Josua 18
18
1KE ame ûkhacaköu tavat a lakon Isaraela hia hnyi Silo, ke adre me otilâ eling uma mano a uma ûkhacaköu: ke ame ngâ but hnyei hnyi hnyimaködrin. 2Ke seven biju je tribuiny lakon Isaraela a ödrin tiga ca khenâ jekhöûdrin. 3Ke Josua ame ha ka lakon Isaraela, ka habe, Ieû gabun öbun e bec he ka he me hûgûnâ hnyei wale a ham köbun Iehova Khongon lakamöbun? 4Uca thö unyibun ke je hnyat ûsa kun hobi kâu je tribu: me oge me he ka kunʼ ödrin, ke ödrin e he ka todrö me vheno hnyei, me omanenâ e hoton je jekhöûdrin; me ödrin e he ka he jem könya. 5Ke ödrin e he ka kia sevenâ: ame he Juda ka laba hnyi hnyigöulen ka hnyi hwaiöu, ke ame he lap anyi Josefa ka laba hnyi hnyigöulödrin ka hnyi hwadrö. 6Ke öbun e he ka omanenâ hnyei me me seven, me hom jem könya hna omanenâ eling: me oge me he ka ugleköbâ hobi köbun eang hnyi hnyimakö Iehova Khongutin. 7Anyin ae ba iny at Levi unyibun; anyin a haba hanymen tavat bihut kö Iehova, wale jekhöûdrin: ke haba Gada, me Reubena, me hafiny tribu Manase, ödrin e hia but kap jekhöûdrin hnyi ke keihen e deiö Joridano, wale a ham ködrin Mose athnyabai Iehova. 8Me ame todrö tavat me he: ke Josua ame hûna ködrin wale hnyat ödrin e he he ka omanenâ hnyei, ka habe, he thö, me vheno hnyei, me omanenâ e, ke hmetu ju könya, me oge me he ka ugleköbâ eang hobi köbun hnyi hnyimakö Iehova hnyi Silo. 9Me ame he tavat me vheno hnyei, me omanenâ e hnyi tusi hoton je taun me me seven, me ödrin e o kö Josua hnyi hna hunuma hnyi Silo. 10Ke Josua ame ugleköbâ hobi ködrin hnyi Silo hnyi hnyimakö Iehova: ke Josua ame khenâ eling hnyei ka lakon Isaraela hoton je jekhöûdrin.
11Ke ame āt dö ge leköp tribu anyin laku Beniamina hoton anyidrin je lap: ke ame hnyigöulen jekhöûdrin hnyi wanben laku Juda, me laku Josefa. 12Ke haba hnyigöulödrin ka hnyi hwadrö, hwân hnyi Joridano; ke ame he hnyigöulen ka hnyi ke keihen hwadröiny Jeriko, me he ka hnyi hnyei ae hut e jio; kʼ ame umo hnyi hnyebuba Beth-aven. 13Ke ame he bala hnyigöulen ûheny e Luza ai, ka hnyi ke keihen Luza (wale Beth-ela) ka hnyi hwaiöu; ke ame he bala hnyigöulen Ateroth-adara ai ka hnyi bucen hnyi hwaiöu hnyi Bethe-horona eû. 14Ke adre me tuluto hnyigot me khenyi hnyi ke keihen e jio ka hnyi hwaiöu, hwân hnyi bucen cicö Bethe-horona hnyi hwaiöu; ke adre me umo e hnyi Kiriatha-baala (wale Kiriatha-jarim), ke tauniny laku Juda: wale ke keihen e jio. 15Ke haba ke keihen ka hnyi hwaiöu ame hwân hnyi obiny Kiriatha-jarim, ke ame he hnyigöulen e jio, me umo hnyi je an ame pupua e Nefetoa: 16ke ame o hnyigot ka hnyi obiny bucen cicö hnyigöulen bucen anyi nöku Hinom, wale hnyi hnyigöulen bucen anyin tavat ae beû ka hnyi hwadrö; ke ame he ka hnyi hnyigöulen bucen anyi Hinom ka hnyi ke keihen at Jebusi ka hnyi hwaiöu, me he Eni-rogel ai; 17ke adre me tuluto hnyi hwadrö me umo hnyi Eni-semes, me he Geliloth ai, wale cicö gethen ame ölö Adumim ai; kʼ ame he ka hnyi veto anyi Bohan nöku Reubena; 18ke ame he bala ka hnyi ke keihen cicö Araba hnyi hwadrö me he Araba ai: 19ke ame he bala bi hnyigot ka hnyi ke keihen Beth-ogela hnyi hwadrö: ke adre me umo hnyigot hnyi bweduainy Köiö ae Hiny ka hnyi hwadrö, hnyi obiny Joridano ka hnyi hwaiöu: wale hnyigöulen ka hnyi hwaiöu. 20Ke haba hnyigöulen e hnyi ke keihen e deiö, me, Joridano. Wale jekhon laku Beniamina hoton je hnyigöulödrin igigilö; hoton anyidrin je lap. 21Ke walang je taun anyin je tribuiny laku Beniamina hoton anyidrin je lap, Jeriko, me Beth-ogela, me Emeka-Keziz; 22me Beth-araba, me Zemari, me Beth-ela; 23me Avi, me Para, me Ofera; 24me Kefara-hamonai, me Ofeni, me Geba; a twelv ta je taun me je tauniny ae ûhnyûkong; 25Gibeona, me Rama, me Berotha; 26me Mizepa, me Kefira, me Moza; 27me Rekem, me Irepel, me Tarala; 28me Zela, me Elef, me Jebusi (wale Jerusalema), me Gibea, me Kiriatha; fortin je taun me je tauniny ae ûhnyûkong. Wale jekhon je laku Beniamina hoton anyidrin je lap.
maintained by the British and Foreign Bible Society