2 MAKABE GƏ̄ 8
8
Judas Makabe əla gír rɔ̄ɔ̄ ngé kṵ ɓē gə̄
1Dan ngeé ń nuū tə́ ní, Judas Makabe nin̄ kə madə̄n gēé túdə̄n̄ kə̄ kem ngán ɓē gə̄ tə́ jəke jəke, ba ɓārə́n̄ ngákṵ́ṵ́də́ gə̄ kə́ gír kaa yādə́ tə́ adə̄ reēn̄ rɔ̄də́ tə́ ō, ɔyn̄ ngé gə̄ ń ran̄ dɔ taā kem yā Jipə gə̄ tə́ ní adə̄ ərōn̄də́ tə́ ō. Nin̄ kánə̄n̄də́ lo kógə̄ḿ adə̄ kutədə́ asə dūbú mehḛ́ ngɔr. 2Nin̄ rāān̄ Kɔ́ɔ̄ɓē ɓɔ́ kadə̄ dḭḭ̄ gír deē yān gə̄ ń de gə̄ a rējə̄n̄də́ ní ō, kadə̄ kumən ṵṵn kə kújə yān ń ngé taā kem aĺ gə̄ rāān̄ yá̰á̰ kə́ karī tə́ ní ō, 3kadə̄ kumən kə ṵṵn kə ɓē ń de gə̄ nujənə̄ń sák sák kɔ̄ɔ́ ō, rāān̄ adə̄ tél asə naā kə ta nangaá ní ō, kə dal ba̰ā̰ mósə de gə̄ ń a̰ȳ nang tə́ ní ō. 4Kadə̄ əga kemən dɔ ngán gə̄ ń tɔ̄lə̄n̄də́ ngá̰ý kanjə̄ kumən ní ō, ta tɔ̄l̄ ta ɓáa kə bə̄gā wūn̄g yān dɔ ngé tájə̄ rīn gə̄ tə́ ō. 5Dan nəkɔ́ ń Makabe un dɔ ɓūtə̄ ngé rɔ̄ɔ̄ gə̄ anī, gír ɓē kə́ tetən rɔ̄ɔ̄ gətóo. Tɔdɔ̄ wūn̄g yā Kɔ́ɔ̄ɓē tél i kum kṵ kɔ̄ɔ́. 6Makabe teē búgə́rú kə̄ rɔ̄ ɓē bo gə̄ tə́ ō, ngán ɓē gə̄ tə́ ō, ba tə́la hor dɔ tə́ ō, taā lo kə́ yā ra tū tə́ rɔ̄ɔń majə gə̄ ō, tetə madə̄ ba̰ā̰ gə̄ rɔ̄ɔ̄ nja i ngá̰ý ō. 7Ni a ənī rɔ̄ɔ̄ kə́ beé gə̄ i ndɔ̄ɔ́ ō, de gə̄ ɔrə̄n̄ najə̄ yān kə̄ lo gə̄ tə́ ō.
Judas tetə Nikanor rɔ̄ɔ̄
8Pilipə a̰ā̰ kadə̄ a aw̄ i kum kə̄ kété ō, a tetə i rɔ̄ɔ̄ kə gō naá gō naá ō anī, ndang makətūbə̄ adə̄ Pətoleme nge kṵ ɓē kə́ Koyelesiri ō, kə́ Penisi ō, kadə̄ reē kə rɔ̄ɔ̄ dɔ yá̰a̰ kənge yā mban̄g tə́. 9Pətoleme gə̄rā Nikanor kə́ ngōn̄ Patərokəl ń i de kógə̄ḿ kə́ dan madə̄ ta mban̄g gə̄ kə́ ta kəga dɔ tə́ ní, əndān dɔ ɓūtə̄ ngé rɔ̄ɔ̄ gə̄ kə́ asən̄ deē dūbú kutə jōó ń nuū tə́, kə́ teēn̄ i kə̄ gír ɓē gə̄ tə́ malang, yā kadə̄ tɔ̄lə̄n̄ gír kaa yā Jipə gə̄ malang kɔ̄ɔ́. Ni adə̄n Gorjiyas ń i ngol ngé rɔ̄ɔ̄ gə̄ ō, ger̄ yá̰á̰ kə́ sɔɔ̄ dɔ rɔ̄ɔ̄ majə ō ní kadə̄ i seneé. 10Dan ngeé ń nuū tə́ ní, kə̄rā yā Rom gə̄ kə́ dɔ mban̄g tə́ i sə́lē gində̄ arjā̰a̰ kə́ kɔȳn i kəlōo dūbú kutə mí gidə i sɔ́. Anī Nikanor gír̄ kigə Jipə gə̄ ń əhɔn̄də́ bəlo tə́ ní, yā kəgāń kə̄rā kə́ dɔ mban̄g tə́. 11Ni əla kəla kə̄ ta jī tə́ nuū adə̄ ɓē gə̄ ń ndin̄ kə gō kadə̄ bā boó ní kadə̄ kə reē kə mangən̄ Jipə kə́ ɓəlo gə̄. Ni ənī ndūn yā kadə̄də́ Jipə kə́ ɓəlo gə̄ kutə ndōhó gíŕ sə́lē gində̄ arjā̰a̰ kə́ kɔȳn i kəlōo kutə jōó gidə i sīrí tə́. Yá̰á̰ kə́ tōr̄ ń Nə́ɓā kə́ tɔ́gən i ngá̰ý a ndi yā rāā seneé gō tə́ ní, ni gír̄ dɔ tə́ alé.
12Judas oō kadə̄ Nikanor əsō róbó a reē. Ba dan ń ni əda de gə̄ yān gə̄ najə̄ yā áskar yā madə̄ ba̰ā̰ gə̄ kə́ a teēn̄ kə̄ rɔ̄də́ tə́ ngɔr anī, 13ngé ɓōĺ gə̄ ō, ngé taā kem yá̰a̰ rāā kə́ gōtə́ yā Nə́ɓā aĺ gə̄ ō, a̰ȳ aw̄n̄ lo kə́ rang gə̄ tə́. 14Ngé kə́ rang gə̄ igən̄ gotə yá̰a̰ yādə́ gə̄ malang ń nay ní ō, ndɔ̄ȳn̄ Kɔ́ɔ̄ɓē kadə̄ kə ajə ngé gə̄ ń Nikanor nge taā kem Nə́ɓā aĺ gātə̄ sedə́ kété kanjə̄ kənī rɔ̄ɔ̄ ɓáý ní ō. 15Nin̄ ədan̄ Kɔ́ɔ̄ɓē na: Ré ī-gḛy kajəjí tām̄ yājí jḭḭ kɔ́ gə̄ tə́ aĺ gə̄gē anī, ādə̄ əga kemií dɔ madə̄ naā ń əhɔ kə kaají gēé ní tə́. Ādə̄ əga kemií dɔ tə́ na rīí kə́ bo ń kɔsə go̰n yān i ngá̰ý ní, i kə́ ɓār̄ dɔjí tə́. 16Judas Makabe ɔsə dɔ de gə̄ yān gə̄ kə̄ naā tə́, nin̄ i deē dūbú mehḛ́. Ni ədadə́ na kə lōōn̄ ɓōĺ madə̄ ba̰ā̰ gə̄. Kə lōōn̄ ɓōĺ kósə de gə̄ kə́ nin̄ i Jipə aĺ gə̄ ń reē ənīn̄ rɔ̄ɔ̄ kanjə̄ kumən ní, ba kə rɔ̄ɔ̄n̄də́ kə wurkilií. 17Kadə̄ əga kemdə́ dɔ yá̰á̰ kə́ majə aĺ ngá̰ý ń de gə̄ ń nuú na rāān̄ kə kújə yā Kɔ́ɔ̄ɓēé ngándáńg ní. Nin̄ əlan̄ hor dɔ ɓē kə́ Jerusalem tə́ ō, ta tɔ̄l̄ ta anī ɔgə̄n̄jí rāā yá̰a̰ kāgə̄ ɓē yā kaají gə̄ ō. 18Judas əda ɓáý tṵ na: Madə̄ ba̰ā̰jí gə̄ əndān̄ kemdə́ i dɔ yá̰a̰ rɔ̄ɔ̄ yādə́ gə̄ tə́ ō, dɔ yá̰a̰ gə̄ ń nin̄ a rāān̄ kanjə̄ ɓōĺ ní tə́ ō. Ba jḭḭ̄ j-ənī kemjí j-adī i Nə́ɓā kə́ tɔ́gən i ngá̰ý. Ré ni ndigə anī, asə mbə́rē ngé rɔ̄ɔ̄jí gə̄ tə́nīdə́ ō, mbə́rē de kə́ dɔ nang tə́ gə̄ malang naā tə́ sedə́ tə́nīdə́ ō. 19Gō tə́ anī, Judas ter̄ kemdə́ dɔ dḭḭ̄ ń Nə́ɓā dḭḭ̄ kaadə́ gə̄ ní tə́: ɓāl̄ yā Senakerib tə́ ní, Nə́ɓā rāā adə̄ madə̄ ba̰ā̰ gə̄ dūbú ɓú kə kutə sɔ́sɔ́ kə kalən kə́ mí oyn̄. 20Ādə̄ əga kemsí dɔ rɔ̄ɔ̄ ń rɔ̄ɔ̄n̄ Galatə gə̄ dɔ nang kə́ Babilon tə́ ní ō. Ndɔ̄ ngeé ń nuū tə́ ní, Jipə gə̄ dūbú sɔ́sɔ́ ō, de kə́ Masedəwan gə̄ dūbú sɔ́ ō, ərōn̄də́ adə̄ rɔ̄ɔ̄nəń de gə̄ kə́ kutədə́ i dūbú ɓú kə kutə jōó. Yá̰a̰ tōr̄ rɔ̄ Masedəwan gə̄, banī Nə́ɓā rāā kə Jipə kə́ dūbú sɔ́sɔ́ gə̄ adə̄ nin̄ nujən̄ madə̄ ba̰ā̰də́ gə̄ malang kɔ̄ɔ́ ō, ɔyn̄ yá̰a̰ kənge yādə́ gə̄ ngá̰ý ō.
21Judas əla go̰ kem ngé rɔ̄ɔ̄ yān gə̄ tə́ ō, əndā dɔ rɔ̄də́ danaá kadə̄ oyn̄ tām̄ yā Ndū najə̄ yā Nə́ɓā tə́ ō, tām̄ yā ɓē tə́ ō, i kə najə̄ gə̄ ń nuū. Ni gán̄g ɓūtə̄ ngé rɔ̄ɔ̄ yān gə̄ gír lo sɔ́. 22Ɓūtə̄ gə̄ kógə̄ḿ kógə̄ḿ ní, ngé rɔ̄ɔ̄ kə́ kemeé gə̄ asən̄ dūbú kə ɓú mí, dūbú kə ɓú mí. Ni tə́ndā ngákṵ́ṵn gə̄ ń i Simo̰ ō, Jəjep ō, Jonata̰ ō ní, dɔ ɓūtə̄ gə̄ ní tə́ kógə̄ḿ kógə̄ḿ. Nəkɔ́ i dɔ gír ɓūtə̄ kə́ kógə̄ḿ tə́ ō. 23Gō tə́ anī əda Eleyajar kadə̄ tə́da makətūbə̄ kə́ táĺ. Kutə̄ gō anī əda de gə̄ najə̄ ń toō yā kəlań go̰ kemdə́ tə́ na: Nə́ɓā dḭḭ̄jí. Gō tə́ anī, njə̄rā kété no ɓūtə̄ kə́ ta kəga dɔ tə́ aw̄ ənīń Nikanor rɔ̄ɔ̄. 24Nə́ɓā kə́ tɔ́gən i ngá̰ý i gō Jipə gə̄ tə́. Adə̄ nin̄ tɔ̄lə̄n̄ madə̄ ba̰ā̰ gə̄ dūbú ndōhó. Nin̄ adə̄n̄ gotə áskar kə́ rang kə́ ngá̰ý gə̄ yā Nikanor do ō, gángə̄n̄ jīdə́ gə̄ kə njadə́ gə̄ ō, gotə gə̄ a̰ȳn̄ naā ō. 25Nin̄ táān̄ nar yā ngé reē mangdə́ ɓəlo tə́ gə̄ ō, ngɔ̄də̄n̄ ngé ka̰ȳ naā gə̄ dan təsóo ō. Ba gō tə́ anī téləń dɔ tə́, tɔdɔ̄ kum mbang mān̄ ngá̰ý kɔ̄ɔ́. 26Tɔdɔ̄ ré lo tíbə anī, rāā rɔ̄nel̄ ndɔ̄ kə́ nge kṵ sīrí a əla gír, adə̄ nin̄ lōōn̄ gír ngɔ̄də̄də́ tə́. 27Dan ń nin̄ ɔyn̄ yá̰a̰ rɔ̄ɔ̄ gə̄ yā madə̄ ba̰ā̰ gə̄ ō, ɔyn̄ yá̰a̰ kənge yādə́ gə̄ ō oy anī, ɔsən̄ go̰n ndɔ̄ kə́ nge kṵ sīrí. Nin̄ tɔ̄ȳn̄ Kɔ́ɔ̄ɓē kə tɔ́gə́də́ ō, rāānən̄ kə́ra ō. A̰á̰ā̰, ni ajədə́ ndɔ̄ ngeé ń nuū tə́. Ni tél ɔjədə́ kem majə yān gogə́ rang. 28Gō ndɔ̄ kə́ nge kṵ sīrí tə́ anī, nə̄ɓōn̄ de gə̄ ń rāān̄də́ ndoō tə́ ní núsə́ yá̰a̰ kənge kə́ kɔy ta rɔ̄ɔ̄ tə́ gə̄ ō, nə̄ɓōn̄ dəyá̰ kə́ ngaa koy gə̄ ō, ngán hal gə̄ ō. Gotə ń nay ní, nin̄ nə̄ɓōn̄ naā dɔ dáńdə́ tə́ kə ngáńdə́ gēé. 29Dan ń rāān̄ yá̰á̰ ń nuū oy anī, rāān̄ Nə́ɓā ɓɔ́ naā tə́ malang ō, ndɔ̄ȳn̄ Kɔ́ɔ̄ɓē nge ka̰a̰ kum tō ndoō yā deē ō, kadə̄ tél əndā najə̄ naā tə́ márwāy kə ngé kəla yān gēé.
Judas tetə Timote rɔ̄ɔ̄
30Dan ń rɔ̄ɔ̄n̄ áskar yā Timote gə̄ ō, yā Bakides gə̄ ō ní, tɔ̄lə̄n̄də́ adə̄ tɔȳ dūbú kutə jōó ń nuū, ba taān̄ kújə́ kə́ ngan̄g kə́ ngāl̄ ɓururu kum kə̄ dɔɔ́ gə̄. Yá̰a̰ kənge kə́ ngá̰ý tɔȳ kə́ kété ń ɔyn̄ ta rɔ̄ɔ̄ tə́ ní, kēgə̄n̄ naā tə́ gír lo i jōó adə̄ asə naā. Kógə̄ḿ i yādə́ nin̄ kɔ́ gə̄ ō, kə́rēý i yā ngé gə̄ ń rāān̄də́ ndoō tə́ ní ō, ngán hal gə̄ ō, dəyá̰ kə́ ngé kəla ndoō gə̄ ō, kanjə̄ kadə̄ dɔdə́ ndígə̄nal dɔ ɓə́ga gə̄ tə́ ō. 31Dan ń ɔyn̄ yá̰a̰ rɔ̄ɔ̄ gə̄ yā madə̄ ba̰ā̰ gə̄ oy anī, kánə̄n̄ dɔ naā tə́ lo kógə̄ḿ kə́ majə tə́. Ba gotə yá̰a̰ kənge kə́ rang kə́ kɔy ta rɔ̄ɔ̄ tə́ gə̄ ní, ɔy aw̄nəń Jerusalem. 32Nin̄ tɔ̄lə̄n̄ ngol ɓūtə̄ áskar gə̄ ń ɓoon̄ rɔ̄də́ tū yā Timote tə́ ní. I de kógə̄ḿ kə́ taā kem Nə́ɓā aĺ bátə́ kə́ rāā Jipə gə̄ majə aĺ ngá̰ý. 33Dan ń nin̄ a rāān̄ rɔ̄nel̄ tetə rɔ̄ɔ̄ kem ɓē yādə́ tə́ anī, əlan̄ hor dɔ ngé gə̄ ń tə́lan̄ hor tū bápə́ kə́ táĺ gə̄ tə́ ní. Nin̄ əlan̄ hor dɔ Kalisten ń ɓɔ̄ɔ̄ rɔ̄n kem ngōn̄ kújə́ kə́ dūú tə́ ní ō. I beé n əndānəń njadə́ najə̄ lo kə́ táĺ ń rāān̄ yá̰á̰ kə́ karī tə́ ní.
Nikanor a̰ȳ aw̄ A̰tiyos
34Nikanor ń i de kə́ ndɔ̄ĺ i ngá̰ý dɔn tə́ ní, reē kə ngé rāā gātə̄ gə̄ dūbú kadə̄ mangən̄ Jipə gə̄. 35De gə̄ ń ni rāādə́ i yá̰a̰ aĺ tə́ ní, Kɔ́ɔ̄ɓē rāā sedə́ adə̄ əlan̄ rɔ̄sɔl̄ dɔn tə́. Ni ɔr̄ kūbə̄ kə́ majə ngá̰ý kə́ rɔ̄n tə́ kɔ̄ɔ́, ba a̰ȳ kə kem ndɔr̄ gə̄, tītə̄ ɓəlo kə́ teē ɓē kɔ́ɔ̄neé a̰ȳ beé. De gə̄ malang əya̰nən̄ kɔ̄ɔ́ ō, aw̄ bátə́ ugə̄ A̰tiyos ō. Ni teē ta tə́ i sasat, tɔdɔ̄ tɔ̄lə̄n̄ ngé rɔ̄ɔ̄ yān gə̄ malang kɔ̄ɔ́. 36Ni ənī ndūn adə̄ Rom gə̄ yā kəgā kə̄rā kə́ dɔ mban̄g tə́ i kə nar gír ɓəlo gə̄ kə́ Jerusalem. Ba ngɔlaā ɓáa ni ger̄ kadə̄ Jipə gə̄ i de gə̄ kə́ deē a tetədə́ rɔ̄ɔ̄ alé, tām̄ aw̄n̄ kə Nə́ɓā kə́ nge rɔ̄ɔ̄ dɔdə́ tə́ ō, əlan̄ dɔdə́ gír Ndū najə̄ yān gə̄ tə́ ō.
Markert nå:
2 MAKABE GƏ̄ 8: SARDC
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bibəl ta Sar̄ © L'Alliance Biblique du Tchad, 2006, 2010.