Yohanes 19

1Kumawus in itu, ru'du' i Pilatus sé surarona e maali si Yesus in samboken. 2Wo émaan éra em panga-pangana rintek tutunéan mamuali esa mahkota wo ipaké éra an do'kos i Yesus. Wo pakéan éra ka'i Sia in juba pares. 3Wo séra memaré-maréng rumuru mangé ai Sia wo kumua, “Siri', a si colano é tou Yahudi!” Kumawus in itu sepé-sepéén éra en amo-Na.

4Wo si Pilatus kumesot sumawel wo icuana a sé tou Yahudi, “Séréno, icesotku si Tou anio' ai camu wosama' kailekan iow sapaoka Sia, mandé esake' eng kaséaan-Na ra'ica wana eng kinakéréanku.” 5Wo si Yesus kumesot an untep in istana, wo Sia pakapakéané' i mahkota tutunéan wo in juba pares. Wo icua i Pilatus ai séra, “Séréno si Tou anio'!”

6An tutuw i Yesus paileken é kikiiten é imam wo sé mengatéir im Balé Le'nas, wo yangko' éra, “Isalipo Sia! Isalipo Sia!”

Icua i Pilatus ai séra, “Sa taniitu, indono Sia wo mangé isalip, ampa'paan ra'ica kinéréanku eng kaséaan-Na mandé wayake' in esa.”

7Wo icua é tou Yahudi itu a si Pilatus, “Icami awéan ukum, sa kumiit in ukum itu, Sia musti ukumen im patén, ampa'paan Sia mawerot en owak-Na Toyaang i Amang Kasuruan.”

8Tutuw i Pilatus luminga sapa em ipakua éra itu, makaaweso eng kaindé'anna. 9Wo sia muntep sumawel an istana itu, wo kumua a si Yesus, “Am bisa owo réén Ko mai?” Taan ra'ica wana sapa-sapa en aisowat i Yesus ai sia.

10Wo icua i Pilatus ai Sia, “Kéitu réén Ko ra'ica kiim rumoma' a yaku? Ra'ica réén kailekan-Mu, yaku awéan kawasa e mekar Ico wo ka'i awéan kawasa en sumalip Ico?”

11Isowat i Yesus, “Ico ra'ica makaanu kawasa sapa-sapa a Yaku sa eng kawasa itu ra'ica aiwéé mai ai co an dangka' owo. Ampa'paan in itu si tou sumarakan Yaku ai co, eng kamesé-meséaanna lébé uter wo eng kamesé-meséaanmu.”

12Kekawus i Pilatus luminga en aicua i Yesus itu, wo sia rumaméji maéré-éré lalan tumambisa e mekar si Yesus. Taan icua é tou Yahudi itu ang karapi in taangko', “Sa iwekar i tuang si Tou anio', si tuang ra'io ka'i kara-karapi i Kaisar. Wo si séike' si mawerot in owakna kolano, sia isumunduro si Kaisar.”

13An tutuw i Pilatus luminga en aicua é tou itu, wo iru'du'na sé suraro e maali si Yesus icesot an istana itu. Wo si Pilatus lumukut am palukutan im pengadilan si patuulen Lanté Watu, a nunuwu' Ibrani patuulen Gabata. 14Si endo itu, tumena asi endo matu'tul in endo wangko' Paska, wo jam duablaso wona' ing katoora yéndo. Wo icua i Pilatus a sé tou Yahudi itu, “Séréno mai, Si anioo si colano miow!”

15Wo séra mengangko-ngangko' wo makua, “Paténo Sia! Paténo Sia! Salipo Sia!”

Wo icua i Pilatus ai séra, “Musti réén isalipku si colano miow?”

Isowat é kikiiten é imam, “Si colano ami wayake' si Kaisar!”

16Wo isarakan i Pilatus si Yesus a sé suraro e mangé isalip.

Si Yesus aisalip

(Mat. 27:32-44; Mrk. 15:21-32; Luk. 23:26-43)

Wo si Yesus iwali é suraro e mangé isalip. 17Wuléngen-Na en salip wo mangé an tampa si makangaran tampa Ru'i in Do'kos, a nunuwu' Ibrani Golgota. 18Asi tampa ituo Sia aisalip éra. Awéan ka'i rua tou walina sé aisalip mewali-wali wo si Yesus, si esa ang ka'biri si esa ang kakan, si Yesus an uner éra. 19Iru'du' ka'i i Pilatus im pakuan angé esa papang ang kayu salip, si pinatican in tana'i: “Si Yesus, tou Nazaret, Kolano é tou Yahudi.”

20Kelian tou Yahudi mabaca in aipatic ang kayu salip itu, ampa'paan en tampa sinalipan si Yesus itu tawike' ing kota Yerusalem. Wo sé aipatic itu maké i nunuwu' é Ibrani, Latin wo Yunani. 21Wo icua é kikiiten é imam itu a si Pilatus, “Tioo ipatic ‘Kolano é tou Yahudi’, taan ipatico mio', ‘Si Tou anio' eng kumua: Yaku Kolano é tou Yahudi.’ ”

22Taan isowat i Pilatus, “Sapa si aipatickuo, siituo em patic.”

23Kekawus i Yesus aisalip é suraro wo indon éra eng karai-Na, wéténgen éra mamuali epat ngawéténg, esa suraro makéré esa ngawéténg. Wo indon éra ka'i en juba-Na, en juba itu esake' tenunan tumo'tol an dangka' akar a mio'na, ra'ica wana em binilit. 24#Mzm. 22:19 Ampa'paan in ituo séra mengkuanan a si esa wo sé walina, “Ra'ica toro pewéténgenta eng karai anio' mamuali piraan ngapokol, taan lébé loor taré lotréientao en tumantu si séi e makéré.” Wo in taniitu malekepo sapa sé aipatic ang Kitap Le'nas,

“Winété-wéténg éra eng karai-Ku a si esa wo se walina,

wo lotréien éra si séi e makéré in juba-Ku.”

Siituo e niéma' é suraro itu.

25Wo an duru in salip i Yesus makatulung si inang-Na, wo si wéwéné poow i inang-Na, wo si Maria penanaan i Klopas, wo si Maria Magdalena. 26An tutuw i Yesus makaséré si inang-Na wo si murit icaupus-Na makatulung an duruna, kumuao Sia a si inang-Na, “Inang, si anioo si toyaangmu!” 27Wo icua-Na a si murit icaupus-Na itu, “Si anioo si inangmu!” Tumo'tolke' asi tempo' itu, si inang i Yesus tinerima i murit itu mento' am baléna.

Si Yesus maté

(Mat. 27:45-56; Mrk. 15:33-41; Luk. 23:44-49)

28 # Mzm. 22:16, 69:22 Kailekan i Yesus niéma'-Nao em baya-waya si musti émaan-Na, ampa'paan in itu icua-Na “Maré'omo Aku!” Wo in taniitu sapa sé aipatic ang Kitap Le'nas imamualio. 29Am bitu awéan esa tampayang wuta in anggor esem. Itopok éra em bungang ing karang asi pangana in hisop, wo ito'to' éra an anggor esem wo iwéé éra mangé am ba'ba' i Yesus. 30Keepé'-Na in anggor esem itu, icua-Na, “Malekepo!” Wo icuru-Na en do'kos wo isarakan-Na e mu'kur-Na.

Em petic i Yesus tinopok

31Asi endo itu, endo tumu'tul in endo Sabat. Ampa'paan in itu ra'ica icasalé' i kikiiten é tou Yahudi e mayat-mayat itu ipakawéréné' ang kayu salip asi endo Sabat, sapapé' si endo itu endo wangko'.#19:31 Endo Sabat itu endo wuntulke' ampa'paan tumena en témpona tuma'néi in endo wangko' Paska. Anaé, séra mekiupus a si Pilatus wosama' eng kécéi é tou aisalip itu lentuun wo itumpa e mayat éra. 32Wo mai sé suraro. Lentuun éra eng kécéi é rua tou sé aisalip mewali-wali wo si Yesus. 33Taan mai asi Yesus, sérén éra Sia imatéo, anaé eng kécéi-Na ra'ica linentu' éra. 34Taan esaan asé suraro itu tumopok im petic i Yesus maké wengkow, wo makala'us kumesurai en enda' wo en dano.

35Si tou en suméré ing kamamualian itu in esa, en icumua sapa en sinerénao, wo sé ipakuana itu wutul. Wo kailekanna sapaoka sia makua im butul wosama' percayaan iow. 36#Kel. 12:46; Bil. 9:12; Mzm. 34:21 En itu mamuali wosama' malekepo sapa sé aipatic ang Kitap Le'nas, “Ra'ica wana en du'i-Na sé lentuun oka.” 37#Za. 12:10; Why. 1:7 Wo awéan ka'i e nats aipatic ang Kitap Le'nas, “Téintengen éra oka Sia si tinopoko éra.”

E mayat i Yesus aicubur

(Mat. 27:57-61; Mrk. 15:42-47; Luk. 23:50-56)

38Awéan esa tou makangaran Yusuf, tou Arimatea. (Sia mengakiit si Yesus, taan ang karapi imaene-enep ampa'paan icaindé'na sé kikiiten é agama Yahudi.) Sia mangé mekiupus a si Pilatus wosama' énanna e mindo i mayat i Yesus e mangéna cubur. Kekawus niénan i Pilatus, wo mangéna itumpa e mayat itu ang kayu salip. 39#Yoh. 3:1-2 Wo mai ka'i am bitu si Nikodemus. Sia si sumangkumo mai meta'up wo si Yesus asi sangawengi. Sia imai maali-ali in solo mawou manam si kinemuan i mur wo eng gaharu, eng kauter i ramuan itu wona' telu ngapulu' kilo. 40Wo indon éra e mayat i Yesus, wo saputen éra ing kaéng lénen wo kisun éra in solo mawou manam itu, ciit ing kanaramen é tou Yahudi mengakubur i mayat.

41An duru in tampa i Yesus aisalip, awéan esa uma. An uner in uma itu awéan esa kubur werupé' wo ra'ipé' pinaké. 42Anaé, ampa'paan in tawio tumo'tol en endo Sabat wo eng kubur itu tawike', icubur éra e mayat i Yesus am bitu.#19:42 Kumiit im pakarékén ang kanaramen é Yahudi, endo Sabat rinékén tumo'tol i yéndo muntep asi ari lima akar i yéndo muntep asi ari Sabtu.

Obecnie wybrane:

Yohanes 19: TNT

Podkreślenie

Kopiuj

Porównaj

Udostępnij