Lukka 10
10
Yesu lasulu Swahaba tinen wu sebeyin.
1Baada kalama dole siddi Yesu nigitu Swahaba tinen wu sebeyin dukur uwo kelem noomon kede ummon ruwa fih kom tinen kee ummon ruwa fih killa meddina mee killa ab uwo siddu kaan aju ruwa fogo fih misho. 2Dukur kabbla Yesu rasul ummon okelem noomon gali, “Annas milaan kalas aju amin anaa, lakin mafih anaa milaan tee kelem noomon kabar ab kuweesi. Ummon fih jee shamba ab kebir tee akil ab tim tee amrugu lakin ligo labbiya siya fih amrugu akil min shamba dee. Yaa womba kum nee Rabbana ab siddi tee amrugu akil kee liju annas milaan kee lim fih shamba. 3Ruwa takkum, lakin chunnga kalam anaa ggi rasul itakkum fih annas albatal zaidi. Itakkum bi kun jee nyereku kooru fih lamgaba albatal zaidi. 4Matta kum arfa ssente yoyote amaa bagi tee safari, sala gezma taani, matta kum kalas zaaman fih selem annas fih sika ligo itakkum ggi ruwa.
5Killa juwa ab itakkum bi dakal fogo. Wedi kum amaani fih beyy dee ligo itakkum ggi kelem gali, Kee Rabbana wedi baraka nee killa ajol ab fih-fih juwa dee. 6Kaan ajol wayyi minjuwa aju raha mee baraka tee amaani bi fadi fogo. Lakin kaan mafih ajol ab aju amaani, baraka takki tee raha bi aarja nee itaa. 7Matakkum ruwa beyy fih beyy lakin geni kum fih bakaan wayyi akul kum mee asurub kum killa sokol ab ggi wedi nee itakkum kalam killa labbi faa mee mushara too.
8Wu killa kaan itaa ruwa fih meddina dukur mee annas tee meddina dee karibisha itakkum, akul kum killa sokol ab wedi nee itakkum. 9Ponyesha kum annas ab ayanin kuul ab fih-fih meddina dee dukur kelem kum nee ummon gali, mamlaka tee jee geeri nee itakkum.” 10Lakin kaan itakkum dakul fih meddina yoyote dukur annas tee meddina dee karibisha itakkum maa ruwa kum fih sika bakaan ab fogo annas milaan ab ggi asmma itakkum dukur kelem noomon. 11Inna ggi akunus vumbi tee meddina takkum ab leseggu fih kura teena jee shahidi gali Rabbana izabu itakkum. Lakin lissa, inna aju itakkum kee arfu jee maa mamlaka tee Rabbana jee geeri nee itakkum. 12Wakati uwo kalas weeri noomon sokol tee soh, Yesu wonus gali, “anaa ggi hakikisha itakkum gali kaan Rabbana bi azibb killa wayyi fih yom tee kiyyama, uwo bi azibb annas tee meddina naade zaidi shinda annas tee zaaman albatal fih meddina tee Sodom”
13“Ligo badum mee itaa kalazin mee itaa Besusaida! Kalam kalama tee majjab ab jaa soh fugu itakkum Sidon mee Tulo annas tee bakaana dee ligo ummon taya gwaam. Ligo ummon lebisi gumasa ab gedim dukur ummon geni fih ruuman weeri singa fih zambi tomon. 14Lakin fih yom ab Rabbana ruwa azibb killa wayyi, uwo bi azibb annas tee meddina tee kalazin mee Besusaida zaidi shinda annas tee Tulo mee Sidon. 15Dukur itakkum, annas tee meddina tee Kaperenawum, seyi itakkum bi ligo hishima ab tee foo zaidi fih samayi? Ata, Rabbana bi kutu kee jadda itakkum falaata fih bakaan tee dofun fogo annas.
16Yaa marri taani Yesu kelem nee Swahaba too gali. Ajol ab ggi rudu mee kabar takkum bi rudu anaa, mee ajol ab ggi aba itakkum bi aba anaa. Mee ajol ab ggi aba anaa, uwo bi aba Rabbana ab rasul anaa.”
Swahaba tinen wu sebeyin aarja mee furaayi.
17Ini yaa Swahaba tinen wu sebeyin wakati ummon aarja min safari, ummon furaayi mee killa sokol ab jaa soh dukur ummon kelem nee Yesu gali, “Siddi teena ladi roho albatal kaman leyin nee inna wakati inna tummiya wezzo takki mee asmma takki fih amrisha ummon kee seebu annas.”
18Yesu kelem noomon gali, “Bakaan albatal leyin nee itakkum, anaa ayinu sitan ligo ggi wagga min samayi jee saga. 19Ayinu, anaa wedi nee itakkum wezzo tee masi fih debiba mee agrab. Mee shinda guddrra kuul tee adduyi, sitan. Wu mafih sokol ab ggi soh itakkum batal. 20Lakin Matakkum furaayi kalam roho albatal leyin itakkum. Lakin furaayi kum kalam Rabbana katif asmma takkum fih kitabu too fih samayi.”
Yesu furaayi fih roho.
21Fih sawa wayyi dee, Yesu amla mee furaayi ab tala min Roho abnedif dukur uwo kelem, “Ooh, Babba tayi, Itaa yaa siddu tee killa sokol fih samayi mee duniya. Anaa ggi shukur itaa kalam itaa weeri wedede nee annas ab fih jee yaala ab duga. Lakin itaa maa weeri ummon nee annas ab neegi mee annas ab agara zaidi. Babba, fih hakki itaa soh wedede, kalam ggi furayisha itaa.”
22Dukur Yesu kelem nee annas, “Babba tayi wedi nee anaa wezzo fih killa sokol. Mafih ajol ab arfu nyereku mina arfu Babba too, mee mafih ajol ab arfu Babba mina arfu nyereku too mee ummon ab nyereku nigitu.”
23Ini yaa Yesu agilibu uwo dukur uwo wonus mee Swahaba too baara fih siri dukur uwo kelem gali, “Rabbana wedi nee itakkum kuul baraka fih ayinu sokolin dee kuul.” 24Yaa anaa ggi kelem nee itakkum gali, “Nebbiya mee Sultana milaan ab fih min zaaman, ummon kaman aju ayinu sunu ab itakkum ggi ayinu mee asmma, lakin ummon maa ayinu mee asmma.”
Ijamajako tee Samaliya ab seme.
25Yom wayyi ligo Yesu ggi alim, malima tee sharia jaa uwo dukur uwo asaadu Yesu maswali fih jarrib uwo. Dukur uwo asaadu, “malima, sunu yaa anaa bi soh kee Rabbana wedi nee anaa hayyi ab ggi kalas maa”
26Yesu asaadu uwo gali, “Sunu yaa Musa jaa katif fih sharia ab ggi amsuku fih weede? Sunu yaa itaa faham fih dole.”
27Malima tee sharia dee jibisha, “Sharia dee ggi kelem kaan itakkum endis tee aju siddi Rabbana takkum mee gelbba takkum kuul, mee roho takkum kuul, mee agil takkum kuul. Dukur itakkum endis tee aju jiran takkum jee itakkum siddu.”
28Yesu kelem gali, “itaa wedi majib ab addil. Yaala soh jeede, Rabbana bi wedi neetaa hayyi ab maa ggi kalas.”
29Lakin ragi dee kaan aju beenu addil, yaa uwo asaadu Yesu, “munu yaa jiran tayi.”
30Yesu ggibisha fih ijamajako ligo uwo ggi kelem gali, “Kaan fih naa ragi ab kaan ruwa fih safari fih meddina kebir tee Jerusalem mee fih meddina tee Jeriko. Fih sika, haramiya jaa noowo dukur sulu killa sokol ab uwo kaan endis ladi mee gumasa too. Dugu uwo ladi geeri kee uwo muttu dukur ummon jarre. 31Fih misho, kahin tee Yudaaya ligo uwo ggi ruwa fih Jeriko fih sika wayyi dee, lakin bakaan uwo ayinu ragi ab kaan endis dabara ligo uwo num fih siko, uwo futu fuu ragi dee fih safa taani tee sika dee. 32Fih sika wayyi dee, ragi ab kaan labbi tee Yeekalu tee kabila tee Levi ligo ggi ruwa fih sika wayyi dee. Uwo ayinu ragi ligo num fih toruf sika lakin uwo futu fih ragi dee. 33Fih misho ragi wayyi min karni tee Samaliya jaa yaa fih sika wayyi dee bakaan ab kaan ragi dee num fogo. Bakaan uwo ayinu ragi tee dabara dee, gelbba too amla mee huruma. 34Uwo ruwa geeri mee ragi dee dukur uwo nedif dabara dee ligo uwo ggi-ggi kub fogo merisa mee dikin dukur uwo robutu dabara dee mee dulugan. Dukur uwo kutu ragi fih punda too uwo sulu uwo fih juwa too tee diffaana zidu chunnga uwo.” 35Wakati latta saba, ligo ragi mu Samaliya dee lissa maa tala minjuwa tee diffaana, uwo lippa labbi tee juwa dee mushara tee yom tinen dukur uwo kelem uwo gali, “Chunnga ragi dee kaan itaa tummiya ssente milaan anaa bijja lippa itaa”
36Dukur Yesu asaadu malima tee sharia gali, “sunu yaa itaa ggi feker? Fih rujala talata dee ab ayinu ragi ab haramiya dugu, munu yaa kaan jiran too ab kuweesi?” 37Malima tee sharia ggi bishna gali, “uwo ab weri noowo huruma. Yesu kelem noowo gali, Itaa kaman endis tee soh seme nee annas fih nammna wayyi dee.”
Mariyam nee Mariza
38Jee Yesu mee Swahaba too ligo ummon lissa ggi masi fih sika, ummon dakal fih karni. Kaan fih naa mariya asmma too Mariza karibisha ummon fih juwa too. 39Mee Mariza kaan endis aku too asmma too Mariyam. Dukur Mariyam geni falaata geeri mee kura tee siddu teena Yesu uwo abidu asmma alim Too. 40Lakin Mariza kaan kaffu mee kazi tee juwa ab uwo kaan endis too, yaa uwo ruwa nee Yesu dukur uwo kelem, “siddu, tayi, aku tayi maa ggi awn anaa mee kazi. Kelem uwo kee uwo jaa awn anaa!”
41Lakin siddu teena Yesu kelem noowo gali, “Mariza, itaa endis kuwaf foo sokolinna milaan. 42Lakin sokol wayyi yaa kaan tee mmana dukur Mariyam nigitu soo too. Mafih ajol yoyote ab kee sulu min uwo.”
Markert nå:
Lukka 10: KCN
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Nubi Bible by Beyond Translation is licensed under Creative Commons Attribution-ShareAlike 4.0 License.
