Lukka 18
18
1Badda naade, Yesu tummiya ijamajako fih alim Swahaba too fih womba bila fatarani. 2Dukur Yesu kelem noomon gali, “Kaan fih naa kebir tee sharia ab ggi geni fih, meddina wayyi uwo maa kaan ggi hishima Rabbana mee annas. 3Fih meddina wayyi dee, kaan fih mariya ab ragi too jaa muttu. Mariya wedede kaan ggi ruwa nee kebir tee sharia fih naku uwo fih gata seme kesi mee adduyi too. 4Kebir tee sharia dee sulu mudda towwhil bila awn mariya dee. Lakin fih mwisho, uwo kelem gali salakun anaa maa ggi hishima Rabbana mee annas 5Lakin kalam mariya dee taban anaa zaidi, yaa anaa endis tee gata kesi too addil. Kalam kede uwo maa aarja marri taanin fih taban anaa.” 6Min naa, siddi teena Yesu kelem nee ummon gali, “Asmma kum sokol ab kebir tee sharia ab tee hakki maa dee jee ggi kelem. 7Kaan ajol ab ggi soh zambi kaan awn ajol, saade itakkum maa ggi feker gali Rabbana bijja wedi noomon izabu ab addil nee annas ab uwo nigitu womba min nahari fileli? Uwo maa bi tolu awn ummon. 8Anaa ggi kelem nee itakkum gali uwo bijja gata kesi dee addil gwaam. Lakin kaan nyereku tee binadum aarja fih duniya, seyi uwo bi ligo annas fih duniya ab ggi amin noowo.”
9Badda naade, Yesu kelem ijamajako taani nee annas ab kaan fih-fih kom, asmma uwo. Annas dolde arfu jaa ummon kaan tee hakki. Yaa ummon ayinu falaata fih killa ajol. 10Yaa Yesu kelem noomon gali, “Rujala tinini Farasin mee ajol tee lim musoro ummon ruwa fih Yeekalu fih womba nee Rabbana fih Jerusalem.” 11Dukur yaa nas Farasin gum foo uwo abidu womba ligo uwo ggi wonus fogo siddu gali, “Anna ggi shukur Rabbana kalam Anna maa endis zambi jee rujala taanin. Anaa maa harami, maa tee hakki anaa maa ggi soh zina mee maa fih jaa ragi ab ggi lim musoro dee. 12Anaa sayim yom tinini fih jaa weeki wu anaa wedi ashara fih nusu tee sokolin tayi. 13Lakin ajol tee lim musoro dee yegif boyyi ligo uwo maa agddear fata enna too ayinu fih samayi fih womba. Lakin ligo uwo kaan ggi dugu dusu too mee idda ligo uwo ggi weeri singa too ligo uwo ggi kelem. Rabbana ayinu neena huruma kalam anaa ggi soh zambi.” 14Anaa ggi kelem nee itakkum gali, “ragi ab ggi lim musoro dee ruwa fih beyy ligo Rabbana sama zambi too, lakin farasi maa sama zambi too. Kalam wedede inna arfu gali kaan ajol hishima mowo siddu, bi hishima mowo kaman.”
Rabbana wedi baraka nee yaala
(Matthew 19:13-15; Mark 10:13-16)
15Yom wayyi, wazazi taanin jibu yaala too nee Yesu gali uwo agddear alim ummon mee wedi noomon baraka. Lakin bakan Swahaba too ayinu noowo, ummon atakku ummon. 16Lakin Yesu naadi yaala noowo, uwo kelem nee Swahaba, “Matakkum aba yaala dee jaa nee anaa! Nee mamlaka tee Rabbana fih nee annas ab fih jee ummon yaala. 17Fih jeedde, anaa ggi kelem nee itakkum gali, kaan ajol yoyote bi amin itakkum maa mee rudu mamlaka tee Rabbana jee nyereku ggi soh, uwo maa bijja jaa fih mamlaka tee Rabbana.”
Yesu ggi kelem nee tajir ab sakal ab ggi hukum
(Matthew 19:16-22; Mark 10:17-22)
18Kaan fih naa kebir tee nas Yudaaya ab asaadu Yesu gali, “siddu itaa ajol kuweesi, sunu yaa kede anaa soh ligo hayyi ab ggi kalas maa?” 19Yesu kelem noowo gali, “Ley itaa ggi kelem gali kelem gali anaa ajol kuweesi, mafih ajol ab kuweesi illa Rabbana. 20Itaa arfu sharia tee Rabbana gali, Mata soh zina, matta katul ajol yoyote, matta serregu sokol yoyote, matta kabas fih annas taanin. Hishima Babba takki mee mamma takki.” 21Ragi dee kelem nee Yesu gali, “Anaa leyin sharia dee kuul min ligo anaa lissa nyereku.” 22Waakati Yesu asmma dolde, uwo kelem noowo gali, “Lissa fih sokol wayyi taani ab anaa aju soh, tunda killa sokol ab itaa endis. Dukur ssente kede itaa wedi nee miskiinin. Kaan itaa bi soh jeedde, Rabbana bi wedi neetaa utajiri fih samayi dukur taali kede itaa faatiya uwo.” 23Waakati Yesu asmma kalama dolde, singa soh ragi dee kalam uwo kaan-kaan tajir zaidi mee uwo kaan aju maa tunda sokolinna too.
Mee Rabbana killa sokol agddear uwo
(Matthew 19:23-30; Mark 10:23-31)
24Dukur Yesu ayinu uwo okelem nee Swahaba too mee annas ab kaan fih gali, “Maa rayisi nee annas ab tajirin dakal fih mamlaka tee Rabbana. 25Rayisi zaidi nee ngamiya futu fih lufura tee libbira shinda ragi ab tajir dakal fih mamlaka tee Rabbana.” 26Waakati annas asmma kalama ab Yesu kelem gali, “Bi ponyesha fih ajol?” 27Dukur Yesu kelem momon gali, “Rabbana ggi soh sokol ab annas maa agddear soh.” 28Dukur Pita asaadu Yesu gali, “Kumbuka inna seebu killa sokol ab inna kaan endis kalam kede inna faatiya itaa jaa Swahaba takki.” 29Yesu ggibisha ligo oggi kelem gali, “killa ajol ab seebu beyy too waala mariya too, akwaana weele, akwaana baana, waazazi, yaala too fih kalam tee mamlaka tee Rabbana. 30Uwo bi ligo sokolinna dee kuul marri milaan ini fih hayyi tee duniya mee fih samayi uwo bi ligo hayyi ab ggi kalas maa.”
Yesu wonus muttu too
(Matthew 20:17-19; Mark 10:32-34)
31Badda wedede, Yesu sulu Swahaba itinashar dee min annas dukur uwo kelem noomon gali, “Asmma! Inna ggi ruwa fih meddina tee Jerusalem saade. Kaan inna fih naa, nyereku tee binadum bijja fih addil jee Nebbiya ab jaa katif. 32Annas bi wedi uwo nee annas ab maa tee Yudaaya bi alis uwo, bi sitim uwo, bi tobu fogo bijja, mee dukur uwo, dukur kaman bi katul uwo. 33Lakin fih yom tee talata badda muttu too, uwo bijja aarja fih hayyi.” 34Swahaba dee maa jaa faham sunu yaa Yesu kaan ggi wonus fogo. Ummon faham maa nammna tee kalam dee, kalam maana tee kalama dee kaan dusu min ummon.
Yesu ponyesha amyaan
(Matthew 20:29-34; Mark 10:46-52)
35Waakati Yesu mee Swahaba too jaa geeri fih meddina tee Jeriko, ragi ab amyaan kaan geni fih torof sika ligo uwo ggi asaadu ssente nee annas. 36Waakati Ragi ab amyaan dee asmma sauti tee annas ab ggi futu jabu uwo, uwo asaadu annas ab kaan fih jabu uwo gali, “sunu yaa ggi sowo?” 37Annas taanin ggibisha uwo gali, “fih ragi asmma too Yesu uwo taala fih meddina tee Nazaresi yaa ggi futu.” 38Waakati amyaan dee asmma kalama dee, uwo wonus mee sauti tee foo gali, “Yesu nyereku tee Daudi, ayinu huruma tayi!” 39Ummon ab kaan fih gidaam Yesu wonus mee sauti tee foo gali kede uwo askutu. Lakin uwo wonus mee sauti tee foo shinda tee awlan, “Yesu nyereku tee Daudi ayinu huruma tayi!” 40Bakaan Yesu asmma kalam dolde, uwo yegif uwo kelem nee ummon kede ragi dee noowo bakaan ragi dee jaa geeri, Yesu asaadu uwo gali, 41“Sunu yaa itaa aju anaa kede soh neetaa?” Ragi ab amyaan dee ggibisha gali, “Siddi tayi anaa aju ayinu maara taani.” 42Yesu dukur kelem noowo gali, “Aarja ayinu mara taani! Amin takki naana ponyesha itaa min amyaan takki.” 43Fih gwaam zaidi ragi dee aarja ayinu mara taani, oruwa wara Yesu ligo uwo ggi shukur nee Rabbana ummon kuul ab jaa ayinu ummon shukur nee Rabbana.
Markert nå:
Lukka 18: KCN
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Nubi Bible by Beyond Translation is licensed under Creative Commons Attribution-ShareAlike 4.0 License.
