मरकुस 2
2
अधरंगी रोगी ठीक केया
(मत्ती 9:1-8; लूका 5:17-26)
1कुछ धियाड़िया बाद, जेख्णी यीशु फिरी कफरनहूम नगरा वापस या, ता मैहणुवें ऐ खबर इकदम फैलाय दित्ती कि यीशु घरै यौउरा। 2फिरी ऐत्थरै मैहणु किट्ठै भौ ग्यै कि दुवारा किना भेईर बि जगा ना थी; जां सै तेन्हांनि परमेश्वरैरा वचन प्रचार काता थ्या। 3जेख्णी यीशु परमेश्वरैरा वचन प्रचार काता थ्या तैस टैंमा कुछ मैहणु एकि अधरंगेरै बिमार मैहणु मन्जै पनि चोउवा मैहणुवां किना चुका करि तैस किनि लै यै। 4पण जेख्णी भीड़िरी वजहि ला सै यीशु किनि नीड़ न पुजै, ता तैन्हैं सैकेई छत जैस हैट सैक्यै बेठोरै थ्यै, सै पुटि करि, जैस हैट यीशु बेठौरा थ्या; जां जेख्णी तैस पुटि बेठै, ता तैन्हैं सै मन्जा जैत पन सै अधरंगी थ्या, थल्लै यीशु किनि उतारी दिता। 5जेख्णी यीशु तेन्हैरा विश्वास तका, कि सै तैस पन विश्वास कातै, तैस अधरंगेरै बिमार मैहणुनी बौलु, “पुत्र, मीं तिंडै पाप माफ कियै।”
6तेख्णी कुछ यहूदी शास्त्री जै तैस घरा मझ बेठोरै थ्यै, अपड़ै-अपड़ै मंना मझ विचार कांना लगै, जै किछ यीशु बौलु तेसेरै बारै मझ अपड़ै मंना मझ सौचणा लगै। 7ऐस मैहणु ऐहीं ना चेहिंथु बोलणु? ऐ ता परमेश्वरेरी निंदा काता, परमेश्वरा छडि करि हौरा कौ पाप माफ ना करि सकता? 8यीशु झटपट बुझि ग्या कि सै अपड़ै-अपड़ै मंना मझ ऐतिया विचार कातै अत्तै, जां तेनी बौलु; “तुहां ऐहीं ना सौचणु चेहिंथु।” 9यीशु यहूदिया शास्त्रिया सिंउ बौलु कि अधरंगेरै बिमार मैहणुनी ऐक्यु बोलणु मुश्किल ना कि तिंडै पाप माफ भौ ग्यै, केईनी कि कौ ऐस साबित ना करि सकता। पण कौ तेसनी ऐ ना बोलि सकता कि उठ अपड़ा मंजा उछू जां चलणा फिरना लग अगर सच मझ तैस किनि ठीक कांनेरी शक्ति ना। 10पण ऐठणीरै तेईनी आंउ चांहथा कि तुहां ऐ पता लगी गहिया कि मूं मतलब मैहणुरै पुत्रा धरती पनि पाप माफ कानेंरा बि हक आ। यीशु तैस अधरंगी मैहणु सेईतै बौलु, 11आंउ तांउ सेईतै बोलता, उठ अपड़ा मंजा चुक जां अपड़ै घरेनी गा। 12सै उठा जां झटपट अपड़ा मंजा चुक्का जां सभनियांं मैहणुवां केरै सांमणै घरा किना चलि ग्या; तेत पन सारै मैहणु जै तैस तकांतै थ्यै हैरान भौ ग्यै, जां सै सारै ऐ बोलि करि परमेश्वरेरी बडियेई कांना लगै, कि “असै ऐतियु कदि ना तकाउ।”
लेवीरू शदायूंणु
(मत्ती 9:9-13; लूका 5:27-32)
13यीशु अक बारी फिरी कफरनहूम नगरा किना गलील झीलिरै किनारै ग्या। बड़ै सारै मैहणु तैस किनि यै, जां सै तेन्हांनि परमेश्वरैरा सन्देश शुणांणा लगा। 14जेख्णी यीशु गांहथा थ्या, फिरी तेनी हलफईरा पुत्र लेवी चुंगी लींणै वा मैहणु चौका पन बेठौरा लधा, “जां तेनी तेसनी बौलु, मूं पिचालीं आ जां मिंडा चैला बंण, ऐठणीरै तेईनी सै उठा जां तैस पिचालीं चलि पिया।” 15अक धियाड़ि बाद यीशु जां तेसेरै चैलै लेविरै घरै रात रोटी खांतै थ्यै। बड़ै सारै चुंगी लींणै बाऐ जां जैन्हां मैहणु पापी मनींथ्यै तैन्हांं सेईतै रोटी खांणा बेठा; केईनी कि सै बड़ै सारै थ्यै, जां यीशु पिचालीं हर अक जगाय गहींथ्यै। 16कुछ यहूदी शास्त्रियै जै फरीसी बि थ्यै, ऐ तका कि ऐक्या ता चुंगी लींणारा जां पापिया सेईतै रोटी आ खांता, ऐठणीरै तेईनी तैन्हैं तेसेरै चैला सेईतै बौलु, “तुवे चुंगी लींणारा जां पापिया मैहणुवां सेईतै केईनी खांतै पींतै?” 17यीशु ऐ शुणि करि तैन्हांं सेईतै बौलु, बिमार मैहणुवां डोक्टरेरी जरूरत आ, पण जै ठीक अत्तै तैन्हांं डोक्टरेरी जरूरत नाँ भूंती, आंउ तैन्हांं मैहणुवां शदाणनि ना यौउरा जै अपड़ै आपनि धर्मी समझतै, आंउ तैन्हांं मैहणुवां बचाणनि आ यौउरा जै अपड़ै आपनि पापी मनतै।
उपवासैरा स्वाल
(मत्ती 9:14-17; लूका 5:33-39)
18यूहन्नेरै चैलै जां फरीसी उपवास करींथ्यै। ऐठणीरै तेईनी कुछ मैहणुवें ऐईछी करि यीशु किना पुच्छु, यूहनैरै चैलै, जां फरीसिया केरै चैलै भ्रुख्णु पैटै उपवास रखतै, पर तिंडै चैलै भ्रुख्णु पैटै उपवास किना रखतै? 19यीशु तैन्हांं सेईतै बौलु, जां तेईनी आंउ अपड़ा चैला सेईतै आ, सै उपवास किही करि सकतै? सै ना करि सकतै, केईनी कि सै खुश अत्तै, ठीक तिहीं, जिहीं एकि लाड़ैरै मित्र तैस सेईतै तेसेरै ब्याहेरी खुशी मनातै। 20पण सै धियाड़ि ऐईंणी जेख्णी लाड़ा तैन्हांं किना अलग भूंणा, तैस टैंमा तैन्हांं भ्रुख्णु पैटै बेश्णु। 21मैहणु अपड़ै पुरांणै कपडै़नि नवें कपडै़री टलि ना लांतै; ना ता जेख्णी सै धूंणु ता नऊं लिकड़ ढुकि गांहणु जां पुरांणु लिकड़ जादु फटि गांहणु। 22नवें अंगूरेरा रस पुराणियां चमड़ेरिया थेईलिया मझ कौ ना रखता, न ता अंगूरेरै रसै ला सै फटि गांहणी, जां अंगूरा केरा रस जां चमड़ेरी थेईली दोईयो खत्म भौ गांहणी; पण नवाँ अंगूरेरा रस नवीं चमड़ेरिया थेईलिया मझ भरियूंता।
सब्तैरा प्रभु
(मत्ती 12:1-8; लूका 6:1-5)
23ऐतियु भूं कि यीशु जां तेसेरै चैलै आरामेरी धियाड़ी किणकेरी पटिरी बत्तै गांहथै थ्यै, जां तेसेरै चैलै चलतै-चलतै किणकेरै दांणै कढि करि खांणा लगै। 24तां फरीसियै यीशु सेईतै बौलु, “तका; आरामेरी धियाड़ी ऐतिया कम केईनी अत्तै कातै जै मूसेरी व्यवस्थाईरै अनुसार ठीक ना?” 25यीशु तैन्हांं सेईतै बौलु, “क्या तुहैं पवित्र शास्त्रा मझ ऐ कदि ना पढ़ोरू कि जेख्णी असेड़ै महान पूर्वजा दाऊदनि जरूरत पैयि, जां जेख्णी तैस जां तेसेरै साउगिया भ्रुख लगी ता तेनी कितु केईथ्यु? 26तेनी किही अबियातार महायाजकेरै टैमां परमेश्वरेरै घरा मझ गहि करि भैंट चाढ़ोरी रोटी खयि, जेसैरा खांणैरा हक याजका छडि करि होरनियां कोसनि बि ना थ्या, तेनी अपड़ै साउगियनी बि दित्ती।” 27तां यीशु तेन्हांनि बौलु, “परमेश्वरेरी आरामेरी धियाड़ि मैहणुवां केरै तेईनी बंणाउरी आ, ना कि मैहणु आरामेरी धियाड़िया केरै तेईनी बणाउरै अत्तै।” 28ऐठणीरै तेईनी आंउ मतलब मैहणुरा पुत्र आरामेरी धियाड़िरा बि सुवांमि आ।
Markert nå:
मरकुस 2: CDJNT
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
