पूंणा।” 23जां तैन्हैं हर एकि कलीसियेरै विश्वासिया मझां तेन्हैरै अगुवे बणांणेरै तेईनी किछ मड़द चुणै, जां उपवास जां प्रार्थना करि-करि सैक्यै नवें विश्वासी प्रभु यीशुरै हवालै कियै जैस पन तैन्हैं विश्वास क्यौरा थ्या। 24जां पिसिदिया प्रदेशा किना गांहथै सै पंफूलिया प्रदेशा मझ पुज्जै; 25जां जेख्णी सै पंफूलिया प्रदेशेरै पिरगा शहरा मझ वचन प्रचार करि बेठै, ता सै अत्तलिया नगरा मझ यै,
26जां तैड़ां किना संमुद्री जहाजा मझ अन्ताकिया शहरानि वापस चलि यै, जेठां किना सैक्यै परमेश्वरेरै अनुग्रह मझ सोंपी करि, तैस कंमेरै तेईनी भेईजोरै थ्यै जैस सै पूरा करि वापस चलि येईथ्यै। 27अन्ताकिया शहरा मझ पुजि करि, फिरी तैन्हैं कलीसिया किट्ठी की जां बौलु, कि परमेश्वरै असु सेईतै भौ करि केतियै बडै-बडै कम क्यै! जां किहीं परमेश्वरै होरनियां जातियनि यीशु मसीह पन विश्वास कांना मझ कामयाब बंणाय। 28तैठि “पौलुस जां बरनबास” चैला सेईतै बड़ी धियाड़ी रिय्है।
Obecnie wybrane:
प्रेरितों के काम 14: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
