Wɔrɔmi ye 2
2
Kolocɔlɔɔ kútiiw kéele
1 #
Mat 7:1; Luk 6:37 Gee bee na mɔ syɔ́ɔnwee faala mi miyɛɛ gbéʔele bele kútiijooo lè, mɔ a kɔ́ joo tànʔa i nyɛ mɔ ma í, níì cán mɔ wee mi miyɛɛ bye lè bele kútiijooo ní wɔ́ɔ i kérigèle bee wonijangéle kpéʔele, mi gi cán mɔ tiimaa wɔ́ɔ i kútiiw cáan miyɛɛ na. 2Wolo n gi cán bele be kérigèle bee félege kpéʔele lè, kútiiwee Kolocɔlɔɔ nyuu bele bee kéele na lè, wi i nyɛ kányɛʔɛ be na. 3Bele be kérigèle bee kpéʔele lè, mɔ syɔ́ɔnwee mi miyɛɛ bye lè bele bee kútiijooo, bi gi taa mɔ wɔ́ɔ i kérigèle bee wonijangéle kpéʔele, a mɔ i sɔ̀ngí lé mɔ a syɔɔ Kolocɔlɔɔ kútiiw ma? 4Wàlá àmɛɛ Kolocɔlɔɔ fúngi tɔ̀nɔ n nyɔɔ lè gbanʔama, á wi nyínimi ní wi kpàracogi wɔ́ɔ̀ nɛʔɛ lè, a koro jo lé mɔ o gee bee córo wii í láà? Mɔ ga gi cán ncan wi funjǎngi a gbǎn mɔ kàriga mɔ í kàdoʔo wáa mɔ kapeegèle ma ì? 5Kàjáa àmɛɛ mɔ nyúngi tɔ̀nɔ n waʔa lè, ní àmɛɛ mɔ láa o nyɛ bi mɔ fúngi kàriga Kolocɔlɔɔ ma lè í, koro na mɔ tiimaa i kàa taari mɔ wɔʔɔli na bi taa sa nan wɔʔɔgbɔɔgi canʔa na, cángee na Kolocɔlɔɔ a ba gi tɛ̀ɛn lè syɛ́ɛnbèle na pe gi cán woro kútiiw n tɔ̀nɔ n sín. 6#Ŋún 62:13; Kàs 24:12 Cángi bee na wi a ba syɛ́ɛnbèle myɛ nibin nibin sàra bi yɛlɛ ní be kapyegèle ní. 7Bele si be kòro ni kasingèle kpéʔele lè ní lòmaana ní, ní i nìjanri caa, n fàra sòololi, ní cénaa-sìnvɔnʔɔri na, bele bee má wi a sìibangwɔɔw kaan. 8Kàjáa bele fundaaya yi be kíle ni syée pe nyɛnɛ kérigèle kurugo lè, pe si tée o yèré kányɛɛgi ni lè í, níì kòro pe kakolobyeri na ni kpéʔele lè, Kolocɔlɔɔ fundanʔari ní wi kayaagi a ba too bele bee na. 9Bele myɛ be nyɛ lè kakolobyebèle, wɔʔɔgɔ ní funjurugoro a ba too bele bee na, ki si a séli Zyefubèle na gbɛnʔɛnɛ, si náa nan syɛɛnfeleyi wozanya na. 10Kàjáa bele myɛ be nyɛ lè kasinbyebèle, nìjanri, ní sòololi, ní yɛɛ̀nyingi a ba pye bele bee ma, ki si a séli Zyefubèle na gbɛnʔɛnɛ, si naa nan syɛɛnfeleyi wozanya na. 11#Làlw 10:17 Níì cán Kolocɔlɔɔ o syɔɔnwaa yirigi wàa ni í.
12Bele myɛ be kapeegèle kpéʔele lè, pe si o nyɛ Mowizi làlwaw kólogo ni lè í,#2:12 Mɔ ga lóʔo bele be lè pe o nyɛ Mowizi làlwaw kólogo ni í, gee bee n jo pe o nyɛ Zyefubéle í. Mɔ si ga lóʔo bele be nyɛ lè Mowizi làlwaw kólogo ni, Zyefubèle na be nyɛ. bele bee a kálagi, kàjáa làlwaw bee kólogo kéele na ban pe a kálagi í, bele myɛ si be kapeegèle kpéʔele lè ní i nyɛ Mowizi làlwaw kólogo ni, kútiiw a ba too bele bee na bi yɛlɛ ní làlwaw bee syɛ́ɛnrɛ ní. 13Níì cán ki o nyɛ mɔ a jo bele be làlwaw syɛ́ɛnrɛ lúro lè yagana, bele bee Kolocɔlɔɔ córo syɛɛnsinbèle í, fwɔɔ bele be làlwaw syɛ́ɛnrɛ lúro lè ní i di kpéʔele. 14Syɛɛnfeleyee yi lè Mowizi làlwaw o nyɛ yi ma í, yi ga ni làlwaw kèlē kpéʔele gele yi fúnyi tèé yi na lè, koro n gi tɛ̀ɛn ncan làlwawaa i nyɛ yi tiimaa fúnyi ni, bi gi taa Mowizi làlwaw o nyɛ yi ma í. 15Níì cán kérigèle gele Mowizi làlwaw tɛ̀ɛn lè, yi kapyegèle ga ni yɛlɛgi ní gele bee ní, gee bee i gi tèé làlwaw n sɛ́bɛ yi fúnyi ni. Yi fúnyi i nyɛ yi séera, ncan làlaa ni yi sɔ̀nguri i kolomɔ kaangi yi ma, làlaa ni ti wɔ́ɔ i tànʔa kaangi yi ma. 16Gee bee si a ba yiri gbɛ̀ɛ́nmi na cángi bee na, gee ni Kolocɔlɔɔ a ba kútiiw joo lè kalaragèle myɛ kéele na ge nyɛ lè syɛ́ɛnbèle fúnyo ni, ki si a kpéʔele Zyezu Kirisi bárigaw ni bi yɛlɛ ní Syɛɛnjóocǎnri ní mii nyuu lè.
Zyefubèle ní Mowizi làlwaw kéele
17Mɔ i miyɛɛ yiri Zyefuo, níì mɔ sɔngumi taʔa Mowizi làlwaw na, ní i miyɛɛ gbɔ́ʔɔgi ní Kolocɔlɔɔ kéeli ní, 18mɔ n jo mɔ n Kolocɔlɔɔ kínidɛnɛgi cán, ní wɔ́ɔ i kacǎngèle sɛʔɛ ni cángi, gele ge yɛlɛ mɔ í da kpéʔele lè, níì cán Mowizi làlwaw wi mɔ tama kérigèle bee na, 19mɔ i gi sɔ̀ngí n jo mɔ wi nyɛ fúunbèle talafɔlɔ, ní wɔ́ɔ i nyɛ yébilimi syɛ̀ɛnnɛ gbɛɛnmɛ, 20ní ní i nyɛ nilabalabèle cìligefɔlɔ ní pìíbèle tamafɔlɔ, níì cán Mowizi làlwaw sɛ́bɛ wi nyɛ mɔ ma lè, kérigèle cánna ní kányɛɛgi myɛ i nyɛ wi ni. 21Ki si ga pye nya, mɔ wee wi pèle tama lè, nyàʔá na mɔ tiimaa o miyɛɛ dama í? Mɔ wee wi gi nyuu lè níì jo: Ki ga yɛlɛ syɔɔn í da yúu í, nyàʔá na mɔ yúu? 22Ba mɔ wee wi gi nyuu lè níì jo: Ki ga yɛlɛ syɔɔn í da ceyuugo kpéʔele í, nyàʔá na si mɔ gi kpéʔele? Yáriree syɛ́ɛnbèle sámagi ní pe kɔ́yi ní ní i di kpɔ̀ʔɔrɔ́ lè, mɔ wee wi jo lè ti ga mɔ dɛ́nɛ í, nyàʔá na si mɔ di kpɔ̀ʔɔrɔli kpaaya fuguru di kurugo? 23Mɔ wee wi kpɔ́ɔmi kpéʔele lè àmɛɛ Mowizi làlwaw nyɛ mɔ ma lè, nyàʔá na mɔ Kolocɔlɔɔ faari àmɛɛ mɔ làlwaw bee cèʔé lè mɔ kapyegèle báriga ni? 24#Eza 52:5 Níì cán ki i nyuu Kolocɔlɔɔ syɛɛnsɛbɛri ni níì jo: «Yele Zyefubèle i nyɛ sábabu á syɛɛnfeleyi wozanya si i Kolocɔlɔɔ mɛ́ɛgi kálagi.»
25 Kɛ́nɛw tɔ̀nɔ́ i nyɛ yacanga mɔ ma kapye mɔ i Mowizi làlwaw kólogo táanri ki tánʔaganmi na. Kàjáa mɔ si ga pye mɔ o làlwaw bee kólogo táanri ki tánʔaganmi na í, mɔ i nyɛ àmɛɛ kɛ́nɛnaa-sìngbeʔeleo nyɛ lè. 26Ki si ga pye kɛ́nɛnaa-sìngbeʔeleo i táanri ni yɛlɛgi ní làlwaw kajoogéle ní, mɔ ga gi cán Kolocɔlɔɔ a wee bee córo àmɛɛ kɛ́nɛkpeʔeleo nyɛ lè ì? 27Gee bee na wee wi nyɛ lè kɛ́nɛnaa-sìngbeʔeleo céri kàbaan na ní i làlwaw kèlē kpéʔele ni forogi, wee bee a tànʔa taa mɔ na, mɔ wee wi lè mɔ o làlwaw kólogo táanri ki tánʔaganmi na lè í, bi gi taa làlwaw syɛɛnsɛbɛrɛ i nyɛ mɔ ma n fàra kɛ́nɛw kpéʔelele na. 28Níì cán wee wi nyɛ lè Zyefuo syɛ́ɛnbèle nyɛ́nɛ na yagana, wee bee o nyɛ Zyefuteleo í. Ní kɛ́nɛwee be kpéʔele lè céri na yagana, wee bee o nyɛ kɛ́nɛteleo í. 29#Làlw 30:6 Kàjáa wee wi nyɛ lè fúngi ni Zyefuo, wee bee tɔ̀nɔ́ i nyɛ Zyefuteleo. Ní kɛ́nɛwee wi nyɛ lè fúngi wóo, wee bee i nyɛ kɛ́nɛteleo, kɛ́nɛw bee i kpéʔele Pìicǎnni báriga ni, wi o kpéʔele làlwaw syɛɛnsɛbɛrɛ joolo báriga ni í. Syɛ́ɛnbèle ban pe a syɔ́ɔnw bee sòolo í, Kolocɔlɔɔ wi a wi sòolo.
Obecnie wybrane:
Wɔrɔmi ye 2: CB10
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Kolocɔlɔɔ Syɛ́ɛnri © Bible Society of Côte d'Ivoire, 2008.
