यहेजकेल 3
3
1फेर परमेसवर नै मेरे ताहीं कह्या, “हे माणस की सन्तान, जो तेरे ताहीं मिल्या सै उसनै खा ले; यानिके इस किताब नै खा, फेर जाकै इस्राएल के घरान्ने तै बात कर।” 2इस करकै मन्नै मुँह खोल्या अर उसनै वो किताब मेरे ताहीं खुवा दी। 3फेर उसनै मेरे तै कह्या, “हे माणस की सन्तान, यो किताब जो मै तन्नै दियुँ सूं उसनै पचा ले, अर अपणी अंतड़ियाँ नै इसतै भर ले।” आखर म्ह मन्नै उस ताहीं खा लिया; अर मेरे मुँह म्ह वो शहद की तरियां मिठ्ठी लाग्गी।
4फेर उसनै मेरे ताहीं कह्या, “हे माणस की सन्तान, तू इस्राएल के घरान्ने कै धोरै जाकै उननै मेरे वचन सुणा। 5क्यूँके तू किसे अनोखी बोल्ली या मुश्किल भाषा आळी जात्ति कै धोरै न्ही भेज्या जावै सै, पर इस्राएल ए के घरान्ने कै धोरै भेज्या जावै सै। 6अनोखी बोल्ली या मुश्किल भाषा आळी घणी जात्तां कै धोरै जो तेरी बात समझ ना सकै, तू न्ही भेज्या जावै सै। बेसक जै मै तेरे ताहीं इस तरियां के जिसयां धोरै भेजदा तो वे तेरी सुणदे। 7पर इस्राएल के घरान्ने आळे तेरी सुणण तै इन्कार करैंगे; वे मेरी भी सुणण तै इन्कार करै सैं; क्यूँके इस्राएल का सारा घरान्नां ढीठ अर कठोर मन का सै। 8देख, मै तेरे मुँह नै उनके मुँह कै स्याम्ही, अर तेरे माथे नै उनके माथे कै स्याम्ही, ढीठ कर देऊँ सूं। 9मै तेरे माथे नै हीरे की तरियां करड़ा कर देऊँ सूं#3:9 तेरे माथे नै हीरे की तरियां करड़ा कर देऊँ सूं मन्नै तेरे ताहीं उनतै घणी शक्ति दी सै। जो चकमक पत्थर तै भी करड़ा होवै सै; इस करकै तू उनतै ना डरिये, अर ना उनके मुँह देखकै तेरा मन कच्चा होवै; क्यूँके वे बिद्रोही घरान्ने के सैं।” 10फेर उसनै मेरे ताहीं कह्या, “हे माणस की सन्तान, जितने वचन मै तेरे तै कहूँ, वे सारे मन म्ह राख अर कान्नां तै सुण। 11अर उन कैदियाँ कै धोरै जाकै, जो तेरे जात्ति भाई सैं, उनतै बात करिये अर कहणा, ‘प्रभु यहोवा न्यू कहवै सै;’ चाहे वो सुणै, या ना सुणै।”
12फेर परमेसवर के आत्मा नै मेरे ताहीं ठाया, अर मन्नै अपणे पाच्छै बड़ी घड़घड़ाट कै गैल एक शब्द सुण्या, “यहोवा के भवन तै उसका तेज धन्य सै।” 13अर उसके गैल ए उन जीवधारियां के पंखां का शब्द, जो एक दुसरे तै लाग्गै थे, अर उनके साथ के पहियाँ का शब्द अर एक बड़ीए घड़घड़ाट सुणाई पड़ी। 14फेर परमेसवर का आत्मा मेरे ताहीं ठाकै लेगी, अर मै घणे दुःख तै भरया होया, अर मन म्ह जळदा होया चल्या गया; अर यहोवा की शक्ति मेरे पै हावी थी; 15अर मै उन इस्राएली कैदियाँ कै धोरै आया जो कबार नदी के किनारे पै एक छोट्टे-से गाम तेलाबीब म्ह रहवैं थे। अर ओड़ै मै सात दिन ताहीं उनकै बिचाळै बेचैन होकै बैठ्या रह्या।
पहरेदार के रूप म्ह यहेजकेल की नियुक्ति
16सात दिन के गुजरण पै यहोवा का यो वचन मेरे धोरै पोहच्या, 17“हे माणस की सन्तान मन्नै तेरे ताहीं इस्राएल के घरान्ने कै खात्तर पहरुआ#3:17 पहरुआ परमेसवर के पुरोहितां अर सेवकां नै योए कह्या जावै था। यहेजकेल ताहीं खास करकै इसे नाम तै अलग दिखाया गया सै, यहे. 33:7 पहरुआ की दो खास जिम्मेदारियांँ थी, परमेसवर के हुकम की बाट देखणा अर उम्मीद राखणा अर दूसरा अपणे माणसां की चौकसी अर देख-भाळ करणा। ठहराया सै; तू मेरे मुँह की बात सुणकै, उननै मेरी ओड़ तै चेतावनी देणा। 18जिब मै दुष्ट तै कहूँ, ‘तू जरुर मरैगा,’ अर जै तू उस ताहीं ना चितावै, अर ना दुष्ट तै इसी बात कहवै जिसतै के वो चौक्कस हो अर अपणी बुरी राह छोड़कै जिन्दा रहवै, तो वो दुष्ट अपणे अधर्म म्ह फँस्या होया मरैगा, पर उसके खून का लेखा मै सिर्फ तेरे तै ए ल्यूँगा। 19पर जै तू दुष्ट नै चितावै, अर वो अपणी दुष्टता अर बुरी राह तै ना फिरै, तो वो अपणे अधर्म म्ह फँस्या होया मर जावैगा; पर तू अपणी जान नै बचावैगा। 20फेर जिब धर्मी माणस अपणी धार्मिकता तै फिरकै बुरा काम करण लाग्गै, अर मै उसके स्याम्ही ठोक्कर राक्खूँ, तो वो मर जावैगा, क्यूँके तन्नै जो उस ताहीं न्ही चिताया, इस करकै वो अपणे पाप म्ह फँस्या होया मरैगा; अर जो धार्मिकता के काम उसनै करे हों, उनकी सुधि ना ली जावैगी, पर उसके खून का लेखा मै सिर्फ तेरे तै ल्यूँगा। 21पर जै तू धर्मी नै इसा कहकै चेतावनी देवै, के वो पाप ना करै, अर वो पाप तै बच जावै, तो वो चेतावनी नै मान्नण कै कारण जरुर जिन्दा रहवैगा, अर तू अपणी जान नै बचावैगा।”
यहेजकेल बोलण कै लायक ना रहया
22फेर यहोवा की शक्ति ओड़ैए मेरे पै प्रगट होई, अर उसनै मेरे ताहीं कह्या, “उठकै मैदान म्ह जा; अर ओड़ै मै तेरे तै बात करुँगा।” 23फेर मै उठकै मैदान म्ह गया, अर ओड़ै के देख्या, के यहोवा का प्रताप जिसा मेरे ताहीं कबार नदी के किनारे पै देख्या, उसाए उरै भी दिखाई पड़ै सै; अर मै मुँह के बळ गिरकै दण्डवत करया। 24फेर परमेसवर का आत्मा मेरे म्ह समाकै मेरे ताहीं पैरां कै बळ खड़या कर दिया; फेर वो मेरे ताहीं कहण लाग्या, “जा अपणे घर के भित्तर किवाड़ बन्द करकै बैठ्या रह। 25हे माणस की सन्तान, देख; वे माणस तेरे ताहीं रस्सियाँ तै जकड़ कै बाँध लेंगे, अर तू लिकड़कै उनके बीच जाण न्ही पावैगा। 26मै तेरी जीभ तेरे ताळुवै तै चिपका दियुँगा; जिसतै तू चुप रहकै उनका डाँटण आळा ना हो, क्यूँके वे बिद्रोही घरान्ने के सैं। 27पर जिब-जिब मै तेरे तै बात करुँ, तब-तब तेरे मुँह नै खोल्लूँगा, अर तू उनतै इसा कहिये, ‘प्रभु यहोवा न्यू कहवै सै,’ जो सुणै सै वो सुण ले अर जो न्ही सुणदा वो ना सुणै, वे तो बिद्रोही घरान्ने के सैं ए।”
Obecnie wybrane:
यहेजकेल 3: BGC
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
