1 KORINT 13
13
Amuzho
1Inü mihtsürübo tüsho yunirü yuthabo chingnü thatha she, amuzho mülasho I ju yinchi kingkhi yungsho larüp kingachihkhi düsheak khülang ah. 2#Mt 17.20; 21.21; Mk 11.23Tüsho müchitpü wubo, aramyu alala anikhitpü tüsho mükheahmudu alala lalashe tüsho awungbo lah-a bahpü I akin alala lalashe, amuzho mülasho I tümü müla. 3Inü I lakhi alala zhochihrü kilim jihabahbah she, tüsho I pang atakpü jihjih she, amuzho mülasho, I alü müla.
4Amuzho ju arümkheam tüsho lümrhihkhi; amuzho ju mükthsü yungsho lülüshishi yung; 5amuzho ju kükheangküyang, mükhütmüra yungsho phümüsüpbe yung; amuzhonü amülim muzochoh; 6amuzho ju amütsü ching asühkhi yung, tüshe thiyuro ching asühkhi lah. 7Amuzhonü alala arümkheamchoh, alala akin lachoh, alala mulonglamchoh, alala rünkhiungchoh.
8Amuzho küyimkishe mükheam; tümüde müchitkhibo hode tsoabahbah; thiyuthabo arün thsübah; mükheahmudu hode tsoabahbah. 9Tümüde isanü chama lang mükheahlah tüsho chama lang müchitchoh; 10Tüshe küyimki khiukdahkhi arübanü, mukhiukdahkhi ju hode tsoabahbah. 11Küyimki I azürü lakhea, I yu thakhi, I anikhitkhi, I lümkhi azürü nangde alakheah, küyimki I azorü kamkheanü, inü azürü yaklibo bah. 12Tümüde kheakü isanü meayinpung ching thrimthrimde ngüchoh, tüshe judüki isanü mironü miro ngübah. Kheakü inü chama lang mükheahlah; judüki I mükheahrama lakhi nangde inü mükheahramde amükheahbah. 13Tüsho kheakü harü mahsam lah: akin, mulonglam tüsho amuzho; tüshe harü bolung atobe ju amuzho.
Currently Selected:
1 KORINT 13: YIMCBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.