1 KORINT 14
14
Alü Me Thsambahbo dünkheak
1Amuzho müshamang, tüsho me thsambahbo, adungto thsüde müchitpü künang. 2Tümüde shepünü thiyutha chingnü thachonü mihtsürü ki yung tüshe Thrünpuh ki thachoh; shenü api manikhit, tüshe Me ching aramyu thachoh. 3Tüshe shepünü müchityubo mihtsürübo ki thachonü arü shuhkihpü, mulong toyu tüsho mulong shukheampü lah. 4Shepünü thiyutha thachonü nihbuh runglochoh, tüshe shepünü müchitchonü borü düküngshihchoh. 5Kheakü inü nüsa alalanü thiyutha ching thashihnelah, tüshe alü müchitshihnelah. Athanakrü khürü labah borü düküngshihpü müthsüsho, shepünü müchitchonü thiyutha chingnü atharü kheaknü atobe ah.
6Keoniorübo, inü nüsa ki thiyutha chingnü thade arüsho, nüsa kilim amikheak akhiukkhi, mükheahmudu, müchitkhi, yungsho thsangyukhi khürü hande marüsho, inü küde thsah nüsa alü thsüjihpü? 7Rhangdung mülakhi kingzükingdobebo khungpi yungsho bingkhungnü düsheak mütsande müjihsho, tümü khungkheanü küde thsah khürünü amükheahba? 8Tüsho hulipungpungnü düsheak mütsande müjihsho, shepünü thirithsüpü thsakhamba? 9Junangde nüsa kheak lah; nüsanü manikhitbe yutha chingnü thasho, tümü thakheanü shepünü anikhitba? Tümüde nü ju apung ching thakhi labah. 10Alomi ching thiyutha büthsüthsü ahihdo lah, tüshe küju she amütsan müladüa müla; 11tüshe inü thiyutha amütsan mümükheahsho I ju atharü ki khiungkerü thsübah tüsho atharü ju I ki khiungkerü thsübah. 12Junangde nüsa kheak lah; tümütüsho nüsanü me thsambahbo ngüpü künde lale, borü shuhkihpü thsüde thsambahbo ching tsüdakpü mürangang.
13Jumonü shepünü thiyutha thachonü athanakpü wu thsungkheak tamkhüntamnübeah. 14Tümütüsho inü thiyutha chingnü tamkhüntamnüsho, I menü tamkhüntamnüchoh tüshe I lümnü a tümü müla. 15Judüasho inü tümü thsüba? Inü menü tamkhüntamnübah tüsho lümnü she tamkhüntamnübah; inü menü khün thsübah tüsho lümnü she khün thsübah. 16Nünü menü Thrünpuh ki mungshi jihsho, manikhitrü bolung larünü nünü athakhi yu mümükheahle küde thsah nünü makshe jihkhi ching “Amen” de athaba? 17Tümütüsho nünü makshe tsüde jih-a lapü kuklah, tüshe mihtsürü püpürü a alü müthsü. 18Nüsa alala kheaknü alü inü thiyuthabo chingnü athakhi Thrünpuh ki makshe jihchoh; 19judüalalashe, püpürü thsangdanpü thsüde, inü borü ching thiyutha chingnü thiyu chithürü thürü kheaknü a I lümnü thiyu phüngü thabah.
20Keoniorübo, nüsa lümzülümdo ching azürü düthsü, amütsü ching khungarü thsang, tüshe lümzülümdo ching azorü kamang. 21Yakzan ching thrüta lah, “Jakso mihtsürü tüsho khiungkerü yuthabo chingnü inü ha mihtsürü ki thabah, tütüshe arünü I ki manide alabah, Atungpuhnü thachoh.” 22Hanangde thiyuthabo ju akinrübo thsungkheak amütsan yung tüshe amükinrübo thsungkheak ah; müchitkhi ju amükinrübo thsungkheak yung tüshe akinrübo thsungkheak ah. 23Jumonü, borü abümnü mukhungbah alalanü thiyuthabo chingnü thasho, tüsho aleangkheakrü yungsho amükinrü azahsho, nüsa ju abünrü ah de arünü müthaba de? 24Tüshe alalanü müchitde alachoki, amükinrü yungsho aleangkheakrü azahsho, alalanü api ju aneakrü ah de alümkihshihbah tüsho alalanü api yiuhkhapbah, 25tüsho api mulong ching rama lakhi lahkhitbah; junangde apinü khukningde Thrünpuh kingaünbah tüsho Thrünpuh nüsa bolung lah de athabah.
Arüngyam ching Akhinashu
26Keoniorübo, dale tüsho tümü a? Küyimki nüsa rukhüh mukhungbanü, mihbüm aban khün, thsangdan yu, amikheak akhiukkhi, thiyutha yungsho athanakkhi lah. Harü alala borü düküngpü thsungkheak rhimobeah. 27Khürünü thiyutha chingnü athapü thsüsho, mahne yungsho mahsamnü lang khindungachihde thashang, tüsho khülangnü thanakshang. 28Tüshe athanakpü thsüde she mülasho, arü abannü arüngyam ching malande laang tüsho nihbuh ki le Thrünpuh ki thashang. 29Wukihrü mahne yungsho mahsamnü thashang tüsho athakhi ju püpürünü mütsanmükhishang. 30Binde alakhi khürü ki amikheak akhiukkhi rhimosho, akhuhbuh ju tukloshang. 31Tümüde nüsa alalanü khindungde müchitpü kukbah, junangde alalanü anikhitbah tüsho mulong toshihbah; 32tüsho wukihrü mebo ju wukihrübonü adanyukkhi khüp labah. 33Tümütüsho Thrünpuh ju neamneamruru yo yung tüshe mungtsü Thrünpuh ah.
Amüsührü borübo alala ching, 34borübo ching aliberübonü zhikde alabeah. Tümüde arünü athapü mümülü, tüshe yakzannü athakhi nangde arübo abukkhüp larü thsübeah. 35Arünü tümükhüh mükheahpü künsho, thüyam ching arü niubuhrü ki keokhishang. Tümütüsho aliberü khülangnü arüngyam ching thapü ju achihbe lah.
36Yungsho Thrünpuh yu nü kheaknü arükhea de, yungsho ju arükhi nü kheak lang a de? 37Khürünü api wukihrü, yungsho me-larü ah de lümsho, inü nüsa kilim thrütkhi ju Atungpuh yukhüm ah de apinü amükheahbeah. 38Khürünü ha amümürang thsüsho, api ju amümürang thsüabahang. 39Jumonü keoniorübo, müchitpü künang, tüsho thiyuthabo chingnü athapü düzhipdo; 40tüshe alala akhamazhamde tüsho akhinashunü arhimobeah.
Currently Selected:
1 KORINT 14: YIMCBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.