2 MAKABE GƏ̄ 11
11
Judas tetə Lijiyas rɔ̄ɔ̄
1Sḛ́ý gō tə́ anī, Lijiyas ń i nge kətō mban̄g ō i ngeen ō ní, ndi dɔ yá̰a̰ gə̄ kə́ kem ɓē kṵ tə́ ō, yá̰a̰ gə̄ ń rāān̄ yá̰a̰ gō gogə́ laā ní tōrən ngá̰ý ō. 2Adə̄ ngé rɔ̄ɔ̄ kə njadə́ yān gə̄ kə́ dūbú kutə sɔ́sɔ́ ō, ngé rɔ̄ɔ̄ kə sə́ndá gə̄ malang ō ní, ɔsə dɔdə́ naā tə́, ba aw̄ kənī Jipə gə̄ rɔ̄ɔ̄ tə́. Ni gír̄ rāā ɓē yādə́ kadə̄ tél lo ndi yā Gərek gə̄ ō, 3kadə̄ kújə́ kə́ táĺ əgā lambóo tītə̄ yā gotə kújə ɓesə̄ gə̄ yā nápar de kə́ rang gə̄ ō, kə dɔ ɓāl̄ gə̄ malang ɓáa kə gātə̄n̄ kə lo kəla yā nge tun̄ yá̰á̰ kə́ bo ō. 4Usən ni dɔ tɔ́gə yā Nə́ɓā tə́ alé, ba əndā kemən i dɔ ngé rɔ̄ɔ̄ kə njaá yān gə̄ kə́ i dūbú tə́ ō, dɔ ngé rɔ̄ɔ̄ kə sə́ndá yān gə̄ kə́ i dūbú ngá̰ý tə́ ō, dɔ kedə̄ rɔ̄ɔ̄ yān gə̄ kə́ kutə sɔ́sɔ́ tə́ ō, kə kɔjə rɔ̄ɔ́.
5Dan ń ni ugə̄ dɔ nang kə́ Jude tə́ anī, aw̄ ngɔr rɔ̄ ɓē kə́ Betəsur ń i lo kə́ ngan̄g ní tə́. Kḭḭ tū tə́ kaw̄ Jerusalem asə kəlōmétər kutə jōó gidə i sɔ́sɔ́ ń nuū, ba ənīn̄ rɔ̄ɔ̄ kə ngangá. 6Dan ń Makabe nin̄ kə de gə̄ yān gēé oōn̄ kadə̄ Lijiyas gīr̄ ɓē kə́ ngan̄g gə̄ kə rɔ̄ɔ́ anī, rāān̄ Kɔ́ɔ̄ɓē ɓɔ́ ō, to̰ō̰n̄ rus rus kə man̄ nuú kumdə́ tə́ ō, naā tə́ kə kósə de gə̄ malang ō, kadə̄ ni əla kə deē yān kə́ dɔ rā̰ tə́ kə́ majə adə̄ Israel kadə̄ ajən. 7Makabe nəkɔ́ ɔy yá̰a̰ rɔ̄ɔ̄ gə̄ kété, ba əla go̰ kem madə̄n gə̄ tə́ kadə̄ ənīn̄ rɔ̄də́ kɔ̄ɔ́ ta yo tə́ seneé, yā dḭḭ̄ń ngákṵ́ṵ́də́ gə̄. Nin̄ əsōn̄ róbó naā tə́ malang kə kem tə́ngāá. 8Dan ń nin̄ i ngɔr kə Jerusalem ɓáý anī, nge kal̄ sə́ndá kógə̄ḿ kə́ ṵṵ̄ kūbə̄ kə́ ndaa teē hɔy ba njə̄rā kété nodə́ tə́ ō, wél̄ yá̰a̰ rɔ̄ɔ̄ kə́ rāā kə lɔ́rɔ́ ō. 9Lo ń nuū tə́ nin̄ malang ndadə̄n̄ Nə́ɓā ń a̰a̰ kum tō ndoō yādə́ ní ō, tɔ́gə́ kógə̄ḿ kə́ ngá̰ý reē rɔ̄də́ tə́ ō. Adə̄ nin̄ i ngɔr ngá̰ý yā rɔ̄ɔ̄ de gə̄ ngóy alé, ká ré i dā̰ ngān̄g aké i ndogə̄ gində̄ gə̄gē anī, nin̄ i ngɔr ngá̰ý yā rɔ̄ɔ̄də́. 10Nin̄ njə̄rān̄ kété kə ta naā kə jī lo rɔ̄ɔ́, tām̄ aw̄n̄ kə de kógə̄ḿ kə́ ḭḭ dɔ rā̰ tə́, tɔdɔ̄ Kɔ́ɔ̄ɓē a̰a̰ kum tō ndoō yādə́. 11Nin̄ əlan̄ ruu kə̄ dɔ madə̄ ba̰ā̰ gə̄ tə́ tītə̄ ɓɔl gə̄ beé, rāān̄ adə̄ áskar yā madə̄ ba̰ā̰ gə̄ kə́ ngé rɔ̄ɔ̄ kə njadə́ gə̄ dūbú kutə gidə i kógə̄ḿ oyn̄ ō, ngé rɔ̄ɔ̄ kə sə́ndá gə̄ dūbú kə ɓú mehḛ́ oyn̄ ō, ran̄ kə gotə áskar yā madə̄ ba̰ā̰ gə̄ ń na̰yn̄ ní gagar adə̄ a̰ȳn̄ naā malang ō. 12Ngá̰ý gə̄ dandə́ tə́ a̰ȳn̄ naā i kə do gēé ō, i kanjə̄ yá̰a̰ rɔ̄ɔ̄ gə̄ ō, Lijiyas nəkɔ́ a̰ȳ i ka̰ȳ kə́ to rɔ̄sɔl̄ ō.
Lijiyas əndā Jipə gə̄ naā tə́ kə A̰tiyokus
13Lijiyas i mbóo alé, gír̄ dɔ rɔ̄ɔ̄ ń rāan tə́ ní ō, ger̄ kadə̄ deē a tetə Hebəro gə̄ rɔ̄ɔ̄ aĺ ō. Tɔdɔ̄ Nə́ɓā kə́ tɔ́gən i ngá̰ý i gōdə́ tə́. Adə̄ əla de gə̄ 14kadə̄ aw̄ dəjen̄də́ kadə̄ əndān̄ najə̄ naā tə́ sedə́ tām̄ yā lɔm kə́ ngəran ra i dɔ yá̰a̰ rāā kə́ gōtə́ tə́ ō, ənī ndūn adə̄də́ yā kəndā gúu dɔ mban̄g tə́ kadə̄ tél madə̄ tadə́ ō. 15Yá̰a̰ malang ń Lijiyas dəje ní, Makabe ndigə. Tām̄ ni gír̄ i dɔ majə yā kósə de gə̄ tə́ ō, tá yá̰a̰ malang kə́ ɔjə dɔ Jipə gə̄ ń Makabe ndang əlań adə̄ Lijiyas ní, mban̄g ndigə dɔ tə́ ō.
16Makətūbə̄ ń Lijiyas ndang əlań adə̄ Jipə gə̄ ní, najə̄ kə́ kemeé n toó: Lijiyas rāā Jipə gə̄ malang lápə́ya! 17Ja̰a̰ ō, Abəsalom ō ń i ngé kəla yāsí gə̄ ń ə́laīdə́ ní, adə̄mə̄n̄ kēē makətūbə̄ ń toō, ba rāāmə̄n̄ ɓɔ́ kadə̄ m-ə̄ndā jīḿ gír najə̄ kə́ kemeé gə̄ tə́. 18Yá̰á̰ ń kadə̄ m̄-ndigə ní, m̄-ndigə dɔ tə́ pá tá m-āw̄ m-ɔ́jə mban̄g yá̰á̰ ń sɔɔ̄ kadə̄ m-ə̄nī kə̄ non tə́ ní ɓáý. 19Ré kemsí majə kə ngé kṵ ɓē gēé ngándáńg anī, ndɔ̄n tə́ m-ā m-ə́hɔ rɔ̄ḿ tɔgə yā rāā kəla kə́ majə tām̄ yāsí tə́ ō. 20Kə́ tām̄ yā gotə ngáń butə̄ najə̄ gə̄ tə́ tā anī, m-ə̄ndā najə̄n i ta ngé kəla yāsí gə̄ ń ə́laīdə́ ní tə́ ō, ta de gə̄ yāḿ gə̄ tə́ ō, kadə̄ sḭḭ̄ ī-tɔ́tī naā dɔ tə́ sedə́. 21Ī-ndiī lápə́ya. I makətūbə̄ kə́ ndang kem ɓāl̄ kə́ nge kṵ ɓú kə kutə sɔ́ kə kalən kə́ sɔ́sɔ́ tə́ kə ndɔ̄ kə́ nge kṵ kutə jōó gidə i sɔ́ yā nāā Diyoskor.#11.21 Diyoskor: i rī nāā yā Kəretə gə̄.
22Najə̄ kə́ kem makətūbə̄ yā mban̄g tə́ n toó: Mban̄g A̰tiyokus rāā ngōkṵ́ṵn Lijiyas lápə́ya! 23Bɔbə̄jí oy aw̄ gō de kə́ dɔ rā̰ tə́ gə̄ tə́ ō, jḭḭ kɔ́ gə̄ jə-gḛy kadə̄ de kə́ kem ɓē kṵ yājí tə́ gə̄ ndin̄ kanjə̄ kadə̄ yá̰á̰ kógə̄ḿ hóȳdə́ naā tə́ ō, kadə̄ əndānəń kumdə́ gír kəla yādə́ nin̄ kɔ́ gə̄ tə́ kə gōó majə. 24J-oō kadə̄ Jipə gə̄ mbātə́n̄ rāā yá̰a̰ kāgə̄ ɓē yā Gərek gə̄ ń bɔbə̄jí ndigə ní, ba gḛyn̄ i rāā yá̰a̰ kə jī bēl̄ lo rāan yādə́ nin̄ kɔ́ gə̄ kə́ to tayā. 25Adə̄ dan ń jə-ndigə kadə̄ gír de gə̄ ń nuū ndin̄ kanjə̄ kadə̄ yá̰á̰ kógə̄ḿ hóȳdə́ naā tə́ ní, j-un ndūjí kadə̄ télən̄ kə kújə yā Kɔ́ɔ̄ɓēé adə̄n̄də́ gogə́ ō, kadə̄ ndinə̄ń kə́ ngáń ngé ɓē gə̄ tə́ kə gō yá̰a̰ kāgə̄ ɓē yā kaadə́ gə̄ ō. 26Adə̄ ré ḭ̄ Lijiyas ə́la deē adə̄ aw̄ ədadə́ najə̄ lɔm ń jḭḭ jə-gḛy ní anī, ī-rāā i yá̰á̰ kə́ majə. Tɔdɔ̄ dan ń a gerə̄n̄ yá̰á̰ ń jḭḭ jə-ra dɔ tə́ ní anī, kemdə́ a tetə kə̄ nang tə́ ō, a əndān̄ kumdə́ gír kəla yādə́ gə̄ tə́ kə kem sɔlɔ́ ō.
27Makətūbə̄ ń mban̄g ndang əlań adə̄ gíŕ nápar de gə̄ ń i Jipə gə̄ ní, najə̄ kə́ kemeé n toó: Mban̄g A̰tiyokus rāā kum kɔɔ̄ yā Jipə gə̄ ō, gotə Jipə kə́ rang gə̄ ō lápə́ya! 28Ré ī-toī majə anī i nge ń nuū n i ndə̄ngā yājí ní ō, jḭḭ kɔ́ gə̄ jə-to lápə́ya ō. 29Menelas ədají najə̄ gḛy kə́ ī-gḛyiī tél kaw̄ gogə́ ɓēé yā kaw̄ rāā kəla yāsí gə̄. 30Adə̄ de gə̄ malang ń a tél a aw̄n̄ ɓēé no ndɔ̄ kə́ nge kṵ kutə mətá yā nāā Kəsa̰tik#11.30 Kəsa̰tik: i rī nāā Diyoskor kə́ rang. Á̰a̰ī kəlān kə́ 21. tə́ ní, deē a rāādə́ yá̰á̰ kə́ tōr̄ alé. 31Jipə gə̄ a asən̄ kəsa yá̰a̰ yādə́ kə́ to tayā gə̄ ō, a asən̄ rāā yá̰a̰ gə̄ ń ndū najə̄ yādə́ əda ní tītə̄ kə́ kété ō, deē a ənda de kógə̄ḿ kə́ dandə́ tə́ najə̄ yá̰a̰ rāan kə́ gō ger̄ aĺ tə́ aĺ ō. 32Tá m-ə́la Menelas kadə̄ aw̄ sɔl̄ kemsí ō. 33Ī-ndiī lápə́ya. I makətūbə̄ kə́ ndang kem ɓāl̄ kə́ nge kṵ ɓú kə kutə sɔ́ kə kalən kə́ sɔ́sɔ́ tə́ ō, i kə ndɔ̄ kə́ nge kṵ kutə gidə i mí yā nāā Kəsa̰tik ō.
Makətūbə̄ ń Rom gə̄ ndang adə̄n̄ Jipə gə̄ ní
34Rom gə̄ ran̄ yādə́ nuū dām̄ kə́rēý tə́ ndangən̄ makətūbə̄ əlanə̄ń adə̄n̄ Jipə gə̄ ō. Najə̄ kə́ kemeé n toó: Kintus Memiyus ō, Titus Memiyus ō ń nin̄ i ngé kɔsə kum gotə Rom gə̄ ní, rāān̄ gíŕ nápar de gə̄ ń i Jipə gə̄ ní lápə́ya. 35Yá̰a̰ gə̄ ń Lijiyas kə́ ngee mban̄g ndigə gōsí tə́ ní, jḭḭ j-əya̰ j-adə̄sí kadə̄ i yāsí ō. 36Ba ngé gə̄ ń ni a̰ā̰ majə kadə̄ n-ənī kə̄ no mban̄g tə́ pá tá ní, ré ə̄ndāī maȳ oy anī, ə́laī kə deé láẃ ādījí kanjə̄ kɔr bā̰ā̰, yā kadə̄ j-ɔjəń mban̄g yá̰a̰ gə̄ ní kə jī lo kɔjən kə́ kadə̄ majə tām̄ yāsí tə́, tɔdɔ̄ j-a j-aw̄ i kə̄ A̰tiyos. 37I beé ní, ə́laī kə de gēé láẃ ādījí, ādə̄ jḭḭ jə-gerə̄ń gír̄ yāsí gə̄ ō. 38Ī-ndiī lápə́ya. I makətūbə̄ kə́ ndang kem ɓāl̄ kə́ nge kṵ ɓú kə kutə sɔ́ kə kalən kə́ sɔ́sɔ́ tə́ ō, i kə ndɔ̄ kə́ nge kṵ kutə gidə i mí yā nāā Kəsa̰tik ō.
Markert nå:
2 MAKABE GƏ̄ 11: SARDC
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bibəl ta Sar̄ © L'Alliance Biblique du Tchad, 2006, 2010.