Mʉkpanganɨa 26
26
Asɔɓɨɨ ɔkiokio Isaka
1Ayende ɔ꞉kumonio ɓata amati ɔ ɨkʉmbʉ ngɨyɛnɛnɨ. Ya꞉ɓiomʉ ayende ngɨa a꞉ɓio jɛnɛ angbinga ngɨyɔ Abalaama. Kʉdɔ, Isaka ɔ꞉ngwɨa kyɛnda anɨsa atɨ Abɨmɛlɛkɨ, ngɨa a꞉ɓio ngama ɔ Ɓafilisitina, aki anɔ Gɛlalɨ#popoko Mʉkp 12:10-20; 20:1-18. 2MAKWƆƁƗƗ ɔ꞉mʉchwɛanɨa Isaka, nɔ ɔ꞉musigio ɓɔ: «Watɨsamʉ anɔ Misili, yakamɛngana, sa ta aɨkʉmbʉ ngɨyɛ na꞉napanaka. 3Wolo-sɨ ɨkʉmbʉ tɨta ananɨ. Ɨmɨ, na꞊ɓio ta ɨhɔ nɔwɛ, nɔ, na꞊nɔkiokio kiokioni. Dɔ, na꞊nenjo sina ʉwɛ, ɨhɔ tɨa kʉ nɔ ɓanɔnɔ ɓɔsɔɔ, lɨkʉmbʉ liɓomu ngɨlananɨ. Kʉɓanɨ, na꞊kyananakɨa agɔmɛ ngɨa na꞉kɨa jɛnɛ nɔ atɔ Abalaama. 4Na꞊chiso sina ɓanɔnɔ ɓʉsɔɔ ngbanga ndʉ ndata akʉʉ ɔ ɓisi. Ne꞊njo sina ɓanɔnɔ ɓʉsɔɔ lɨkʉmbʉ ngɨlɛ kʉ liɓomu. Mababa kɔ dɔdɔ kʉ maɓomu, kɛ꞊nɨanɨa sina nɔ ʉɓʉnga akʉʉ ɔ ɓanɔnɔ ɓʉsɔɔ. 5Yaɓanɨ dɔ, Abalaama akɛ a꞉nɔka jɛnɛ ɨmɨ, nɔ, ɔ꞉pɛmakɨa agɔmɛ ngɨasɛmɨ, nɔ yaka ngɨyɛ ɨmɨ na꞉gbɛmɨa, nɔ ɨyɛ, na꞉ɨyaa, nɔ mapanʉ ngʉkɔsɛmɨ kʉtaa.»
Isaka ɔtatɔ ɓɔ Lɛbɛka angɔmʉ moi angɔ
6Kʉdɔ, Isaka ɔ꞉sa awolo ɨkʉmbʉ tɨa kʉ anɔ Gɛlalɨ. 7Ndʉ ɓombi ɓɔ ɨkʉmbʉ ɓa꞉muɓokwoko yaka akʉʉ ɔ moi angɔ, ga ɨyɔ aka ɓɔ: «Mʉsaɨ asɛmɨ ananɨ.» A꞉ɓio nɔ ʉɓá akɔsugo ɓɔ moi angɔ, dɔ, ɓombi ɓɔ ɨkʉmbʉ ɓatɨmʉwamʉ ɨyɔ akʉʉ yaka yɔ Lɛbɛka, dɔ, a꞉ɓio muɗo nɔgbɛ. 8Isaka a꞉gbalɨa akɔ ɨkʉmbʉ ngɨyɛnɛnɨ gbalɨanɨ. Ya꞉ɓio tɨa ɓisi mʉngana, Abɨmɛlɛkɨ ngɨa a꞉ɓio ngama ɔ Ɓafilisitina, ɨyɔ ta ga anono aidilisa ɓɔ, ɔ꞉tɛna tɨa Isaka ɨyananɨ akpangaka moi angɔ Lɛbɛka. 9Ga Abɨmɛlɛkɨ nɔ Isaka aka ɓɔ: «Ha gue, ambɔgɔ moi asɔɔ ɨyakɛ ɓɔ! Wa꞉sugo pɔngɔ dɔ-sɨ tanɨ ɓɔ a mʉsaɨ asɔɔ?» Ga Isaka nayɔ ɓɔ: «Na꞉sugo pɔngɔ ɓanɨ, dɔ nátɨnawomʉ ɨmɨ akɔ yaka yangɔ.» 10Ga Abɨmɛlɛkɨ nayɔ ga: «Wa꞉tɨkɨa pɛ ɓanɨ dɔtanɨ? Ɨnadɔ, mafandamɨ mʉngana ɔ꞉kwaeni pɛ nɔ moi asɔɔ, ambɔ wa꞉tɨsɨka pɛ ndʉ tɔnakɨɔ ɓʉɓɨɓɨ.» 11Kʉɓanɨ, Abɨmɛlɛkɨ ɛ꞉njo ʉpanʉ akɔ ɓandɔngɔ ɓaɓomu, akɔsʉgɔ ɓɔ: «Mombi ngɨa adʉa gue ngɨa, pɔ moi angɔ, ɓa꞊mʉwa ta nɨwa.»
12Ta nɔ igo ngɨyɛnɛnɨ, Isaka ɔ꞉hʉnaka masɔɔ akɔ ɨkʉmbʉ ngɨyɛnɛnɨ. Ɔ꞉tɔkubuoko tɨa machangbʉ mɨya mʉngana, akɔ ʉka, a꞉hʉnaka, dɔ MAKWƆƁƗƗ a꞉mukiokio kʉ ingono. 13Ikesi ngɨangɔ yɛ꞉sɨnganaka tɨta nɨsɨnganaka, kʉdɔ, a꞉pipio aɓio tɨa mombi ɔ lɨkyɛmʉ lɨja nɔgbɛ. 14A꞉ɓio nɔ likumba lɔ ɓakɔndɔlɔ, nɔ ɓamɛmɛ, nɔ ɓangɔmbɛ kʉ nɔ ɓombi ɓɔ tɛa ɓaja. Kʉdɔ, Ɓafilisitina ɓɔ꞉pʉnga nayɔ anɨnɨa imi.
Ɓafilisitina ɓawesio lɨko nɔ atɨ Isaka
15Ɓafilisitina ɓa꞉dɨkpaka, lɨkɔ ta liɓomu nɔ bɔ꞉lɨhukiso nɔ ɨtaka. Lɨkɔ ngɨlɛnɛnɨ, ɨsɛ Abalaama a꞉mbiso jɛnɛ nɔ ɓombi ɓɔ tɛa ngʉɓangɔ, ɨyɔ-sɨ ta aubei. 16Kʉdɔ, ga Abɨmɛlɛkɨ nɔ Isaka aka ɓɔ: «Ha gue-e, uhoko andɛsɔ aka tɨta nuhoko, dɔ, wa tɨa nɔ angu nesu anagaaka.»
17Kʉdɔ, Isaka ɔ꞉ngwa inani, nɔ, ɔ꞉sa awolo ɨkʉmbʉ tɨa amugbundu wɔ ihoi yɔ Gɛlalɨ. 18Isaka a꞉pʉnga ɓata kʉ anʉmbiso lɨkɔ ngɨlɛ ɨsɛ Abalaama a꞉ɓio bɔ ɔlimbiseni, ɨyɔ-sɨ kʉ aubei. Ɓafilisitina ɓa꞉lɨdɨkpaka ambise ɔ ingwo yɔ ɨsɛ Abalaama. Ɔ꞉lɨsʉa ɓata ta mano ngʉka ɨsɛ a꞉ɓio jɛnɛ ɓɔ ɔ꞉kʉsʉeni. 19Ɓombi ɓɔ tɛa ngʉɓɔ Isaka ɓɔ꞉tɔmba ɓata ɨkɔ ngayɛmɔ amugbundu, nɔ ɓɛnɨa nɔ mipo kɔta ngyepe ngyepe. 20Ɓapɛmakɨa ɓɔ ɓanama ngʉɓɔ ɨkʉmbʉ yɔ Gɛlalɨ, ɓa꞉yakana mangoi nɔ ɓapɛmakɨa ɓɔ ɓanama ngʉɓɔ Isaka, akɔsugo ɓɔ: «Ɨkɔ yeso». Ga Isaka ɓɔ: «Ɨkɔ ngɨyɛnɛnɨ, ya꞊ɓio ino ta ɓɔ ‹Mangoi›», ɨsɨ yɔngɔ ɓɔ ɓapɛmakɨa ɓɔ ɓanama ɓa꞉yakana mangoi. 21Ambise ɔngɔ, ɓapɛmakɨa ɓɔ ɓanama ngʉɓɔ Isaka ɓɔ꞉tɔmba ɓata ɨkɔ ngayɔmɔ, yɔ꞉tɔkwa ɓata kʉ ɨpʉmbʉ, kʉdɔ, Isaka a꞉ɨsʉa ino ɓɔ Sɨtɛna. 22Ndʉ ya꞉gbalɨa, Isaka ɔ꞉hoko ananɨ, ɔ꞉sa akɔnʉmba ɨkɔ ngayɔmɔ, ɨyɛ, yɔ꞉kɔkwɔ tii ɓata ɨpʉmbʉ. Kʉdɔ, ɔ꞉tɔɨsʉa ino ɓɔ: «Ʉmʉa wɔta bamu». Ga ɨyɔ aka ɓɔ: «Ɨtakɨtakɨ ngɨyɛ, MAKWƆƁƗƗ ɔ꞉tinjo ihoi tɨa injoni, nɔ tɛa ngɨyeso yɨsɨnganaka tɨa iɗo.»
23Isaka ɔ꞉ngwa ananɨ, ɔ꞉sa tɨa akɔ ɨkʉmbʉ yɔ Bɛlɨ-Sɛba. 24Kʉ naɓutu ngɨananɨ, MAKWƆƁƗƗ ɔ꞉mʉchwɛanɨa, ga ɨyɔ nayɔ ɓɔ: «Ɨmɨ, na Asɔɓɨɨ ngɨa atɔ Abalaama. Watɨkwamʉ ʉɓá, dɔ ɨmɨ, na ɨhɔ nɔwɛ. Na꞊nɔkiokio kiokioni, nɔ꞊chiso ɓanɔnɔ ɓɔsɔɔ, akɔ ino yɔ baya asɛmɨ Abalaama.»
Abɨmɛlɛkɨ ɔkio silika nɔ Isaka
25Tɨa inani, Isaka ɔ꞉tɔtuɓoko gbɔ́gbɔ ɔ mutebii akɔbibiso Asɔɓɨɨ. Ɔ꞉mɨta Asɔɓɨɨ akɔ ino yɔ MAKWƆƁƗƗ. Ɛ꞉maiso lɨhɛma ngɨlangɔ, nɔ, ɔ꞉mbiso kʉ nɔ ɨkɔ ngayɛmɔ, inani anɔ Bɛlɨ-Sɛba. 26Atɨ Abɨmɛlɛkɨ nɔ Ahujati ngɨa a꞉tɨgʉgaka ngama yaka, ɨhɔ nɔ Fɨkɔlɨ ngama ɔ ɓasʉda ngɨangɔ, ɓa꞉sa akanga Isaka, ɓɔ꞉ngweni anɔ Gɛlalɨ. 27Ga Isaka naɓɔ ɓɔ: «Nɛkɔ nɛmɨ akpata iyani dɔtanɨ, ambɨ ndɨ inu akɛ ná꞉nayaa pɔngɔ, nɔ, nɔ꞉nakponyo andɛnɔ?» 28Ɨɓɔ, ɓɔ꞉mutosio ɓɔ: «Isu, tɛnɔ ɨnanɨ ɓɔ MAKWƆƁƗƗ a ɨhɔ nɔwɛ, kʉdɔ, tɛnɔ iɗo ɓɔ, yɔkwananɔ ɓɔ, isu nɔwɛ tikio silika, nɔ, ninjono agɔmɛ. 29Kʉɓanɨ, simio gɔ ɓɔ wa꞊ngɔtɨkɨamʉ ɓʉɓɨɓɨ. Isu, ta꞉nakyananakamʉ pɛ ʉwɛ, ta꞉nasɨa pɛ ɓɔ sa yɛsɔɔ ta nɔ majɨɔ. Ɨtakɨtakɨ ngɨyɛ, MAKWƆƁƗƗ ɔ꞉nakiokio ʉwɛ, tɨa kiokioni.» 30Isaka ɔ꞉ɓʉdyisio ʉmbɔ, nɔ, ɓɔ꞉dyakanaka, nɔ, ɓɔ꞉mwakanaka. 31Nekuɓa yɔngɔ, ɓɔ꞉jʉkanaka negbandindi, ɓɔ꞉kiono silika, ɓɔ ɓakpata tɨta yaka ngɨyɛ ɓɛ꞉maiso. Isaka ɔ꞉ɓinjo kyɛnda, nɔ, ɓɔ꞉sɨana ta amati ɔ majɨɔ.
32Kʉ nɔ ɓisi ngʉɓɔnanɨ, ɓombi ɓɔ tɛa ngʉɓɔ Isaka ɓɛ꞉ka nayɔ akɔninjo masaʉ kɔ ɨkɔ ngɨyɛ ɓa꞉ɓio ɓɔ ɓɔmbeni akɔsugo ga: «Tejeyo mipo ijeyoni!» 33Kʉdɔ, Isaka a꞉sʉa ɨkɔ ngɨyɛnɛnɨ ino ɓɔ Sɛba#26:33 Sɛba: pɔ ɓɔ ɨsɨ yɔngɔ ɓɔ «Silika» nɔ Ebelenia. Yaka ngɨyɛ ɓasʉa-ɔɔ ɨkʉmbʉ ngɨyɛnɛnɨ ino ɓɔ Bɛlɨ-Sɛba#26:33 Bɛlɨ-Sɛba: pɔ ɓɔ «Ɨkɔ yɔ Silika», ya꞉kwa ɓanɨ, akɔɓɔya kʉndʉ ɓʉɓʉnʉ.
Esau ɔsɨkɔ ɓoi ɓapɨnɨ
34Ndʉ Esau a꞉ndaniso mago ɓatɛkɛɓɛ ɓɔgɨna, ɔ꞉sɨka ɓoi ɓapɨnɨ ɓuto Ɓahɨtɨ ɓɔngɔ. Ɓa꞉ɓio mano ɓɔ Yeluditi, mwana ɔ Beli nɔ Ɓasɨmatɨ, mwana ɔ Ɛlɔnɨ. 35Ɓoi ngʉɓɔnanɨ, ɓa꞉taiso Isaka, ɨɓɔ nɔ moi angɔ Lɛbɛka, taa yɔ uɓei, ta taiso.
Markert nå:
Mʉkpanganɨa 26: buuN
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc.
