रोमी 3
3
किन्ज्यो यिह-छ्य़ेबु ज़्य़ू नाङदी येह
1आहन्डा यिहन्सीमानानी ता़ह यहूदी काहल्दीॱआङ च्यि खेप्साङ काहल्बा ले? च्यि स्या-ताक पेहती च्यिरा ख्येप्साङ ओहङगे ले? 2ख्येप्साङनी दिला माहङबुराङ ख्येप्साङ येहबा। थाम्ज्यी म़ेदी तोहङलेनी किन्ज्योगी यहूदीया़ला राहङगी नाम्पार-ताहक्पा सुङ चि क्याहप नाङसीन। 3खुङया़ नाहङला लाहला मिहया़ यिह-छ्य़ेबु मे़हना च्यि काहल्बा ले? खुङ यिह-छ्य़ेबु म़ेह म़ेदी च्यि किन्ज्योॱआङ यिह-छ्य़ेबु म़ेहबा ओहङगे ले? 4ओ़हठी माहयोहङज्यु, मिह थाम्ज्यीगी स्योप क्याहपॱनाङ किन्ज्योगी नाहमॱआङ स्योप क्याहप मेहनाङगे। छ्य़ेला दि ल़ेहमु प्री़हदी येहबा,
“राहङगी सुङ नाङग्योकी स्याहलला राहङ ठाबे दु म़ेदी मिहया़गी थोङज्ये येह
ओहले ठिम ताङ नाङगेन ङ्यिहमाला राहङगीराङ क्याहल नाङज्ये येह।”#भज ५१:४
5यिहॱनाङ ओहराङगी पेहक्यो ल़ेह चोक्पाया़गी किन्ज्योला तोहरोङ टाहङबु यिहन म़ेदी तेन्गे मासीमाना ता़ह ङ्यिहगी च्यि माज्ये ले? च्यि किन्ज्योकी थुयाल ओहराङ थो़ला बाप्केमु मिहरोगी आन्या जे नाङगे ले? (लाहला मिहया़गी दि ल़ेहमुराङ साम्लु ताङगे।) 6ओ़ह ल़ेहमु मिहम्बा! ओ़हठी यिहन्सीमानानी, किन्ज्योगी जाम्बुलीङला काह-ठि जेती ठिम ताङ नाङ ख़ूज्ये ले? 7का़हलेॱआङ ङाहगी स्योप क्याहप्क्यो सोङबे किन्ज्योकी तेहन्दाम मिहरोकी ज़िज्यिदगी तेहन्दालाराङ बोल्बु ओहङगे यिहॱना़, च्यिबे ङाहला तिहक्च्येम्बा यिहन म़ेदी फातुर चु-नाङगे? 8ओ़हठी यिहन्सीमाना, या़हबु ओहङज्यु म़ेदी ल़ेह चोक्पाराङ च्यिबे मेहबेच्ये ले? लाहला मिहया़गी ङ्यिहगी ओ़हठीॱराङ माएँ म़ेदी ङ्यिहला ताम च्येहती फातुर च़ूएँ। दि ल़ेहमु फातुर च़ूएँ मिहला ओ़हला ते़बेगी ङ्य़ेहबा फो़ज्ये येह।
मिह टाहङबु सुॱआङ म़ेह
9ओ़हठी यिहन्सीमाना च्यि ओहराङ यहूदीया़ लेहमेन क्यिहपाया़ म़ेदी या़हबु यिहम्बा ले? मिहम्बा, ओ़ह ल़ेहमु यिहनॱराङ मिहन। यहूदी दाङ लेहमेन क्यिहपाया़ॱआङ तिहक्पाकी ओङ चो़ला येह म़ेदी ङाहगी फातुर च़ू सिहन्दी येह। 10छ्य़ेला दि ल़ेहमु प्री़हदी येहबा, “मिह टाहङबु सुॱआङ म़ेह,
मेहन्दा च्यी़ॱआङ म़ेह,#भज १४:१-३; ५३:१-३
11ङोह स्य़ेगे सुॱआङ म़ेह,
किन्ज्योला छोल्गे सुज्यीॱआङ म़ेह।
12खुङ थाम्ज्यी किन्ज्यो ङो़ले तेहपा लो़हदी येह
खुङ थाम्ज्यी फेनराङ मे़हथोएँ काहल्दी येह।
सुज्यीगीॱआङ ल़ेह या़हबु मेहबेकें, ल़ेह या़हबु पेहकेन्दी मेहन्दा च्यी़ॱआङ म़ेह।”
13“खुङया़की टिहगा खा फे़ ज़्या़क्योकी तुहर्सा यिहम्बा,
खुङ च्येलेगी स्योप क्याहप्ती ताम माएँ।”
“प्रुहलकी तू़ह खुङया़गी खाला येहबा।”#भज ५:९; भज १४०:३
14“खुङया़गी खा मे़मु दाङ खाक्ती तामया़गी काहङदी येह।”#भज १०:७
15“खुङया़गी काङबा मिह सेकेन्गी ल़ेहला ग्यो़बा येहबा।#यशै ५९:७,८
16खुङ का़हला डोॱनाङ छ्या़मे-स्यी़हमे ताङगे ओहले ङ्ये़ली तेन्गे दाङ तुहक्पु-तुहङाल टाम्गे,
17ओहले खुङया़गी स्य़िहदेकी लाहम ङोह स्य़ेदी म़ेह।”
18“ओहले खुङ मी़ला किन्ज्योकी ज्यिक्पा म़ेह।”#भज ३६:१
19छ्य़े-ठिमकी स्याहल छ्य़े-ठिमकी ओङ चो़ला येहकेन मिहया़ला माक्यो यिहम्बा म़ेदी ओहराङला क्यी़ह येह। ओ़ह सोङबे मिह थाम्ज्यीगी खाला खाज्यु क्याहप्च्ये येह ओहले लुहङबा किनगी मिहया़गी राहङगी पेहक्यो ल़ेहगी तेहन्दाला किन्ज्योला चिदुङ तेर कोहच्ये येह। 20ओ़ह सोङबे छ्य़े-ठिमला ची़दी सुज्यीॱआङ किन्ज्योगी दिनला टाहङबु सी़ह मी़हखुएँ, च्यिबेमाना छ्य़े-ठिमगीनी मिहगी पेहक्योगी तिहक्पाला ङोह स्य़े च्यी़राङ च्य़ूगे।#भज १४३:२; गला २:१६
तेहपा लाहमले मिह टाहङबु सी़ह ख़ूएँ
21यिहॱनाङ ता़ह छ्य़े-ठिम म़ेहबा पेहतीॱआङ किन्ज्योगी मिहला टाहङबु सी़ह च्य़ू थुप्के म़ेदी मिहरोगी तेन नाङदी येह। दि केच्या छ्य़े-ठिम दाङ लुहङतेम्बाया़गी स्येती येह। 22दि ल़ेहमु पेहती येशू मास्यीकाला तेहपागी मिह थाम्ज्यीला किन्ज्योगी टाहङबु सी़ह च्य़ू नाङगे च्यिबेमाना किन्ज्योगी सुलाॱआङ ङ्येम्बा-ङ्य़ेहरी जे मेहनाङगे,#गला २:१६ 23च्यिबेमाना मिह थाम्ज्यीगी तिहक्पा पेहती येह, ओहले किन्ज्योकी ज़िज्यिद यिहन्ज्यु था़-रिहङबु काहल्दी येह। 24यिहॱनाङ किन्ज्योकी काटीनकी काबापगी पेहती मास्यीका येशू ङ्याम्बु येहकेन्गी थार्पा लाहमले खुङया़ आहन्डाराङ टाहङबु सी़ह ख़ूसीन। 25च्यिबेमाना किन्ज्योगी, तिहक्पा कोहङदा तेर्केन्की मार्च्ये फुल्ज्येला मास्यीकाला ताङ नाङसीन। ओ़ह सोङबे येशूगी राहङगी कु-ठा़ ओहराङगी तेहन्दाला स्याहल च्य़ू नाङसीन म़ेदी यिह छ्य़ेगे मिह थाम्ज्यीगी तिहक्पाकी कोहङदा ज्योर्च्ये येह। दि छ्या़ले किन्ज्योगी राहङगी टाहङदेन तेन्ज्येला जे नाङसीन च्यिबेमाना मास्यीका फेप नाङगे म़ेदी तोहङले किन्ज्योगी राहङगी थुयाल ना़दी ज़्य़ू नाङदी येहकें ओहले तोहङले मिहया़गी पेहक्यो तिहक्पाया़ला नाङदा जे माहनाङ। 26किन्ज्यो राहङ टाहङबु ज़्य़ू नाङदी येह ओहले येशू थो़ला तेहपा पेहकेया़ला मिहरोगी टाहङबु सी़ह च्य़ू नाङज्ये येह माएँ तामकी दास्यी तेर्च्येला मिहरोगी ताहन्दागी ती़हजीला दि छ्या़ले जे नाङसीन।
27ओ़हठी यिहन्सीमाना ता़ह ओहराङ च्यिगी तेहन्दाला छ्य़ेन्दो तेन्गे? च्यि तामॱलाङ मिहन! च्यि ओहराङगी छ्य़े-ठिम ची़क्यो सोङबे? मिहम्बा, यिहॱनाङ यिह छ्य़ेक्यो सोङबे च्यी़राङ। 28ओ़ह सोङबे छ्य़े-ठिम ची़दी मिहम्बा, यिहॱनाङ मास्यीकाला तेहपा पेहती च्यी़राङ किन्ज्योकी दिनला टाहङबु सी़ह ख़ूएँ। 29च्यि किन्ज्यो यहूदीया़दी च्यी़राङ किन्ज्यो यिहम्बा ले? च्यि किन्ज्यो लेहमेन क्यिहपाकी मिहया़दीती किन्ज्यो मिहम्बा ले? मिहरो लेहमेन क्यिहपागी मिहया़दीॱआङ किन्ज्यो यिहम्बा। 30च्यिबेमाना किन्ज्योनी च्यिमे च्यी़राङ ज़्य़ू नाङदी येहबा। मिहरोगी यहूदीया़ला खुङया़गी तेहपा लाहमले टाहङबु सी़ह च्य़ू नाङगे ओहले लेहमेन क्यिहपाकी मिहया़लाॱआङ खुङया़गी तेहपा लाहमलेॱराङ टाहङबु सी़ह च्य़ू नाङगे।#व्य ६:४; गला ३:२० 31ता़ह च्यि ओहराङ दि यिह-छ्य़े लाहमलेॱराङ छ्य़े-ठिम गोम्ज्ये ले? मिहम्बा, ओ़ह ल़ेहमु मिहन! तोहरोङ ओहराङगीनी छ्य़े-ठिम तोहङमा काहन्डुमु येहबा ओ़हठीॱराङ ज़्या़गे मिहया़ गा यिहम्बा।
Markert nå:
रोमी 3: HYLM
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2023 (Active), Wycliffe Bible Translators, Inc. All rights reserved.
