Lukka 19
19
Yesu ligo Zakayo ab ggi lim musoro
1Badda nade, Yesu mee Swahaba too rasul fih meddina tee Jeriko ligo ummon ggi futu fogo. 2Ragi ab ggi naadi Zakayo ggi geni naa. Uwo yaa kaan kebir tee annas ab ggi lim musoro mee uwo kaman kaan tajir. 3Ligo Yesu Kaan ggi futu fih meddina, Zakayo kaan aju ayinu Yesu yaa munu lakin uwo maa jaa ayinu uwo kalam uwo kaan ragi ggi seri mee annas kaan fih naa milaan geeri mee Yesu. 4Yaa Zakayo jerre gidaam kom tee annas uwo panda shedel ab towwhil ligo fogo matunda yaa kede uwo ayinu Yesu kalam uwo kaan geeri fih sika. 5Wakati Yesu jaa fih bakaan ab Zakayo kaan fogo, uwo ayinu foo fih shedel fogo okelem noowo gali, “Zakayo nenzil gwaam falaata. Kaan anaa endis tee kun diffan takki naare.” 6Yaa Zakayo nenzil gwaam min shedel dee uwo karibisha Yesu mee furaayi fih juwa too. 7Wakati annas ab kaan fih naa ayinu Yesu ligo ggi ruwa fih juwa tee Zakayo, ummon kelem gali, “uwo ruwa kun diffan fih juwa tee ajol ab ggi soo zambi.” 8Lakin badda yom dee, Zakayo gum foo uwo kelem nee siddi Yesu, “Asmma weede dee siddi. Anaa bi wedi nusu tee utajiri tayi nee miskiinin, mee anaa bi lippa mara arba nee annas tee musoro ab anaa zulum.” 9Dukur Yesu kelem noowo gali, “Naare Rabbana ponyesha itaa mee beyy takki kalam itaa kaman muzuuku tee Ibrayim. 10Kalam anaa nyereku tee binadum jaa fih duniya gussu ummon ab jaa woduru mee ponyesha ummon min izabu tee zambi too.”
Ijamajako tee ssente tee zaabu
(Matthew 25:14-30)
11Ligo kom tee annas ggi asmma kalama ab Yesu kelem. Uwo zidu kelem noomon ijamajako kalam ummon kaan geeri lasulu fih meddina tee Jerusalem yaa annas feker gali mamlaka tee Rabbana giruwa abidu fih gwaam. 12Uwo kelem gali, “Ragi ab taala min famila tee hishima uwo ruwa fih Bele taani boyyi. Kaan giruwa nigitu uwo Sultan tee Bele too dukur uwo kee aarja fih hukkum. 13Lakin kabbla oruwa, uwo naadi Swahaba too ashara uwo wedi nee killa wayyi ssente tee zaabu tee mudda tee shahar talata. Yaa uwo kelem noomon gali kee ummon tomiya ssente ab wedi noomon dee kee ummon zidu fih byashara too ladi uwo bi aarja. 14Lakin annas too taanin kaan aju uwo maa yaa badu uwo kalas ruwa ummon rasul mursalin waara wo kede ummon kelem nee Sultan kebir gali, Inna maa aju wedede kun Sultan teena. 15Lakin Sultan ab kebir kutu Sultan wu uwo aarja fih beyy. Dukur uwo naadi Swahaba ashara dee ab uwo wedi noomon ssente. Uwo aju arfu fayyida ab ummon ligo. 16Labbi tee awlan jaa kelem noowo gali, Siddi tayi anaa soo fayyida tee ssente ashara fih wayyi ab itaa wedi naana” 17Sultan kelem noowo gali, “Jeedde kuweesi! Itaa labbi ab kuweesi. Itaa kaan tee hakki fih soo ab sakar, yaa anaa giruwa wedi neetaa weezo tee hukkum meddina ashara. 18Labbi tee tinen jaa kelem noowo gali, Siddi tayi anaa soo fayyida tee ssente kamsaa fih wayyi ab itaa wedi naana.” 19Sultan ggibisha uwo gali, “Anaa bi wedi neetaa weeza tee hukkum meddina kamsaa.” 20Dukur mee labbi tee talata jaa kelem noowo gali, “Siddi tayi ssente takki tee zaabu dee fih yaa dee. Anaa chunnga kuweesi fih nusu tee gumas.” 21Anaa soo jeedde kalam kaffu itaa. Kalam itaa ragi ab batal zaidi. Itaa ggi sulu ssente ab itaa maa yaa soo mee amrugu akil min shamba ab itaa maa yaa ajirra. 22Sultan ggibisha gali, “Anaa giruwa gata nee makosa fih kalama takki ab itaa wonus, itaa labbi ab hakari! Itaa feker fih hakki gali anaa ragi batal gali anaa ggi sulu ssente ab anaa maa yaa soo mee amrugu akil fih shamba ab anaa maa yaa ajirra. 23Fih jeedde, ley itaa maa kutu ssente tayi fih bakaan ab ggi kutu fogo ssente? Kaan itaa soo jeedde, kaan anaa bi aarja, anaa kaan bi ligo ssente tayi mee fayyida. 24Dukur Sultan kelem nee annas ab kaan yegif geeri, Sulu ssente tee zaabu dee min uwo kede itaa wedi nee labbi ab endis ssente tee zambi ashara.” 25Lakin labbiya dee kelem noowo gali, “Siddi teena, labbi dee kaala endis ssente tee zaabu ashara! 26Sultan ggibisha gali, anaa ggi kelem nee itakkum gali, Rabbana bi wedi milaan nee ajol tee hakki mee sokolinna milaan ab uwo endis, lakin ab tee hakki maa, mee siya ab uwo endis kuul bi sulu min uwo. 27Lakin tee aduuya tayi ab maa aju anaa kun Sultan, jibu kum ummon kede itakkum katul ummon gidaam anaa ini.”
Yesu dakal fih meddina tee Jerusalem jee Sultan.
(Matthew 21:1-11; Mark 11:1-11; Yokana 12:12-19)
28Badda wonus kalama dolde kuul, Yesu ruwa fih meddina tee Jerusalem, ligo uwo ggi Maasi gidaam Swahaba too. 29Wakati uwo geeri mee meddina Besufaage mee Besaniya karni, ab kaan fih safa tee gala tee zaitun, Yesu naadi Swahaba too tinini uwo kelem ummon gali. 30“Ruwa tokum fih karni ab fih gidaam itakkum. Kaan itaa rasul naa, itakkum bi ayinu nyereku punda ligo robutu, wu ligo lissa maa fih ajol ab duru fogo fikku kum uwo kede itakkum jibu naana. 31Kaan ajol yoyote asaadu itakkum ley tumm ggi fikku uwo gali, Siddu teena aju tummiya.” 32Yaa Swahaba ab Yesu jaa rasul gidaam ummon ruwa fih karni. Ummon ayinu killa sokol jee Yesu kelem noomon. 33Ligo ummon kaan ggi fikku nyereku punda dee. Siddu too asaadu ummon gali, “Ley itakkum ggi fikku dee.” 34Ummon ggibisha gali, “Siddu teena aju tummiya.” 35Yaa Swahaba dee jibu nyereku punda dee nee Yesu. Ummon kutu gumasa tomon fih daari dee. Dukur ummon awn Yesu fih geni fogo. 36Wakati Yesu ligo ggi toru farasi dee, annas afurus gumasa tomon fih sika gidaam Yesu fih hishima uwo. 37Wakati Yesu rasul fih bakaan ab sika kaan ggi serengeta geeri mee gala tee zaitun, yaa kom tee Swahaba dee kuul abidu wonus mee sauti foo mee furaayi ligo ummon ggi abdu Rabbana kalam majjab ab ummon ayinu ligo Yesu ggi soo. 38Ggi kelem, “baraka yaa uwo ab ggi jaa jee Sultan fih asmma tee Rabbana! Mee amaani kee kun fih ustu tee annas mee Rabbana fih samayi mee hishima kede aarja nee Rabbana fih samayi.” 39Lakin kubarina taanin tee diin ab naadi Farasin fih annas ab kelem nee Yesu, “Siddu, amrisha Swahaba takki kede seebu wonus kalama dolde!” 40Yesu ggibisha ummon gali, “Anaa ggi kelem nee itakkum gali kaan annas dolde seebu shukur mee sauti tee foo, dukur mee laagera bi abidu dugu kelele.”
41Wakati Yesu geeri kede rasul fih meddina tee Jerusalem uwo ayinu noowo, “Uwo abidu kore nee meddina dee mee annas too.” 42Uwo kelem gali, “Ohh Jerusalem, kaan-kaan annas takki arfu sokol ab ggi jibu amaani noomon! Lakin aseede itaa maa agddear faham.” 43“Kalam wakati ggi jaa tim ligo taabu jaa neetaa. Mee wakati dee, aduuya takki bi jaa abinu tuubu fih torof takki, ummon bi lifu itaa dukur ummon bi jaa amsuku itaa.” 44“Ummon bi jaa keregi meddina takkum mee katul annas. Ummon bi keregi juwa mee tuubu. Wedede bi soo kalam itakkum maa arfu zaaman ab Rabbana bi aarja fih ponyesha itakkum.”
Yesu fih Yeekalu
(Matthew 21:12-17; Mark 11:15-19; Yokana 2:12-25)
45Dukur Yesu dakal fih meddina tee Jerusalem uwo ruwa fih midani tee Yeekalu uwo abidu oturuju annas ab kaan ggi wuzza lamgaba mee sokolinna taanin tee sadaka. 46Yesu kelem noomon gali, “Jaa katif gali, juwa tee Rabbana Yeekalu bi kaan bakaan tee womba fogo! Lakin itakkum kun bakaan jaa tee haramiya!” 47Killa yom, Yesu ggi alim annas fih midani tee Yeekalu. Lakin kebir tee kahin mee malima tee sharia, mee kubarina taanin mee annas tee Yudaaya ligo ummon kaan ggi gussu nammna tee katul uwo. 48Lakin, ummon maa jaa feker fih nammna tee soo too, kalam annas kuul kaan ggi asmma uwo zidu.
Markert nå:
Lukka 19: KCN
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Nubi Bible by Beyond Translation is licensed under Creative Commons Attribution-ShareAlike 4.0 License.
