نامَه اوّل یوحَنا 4
4
اُ روحیا امتحان بِکنی
1اَی عزیزیا، اُ هر روحی باور مَکنی، بلکه اُ روحیا امتحان بِکنی تا بِبِنی که از خدا هِت یا نَه. اَسِی که بُری انبیای دارُوی تِک دنیا پَخش بُدِستِت. 2اینایی روح خدائا بِشناسی: هر روحی که اُ زابو بیارِ عیسی مسیح تِی جسم انسانی اُندِ، از خدائِه. 3و هر روحی که اُندَهِ عیسی تِی جسم انسانیا اُ زابو نیارِ، از خدا نی. اِ مِ روح ’ضدّمسیحِه‘ که تُشُنُفتِ اَدا و هَمِ آلَه هم تِک دنیائِه.
4اَی بَچیا، شما از خدا هی و اُ آنایا پیروز بُدِستی، اَسِی که آناکِه تِی شمائِه از آناکِه تِک دنیائِه گاتتَئِه. 5آنایا از دنیا هِت و وَخاطر هَمِ از دنیا حرف اَزنِت، و دنیا اُ حرفیاشو گاش کَر اَکو. 6اَما از خدا هِم. هرکَه که اُ خدا اَشناسِه، اُ اَما گاش کَر اَکو؛ هرکَه هم از خدا نی، اُ اَما گاش کَر ناکو. اینایی روح حکیکت و روح گمراهیا اَشناسِم.
خدا محبتِه
7اَی عزیزیا، بِلگی اُ یَکُدو محبت بِکنِم، اَسِی که محبت از خدائِه و هرکَه محبت اَکو، از خدا اُ دنیا اُندِ و اُ خدا اَشناسِه. 8کسی که محبت ناکو، اُ خدا ناشناسِه، اَسِی که خدا محبتِه. 9محبت خدا اینا بین اَما آشکار بو، که خدا تنها پُسُش شُ دنیا فِرِستَ تا اُ واسطَهِ آنا زندگِنِ اَبَدی مُبِه. 10محبت هَمِئِه، نِه اِکِه اَما اُ خدا محبت مُکِردِ، بلکه آنا شُ اَما محبت کِه و اُ پُسُش اُشفِرِستَ تا آنا کُربونِنی بِبِه که اُ واسطَهِ آنا گناهیامو بَخشِدَ بِبِه. 11اَی عزیزیا، اَگَه خدا شُ اَما اینا محبت کِه، اَما هم باید اُ یَکُدو محبت بِکنِم. 12هِسکَه هِسوَخت اُ خدا اُشنِدِدِ؛ اَگَه اَما اُ یَکُدو محبت بِکنِم، خدا تِی اَما اَدَمانِه و محبت آنا تِی اَما کامل بُدِ.
13از اِکا اَدانِم که اَما تِی آنا آمودِستِم و آنا تِی اَما آمودِ، اَسِی که آنا از روح خوش شُ اَما دَدِ. 14اَما مُدِدِ و شهادت اَتِم که بای آسِمونی، اُ پُسُش اُشفِرِستَدِ تا نجاتدَهندَئِه دنیا بِه. 15کسی که اُ زابو دارِ عیسی پُسِ خدائِه، خدا تِی آنا آمودِ و آنا تِی خدا. 16پَ اَما محبتی که خدا اُ اَما اُشَه، مُشناسِدِ و اُ آنا ایمون مُئوردِ.
خدا محبتِه و کسی که تِک محبت آمودِ، تِی خدا آمودِ و خدا تِی آنا آمودِ. 17محبت اینا بین اَما کامل بُدِ تا اَما اَسِی رازِ داوری اطمینان مُبِه، اَسِی که اَما تِک اِ دُنیَهوا هَمونائِم که آنائِه. 18تِک محبتْ تِرس نی، بلکه محبت کامل تِرسا اُدَر اَکو؛ اَسِی که تِرس از مجازات اَدا و کسی که اَتِرسِه، تِک محبت کامل نِبُدِ.
19اَما محبت اَکنِم اَسِی که اوّل آنا شُ اَما محبت کِه. 20اَگَه کسی بِگِه: «ما خاطر خدا مَئِه» ولی نَخچ کاکَی خوش اُشنِبِه، دروغگوئِه. اَسِی که کسی که اُ کاکَی خوش، که اُشدِدِ محبت نِکو، اُشناشابِه اُ خدایی که اُشنِدِدِ، محبت بِکو. 21حُکمی که از آنا مُگِرِتِه اِئِه که، هرکَه خاطر خدا شَئِه، باید خاطر کاکَشو هم اُشبِئِه.
Markert nå:
نامَه اوّل یوحَنا 4: LAB
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
@ 2024 Korpu Company