रोमियो 12
12
परमेशरा जो जिऊंदा बलिदान
1इस खातर मेरे साथी विश्वासियो, परमेशरा री महान दया रिया वजह ने हऊँ तुहांजो विनती कराँ, भई अप्पूँजो पवित्र, इक जिऊंदा बलिदान्ना रे रुपा च परमेशरा जो खुश करदे हुये अर्पण करा। परमेशरा री अराधना करने रा येई सही तरीका।
2हुण होर अग्गे इस संसारा रिया रीता पर मता चलदे; पर परमेशर तुहांरे मना जो बदलने रे जरिये तुहांजो नया दिल देओ। ताकि तुहें परमेशरा रियां इच्छां जो जाणी सकगे, यानि सै जे भली, सै जे तिस्सो खुश कराँ इ कने सै जे उत्तम इ।
आत्मिक बरदानां ते परमेशरा री सेवा
3इस खातर परमेशरा रे अनुग्रह रिया वजह ने सै बरदान जे तिने मिन्जो दित्या, तिस्सो ध्याना च रखदे हुये हऊँ तुहां चते हर इक्की ने बोलां, भई तेढ़ा जे समझणा चाहिन्दा तिसते बधीने कोई खुद अप्पूँजो नीं समझे; यनिके जितना विश्वास परमेशरे तुहांजो दित्या, तिसरे मुतावक अप्पूँजो समझा। 4काँह्भई तियां जे अहां चते हर इक्की रे शरीरा च बौहत सारे अंग ये, चाये सारयां अंगाँ रा काम्म इक्को जेआ निआं; 5तियां इ हलाँकि अहें बौहत सारे, पर मसीह च अहें इक जिस्मा रे रुपा च हुई जायें, इस तरिके ने अहें सारे मसीह विश्वासी इक दुज्जे सौगी जिस्मा रे अंगा साई जुड़ी जायें।
6तां फेरी तिसरे अनुग्रह रे मुतावक अहांजो लग-लग बरदान मिलीरे, अहें तिन्हांरा इस्तेमाल करिये, जे किसी जो भविष्यवाणिया रा बरदान मिलीरा, तां सै अपणे विश्वासा रे मुतावक भविष्यवाणी करे; 7जे किसी जो दुज्यां री सेवा करने रा बरदान मिलीरा, तां सै सेवा करो; जे कोई सखाणे औल़ा हो, तां सै सखाणे च लगीरा रौ; 8जे तुहांरा बरदान हौंसला देणे औल़ा ओ, तां तिस्सो हौंसला देन्दे रैहणा चाहिन्दा; जे किसी जो दान देणे रा बरदान मिलीरा, तां तिस्सो खुले दिला ने दान देणा चाहिन्दा; जे किसी जो अगुवाई करने रा बरदान मिलां, तां सै जोशा ने अगुवाई करे; सै जे दया करो, सै खुशिया ने करो।
मसीही व्यवहार
9तुहांरा प्यार सच्चा ओ; बुराईया ते नफरत करा; भलाई करदे रौआ। 10भाईचारे रे प्यारा ने इक्की दुज्जे रे प्रति समर्पित रौआ, कने दुज्यां जो अप्पूँ ते बधीने आदर देआ।
11खूब मेहणत करा कने आलसी मत बणाँ; अप्पूँजो प्रभुये री सेवा करने च पूरी तरह समर्पित करा। 12अपणिया आशा च खुश रौआ; परेशानियां च धैर्य रखा; कने हमेशा प्राथना करदे रौआ। 13परमेशरा रे लोकां री जरूरतां च मदद करा; मैहमान्नां रे आदर सत्कारा खातर हर वगत त्यार रौआ।
14अपणे सताणे औल़यां जो आशीष देआ; तिन्हांजो श्राप नीं देआ। 15खुश रैहणे औल़यां ने खुश रौआ, कने रोणे औल़यां ने रोआ। 16इक दूये ने मेल-जोल रखा, घमण्डी नीं बणा, पर गरीब लोकां ने बी संगती रक्खा; येढ़ा नीं समझा भई तुहें इ बौहत समझदार ये।
17बुराईया रा बदला किसी जो बुराईया ने मता देन्दे; सारयां लोकां रिया नज़राँ च सै जे ठीक आ तिसजो इ करने री सोच्चा। 18जे हुई सक्को, तां सारयां ने शान्तिया ने रैहणे री कोशिश करा।
19मेरे मित्रो, किसी ने खुद अप्पूँ बदला नीं लेणा, पर इस्सो परमेशरा रे गुस्से पर छड्डी देआ काँह्भई पवित्रशास्त्रा च लिखिरा : प्रभुये गलाया, “बदला लेणा मेरा काम्म आ, माह इ बदला देणा।”
20पर “जे तेरा दुश्मण भुक्खा ओ तां तिस्सो खाणे जो रोटी दे, जे सै त्याह्या तां तिस्सो पीणे जो पाणी दे; काँह्भई जे तू येढ़ा कराँ तां सै तेरते शर्मिन्दा हूणा।” 21बुराईया ते मत हार पर अपणिया नेकिया ते बुराईया जो हरा।
This work is licensed under Creative Commons Attribution-ShareAlike 4.0 License.