ISAYA 25
25
Lwimbo lu Khwitsominya
1Mwami Nyasaye, nivi Nyasaye wanje;
nakhuha vukhumi, ninzitsominya lira liolio;
shichila wakhola vindu viu khuchenyinya;
vindu via waloshitsa khurula khale,
viu vusuuvilwa khandi viatoto.
2Nivi wakhola mataala makali khuva lichiinga,
nu wononyinya tsimbinga tsiako.
Inzu yu vwami ya vandu vi tsimbia tsindi yapomolanyinywa,
iliitsa khuvula khumbakhwa vuyia.
3Khulwa yako, vandu vi tsingulu valiitsa khukhuha vukhumi;
mataala ka vandu vi tsimbia tsindulu valiitsa khukhuha luyali;
4shichila nivi wali khuli imbinga ya vamanani,
imbinga ya vandu vanyakhananga mu matiinyu vavula khwavatiila,
shindu shiu khukhushinga khurula khu imbula yi imbuutsa inditoho,
khandi khuli shiniikha khurula khu mbasu;
shichila vikholwa viu khusalilitsa via vandu valulu
vili khuli imbuutsa ihuutsanga nikwa khu lisisi,
5inoho khuli luya mu shivala shiumakanu.
Navutswa yivi, Mwami Nyasaye wahonjelitsa
liyooko lia vandu vi tsimbia tsindi;
khuli malesi kashinditsanga mbasu mululu,
nindio khwichinjilila khwa vandu valulu khushinditswangwa.
Nyasaye Warechishitsa Lilia
6Mwami Nyasaye wi Mikaanda Chiliihe aliitsa khukholela vandu veve voosi mulukha kwi lilia li vindu vi vivana, mulukha kwi idivai indahi, mulukha kwi vindu vi vivana vi vindu viu vuhaale, mulukha kwi idivai inuulu yene muno khu Shikulu shia Sayoni. 7Aliitsa khutivitsila khu shikulu yishi shia shikhunikho shiosi shiavakhunishila vandu voosi, shitambaya shiavimba vandu vi tsimbia tsiosi. 8Nalwo lwu Mwami Nyasaye aliitsa khweeya miliika mu tsimoni tsia vandu voosi, aliitsa khurulitsaho tsisoni tsia vandu veve vanyolanga shia havundu hosi mu shivala. Mwami Nyasaye umali khuvoola.
9Khulitukhu lienelo, vandu valiitsa khuvoola, “Uyu neye Nyasaye weru! Neye wa khwalindililanga khwenya akhuhonyinyi. Neye Mwami Nyasaye; wa khwalindililanga! Chendi khusangale makhwikhoyele mu vuhonyinyi vwevwe.”
10Mwami Nyasaye aliitsa khulinda shikulu yishi; nikhali Vamoabu valiitsa khutuuvachilwa havundu havo, khuli vatuuvachilanga hasi vunyasi mu vwina vwa masiingo ki imboleya. 11Valiitsa khuvambuula makhono kavo khuli vachelitsanga khweleema khu matsi; navutswa Mwami Nyasaye aliitsa khuvaha tsisoni, mavakorwi khuli vanyala khweleema khu matsi na makhono kavo. 12Aliitsa khupomolanyinya masisi kenyu karaambiha, nu khukakwishitsa hasi, khutukha lwa karikala lukuushi.
© The Bible Society of Kenya, 2013