1 KORINT 12
12
Amüsüh Me Thsambahbo
1Keoniorübo, kheakü me thsambahbo dünkheak nüsanü mümükheahde mülashihne. 2Küyimki nüsa amükinrü lakheanü limro alala ching aduh sangthsübo kilim bephülapkheah de nüsanü mükheahlah. 3Jumonü shenü she Thrünpuh Me hode atharünü a, “Jisu muthrumüneanshang,” de müthachoh tüsho Amüsüh Me hode yungsho shenü she, “Jisu ju Atungpuh,” de müthachoh de nüsanü anikhitshihnelah.
4 #
Rom 12.6-8
Thsambahbo aphuaphu lah, tüshe Me rukhüh; 5tüsho tankihpü aphuaphu lah, tüshe Atungpuh rukhüh; 6rhimo aphuaphu lah, tüshe arü aban kheak athsükhukpü jihkhi Thrünpuh rukhüh. 7Rukhüh tsüpü thsungkheak Me akhiuka huhkhi mihbüm aban kilim jih-a lah. 8Khülang kilim Me hode lümlung yu jih-a lah, tüsho püpü khülang kilim ju Menü mükheahmudu yu jih-a lah, 9püpü kilim ju Me rukhühnü akin, püpü kilim Me khülang tüsho rukhühnü athsüngupü thsambah, 10püpü kilim khinthiyinbe rhimopü, püpü kilim müchitpü, püpü kilim mebo dükeak kheahkhitkhukpü, püpü kilim thiyutha aphuaphu, püpü kilim thiyuthabo thanakpü lah. 11Harü alala Me khülang tüsho rukhüh rhimo ah, tüsho apinü alümkhi yande mihbüm aban kilim jihchoh.
Pang Khülang kheak Achamnakbo
12 #
Rom 12.4,5 Pang khülang tüsho achamnak ahihdo, pang yo achamnak ahihdo lalashe pang khülang lakhi nangde Khrista she ju ruk ah. 13Tümütüsho Jihudarü yungsho Greekrü, azhorü yungsho zuzu larü thsüthsü isa alala pang khülang ching Me khülangnü baptijih tüsho Me khülang yungshih. 14Tümütüsho pang ching achamnak khülang lang yung tüshe ahihdo lah. 15Jingnü, “Tümütüsho I a khah yungle pang yo yung,” de athamonü ju pang yo yung düpü? 16Tüsho nükhünnü, “Tümütüsho I a mük yungle pang yo yung,” de athamonü ju pang yo yung düpü? 17Pang abümnü mük thsükhülaa, asopü küching laba? Abümnü asopü thsükhülaa, amünimpü küching laba? 18Tüshe kheakü Thrünpuhnü apinü amulongkhi nangde pang ching achamnakbo büthsüthsü zojih. 19Tüsho arü alala mungji khülang lang thsükhülaa, pang küching laba? 20Kheakü achamnak ahihdo lah, tütüshe pang khülang. 21Tüsho müknü khah ki, “Inü nü yihnüpü müla,” yungsho kunü jing ki, “Inü nü yihnüpü müla,” de athapü mukuk. 22Jude yung, pang ching achamnak lung akheamkhibe nangde alakhi ju adungto ah. 23Tüsho pang yo achamnakbo isanü akheamkhibe nangde alümkhibo kheak isanü tode wüntre jihchoh; tüsho pang ching makhamaleakbo isanü kümchoh, 24tahle akhamkhi achamnakbo tsüde akümpü yihnüpü müla. Tüshe Thrünpuhnü pang yo achamnakbo hanru tüsho achamnakbo akheamkhibe kilim wüntre atobe jih, 25junangde pang ching achammüzüt müla, tüshe achamnakbo khülangnü khülang rukhühnü kümachihbah. 26Achamnak khülang thsünüsho, alala rukhüh thsünüchoh; achamnak khülang wüntre jihsho, alala rukhüh asühachihchoh.
27Kheakü nüsa ju Khrista pang ah tüsho mihbüm abannü ju lung shihcham ah. 28#Efi 4.11Tüsho Thrünpuhnü borü ching akhuhde amüsüh-thsangyurübo moyuk, mahnepü wukihrübo, mahsampü thsangyurübo, jushu khinthiyinbe rhimorü, jushu athsüngurü, arungachihrü, kiuthsürü, thiyutha aphuaphu ching tharübo. 29Arü alala amüsüh-thsangyurübo a de? Arü alala wukihrübo a de? Arü alala thsangyurübo a de? Alalanü khinthiyinbebo rhimocho de? 30Alala athsüngupü thsambah la shi? Alalanü thiyuthabo thacho shi? Alalanü thanakcho shi? 31Tüshe achangbe thsambah thsungkheak mushude künang.
Tüsho kheaküshe inü nüsa kilim atsüdak limro huhbah.
Currently Selected:
1 KORINT 12: YIMCBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.