เลห 11
11
ลอง ฆอน ฆีณ ยัม
1เฌาพรา วี ต็อห ดี อาโมวแซ, “อึณ ดี มึห ดูก ตาง ปอ อู โมยว ปี ดี ตึย โอว, แตห คูนดีคัม พาโรว บอ มืง แอฆึบ โลว คัม. วาย อัน ตี คูนดีคัม พาโรว ดี ควาง เบ, แตห เบ ฮาว. แดง ตี, อัน ดี ซูต เบ เลห อู เฌณ, ตู แตห เบ วี ตัห ดอ เหมา. 2แม โลว จัร เฆ ดูอี อีซาเรลัะ บอ เฆ อีมาย อีบึณ, แตห เฆ หมาณ ดี ดูอี แอฆึบ ดัว รึอน เฆ ครีว, แตห อึณ แบน คอซอง ปี ดัว เฆ ดี เบ.” 3ดอ หมาณ เฆ ปาย ตี เฌาพรา ดี แตห เฆ ดูอี แอฆึบ มึห น็อห ดีฮาง ดี ดูอี อีซาเรลัะ. เฆ อามู อามาด คูนดีคัม บอ เฆ ดูอี กืน, เฆ โรวเซ อาโมวแซ ตึอน. เฆ ต็อห, อัน มูห ดา ตาง. เฌาพรา มืร แตห เฆ ดูอี แอฆึบ มึห น็อห ซี จอย เฆ ดูอี อีซาเรลัะ.
4ปัน ตี อาโมวแซ วี ต็อห ดี คูนดีคัม, “เฌาพรา แฮะ ต็อห, ‘แคง หมึร นี กาแต ซึอม โอว ดี ฮาว ลึบ ดอน กาง แคง มืง แอฆึบ นี. 5แคง มืง แอฆึบ บอ มืง, แคะ มึห ฆอน ฆีณ, เซ อึณ มูห ฆอน อีมาย, โอว ดี ง็อห ยัม ดอน วี. โอว ดี กาจูห ดี ง็อห ฆอน คูนดีคัม อี กอย ดี มาลาง ฆูณ อัน. แฮะ ฮอต, โอว ดี ง็อห ฮาว แตห กอ ฌัม ฆอน หมาย อี กรีด เคาคยูง คูนดีคัม. โอว ดี ง็อห แวน เฆ บอกาเฆลียด. บอ ฆอน ฆีณ เฆ โดว ซัดดาวา, เฆ ดี ยัม โตต. 6เฆ ดูอี แคง มืง แอฆึบ บอ มืง, เฆ ดี ยาม ตาง, ยาม เหลณ ลอง อัน ตี. อู ซีณ ดอ โฆว อัน กอ ฌัม อาตึร, เฆ ตู ดึอม ยาม ตาง แคะ ตี. บอ นา อาต ฮาว เฆ ตู วี โลว ยาม ตาง ปี แคง หมึร นี. 7โดง กอย เฆ ดูอี อีซาเรลัะ ยี เยน ดาคึย. บอ เฆ ดูอี บอ เฆ โดว ซัดดาวา ตู โยว มาเซ. มาโซว อู โดว มืร ตู โปรห. ปาย ตี แม คูนดีคัม, แม ดี บอ นับ ลอง เฌาพรา. อัน นับ ดี กาย็อห เฆ ดูอี อีซาเรลัะ บอ เฆ ดูอี แอฆึบ, ตู แตห เฆ กาดูห ดูก อู โมยว. 8เฆ อามู อามาด แม ตึอน, เฆ บอกาเฆลียด ดี ตัห ฌัม โดง กอย โอว. เฆ ดี โฆม ฆึบ ดี อาต โอว. เฆ ดี หมาณ ดี โอว ต็อห, “แตห เบ เลห ฮาว, บอ แม บอ เฆ ดอน อี, อี โดบ แม.” ดอ อัน ตี โอว ดี เลห ฮาว โดง กอย แม.’” อาโมวแซ แฮะ ฮอต กาลาง ปาย ตี อัน วี เลห โดง กอย คูนดีคัม พาโรว. น็อห อัน บอ รู กาเซา ดี คูนดีคัม.
9คา อาต เฌาพรา แฮะ ดึอม กาลาง ดี อาโมวแซ. อัน แฮะ ต็อห, “คูนดีคัม พาโรว ตู โทม โฆรห แม. ปาย ตี โอว ดี ปึอน บยัะ นา หมึอม อาม กาเซา แบน โมยว แบน โมยว หลึอม คา อาต แคง มืง แอฆึบ.” 10โคว อัน ตี อาโมวแซ ฆาย อาโรน แฮะ โบง นา หมึอม อาม กาเซา แบน โมยว แบน โมยว ดี อาต คูนดีคัม พาโรว. เฌาพรา ยี แตห น็อห คูนดีคัม พาโรว ตู บยอง, ตู โบง ปี จัร อัน. อัน ตู แตห ดูอี อีซาเรลัะ เลห ฮาว แคง มืง อัน.
Markert nå:
เลห 11: pce
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translator, Inc. All rights reserved.
