रोमी 4
4
अब्राहामकी पे
1ता़ह, ओहराङगी चावा अब्राहामकी तेहन्दाला च्यि माज्ये ले? दिगी तेहन्दाला मिहरोकी ङ्याहम-लेन काह-ठि येहकें? 2का़हलेॱआङ अब्राहाम ल़ेह लाहमले टाहङबु सी़हक्यो यिहनानी खोला छ्य़ेन्दो तेन्गेन्की ग्या़ ओहङज्ये येहकें, यिहॱनाङ किन्ज्योकी दिनलानी मिहम्बा। 3च्यिबेमाना सुङरापगी दि ल़ेहमु सुङदी येहबा, “अब्राहामगी किन्ज्यो थो़ला यिह छ्य़ेसीन, ओहले खोती ओ़ह यिह-छ्य़ेकी पेहतीराङ किन्ज्योगी खोला टाहङबु सी़ह च्य़ू नाङसीन।”#उत १५:६; गला ३:६ 4ल़ेह पेहकें मिहला ले़गा तेर्के। ओ़हदी क्ये़गा तेरक्यो मिहम्बा, ओ़हदी ल़ेह पेहती ज़्योरक्योगी स़ेह यिहम्बा। 5छ्य़े दाङ छ्य़ेगी ल़ेहला मिहम्बा यिहॱनाङ फातुर च़ूक्योया़ला टाहङबु सी़ह च्य़ू नाङगेन किन्ज्यो थो़ला तेहपा पेहसीमाना किन्ज्योगी खोला तेहपा लाहमले “खो टाहङबु यिहन” म़ेदी टाहङमा क्याहप नाङज्ये येह। 6छ्य़े-ठिम माहची़बाकी मिहलाॱआङ किन्ज्योगी टाहङबु सी़ह च्य़ू नाङसीन, ओ़ह मिहगी तेहन्दाला क्याहल्बु दाऊदगी खो काहजे सोनाम-साक्पु म़ेदी सुङ नाङदी येह:
7“खुङ काहजे सोनाम-साक्पु,
खुङया़गी पेहक्यो नामे-नाजो ल़ेह चोक्पाया़ किन्ज्योगी कोहङदा नाङदी येह,
ओहले खुङया़गी तिहक्पा किन्ज्योगी उप नाङदी येह।#भज ३२:१,२
8खुङ काहजे सोनाम-साक्पु,
खुङगी पेहक्यो तिहक्पा, किन्ज्योगी टाहङजी ज़्या़ माहनाङ।”
9च्यि दि मेलाम स्या-ताक पेहक्यो मिहया़गी तेहन्दाला च्यी़राङ यिहम्बानी, स्या-ताक माहबेबाकी मिहया़गी तेहन्दालाॱआङ यिहम्बा? च्यिबेमाना छ्य़ेला प्रुहक्यो ल़ेहमु ङ्यिहगी मा सिहन्दी येह, अब्राहामगी किन्ज्योला तेहपा पेहक्यो सोङबे मिहरोगी खोला “खो मिह टाहङबु यिहन” सुङदी टाहङमा क्याहप नाङसीन। 10ता़ह “खो मिह टाहङबु यिहन” सुङदी काह-ठि जेती किन्ज्योगी खोला नाहम टाहङमा क्याहप नाङबा? खोगी स्या-ताक पेहकें म़ेदी तोहङले नि तिङले? स्या-ताक पेहकें म़ेदी तोहङलेराङ खोगी किन्ज्योला यिह छ्य़ेक्यो येहकें। 11स्या-ताककी ताक्छेन, पे यिहॱना़ तेहपा लाहमले ज़्योरक्यो टाहङदेनकी पार खोगी ओ़ह ती़हजीलाराङ ज्योर सिहन्ग्यो येहकें, ओहजेला खोती स्या-ताक माहकाहल्बा येहकें। स्या-ताक माहबेबा पेहतीॱआङ किन्ज्योला तेहपा पेहती खो मिह टाहङबु सी़ह ख़ूसीन ओहले खो मिह थाम्ज्यीदी यिहक्तेन आबा काहल्सीन। दि तेहन्दा डुप्च्यु म़ेदीराङ दि रोहवा काहल्ग्यो यिहम्बा।#उत १७:१० 12अब्राहाम स्या-ताक पेहक्यो मिहया़ती च्यी़राङ आबा मिहम्बा यिहॱनाङ अब्राहामगी स्या-ताक पेहकें म़ेदी तोहङले किन्ज्योला तेहपा पेहती काह-ठि मिहजी ताङग्यो येहकें ओ़हठीॱराङ पेहती किन्ज्योला तेहपा पेहती मिहजी ताङगे मिहया़दीॱआङ आबा यिहम्बा।
किन्ज्योकी ताहम्ज्या यिह-छ्य़े लाहमलेॱराङ ज्योर ख़ूएँ
13अब्राहामगी छ्य़े-ठिम ची़क्यो सोङबे मिहम्बा, यिहॱनाङ खोगी किन्ज्योला यिह छ्य़ेक्यो सोङबे खो टाहङबु सी़ह ख़ूसीन ओहले किन्ज्योगी खो दाङ खोगी छार्क्यीनया़ला जाम्बुलीङला ओङ ज्योर्केया़ ज़ो नाङज्ये येह सुङदी ताहम्ज्या ज़्या़ नाङसीन।#उत १७:४-६; २२:१७,१८; गला ३:२९ 14का़हलेॱआङ छ्य़े-ठिम ची़गेया़गी च्यी़राङ ओङ ज्योर्के यिहन्सीमानानी ओहराङगी किन्ज्योला तेहपा पेहक्योदीनी फेनराङ थो़ज्ये म़ेहबा येहकें ओहले किन्ज्योगी ओहराङ ङ्याम्बु ज़्या़ नाङग्योकी ताहम्ज्याॱआङ स्यिती काम्बुला थोरो डोज्ये येहकें।#गला ३:१८ 15ता़ह छ्य़े-ठिम ज़्या़ फान्ज्योनी मिहगी मी़हचीसी माना किन्ज्यो थुयाल ज़्याङ नाङगे, यिहॱनाङ छ्य़े-ठिम मे़हसीमानानी ओ़हला छ्य़े-ठिम गोम्गेन्की केच्याराङ मेहयोहङगे।
16ओ़ह सोङबे ताहम्ज्या काटीन लाहमले ओहङगे ओहले तेहपा लाहमले ज्योर्के। ओहले दि ताहम्ज्या अब्राहामकी थाम्ज्यी छार्क्यीनया़गी तेहन्दाला ठीक-ठीक ङ्या़ह-ङ्या़ह काहल सिहन्दी येह। दि ताहम्ज्या छ्य़े-ठिम ची़गे मिहया़गी तेहन्दाला च्यी़राङ मिहम्बा यिहॱनाङ अब्राहामगी ल़ेहमु तेहपा पेहकेन मिह थाम्ज्यीगी तेहन्दालाॱआङ यिहम्बा, च्यिबेमाना अब्राहाम ओहराङ थाम्ज्यीगी आबा यिहम्बा।#गला ३:७ 17छ्य़ेला दि ल़ेहमु प्री़हदी येहबा, “ङाहगी ख्येला माहङबुराङ क्यिहपाया़की आबा जे़दी येहबा।” किन्ज्योगी स्यिक्योया़ला मिहली नाङ थुप्कें ओहले येहॱराङ म़ेहबाकी से़हया़ला का नाङदी छ्या़ च्य़ू नाङ थुप्के म़ेदी यिह छ्य़ेक्यो सोङबे मिहरोगी अब्राहाम ङ्याम्बु दि ताहम्ज्या ज़्या़ नाङग्यो येहकें।#उत १७:५ 18किन्ज्योगी अब्राहामला “ख्येती छार्क्यीनया़ नामगी कार्माजेबा माहङबु डोज्ये येह!” म़ेदी सुङ नाङग्यो येहकें। ओहजेला खोती रेहवा च्यिॱआङ म़ेहबा येहकें यिहॱनाङ खोगी रेहवा पेहती यिह छ्य़ेसीन, ओहले खो क्यिहपा माहङबुराङगी आबा काहल्सीन।#उत १५:५ 19अब्राहामगी कोहङ-लोह क्याह च्यी़ लेप्च्ये पेहती येहकें, खो ज्यिबुराङ केहपु काहल सिहन्दी येहकें ओहले खोगी पी़हमी साराॱआङ आब्दाली येहकें यिहॱनाङ अब्राहामकी तेहपा मा-फाम्बु काहल्दी म़ेहबा येहकें।#उत १७:१७ 20किन्ज्योगी ज़्या़ नाङग्यो ताहम्ज्याकी तेहन्दाला खोगी सेमङेन माहच्याङ, यिहॱनाङ खो यिह-छ्य़ेला तोहरोङ स्युक छ्यिम्बु पेहती किन्ज्योला त़ेरा तेच्या फुल्सीन। 21च्यिबेमाना किन्ज्योगी ज़्या़ नाङग्यो ताहम्ज्या मिहरोगी जे नाङ थुप्कें माएँ ताम खोला या़हबु पेहती क्यी़ह येहकें। 22ओ़ह यिह-छ्य़ेगी पेहतीराङ खो किन्ज्योगी दिनला टाहङबु सी़ह ख़ूसीन। 23दि किन्ज्योगी दिनला टाहङबु सी़हगेन्गी केच्या खोगी तेहन्दाला च्यी़राङ प्रुहक्यो मिहम्बा, 24यिहॱनाङ दि ओहराङगी तेहन्दालाॱआङ यिहम्बा। ओहले ओहराङ सु सुगी ओहराङ चो़वो येशूला टोहङग्यो ग्या़लेगी सोम्बो ज़्याङ च्य़ू नाङगे किन्ज्यो थो़ला यिह छ्य़ेगे खुङॱआङ किन्ज्योगी दिनला टाहङबु सी़हज्ये येह। 25येशू ओहराङगी तिहक्पाकी तेहन्दाला टोहङ नाङसीन, ओहले ओहराङला टाहङबु सी़ह च्य़ू नाङज्येला किन्ज्योगी मिहरोला सोम्बो ज़्याङ च्य़ू नाङसीन।#यशै ५३:४,५
Markert nå:
रोमी 4: HYLM
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2023 (Active), Wycliffe Bible Translators, Inc. All rights reserved.
