रोमियो 13
13
राज रे प्रति कर्तब्य
1हर इक्की माहणुये जो अधिकारियां रे अधीन रैहणा चाहिन्दा, काँह्भई कोई अधिकार येढ़ा निआं सै जे परमेशरा रिया तरफा ते निआं; कने सै जे अधिकार ये, सै परमेशरे दित्तिरे। 2इस खातर सै जे अधिकारिये रा बिरोध कराँ सै परमेशरा रे हुक्मा रा बिरोध कराँ, कने सै लोक जे परमेशरा रे हुक्मां रा बिरोध कराँ ये, तिन्हांजो सजा भुगतणे पौणी।
3काँह्भई देक्खा राजा तिस माहणुये जो नीं डरान्दा, सै जे नेकी कमाँ, पर तिस माहणुये जो डराँ, सै जे बुरे काम्म कराँ। जे तुहें राजे ते नीं डरना चाहन्दे ओ, तां भले काम्म करदे रौआ, तुहांजो राजे रिया तरफा ते सराहना मिलणी; 4सै जे राजा सै परमेशरा रा सेवक आ, सै तेरा भला करने खातर आ, पर जे तू बुरा कराँ तां तिसते डर, काँह्भई तिने तलवार बेमतलब नीं लेईरी; सै परमेशरा रा सेवक आ सै जे बुरा काम्म करने औल़यां पर परमेशरा रा कोप ल्यौआं। 5इस खातर राजे रे प्रति तुहांरा समर्पण जरूरी आ, ये समर्पण सजा ते डरीने नीं हूणा चाहिन्दा, पर तुहांरिया आत्मा रिया गहराईया ने हूणा चाहिन्दा।
6इस खातर तुहांजो टैक्स बी देणा चाहिन्दा, काँह्भई अधिकारी परमेशरा रे सेवक ये सै जे अपणे फर्जां जो पूरा करने च समर्पित रैं। 7जिस किसी माहणुये री देणदारी जे तिज्जो देणे जोई, तिसजो तू चुकता कर; सै टैक्स जे तिज्जो देणे जोआ, तिस्सो दे। तिसरी चुंगी जे तूह पर निकल़ां इ, तिसजो चुंगी दे; तू सब अधिकारियां रे प्रति आदर दास्स।
पड़ेसिये ने प्यार
8इक्की दुज्जे रे प्यारा ते इलावा किसी गल्ला च किसी रे कर्जदार नीं हुआ; काँह्भई सै जे अपणे साथियां ने प्यार कराँ, सै येढ़ा करीने व्यवस्था जोई पूरा कराँ। 9काँह्भई मूसा री व्यवस्था च बौहत सारे हुक्म ये तियां जे, “व्यभिचार मत कर, खून मत कर, चोरी मत कर, लालच मत रख।” कने इन्हांजो छड्डिने होर कोई बी हुक्म ओ, तां सब्बीं रा निचोड़ इसा गल्ला च पाया जां, “अपणे पड़ेसिये ने अप्पूँ साई प्यार कर।” 10प्यार अपणे पड़ेसिये रा बुरा कदीं नीं करदा, इस खातर सै जे प्यार कराँ सै व्यवस्था जो पूरा कराँ।
11इस खातर वगता जो समझीने ये करा। तुहें जाणाँ ये भई तुहांरे खातर अपणिया निन्दा ते जागणे रा बगत आई गरा, काँह्भई ताहली जे अहें विश्वास कित्या था, तिस वगता रे विचारा ने अहांरा छुटकारा हुण तिसते होर नेड़े आ। 12ये येढ़ा भई रात तकरीवन खत्म हुई चुक्कीरी, कने दिन सिरने जोआ; इस खातर अन्धकारा ने जुड़ीरे सारयां कम्मां जो करना बन्द करा कने जोतिया च रैहणे खातर त्यार हुई जावा।
13इस खातर औआ अहें तिन्हां लोकां साई ठीक ढंगा ने व्यवहार करना शुरु करिये सै जे जोतिया च रैं कने अन्धकारा च नीं। कने तुहांजो हरेक किस्मा री नशाखोरी कने दुराचारा च शामिल नीं हूणा चाहिन्दा; कने तुहांजो इक्की दूये ने लड़ाई कने हिरख नीं करना चाहिन्दा। 14बल्कि प्रभु यीशु मसीह साई जीओ, कने जिस्मा री इच्छां जो पूरा करने री कोशिश नीं करा।
This work is licensed under Creative Commons Attribution-ShareAlike 4.0 License.