ISAYA 24
24
Khuli Lilova Liliitsa Khutivitswa
1Mwami Nyasaye ali himbi khwononyinya shivala,
nu khushikhola khuva shele;
aliitsa khukotominya shivala nu khusalanyinya vandu vamenyanga mushio.
2Shia mundu aliitsa khuvirila mu makhuva kenako,
ave mundu vutswa inoho musalisi;
murukwa inoho muruchi wewe;
murumishi wi shikhana inoho mukhali wakholelanga muhinzilu;
mukuuli inoho mundu umukuulitsilanga vindu;
mundu wikopitsanga wundi inoho nende ukopanga;
mundu uli ni likoovi liu wundi, inoho woyo urunganga likoovi.
3Lilova liliitsa khwononyinywa nukhutivitswa;
shichila Mwami Nyasaye umali khuvoola.
4Lilova liumakananga niliniala;
vandu voosi mu shivala vateteshelanga nivakhutsa mwoyo;
khali likulu nende lilova vitivilanga khulala.
5Vandu vayononyinya shivala;
shichila vameneka malako,
vayambakhana khulonda mechitso
khandi vameneka lilakano li mihika ni mihika.
6Khulwa yako, shivala shialaamwa;
khandi vandu vamenyanga mushio vanyakhananga
shichila vutamanu vwavo vene;
vandu vamenyanga mu shivala vacheha,
ni vati vonyene vashili mwoyo.
7Matunda ki misabibu kaniala,
khandi idivai ichehanga.
Shia mundu wosi wali nu vuyaanzi waraanga khuva nu vuveleli mu mwoyo.
8Tsinyimbo tsia vimbanga ni tsindumba tsiavwa,
liyooko lia vakhuvanga nende likhoya viavwa,
tsinyimbo tsi vilili via vakhuvanga viasinjilitswa.
9Khali mundu avulakhuho wimbanga nu vuyaanzi;
khali idivai ya vang'wetsanga nindulu muno.
10Khali vindu viakoyana mu litaala likali;
shia inzu yayikalwa, mundu avulakhuho winjilanga muyo.
11Vandu valaanjililanga mu tsinjila shichila vavula idivai ya vang'wa;
vuyaanzi vwavo vwatukha khushihakamo.
Shindu shiachilanga vandu nivasangala shiamala khurulaho.
12Litaala likali liarikala lichiinga vutswa;
khali vilivwa vialio vitong'olanyinywa mu vitonye.
13Yaka nako kaliitsa khwikholekha khu shia luhia lwosi mu shivala;
khandi kaliitsa khwikholekha khu vandu vi tsimbia tsiosi,
khuli musayituni kuhulakwangwa,
khuli vandu vatulanga litunda liu khumalilikha khu misabibu.
14Yavo valiitsa khurikala valiitsa khulaanjilila, nivimba nu vuyaanzi;
shichila Mwami Nyasaye ali ni tsingulu
lwa valiitsa khuva nivalaanjililanga khurula imbo.
15Khulwa yako, munyi vamenyanga khuluveka luli ivukwi
muhaane vukhumi khu Mwami Nyasaye;
munyi vali khuluchinga lwi inyanza,
muhaane vukhumi khu lira liu Mwami Nyasaye, uli Nyasaye wa Israeli.
16Nu khuli ihale wene khu tsindulu tsi lilova
khuhulilanga tsinyimbo tsiu khwitsominya Israeli,
shivala shi likhola liu vulunji.
Navutswa inzi mbulakhu lisuuvilitswa liosi!
Vandu vu khunzama vatsilililanga khutsama,
vandu vu khunzama vatsilililanga khunzama.
17Munyi vamenyanga mu shivala, mutechele,
vwina nende mireeko chili himbi khumukumila!
18Mundu uliitsa khuva niyilukhanga shichila litechela liliitsa khukwa mu vwina;
woyo uliitsa khuchelitsa khurula mu vwina aliitsa khukwa mu mureeko;
shichila matirishia ku mwikulu kayikuukha,
khandi misinji chiu khulilova chitechelanga.
19Lilova liliitsa khuvunzukhana,
lilova liliitsa khwatiikhanamu,
lilova liliitsa khwinuya nuya vutamanu muno.
20Lilova linuya nuyanga khuli mutandi avoya voyanga,
khandi linuya nuyanga khuli inzu;
lilova lilitohitswangwa nu vwoni vwa vandu vakholanga;
liliitsa khuyongovela, nu khuvula khusinjila khandi.
21Khulitukhu lienelo Mwami Nyasaye
aliitsa khusalilitsa vindu vimenyanga mwikulu, vili mwikulu;
vami vamihanga mu shivala, vamenyanga mu shivala.
22Valiitsa khulaangwa halala khuli vavohe mu vwina;
valiitsa khwikalilwa mucheela,
khandi matukhu manyishi nikakhavira valisalilitswa.
23Nalwo lwa mweli kuliitsa khuvula khwakha,
liuva lilimwama;
shichila Mwami Nyasaye wi Mikaanda Chiliihe neye uliitsa khwamiha
khu Shikulu shia Sayoni
khandi mu Yerusalemi
nu khumanyinya vimilili veve vukhumi vwevwe.
© The Bible Society of Kenya, 2013