2 MAKABE GƏ̄ 13
13
A̰tiyokus adə̄ tɔ̄lə̄n̄ Menelas
1Kem ɓāl̄ kə́ nge kṵ ɓú kə kutə sɔ́ kə kalən kə́ ndōhó tə́ anī, Judas ō, ngé rɔ̄ɔ̄ yān gə̄ ō, oōn̄ kadə̄ A̰tiyokus Opator a reē kə̄ dɔ nang kə́ Jude tə́ kə ɓūtə̄ áskar yān gə̄ kə́ kutədə́ i ngá̰ý yā kənī rɔ̄ɔ̄. 2Lijiyas nge kətōn ń kété ni i dɔ yá̰a̰ gə̄ tə́ malang ní, i seneé ō. Ngé rɔ̄ɔ̄ yān gə̄ kə́ kə njadə́ gə̄ i Gərek gə̄ kə́ kutədə́ i dūbú ɓú kə kutə kógə̄ḿ ō, ngé rɔ̄ɔ̄ kə sə́nda gə̄ i deē dūbú mí kə ɓú mətá ō, kedə̄ rɔ̄ɔ̄ gə̄ i kutə jōó gidə i jōó ō, púsə rɔ̄ɔ̄ gə̄ kə́ kə ngorong gēé ta tə́ i ɓú mətá ō. 3Menelas ɓo rɔ̄n tū yādə́ tə́ ō, əla go̰ kem A̰tiyokus tə́ kə kum kedēé ngá̰ý ō. Rāā beé i tām̄ majə yā ɓē tə́ alé, ba əndā kemən i dɔ kəndā kə́ kadə̄ tél əndānən̄ dɔ kəla yān tə́ gogə́ tə́. 4Banī Mban̄g kə́ dɔ mban̄g gə̄ tə́ rāā adə̄ wūn̄g rāā A̰tiyokus kə́ nge tɔ̄l̄ de gə̄ ngeé ń toō. Ba dan ń Lijiyas ɔjə mban̄g adə̄ unjə̄ kadə̄ i Menelas n i nge reē kə yá̰á̰ kə́ tōr̄ gə̄ malang anī, mban̄g adə̄ ndūn kadə̄ aw̄n̄ seneé Bere kadə̄ tɔ̄lnən̄ lo ń nuū tə́ ō, kə gō yá̰a̰ kāgə̄ ɓē yā de kə́ lo ń nuū tə́ gə̄ ō. 5Kújə́ kógə̄ḿ kə́ ngāl̄ ɓururu kə́ ngālən i métər kutə jōó gidə i mí kum kə̄ dɔɔ́, kə́ bū rosə kem i kem ɓē ní tə́. Gində̄ kógə̄ḿ kə́ a rə̄ngō kə́ a rəte kə de gé adə̄ a tə́sōn̄ kə̄ lo gə̄ tə́ kum bū tə́ i ta kújə́ ní tə́ dɔɔ́. 6Deē ń ɔy yá̰a̰ kənge kə́ kem kújə ɓesə̄ tə́, aké tɔ̄l̄ deē tɔ̄l̄ kə́ majə aĺ ngá̰ý adə̄ najə̄n i dɔn tə́ ní, a aw̄n̄ seneé i lo ń nuū tə́ yā mbəre kənīn kadə̄ əsō oy. 7Menelas ń i de kə́ taā kem Nə́ɓā aĺ ō, i de kə́ kanjə̄ ndū najə̄ ō ní, yá̰á̰ kə́ tōr̄ ń tɔ̄lən ní n nuū ō, ɔgə̄ kadə̄ dubə̄n̄ nīnə́n ō. 8Yo ń ni oy ní i gōtə́, tɔdɔ̄ rāā yá̰á̰ kə́ gōtə́ aĺ gə̄ ngá̰ý kə dabə tun̄ yá̰a̰ yā Kɔ́ɔ̄ɓē ń hor kə́ dɔ tə́ ō bū kə́ dɔ tə́ ō i yá̰á̰ kə́ táĺ gə̄ ní. Adə̄ ni oy i kum bū tə́.
Judas tetə A̰tiyokus rɔ̄ɔ̄ kem ɓē kə́ Modin tə́
9Gír̄ kə́ majə aĺ gə̄ i ngá̰ý kem mban̄g A̰tiyokus tə́, adə̄ ni aw̄ i kə̄ rāā Jipə gə̄ yá̰á̰ kə́ majə aĺ ngá̰ý gə̄ ń bɔbə̄n rāā sedə́ ní tə́. 10Judas oō najə̄ ní, adə̄ əda kósə de gə̄ kadə̄ ndɔ̄ȳn̄ Kɔ́ɔ̄ɓē ndɔ̄ɔ́ ō kadaá ō, yā kadə̄ kə́ ɓōó ń toō Kɔ́ɔ̄ɓē kə dḭḭ̄ ngé gə̄ ń de gə̄ a sāān̄ kɔgə̄də́ rāā yá̰a̰ kə gō ndū najá ō, kɔgə̄də́ ɓē yādə́ ō, kɔgə̄də́ kújə́ kə́ táĺ yā Kɔ́ɔ̄ɓē ō ní. 11Ba kadə̄ gír de gə̄ ń taān̄ koō ka̰a̰ tápə̄ i ngɔr ɓáý ní, Kɔ́ɔ̄ɓē kə lōō kəya̰də́ kadə̄ tél əsōn̄ gír kṵ ɓē yā nápar de kə́ ngé ɓōĺ ndíĺ yá̰a̰ aĺ gə̄ tə́. 12Adə̄ yá̰á̰ ń nin̄ rāān̄ naā tə́ malang ní n toó: laan̄ kemdə́ nang tə́ ndɔ̄ mətá ndɔ̄ȳnəń Kɔ́ɔ̄ɓē kə́ nge ka̰a̰ kum tō ndoō yā de gə̄ kə man̄ nuú kumdə́ tə́ ō, kə ɓōó ō. Gō tə́ anī, Judas əla go̰ kemdə́ tə́ ō, ədadə́ kadə̄ ndin̄ dɔ rɔ̄də́ tə́ ō. 13Ba dan ń ɔr̄ najə̄ kə kum kɔɔ̄ gēé kə kéŕdə́ oy anī, ɔr̄ dɔɔ́ na sōgə́ ngé rɔ̄ɔ̄ yā mban̄g gə̄ reē taān̄ dɔ nang kə́ Jude ō, ɓē kə́ Jerusalem ō. Ni ndigə rāā yá̰a̰ malang i kə ta kūl̄ rāā kə́ Kɔ́ɔ̄ɓē rāā seneé. 14I tītə̄ ń nuū n Judas əya̰ń rɔ̄ɔ̄ kə́ mbənādə́ tə́ kə madə̄ ba̰ā̰n gēé jī nge rāā yá̰a̰ malang kə́ dɔ nang tə́ ní. Ni əla go̰ kem de gə̄ yān gə̄ tə́ kadə̄ rɔ̄ɔ̄n̄ kə wurkilií tām̄ yā ndū najə̄ gə̄ tə́ ō, lo kə́ táĺ tə́ ō, ɓē kə́ Jerusalem tə́ ō, dɔ nang yā ngán Israel gə̄ tə́ kə taá malang ō, gír lo kəla gə̄ tə́ ō. Ba tə́ndā áskar yān gə̄ kə gō gidə ɓē kə́ Modin. 15Najə̄ ń ni əda áskar yān gə̄ əlań go̰ kemdə́ tə́ ní n toó: Nə́ɓā dḭḭ̄jí. Gō tə́ anī, ɔy balsáá kə́ wurkil kə́ ger̄ rɔ̄ɔ̄ majə gə̄ aw̄ ənīń rɔ̄ɔ̄ dām̄ ɓē ń mban̄g ndi tū tə́ ní tə́ dan ndɔ̄ɔ́ ō, tɔ̄l̄ de gə̄ kə́ asən̄ dūbú jōó ń nuū ō, dan de gə̄ kə́ kem géŕ gereé tə́. De gə̄ yān gə̄ ɔsən̄ kedə̄ kə́ bo tɔȳ madə̄ gə̄ malang naā tə́ kə nge kaw̄ seneé ta rɔ̄ɔ̄ tə́. 16Ta tɔ̄l̄ ta tə́ anī əlan̄ ɓōĺ kə́ ngá̰ý kem de gə̄ tə́ ō, rāān̄ adə̄ de gə̄ a̰a̰n̄ woy woy kem géŕ gereé kə taá malang ō. Dan ń nin̄ tetən̄ rɔ̄ɔ̄ oy anī, tél aw̄n̄ gogə́ ō 17lo tīī ō. Nin̄ rāān̄ yá̰á̰ kə́ to rī ɓār̄ ń toō i kə ta kūl̄ Kɔ́ɔ̄ɓē ń rāā sedə́ ō, ngɔ̄m̄də́ ō ní.
A̰tiyokus əndā najə̄ naā tə́ kə Jipə gēé
18I tītə̄ ń nuū n mban̄g gerə̄ń ɓōĺ yá̰a̰ aĺ yā Jipə gə̄ ní. Adə̄ nāā kənī lo yādə́ gə̄ rɔ̄ɔ̄ i kə ngamaá. 19Ni aw̄ ngɔr rɔ̄ ɓē kə́ Betəsur ń i ɓē kə́ ngan̄g yā Jipə gə̄ ní tə́, banī tā̰ā̰nən̄ rɔ̄ɔ̄ əndānən̄ sa̰y ō, asə rāā yá̰á̰ kógə̄ḿ tṵ aĺ ō, tetənən̄ rɔ̄ɔ̄ ō. 20Kə́ tām̄ yā de gə̄ ń gīrə̄n̄ gidən kə rɔ̄ɔ́ ní tā anī, yá̰á̰ ń i kə́ majə tām̄ yādə́ tə́ ní, Judas əlań adə̄də́. 21Banī áskar Jipə kógə̄ḿ kə́ rīn na i Rodokus, teē kə gíŕ yá̰á̰ kə́ to lo mundə̄ tə́ gə̄ adə̄ madə̄ ba̰ā̰ gə̄ gerə̄n̄. Anī ndo̰o̰n̄ gírən ō, əhɔnən̄ ō, tɔ̄l̄nən̄ ō. 22Mban̄g ɔr̄ najə̄ kə de kə́ Betəsur gə̄ nja kə́ nge kṵ jōó. Ni gḛy kadə̄ lɔm to dɔ dáńdə́ tə́, anī nin̄ ndigən̄ dɔ tə́ seneé. Lo ń nuū tə́ ni tél dɔ tə́, 23ənī Judas Makabe kə áskar yān gēé rɔ̄ɔ̄ ō, tetənən̄ rɔ̄ɔ̄ ō. Dan ń mban̄g oō kadə̄ Pilipə ń ni əndān dɔ kəla tə́ ní, əsō wūn̄g kem ɓē kə́ A̰tiyos tə́ anī, kemən nujə sák sák. Ni tɔ́tə̄n̄ naā kə Jipə gēé dɔ najə̄ tə́ ō, ndigə najə̄ kə́rēý gə̄ gōdə́ tə́ ō. Ni túbə ɔjəń kadə̄ n-a n-ngɔ̄m̄ yá̰a̰ malang kə́ gōtə́ ń nin̄ dəjen̄ ní ō, əndā najə̄ naā tə́ sedə́ ō. Ni ndējə̄ yá̰á̰ kə́ yā tun̄ ō, adə̄ kadə̄ karī gə̄ ngá̰ý kə kem ndaá rɔȳń kújə yā Kɔ́ɔ̄ɓē ō. 24Ni əhɔ Judas Makabe kə̄ rɔ̄n tə́ majə ō, ɔjə dɔ Hegemonidə kadə̄ i ni n i nge kṵ ɓē kə́ gō nang ń əla gír Pətolemayis bátə́ ugə̄ń dɔ nang yā Gereni gə̄ tə́ ní ō. 25Mban̄g aw̄ Pətolemayis, banī de kə́ kemeé gə̄ nel̄də́ kə ndū ń ənīn̄ adə̄n̄ Jipə gə̄ ní alé. Wūn̄g rāādə́ adə̄ gḛyn̄ mbātə́ ndūdə́ ń ənīn̄ adə̄n̄ naā ní. 26Lo nuū tə́ Lijiyas al̄ aw̄ dɔɔ́ lo kɔr̄ najə̄ tə́, ba ɔjədə́ kum míndə́də́ ngeé ń toō ń ənīn̄ adə̄n̄ naā kə Jipə gēé ní kə gō tɔ́gəneé adə̄ gerə̄n̄ kum ō, kemdə́ tetə kə̄ nang tə́ ō, aw̄n̄ kə gír̄ kə́ majə ō. Ba gō tə́ anī aw̄ A̰tiyos.
Yá̰á̰ ń rāā yá̰a̰ dan ń mban̄g A̰tiyokus ənīń rɔ̄ɔ̄ tə́ ní n nuū ō, lo kɔr̄ ń ni ɔr̄ rɔ̄n kə̄ gogə́ ní n nuū ō.
Markert nå:
2 MAKABE GƏ̄ 13: SARDC
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bibəl ta Sar̄ © L'Alliance Biblique du Tchad, 2006, 2010.