پولُسئے کاگد په رومیان 10
10
هُدائے داتگێن راستاوری
1او براتان! منی دلئے واهگ و دْوا گۆن هُدایا په اِسراییلیان همِش اِنت که آیان نجات برسیت. 2من په آیان گواهی داتَ کنان که آیان په هُدایا جۆش و گئیرَت هست، بله آیانی اے جۆش و گئیرَت چه شَرّێن زانت و زانگێا نهاِنت. 3آ هما راستاوریا سَرپد نبوتنت که چه هُدائے نێمگا اِنت و وتی جندئے راستاوریئے برجاه کنگئے جُهدا اَتنت، پمێشکا وتا هُدائے داتگێن راستاوریئے دستا نداتِش. 4مَسیه، شَریَتئے سَرجمی و کاملی اِنت. نون هرکَس که ایمانَ کاریت، راستاور و بێمئیار هسابَ بیت.
نجاتئے راه
5هما راستاوری که چه شَریَتا کئیت، آییئے بارئوا موسّا چُش نِبشتهَ کنت: ”هرکَس که اے هُکمانی سرا اَملَ کنت، گۆن اِشانی برجاه دارگا زِندگَ مانیت.“#10:5 لاویان 18:5. 6بله آ راستاوری که چه ایمانا کئیت، اے ڈئولا گوَشیت: ”وتی دلا مگوَشێت ’کئے آسمانا رئوت؟‘“،#10:6 موسّائے واز 30:12. بزان که مَسیها جَهلا بیاریت، 7”یا ’کئے جُهلێن کَبرا اێرَ کپیت؟‘“،#10:7 موسّائے واز 30:13. بزان که مَسیها چه مُردگانی جهانا بُرزا بیاریت. 8اے ڈئولا گوَشیت: ”گال#10:8 گال، بزان هبر، کلمه، لَبز. تئیی نزّیکّا اِنت، تئیی دپا و تئیی دلا اِنت“،#10:8 موسّائے واز 30:14. بزان ایمانئے هما گال که ما آییئے جارا جنێن. 9اگن دپِ وَت بمَنّئے که ایسّا هُداوند اِنت و وتی دلئے تها باور بکنئے که هُدایا آ چه مُردگان زندگ کرتگ، گڑا رَکّئے. 10چێا که اِنسان دلئے تها ایمانَ کاریت و راستاوَر هسابَ بیت، دپِ وَت هم مَنّیت و اے پئیما آییا نجاتَ رسیت. 11پاکێن کتابَ گوَشیت: ”هرکَس که آییئے سرا ایمانَ کاریت، هچبر شرمندگَ نبیت.“#10:11 اِشئیا نَبیئے کتاب 28:16. 12اے بارئوا یَهودی و درکئومئے نیاما پرک و پێرے نێست. چێا که همے یکّێن هُداوند، سجّهێنانی هُداوند اِنت و په هما درُستیگێن مردمان که آییا تئوارَ کننت، بێکِساس#10:12 بێکساس، بزان بێهساب، سَکّ باز. سَکی#10:12 سَکی، بزان بَکشنده، اُردو و پارسیا ”سخی“. و بَکشۆک اِنت. 13چێا که ”هرکَس که هُداوندئے ناما گیپت و آییا تئوارَ کنت، آ رَکّیت.“#10:13 یوییل نَبیئے کتاب 2:32.
14نون مردم چۆن یکّێا تئوار بکننت که آییئے سرا ایمانِش نئیاورتگ؟ و چۆن یکّێئے سرا ایمان بیارنت که آییئے بارئوا چیزّے نهاِشکتگِش؟ و چۆن بِشکننت اگن کسے آیانی کِرّا اے جارا مجنت؟ 15و جار جنۆک چۆن جار بجننت اگن رئوان دئیگ نبوتگاَنت؟ اَنچُش که نِبشته اِنت: ”آ مردمانی پاد و کدم نێک اَنت که وَشّێن مِستاگئے جارا جننت.“#10:15 اِشئیا نَبیئے کتاب 52:7.
16بله بازێنێا اے وشّێن مِستاگ نمَنِّت، چێا که اِشئیا نبیَ گوَشیت: ”او هُداوند! مئے پئیگامئے سرا کئیا باوَر کرت؟“#10:16 اِشئیا نَبیئے کتاب 53:1. 17گڑا ایمان چه اِشکُنگا کئیت و اِشکُنگ چه مَسیهئے پئیگامئے جارا.
18بله نون جُستَ کنان: ”آیان نهاِشکتگ؟“ اَلّم اِشکتگِش، پرچا که:
”جار جنۆکانی تئوار سجّهێن دنیایا شتگ و
آیانی هبر جهانئے گُڈّی مَرز و سیمسران سر بوتگاَنت.“ # 10:18 زَبور 19:4.
19یکّ برے پدا جُستَ کنان: ”اِسراییل سرپد نبوتگ؟“ ائولا، هُدا چه موسّائے زبانا گوَشیت:
”من هما مردمانی وسیلها شُمئے هَسَدّا پادَ کنان که کئومے نهاَنت؛
ناسرپدێن کئومێئے وسیلها شمئے هِژما پادَ کنان.“ # 10:19 موسّائے واز 32:21.
20گڑا هُدا چه اِشئیا نَبیئے زبانا په دلێری گوَشیت:
”منا همایان در گێتک که منی شۆهازا نهاَتنت،
من وتا په همایان زاهر کرت که منی جُست و پُرسا نهاتنت.“ # 10:20 اِشئیا نَبیئے کتاب 65:1.
21بله اِسراییلئے بارئوا گوَشیت:
”سجّهێن رۆچا من وتی دست،
ناپرمان و جاهلێن کئومێئے نێمگا په وَشّانی شهار داتگ.“ # 10:21 اِشئیا نَبیئے کتاب 65:2.
Obecnie wybrane:
پولُسئے کاگد په رومیان 10: HPKB
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2016-22 Wycliffe Bible Translators, Inc.
