Lukka 11
11
Yesu ggi alim womba
(Matthew 6:9-15)
1Yom wayyi ligo Yesu kaan ggi womba fih bakaan wayyi, badda uwo womba wayyi min Swahaba too asaadu uwo, “Malima, alim inna nammna tee womba, jee Yokana ab tee batiza alim mee Swahaba too.”
2Ini yaa Yesu kelem nee Swahaba too, “kaan itakkum ggi womba, womba kum jeedde, Babba teena kede asmma takki kun mee hishima. Mamlaka takki kee jaa.
3Wedi nee inna akil ab inna aju killa yom.
4Sama inna zambi teena jee inna sama ummon ab gihso zambi nee inna. Lakin chunnga inna min soh zambi.”
5Dukur Yesu kelem noomon ijamajako weede; “kaan itaa endis sabi, dukur itaa ruwa fih juwa too fih ustu fileli, dukur itaa asaadu noowo! Sabi tayi, seyi itaa agddear wedi naana sokol tee akul? 6Kalam sabi tayi jaa fih juwa tayi, ligo anaa maa faham jaa too min safari lakin anaa maa endis akil tee wedi noowo.”
7Kaan sabi takki jibisha fih juwa, “matta asaadu anaa gum foo kalam anaa mee yaala tayi kalas ruwa fih num. Aseede anaa maa agddear gum foo kede anaa wedi nee itaa sokol yoyote saade. 8Dukur Yesu kelem, anaa ggi kelem nee itaa gali uwo maa agddear gum foo fih wedi nee itaa akil kalam itaa sabi too. Lakin kaan uwo leseggu fih dugu babbu, uwo bi gum dukur kee wedi nee itaa akil fih milaan jee itaa aju.”
Asaadu, gussu, dukur dugu babbu
(Matthew 7:7-11)
9Yaa fih jeedde anaa ggi kelem nee itakkum, “Asaadu dukur Rabbana bijja wedi nee itaa, gussu dukur Rabbana bi kutu itaa bi loggo, dukur dugu babbu Rabbana bijja fata nee itaa. 10Kalam killa ajol ab ggi asaadu ggi wedi noowo, killa ajol ab ggi gussu ggi loggo mee killa ab ggi dugu babbu, babbu bijja kun fadi nee uwo.
11Kaan wayyi min nyereku takki asaadu fih samaga kede uwo akul, Babba ab yatu min itakkum ab bijja weede noowo debiba badul tee samaga? 12Munu min itakkum ab agddear wedi nee nyereku too agrab okaan bijja asaadu noowo mayayi? 13Yaa fih jeedde kaan itakkum annas tee soh batal itakkum ggi wedi sokolinna ab kuweesin nee yaala takkum. Babba takkum ab fih-fih samayi oma agddear zaidi wedi nee itakkum Roho abnedif nee annas ab ggi asaadu nee uwo.”
Yesu ggi turuju roho ab batal mee guddrra tee Rabbana.
(Matthew 12:22-30; Mark 3:22-27)
14Yom wayyi Yesu turuju roho albatal fih ragi wayyi ab kaan maa ggi wonus. Badda roho batal dee taala min uwo, kaan abidu wonus annas milaan ab kaan fih inna ummon kuul hairru. 15Lakin annas ab kaan fih-fih kom ummon wonus badum tomon gali, “Yesu kaan ggi tummiya guddrra tee kebir tee roho albatal fih turuju boyyi roho albatal min annas.”
16Annas taanin asaadu noowo weri noomon alama ab taala fih samayi kee weri gali Rabbana yaa rasul uwo.
17Lakin Yesu faham sunu yaa kaan ummon feker fogo uwo. Dukur okelem noomon, “kaan Sultan mee annas tee mamlaka wayyi abidu dusman badum tomon, ummon bijja keregi. Jee nammna wayyi, kaan beyy fereteku badum tomon bi keregi. 18Fih nammna wayyi dee, kaan sitan mee roho albatal fih mamlaka tomon gesim badum mee dusman badum tomon, mamlaka dee bijja keregi. Anaa ggi kelem wedede kalam itakkum ggi kelem gali sitan yaa wedi nee anaa guddrra tee turuju roho albatal min annas.
19Kaan kalama ab itakkum ggi kelem dee yaa ab addil, yaala takkum ggi turuju sitan fih guddrra tee munu? Tasil, mee wezzo tee Rabbana. Yaa fih jeedde annas bijja gata nee itakkum kesi wu kaman bijja shinda itakkum. 20Lakin kaan anaa turuju roho albatal mee guddrra tee Rabbana, dukur wedede ggi weri gali mamlaka tee Rabbana jaa nee itakkum.
21Yesu dukur wedi noomon muffano weede, Kaan ragi ab tee guddrra ligo offih tayari mee sokolinna tee dusman too ligo uwo ggi chunnga juwa too, sokolin ab too ligo fih seme. 22Lakin kaan fih inna ajol ab tee guddrra sinda uwo, jaa fih dusman mee uwo, uwo bi jaa sulu sokolinna too tee dusman dee kuul ab kaan uwo ggi amin dukur kee uwo wedi nee sabiyana too.
23Killa ajol ab mafih mee anaa, uwo yaa adduyi tayi mee killa ajol ab maa ggi soh kazi mee anaa, uwo ggi soh mee adduyi takki.”
Aarja tee roho albatal
(Matthew 12:43-45)
24Dukur Yesu zidu kelem gali, “kaan roho albatal taala min ajol, oggiruwa fih bakaan ab pengele kee geni naa fogo. Lakin kaan uwo maa loggo bakaan tee geni fogo dukur uwo bi kelem gali anaa bi aarja nee ajol ab anaa kaan taala fogo. 25Dukur kaan uwo aarja fih ajol ab uwo taala fogo awlan, dukur uwo loggo maa fih sokol fogo, ajol dee fih jee juwa ab akunus abnedif 26Dukur roho ab albatal dee ggi ruwa jibu roho albatal taanin saba kee jaa geni fih juwa dukur hayyi tee ajol dee bijja kun batal zaidi shinda tee awlan.”
Chunnga kalama tee Rabbana
27Ligo Yesu lissa ggi alim weede, kaan fih mariya wayyi min kom tee annas uwo wonus gali, “endis baraka mariya ab weledu itaa, mee sudur ab jaa rabba itaa tee baraka.”
28Ini yaa Yesu ggibisha uwo ligo uwo ggi kelem gali, “Rabbana ggi wedi baraka nee annas ab ggi asmma kalama too mee ummon ab ggi leyin noowo.”
Alama tee Nebbi Yona
(Matthew 12:38-42)
29Waakati annas zidu jaa milaan bakaan Yesu kaan fih fogo, uwo kelem nee ummon gali, “annas tee waakati weede itakkum batal zaidi kalam itakkum aju kee weri nee itakkum alama gali Rabbana yaa rasul anaa lakin baara ab itakkum bi jaa ayinu yaa jee sokol ab saa soh nee Nebbi Yona zaaman. 30Jee nammna ab Nebbi Yona weri noomon alama nee annas ab ggi geni fih meddina tee Nineve ab Rabbana rasul uwo fogo. Kaman anaa nyereku tee binadum anaa bi jaa weri nee annas tee waakati wedede jee Rabbana yaa rasul anaa. 31Fih waakati tee kiyyama, Sultan ab mariya tee Bele tee idda yomin tee Israel uwo bijja gum foo bakaan wayyi mee annas tee waakati weede mee kaman uwo bijja gata noomon tee soh zambi. Kalam uwo taala fih Bele tee boyyi fih jaa asmma kalama tee agil ab Solomon jaa wonus. Dukur anaa aju kelem nee itakkum gali uwo ab ggi shinda Solomon fih ini nee itakkum lakin itakkum aba asmma kalama too. 32Kaman fih yom tee kiyyama, annas tee Nineve ummon kaman bijja yegif mee annas tee waakati weede, ummon bijja gata kesi tee annas tee waakati weede fih soh zambi. Kalam annas tee Nineve sibbu zambi bakaan Nebbi Yona alim. Dukur anaa ggi kelem nee itakkum gali, fih ajol ab tee guddrra sinda Yona ini lakin itakkum aba sibbu zambi takkum.”
Taa tee gildu
(Matthew 6:22,23)
33Dukur Yesu kelem, “maa fih ajol ab ggi waala taa dukur uwo kati taa dee gufo, lakin uwo kutu taa dee fih bakaan ab killa ajol ab ggi dakal fih juwa dee kee taa nooru noowo. 34Enna tee ajol fih jee taa ab ggi waala, lakin kaan ajol agddear ayinu kuweesi dukur gildu too kuul bi jaa amla nooru tee hakki. Lakin kaan ajol maa agddear ayinu kuweesi, dukur gildu too kuul bi amla mee duluma. 35Fih jeedde, Matakkum sibbu nooru ab fih-fih itakkum jaa duluma. 36Yaa fih jeedde, kaan gildu takkum amla mee nooru, mee ligo endis maa duluma, dukur itakkum bi kun mara wayyi fih nooru, jee nammna ab taa ggi waala nee itakkum mee nooru too.”
37Waakati Yesu kalas wonus, annas Farasin wayyi karibisha uwo kede uwo ruwa akul akil mowo fih beyy too. Dukur Yesu ruwa fih juwa, uwo geni falaata fih akul. 38Lakin annas Farasin ab jaa karibisha uwo hairru zaidi ayinu Yesu ligo ggi akul bila kasuru idda too.
39Ini yaa siddu teena kelem noowo gali, “itakkum nas Farasin itakkum fih jee annas ab ggi kasuru min baara tee kubaya mee saani lakin itakkum ggi sibbu waskan minjuwa. Jee nammna itakkum ggi beenu addil nee annas lakin minjuwa gelbba takkum amla mee tama mee batal. 40Itakkum annas ab awirin, itakkum arfu maa gali Rabbana ab karagu gildu kaman yaa karagu gelbba takkum? 41Yaa fih jeedde Matakkum kun mee tama mee batal, lakin gesim kum min gelbba takkum nee annas ab miskiinin dukur ini yaa itakkum bijja kun abnedif gidaam Rabbana takkum.
42Bijja kun batal nee itakkum nas Farasin, kalam itakkum ggi wedi wayyi fih ashara fih killa sokol ab itakkum ggi loggo jee akil, reeha mee killa gesi tee shamba. Lakin itakkum maa jaa feker soh seme nee annas taanin mee aju Rabbana takkum. Chunnga itakkum fih soh sokolin tee mmana mee soh sokolinna ab duga.
43Dukur bijja kun batal nee itakkum Farasin kalam itakkum aju zaidi geni fih bambara ab tee hishima fih Sinagoga wu kaman itakkum aju zaidi kede annas selem itakkum fih bakaan tee sulu.
44Dukur bijja kun batal nee itakkum Farasin, kalam itakkum ggi beenu jee tura ab maggi beenu ab annas masi fogo lakin ummon maa arfu sunu yaa fogo minjuwa.”
45Ini yaa wayyi min annas tee tafsir sharia tee Musa kelem nee Yesu gali, “Malim kaan itaa bi wonus kalama jee dolde fih Farasin, itaa ggi sitim inna kaman.”
46Yesu ggibisha gali, “bijja kun batal nee itakkum kaman malima tee sharia tee Musa kalam ggi kutu annas kee arfa sharia tee diin ab tegil, lakin itakkum kaman agddear maa leyin lada sharia wayyi.
47Dukur bijja kun batal nee itakkum malima tee sharia tee Musa, kalam itakkum ggi abinu nee Nebbiya bakaan makumbusho ligo nas jidi takkum yaa jaa katul Nebbiya dolde. 48Fih soh jeedde, itakkum ggi rudu mee sokolin ab jidijidi takkum jaa soh, ummon jaa katul Nebbiya lakin itakkum ggi abinu ummon makumbusho. 49Fih jeedde, Rabbana fih agil too kelem nee itakkum gali, anaa bijja rasul nee itakkum Nebbiya mee mursalin nee annas tee Israel, taanin bijja katul mee taanin bijja izabu. 50Yaa fih jeedde annas tee waakati weede, Rabbana bijja izabu itakkum kalam muttu tee Nebbiya kuul ab nas jidijidi takkum jaa katul fih abidu tee duniya weede. 51Weede ggi sulu Nebbiya kuul, abidu mee Nebbi Abel, uwo jidi-jidi takkum jaa katul ladi nee Nebbi Zakariya, ab jaa katul uwo fih ustu tee ludaaya mee tee Yeekalu. Mee annas tee waakati weede, Rabbana bijja izabu itakkum kalam muttu tee annas dolde.
52Bijja kun batal nee itakkum malima tee sharia tee Musa kalam itakkum ligo mafta tee agil tee arfu Rabbana lakin itakkum siddu aba dakal mee kaman itakkum aba annas taanin kede dakal.”
53Bakaan Yesu kalas wonus, Farasin mee malima tee sharia tee Musa ummon kaan jarani zaidi dukur ummon abidu asaadu uwo maswali milaan ab gowu bila amla safa. 54Ligo ummon kaan ggi gussu kee uwo wonus kalama yoyote ab ggi kutu kee amsuku uwo.
Markert nå:
Lukka 11: KCN
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Nubi Bible by Beyond Translation is licensed under Creative Commons Attribution-ShareAlike 4.0 License.
