نامَه عِبرانِنیا 9
9
جَی مکدّس زِمِنی
1اَلَه حتی عهد اوّل، کانونِی اَسِی پرستش اُشهاد و لِی زِمی هم یَک جَی مکدّس اُشهاد. 2اَسِی که چادری زادَ بُستاد که تِی کِسمت اوّلُش، چراغدو، میز، و نُنِ تَکدیس بُدَ هاد، اِ جَهوا ’جَی مکدّس‘ شواَگُت. 3کِسمت دوّم، پشت پرده دوّم هاد، که شُن آنا ’مکدّس ترین جا‘ اَگُت؛ 4تِی اِ کِسمتا، بُخور سوزی از طِلا هاد و صندوک عهد که از هر طرف وَ طِلا پوشِدَ بُستاد. تِک اِ صندوکا، کوزهای از طِلا که ’نُنِ مَنّا‘ شُ تِک نگهداری اَبو و عصای هارون کاهِن که شکوفَه اُشزادِستاد، و لوحِی سنگِنِ عهد، هاد. 5بَرَئِه صندوک، فرشتَهئِی کِروبِنِ ’جلال‘ شُن لِی تخت رحمت سایَه بِستِستاد. اَلَه مُناشابِه دربارَهِ ریز وَ ریز اِ چِییَهوا حرف بِزنِم. 6وَختی که اِ چِییَهوا وَ اِ صورتا مرتب بُدِ، کاهِنیا دائِم اُ کِسمت اوّل جا اَچِدِت تا وظیفَهیّاشو اَنجوم هاتِت. 7ولی اُ کِسمت دوّم فَکَط گَپترین کاهِن جا اَچِه، آنا هم فَکَط سالی یَک دَفَه، و اُمرَهِ خوش خون کُربونی اَبَه تا اَسِی خوش و اَسِی گناهِی که کوم نِدانِستَه اَنجوم شُدَدِستاد، تَکدیم بِکو. 8اینایی روح کدّوس خدا نِشو اَدَ که، تا زَمونی که کِسمت اوّل هَنو پابَرجائِه، مِ رَهی که اُ تِک مکدّس ترین جا اَچِه، هَنو واز آنِبُدِ. 9اِ یَک نِشونَهایه اَسِی دُورَه زَمونَه آلَه، طِبک اِ ترتیبا هَدیَهیّا و کُربونِنِی تَکدیم اَبِت که شُناشابِه وجدان کسی که پرستش اَکوئا کامل پاک آکنِت، 10بلکه آنایا فَکَط وَ خَردَ و آخَردَ و غُسلِی مَ رَکَمی سَر و کار شُهَه. کانونِی اَسِی بَدن که فَکَط تا شروع ترتیب تازَهای که خدا اَدَ، اعتبار شُهَه.
آزادی اُ واسطَهِ خون مسیح
11ولی وَختی که مسیح تِی مَکام گَپترین کاهِنِ چِییَی خَشی که آلَه اتفاک اُفتَدِ، ظاهر بو، آنا اُ چادر گاتتَه و کاملتَهای جا چو که وَ دست آدام نَک نِبُدِ، یعنی از اِ خلکتا نی. 12آنا یَک دَفَه اَسِی همیشَه اُ تِک مکدّس ترین جا چو، نِه اُ وسیلَه خون پَهیا و گوسالهیّا، بلکه وَ خون خوش، و اینایی آزادی اَبَدیا آمادَه اُشکِه. 13اَسِی که اَگَه خون پَهیا و گاوِی نار وَ پاشِدَهِ لاگِ گوسالَه مَدَه لِی آنایاکِه نجسِت، تَکدیسشو اَکو تا جسماً پاک آبِت، 14چاد بِشتَه، خون مسیح که اُ واسطَهِ روح اَبَدی، اُ خوش بیعیب شُ خدا تَکدیم کِه، وجدان اَمائا از کَرِی بی فایدَه پاک اَدَکو تا خدای زندَهئا خدمت بِکنِم! 15پَ مسیح واسطَهِ یَک عهد جدیدِه، تا کسِی که دعوت بُستِت، مِ میراث اَبَدِنا که وعدَهاش دَدَ بُدِ اُ دست بیارِت، اَسِی که مرگی اتفاک اُفتَدِ که آنایائا، از خطائِی که تِی عهد اوّل اَنجوم بُدِ، آزاد اَکو. 16اَسِی که زَمونی اَبِه یَک وصیّتا اجرا بِکنِش، که ثابت بِبِه کسی که وصیّت اُشکِردِ مُردِه، 17اَسِی که وصیّت فَکَط بعد از مرگِه که اَبِه اجرا بِکنِش، اَسِی که تا زَمونی که وصیّت کنندَه زندَئِه، نابِه اجرا بِکنِش. 18پَ حتی عهد اوّل هم بدون خون، بَرکَرار نِبو. 19اَسِی که مِ موکَوا که موسی پیغامبر هَمَهِ حُکمِی شریعتا شُ هَمَهِ کوم اعلام کِه، آنا خون گوسالهیّا و پَهیا شاسِه خاد هُو و پشم سرخ و شاخَهئِی زوفا، هم لِی خودِ طومار و هم لِی هَمَهِ کوم اُشپاشِنَه 20و اُشگُت: «اِئِه خون مِ عهدی که خدا شُ شما حُکم کِه.» 21و هَمینا هم مِ خونا، هم لِی چادر و هم لِی تَموم ظرفِی که تِی پرستش استفادَه اَبو، اُشپاشِنَه. 22در اصل طِبک شریعت، تقریبا مَچی وَ خون پاک اَدَبِه و بدون لِتَئِه خون، بَخشش از گناهیا نی. 23پَ لازم هاد که مِ چِییَهوا که یَک نَمونَه از چِییَی آسِمونیه، وَ اِ کُربونِنیا پاک آبِه، ولی خودِ چِییَی آسِمونی وَ کُربونِنِی بِهتَه از اِیا پاک آبِه. 24اَسِی که مسیح اُ مکدّس ترین جا که وَ دست آدامی نَک بُدِ که نَمونَهای از مِ چِییَی حکیکیه، نِچِدِ، بلکه اُ خودِ آسِمو چِدِ تا آلَه از طرف اَما تِی حضور خدا ظاهر بِبِه. 25و اینا نِهاد که اُ خوش چند دَفَه وَ عنوان کُربونی تَکدیم بِکو، چُنِ گَپترین کاهِن که هر سال اُ تِک مکدّس ترین جا اَچِه، آنا هم خاد خونی که خون خوش نی. 26اَسِی که اَگَه اینا اَبو، مسیح از زَمون شروع دنیا، باید چند دَفَه عذاب اُشکَشِدِستاد. ولی هَموناکِه هَه، آنا یَک دَفَه اَسِی همیشَه تِی آخر دوران ظاهر بُدِ تا وَ کُربونی کِردَهِ خوش، گناها از بین بِبَه. 27هَموناکِه اَسِی آدام معین بُدِ که یَک دَفَه بِمِری، و بعد از آنا محاکمَه بِبِه، 28پَ مسیح، بعد از اِکِه یَک دَفَه کُربونی بو تا گناهِی خیلیا اُ دوش بِکَشِه، اَسِی دَفَه دوّم ظاهر اَبِه، نِه اَسِی آسِستَئِه گناه، بلکه اَسِی نجات کسِی که وَ شوک و ذوک چَش انتظارُش هِت.
Markert nå:
نامَه عِبرانِنیا 9: LAB
Marker
Del
Sammenlign
Kopier
Vil du ha høydepunktene lagret på alle enhetene dine? Registrer deg eller logg på
@ 2024 Korpu Company